Рух «Сужэнскія сустрэчы» запрашае сужонкаў, духоўных і кансэкраваных асоб з усёй Беларусі на рэкалекцыі, якія адбудуцца з 18 па 20 кастрычніка. Яны пройдуць у цэнтры Caritas у Ляскоўцы каля Бараўлянаў, што пад Мінскам.
Унікальная аўтарская праграма рэкалекцый ужо амаль 20 гадоў дапамагае сем’ям з Беларусі:
- выходзіць са шматлікіх крызісаў сужэнскага жыцця,
- абнаўляць свае пачуцці,
- аднаўляць сваю любоў,
- адчуваць радасць ад быцця разам,
- паглыбляць узаемаразуменне і давер,
- развіваць, падтрымліваць і клапаціцца пра свае адносіны ў звычайнай штодзённасці,
- знаходзіць кірункі ўзаемнага росту, каб перажываць большую блізкасць, еднасць, цеплыню.
Сужонкі перажываюць рэкалекцыі у дыялогу паміж мужам і жонкай, а духавенства і кансэкраваныя асобы — у дыялогу з Богам.
Арганізатары адзначаюць, што сучасны лад жыцця, напоўнены пастаяннай мітуснёй і стрэсам, вельмі часта перашкаджае нам знаходзіць час для фармавання, ўмацавання і развіцця нашых сужэнскіх адносін. Занятасць працай, абавязкамі, дзецьмі і іншымі штодзённымі клопатамі вельмі часта выцясняюць моманты блізкасці, зносін і ўзаемаразумення паміж сужонкамі. Мы перастаем заўважаць патрэбы і пачуцці блізкага чалавека, губляем кантакт, пачынаем жыць у паралельных светах пад адным дахам.
«Сужэнскія Сустрэчы» прапануюць вырвацца са шматлікіх клопатаў штодзённасці, перажыць рэкалекцыі і паглядзець адно на аднаго і на ўзаемныя адносіны праз прызму дыялогу па канкрэтных правілах і ўжо падчас рэкалекцый атрымаць рэальны працоўны інструмент, які дапаможа будаваць, рамантаваць сужэнскія адносіны ў звычайным штодзённым жыцці. Удзельнікі змогуць і надалей самастойна выкарыстоўваць яго ў сваёй штодзённасці, каб будаваць не толькі адносіны паміж сабою, але і з дзецьмі, роднымі, калегамі па працы і іншымі людзьмі.
Каму найбольш адпавядае праграма рэкалекцый?
- Сем’ям, якія перажываюць крызіс у розных сферах свайго сужэнскага жыцця, якія, магчыма, сёння нават не вераць у тое, што ёсць выйсце.
- Сем’ям, якія маюць трывалыя добрыя адносіны, але разумеюць, што пра адносіны вельмі важна ўвесь час клапаціцца. Ад гэтага клопату залежыць развіццё і ўмацаванне адносін.
- Сем’ям, якія толькі пачалі свой шлях і жадаюць закласці трывалы падмурак, на якім можна будаваць і развіваць свае маладыя адносіны.
- Духоўным і кансэкраваным асобам, якія хочуць развіваць свой дыялог і свае адносіны з Богам і іншымі людзьмі
Вось некалькі сведчанняў ад удзельнікаў рэкалекцый:
Мы зразумелі, што наша сям’я — гэта куфар з самымі каштоўнымі скарбамі ў свеце. Рэкалецыі «прымусілі» нас адкрыць яго і заўважыць адно аднаго.
