Рух «Сужэнскія сустрэчы» запрашае сужонкаў, духоўных і кансэкраваных асоб з усёй Беларусі на рэкалекцыі, якія адбудуцца з 13 па 15 кастрычніка. Яны пройдуць у цэнтры Caritas у Ляскоўцы каля Бараўлянаў, што пад Мінскам.
Унікальная аўтарская праграма рэкалекцый ужо амаль 20 гадоў дапамагае сужонкам з Беларусі не толькі выходзіць са шматлікіх крызісаў сужэнскага жыцця, паглыбляць свае адносіны, абнаўляць пачуцці, рабіць пэўныя крокі насустрач адно аднаму, насустрач сваім дзецям, блізкім і іншым людзям.
Сужонкі перажываюць рэкалекцыі у дыялогу паміж мужам і жонкай, а духавенства і кансэкраваныя асобы — у дыялогу з Богам.
Каму найбольш адпавядае праграма рэкалекцый?
- Сем’ям, якія перажываюць крызіс у розных сферах свайго сужэнскага жыцця, якія, магчыма, сёння нават не вераць у тое, што ёсць выйсце.
- Сем’ям, якія маюць трывалыя добрыя адносіны, але разумеюць, што пра адносіны вельмі важна ўвесь час клапаціцца. Ад гэтага клопату залежыць развіццё і ўмацаванне адносін.
- Сем’ям, якія толькі пачалі свой шлях і жадаюць закласці трывалы падмурак, на якім можна будаваць і развіваць свае маладыя адносіны.
- Духоўным і кансэкраваным асобам, якія хочуць развіваць свой дыялог і свае адносіны з Богам і іншымі людзьмі
«Сужэнскія сустрэчы» падчас рэкалекцый прапануюць вельмі канкрэтны інструмент — дыялог, які пасля удзельнікі змогуць самастойна выкарыстоўваць у сваёй штодзённасці, каб будаваць не толькі адносіны паміж сабою, але і з дзецьмі, роднымі, калегамі па працы і іншымі людзьмі.
Вось некалькі сведчанняў ад удзельнікаў рэкалекцый:
Я ад’язджаю з вялікім пачуццём радасці і адзінства. Мы ачысцілі нашыя адносіны ад „смецця“. Але ў той жа час я еду з рашэннем шмат што змяніць у сваіх паводзінах, таму што рэкалекцыі ўмацавалі мяне ў перакананні, што ў гэтым ёсць сэнс для нашага сужэнства.
За ўвесь час сужэнства мы вельмі мала часу праводзілі разам. Дзеткі, дзеткі… Першыя гады былі вельмі цяжкімі, і мы з мужам неяк аддаліліся адзін ад аднаго. З’явілася халоднасць у адносінах. І тут раптам, менавіта цяпер, як аказалася, у патрэбны час мы перажылі гэтыя рэкалекцыі. Мы так шмат тут перапрацавалі, як быццам бы нанава пазнаёміліся. Ад’язджаем з жаданнем і далей клапаціцца пра нашы адносіны, шмат чаго сабе вызначылі.
У нас ёсць шмат нявырашаных пытанняў і непаразуменняў. Раней, да сустрэчы з вамі, калі спрабавалі размаўляць, кожны думаў, што ён мае рацыю. Заставаліся кожны пры сваім меркаванні. Цяпер разумеем як падыходзіць да рашэння нашых нагрувашчаных пытанняў. І гэта дае свой плён ужо сёння.
Мы толькі ажаніліся і сумняваліся, ці трэба нам ехаць. А цяпер, напрыканцы рэкалекцый, мы разумеем, што так шмат новага адкрылі адно ў адным. І лічым, што новае разуменне дыялогу як інструмента дапаможа нам выходзіць з цяжкіх сітуацый у будучыні.
Арганізацыйная інфармацыя
- Пачатак рэкалекцый у пятніцу 13 кастрычніка ў 18.00.
- Заканчэнне рэкалекцый у нядзелю 15 кастрычніка каля 15.00.
- У рэкалекцыях абавязковы ўдзел абодвух сужонкаў, без дзяцей і ва ўсёй праграме.
- Запрашаюцца ўсе, хто гатовы працаваць над сваімі сужэнскімі адносінамі, незалежна ад узросту, канфесійнай прыналежнасці і рэлігійнай актыўнасці: і тыя, хто толькі распісаліся ў ЗАГСе, і тыя, хто жыве ў касцёльным шлюбе.
- Адрас: Мінскі р-н,в. Ляскоўка, вул. Карытас, 1 (каля Бараўлянаў).
- Запіс па тэлефоне: +375 (29) 652 11 44
Нашыя сем’і нарадзіліся для таго, каб быць шчаслівымі. Запрашаем выкарыстаць гэтую магчымасць!
Сем’і, якія ўдзельнічалі ў рэкалекцыях «Сужэнскіх сустрэч», дзеляцца сваімі сведчаннямі:
- «Ветэраны» «Сужэнскіх сустрэч» — пра свой шлях да асэнсаванасці ў сямейных адносінах
- «Дагэтуль узгадваю цеплыню, рамантыку і прыгажосць тых дзён». Як уік-энд «Сужэнскіх сустрэч» змяніў сямейнае жыццё Аляксандра і Ганны Гелагаевых
- Ад вечароў для закаханых да сужэнскіх сустрэч. Адзін год з жыцця маладажонаў Марты і Паўла
- «Наша знаёмства адбылося ў інтэрнэце». Радасці і цяжкасці сямейнага жыцця Гелі і Вовы Белаусаў
- Дыялогі Олі і Сашы: адчуванне каштоўнасці нашага «разам»
- Радасці і цяжкасці сямейнага жыцця: «Крошкі» для сужэнскіх адносін на кожны дзень — рэцэпт ад сям’і Панамаровых
- «Я ехала на ўік-энд, не ведаючы, што там будзе». Гісторыя сям’і Яўгена і Вольгі Хілько
- Радасці і цяжкасці сямейнага жыцця: «Бог пакрыху, маленькімі крокамі прыходзіў у нашае жыццё»
- Радасці і цяжкасці сямейнага жыцця. Гісторыя сям’і Ганны і Юрыя Лугаўцовых
- Радасці і цяжкасці сямейнага жыцця. Гісторыі ўдзельнікаў «Сужэнскіх сустрэч»
