З 19 па 21 мая адбудуцца рэкалекцыіі для сужонкаў і духоўных асоб ад руху «Сужэнскія Сустрэчы». Яны пройдуць у рэкалекцыйным доме «Голас Айца» пры дыяцэзіяльным санктуарыі Езуса Журботнага ў Росі (Гродзенская дыяцэзія, Ваўкавыскі дэканат).
Арганізатары запрашаюць да ўдзелу перадусім сем’і і духоўныя асобы з Гродна і Гродзенскай вобласці, а таксама з усёй Беларусі. Колькасць месцаў абмежавана. Папярэдні запіс абавязковы.
Наступныя рэкалекцыі для сужонкаў адбудуцца толькі ўвосень, таму арганізатары запрашаюць скарыстацца гэтай магчымасцю ўжо цяпер.
Удзел у духоўных практыкаваннях ад «Сужэнскіх сустрэч» дае магчымасць і шанц наблізіцца адзін да аднаго, аднавіць эмацыйную сувязь у сужэнстве, а маладым сем’ям — закласці моцны фундамент для моцных адносін.
Унікальная аўтарская праграма рэкалекцый ужо амаль 20 гадоў дапамагае сужонкам з Беларусі не толькі выходзіць са шматлікіх крызісаў сужэнскага жыцця, паглыбляць свае адносіны, абнаўляць пачуцці, рабіць пэўныя крокі насустрач адно аднаму, насустрач сваім дзецям, блізкім і іншым людзям. Арганізатары запрашаюць асаблівым чынам зірнуць на свае сужэнскія адносіны праз прызму дыялогу.
Мэты рэкалекцый:
- аднавіць свае пачуцці;
- знайсці радасць у тым, што маем;
- напоўніць узаемаразуменнем, даверам і павагай свой дом;
- парамантаваць тое, што зламалася за годы сужэнскага жыцця;
- і, канечне, атрымаць бяспройгрышны інструмент — дыялог ад «Сужэнскіх сустрэч», якім можна карыстацца кожны дзень, каб будаваць адносіны з Богам, з мужам, жонкай, дзецьмі, роднымі і іншымі людзьмі
Каму найбольш адпавядае праграма рэкалекцый?
- Сем’ям, якія перажываюць крызіс у розных сферах свайго сужэнскага жыцця, якія, магчыма, сёння нават не вераць у тое, што ёсць выйсце.
- Сем’ям, якія маюць трывалыя добрыя адносіны, але разумеюць, што пра адносіны вельмі важна ўвесь час клапаціцца. Ад гэтага клопату залежыць развіццё і ўмацаванне адносін.
- Сем’ям, якія толькі пачалі свой шлях і жадаюць закласці трывалы падмурак, на якім можна будаваць і развіваць свае маладыя адносіны.
- Духоўным і кансэкраваным асобам, якія хочуць развіваць свой дыялог і свае адносіны з Богам і іншымі людзьмі
Сужонкі перажываюць рэкалекцыі у дыялогу паміж мужам і жонкай, а духавенства і кансэкраваныя асобы — у дыялогу з Богам.
«Сужэнскія сустрэчы» падчас рэкалекцый прапануюць вельмі канкрэтны інструмент — дыялог, які пасля удзельнікі змогуць самастойна выкарыстоўваць у сваёй штодзённасці, каб будаваць не толькі адносіны паміж сабою, але і з дзецьмі, роднымі, калегамі па працы і іншымі людзьмі.
Вось некалькі сведчанняў ад удзельнікаў мінулых рэкалекцый:
«Мы ўжо былі эмацыйна далёка адзін ад аднаго. У нас за плячыма 14 гадоў жыцця „пад маскай“. Я здабыла ўнутраны спакой і надзею, што нашу сям’ю можна ўратаваць. Мы ад’язджаем з гэтай надзеяй».
«У апошні год стала так шмат клопатаў, што не знаходзілі час нават на размовы. Адчувала адзіноту. Было страшна. Вельмі хацела сюды патрапіць. Пасля адноўленага дыялогу вяртаюся з пачуццём надзеі, лёгкасці, не адчуваю страху. Ёсць упэўненасць, што з усім справімся».
«Тут з’явілася новае ў развіцці нашых адносін. Больш стаў паважаць і разумець сваю жонку. Зрабілі поўную рэвізію сваіх адносін і выйшлі на новы ўзровень узаемаразумення. Забіраем дадому каштоўны досвед зносін».
«Мы ажаніліся пяць месяцаў таму. Для нас вельмі каштоўным аказаўся досвед удзелу. Шмат новага адкрылі ў сваіх маладых адносінах. Адчуваем сябе моцнымі. Мы разумеем, што клопат пра адносіны таксама павінен быць запланаваны».
Арганізацыйныя пытанні
- Пачатак рэкалекцый у пятніцу 19 мая ў 18.00.
- Заканчэнне рэкалекцый у нядзелю 21 мая каля 15.00.
- У рэкалекцыях абавязковы ўдзел абодвух сужонкаў, без дзяцей і ва ўсёй праграме.
- Запрашаюцца ўсе, хто гатовы працаваць над сваімі сужэнскімі адносінамі, незалежна ад узросту, канфесійнай прыналежнасці і рэлігійнай актыўнасці: і тыя, хто толькі распісаліся ў ЗАГСе, і тыя, хто жыве ў касцёльным шлюбе.
- Адрас: Гродзенская вобл., Ваўкавыскі р-н, г/п Рось, вул. Чырвонаармейская, 12.
- Запіс па тэлефоне: +375 (29) 652 11 44
«Нашыя сем’і нарадзіліся для таго, каб быць шчаслівымі. Запрашаем выкарыстаць гэтую магчымасць!» — кажуць арганізатары.
Сем’і, якія ўдзельнічалі ў рэкалекцыях «Сужэнскіх сустрэч», дзеляцца сваімі сведчаннямі:
- «Ветэраны» «Сужэнскіх сустрэч» — пра свой шлях да асэнсаванасці ў сямейных адносінах
- «Дагэтуль узгадваю цеплыню, рамантыку і прыгажосць тых дзён». Як уік-энд «Сужэнскіх сустрэч» змяніў сямейнае жыццё Аляксандра і Ганны Гелагаевых
- Ад вечароў для закаханых да сужэнскіх сустрэч. Адзін год з жыцця маладажонаў Марты і Паўла
- «Наша знаёмства адбылося ў інтэрнэце». Радасці і цяжкасці сямейнага жыцця Гелі і Вовы Белаусаў
- Дыялогі Олі і Сашы: адчуванне каштоўнасці нашага «разам»
- Радасці і цяжкасці сямейнага жыцця: «Крошкі» для сужэнскіх адносін на кожны дзень — рэцэпт ад сям’і Панамаровых
- «Я ехала на ўік-энд, не ведаючы, што там будзе». Гісторыя сям’і Яўгена і Вольгі Хілько
- Радасці і цяжкасці сямейнага жыцця: «Бог пакрыху, маленькімі крокамі прыходзіў у нашае жыццё»
- Радасці і цяжкасці сямейнага жыцця. Гісторыя сям’і Ганны і Юрыя Лугаўцовых
- Радасці і цяжкасці сямейнага жыцця. Гісторыі ўдзельнікаў «Сужэнскіх сустрэч»
