5 красавіка, у Вялікую сераду, у парафіі Найсвяцейшай Тройцы (святога Роха) на Залатой Горцы ў Мінску прайшоў агульнагарадскі Крыжовы шлях.
Традыцыйна гэтае пакутнае набажэнства адбываецца ў Вялікі тыдзень на прыкасцёльным цвінтары каля святыні самай старажытнай каталіцкай супольнасці ў беларускай сталіцы.
Узначаліў набажэнства Крыжовага шляху Мітрапаліт Мінска-Магілёўскі арцыбіскуп Юзаф Станеўскі. Пад пахмурным красавіцкім небам, з якога часу ад часу імжэў золкі дождж, каля дзвюх соцень удзельнікаў разам з арцыпастырам, яго асабістым сакратаром ксяндзом Юрыем Ясевічам і пробашчам Залатагорскай парафіі ксяндзом канонікам Юрыем Санько пераходзілі ад стацыі да стацыі, ушаноўваючы збаўчую муку Хрыста.
Разважанні да чатырнаццаці стацый Крыжовага шляху па чарзе чыталі вернікі з розных парафій горада Мінска.
На заканчэнне набажэнства арцыбіскуп Юзаф Станеўскі ўдзяліў усім прысутным пастырскае благаслаўленне, пасля чаго ўзначаліў у Залатагорскай святыні цэлебрацыю святой Імшы.