Мы жанатыя ўжо больш за 30 гадоў. Я бачу, што з цягам часу мы нешта страцілі. Мы пачалі праводзіць вольны час па-іншаму. Неяк асобна, хоць мы да гэтага часу жывем разам. Добра бачу, што наперадзе мяне чакае шмат працы, якая зноў аб’яднае нас. Але сёння я ведаю, што мне для гэтага рабіць, у якім напрамку ісці насустрач жонцы. І тое, што мы ў адносінах перажылі за гэтыя тры дні, мы не перажывалі за дзясяткі гадоў нашага сужэнскага жыцця. Шчыра дзякуем за гэтыя крокі да нашай еднасці
Я псіхолаг. Я спрабавала розныя рэчы для нашага сужэнства: тэорыі, тэрапію. Але я бачыла, што ўсё роўна нам чагосьці важнага неставала. Тут мы па-іншаму паглядзелі на свае праблемы; нашыя адносіны як быццам ажылі, сталі аб’ёмнымі, важнымі; з’явіліся канкрэтныя «дарожныя ўказальнікі». Забіраем дыялог ў сваю штодзённасць.
Падчас рэкалекцый мы змаглі вярнуцца да шчырых размоў і вучыліся слухаць адзін аднаго з дапамогай правіл дыялогу. Наперадзе яшчэ шмат працы над нашымі адносінамі, але цяпер у нас ёсць надзея і інструменты для таго, каб гэта ажыццявіць.
Арганізацыйная інфармацыя
- Пачатак рэкалекцый у пятніцу 18 кастрычніка ў 18.00.
- Заканчэнне рэкалекцый у нядзелю 20 кастрычніка каля 15.00.
- У рэкалекцыях абавязковы ўдзел абодвух сужонкаў, без дзяцей і ва ўсёй праграме.
- Запрашаюцца ўсе, хто гатовы працаваць над сваімі сужэнскімі адносінамі, незалежна ад узросту, канфесійнай прыналежнасці і рэлігійнай актыўнасці: і тыя, хто толькі распісаліся ў ЗАГСе, і тыя, хто жыве ў касцёльным шлюбе.
- Адрас: Мінскі р-н,в. Ляскоўка, вул. Карытас, 1 (каля Бараўлянаў).
- Запіс па тэлефоне: +375 (29) 652 11 44
Нашыя сем’і нарадзіліся для таго, каб быць шчаслівымі. Запрашаем выкарыстаць гэтую магчымасць!
Сем’і, якія ўдзельнічалі ў рэкалекцыях «Сужэнскіх сустрэч», дзеляцца сваімі сведчаннямі:
- «Тое, што адбылося з намі на рэкалекцыях, можна назваць цудам». Радасці і цяжкасці сямейнага жыцця Марыны і Юрыя Дваранiновiчаў
- «Ветэраны» «Сужэнскіх сустрэч» — пра свой шлях да асэнсаванасці ў сямейных адносінах
- «Дагэтуль узгадваю цеплыню, рамантыку і прыгажосць тых дзён». Як уік-энд «Сужэнскіх сустрэч» змяніў сямейнае жыццё Аляксандра і Ганны Гелагаевых
- Ад вечароў для закаханых да сужэнскіх сустрэч. Адзін год з жыцця маладажонаў Марты і Паўла
- «Наша знаёмства адбылося ў інтэрнэце». Радасці і цяжкасці сямейнага жыцця Гелі і Вовы Белаусаў
- Дыялогі Олі і Сашы: адчуванне каштоўнасці нашага «разам»
- Радасці і цяжкасці сямейнага жыцця: «Крошкі» для сужэнскіх адносін на кожны дзень — рэцэпт ад сям’і Панамаровых
- «Я ехала на ўік-энд, не ведаючы, што там будзе». Гісторыя сям’і Яўгена і Вольгі Хілько
- Радасці і цяжкасці сямейнага жыцця: «Бог пакрыху, маленькімі крокамі прыходзіў у нашае жыццё»
- Радасці і цяжкасці сямейнага жыцця. Гісторыя сям’і Ганны і Юрыя Лугаўцовых
- Радасці і цяжкасці сямейнага жыцця. Гісторыі ўдзельнікаў «Сужэнскіх сустрэч»
