Пошук


Бібліятэка

Аўторак, 27 студзеня
Апостальская адгартацыя Папы Льва XIV «Dilexi te»
27.01.2026 07:00
АПОСТАЛЬСКАЯ АДГАРТАЦЫЯ DILEXI TE СВЯТОГА АЙЦА ЛЬВА XIV ПРА ЛЮБОЎ ДА БЕДНЫХ     1. «Я палюбіў цябе» ( Ап 3, 9), – кажа Пан хрысціянскай супольнасці, якая, у адрозненне ад іншых, не мела ні ўплыву, ні рэсурсаў, але наадварот, спазнавала насілле і пагарду: «У цябе мала сілы, але […] Я ўчыню, што яны прыйдуць і паклоняцца ў ногі табе» ( Ап 3, 8-9). Гэты тэкст прыгадвае нам словы гімна Марыі: «Скінуў магутных з трона і ўзвысіў пакорных. Дабром галодных насыціў, а багатых ні з чым адправіў» ( Лк 1, 52-53). 2. Прызнанне ў любові з Апакаліпсіса адсылае да невычэрпнай таямніцы, над якой папа Францішак глыбока разважаў у энцыкліцы Dilexit nos аб чалавечай і Боскай любові Сэрца Езуса Хрыста. Калі чытаем, мы захапляемся тым, як Езус атаясамліваў сябе «з тымі, хто знаходзіцца на ніжэйшых узроўнях сацыяльнай ступені», і як, палюбіўшы дарэшты, пацвердзіў годнасць кожнага чалавека, асабліва калі ён «слабы, няшчасны і церпячы» [1] . Кантэмпляцыя любові Хрыста «дапамагае нам звярнуць больш увагі на пакуты і патрэбы іншых, робіць нас дастаткова моцнымі для ўдзелу ў Ягонай збаўчай справе ў якасці прылады для пашырэння Ягонай любові» [2] . 3. З гэтай прычыны, як працяг энцыклікі Dilexit nos , папа Францішак у апошнія месяцы свайго жыцця падрыхтаваў Апостальскую адгартацыю, прысвечаную клопату Касцёла пра бедных і разам з беднымі, якую назваў Dilexi te , паказваючы, што Хрыстус звяртаецца да кожнага з іх, кажучы: «У цябе мала сілы, але (…) Я палюбіў цябе» ( Ап 3, 8-9). Атрымаўшы ў спадчыну гэты праект, я шчаслівы, што магу зрабіць яго сваім, дадаўшы некаторыя разважанні, і прадставіць яго ў пачатку свайго пантыфікату, падзяляючы жаданне майго ўмілаванага Папярэдніка, каб усе хрысціяне маглі зразумець цесную сувязь паміж любоўю Хрыста і Яго заклікам клапаціцца пра ўбогіх. Я таксама лічу неабходным трымацца менавіта гэтага шляху да святасці, паколькі «ў закліку прызнаць Яго ва ўбогіх і церпячых адкрываецца сэрца Хрыста, Яго пачуцці і самыя глыбогія рашэнні, якія кожны святы спрабуе выканаць» [3] .   РАЗДЗЕЛ ПЕРШЫ НЕКАЛЬКІ ВАЖНЫХ СЛОВАЎ 4. Вучні Езуса крытыкавалі жанчыну, якая выліла Яму на галаву каштоўны духмяны алей: «Навошта гэткае марнатраўства? Можна было б дорага прадаць гэта і раздаць убогім». Але Езус сказаў ім: «Убогіх заўсёды маеце пры сабе, а Мяне не заўсёды маеце» ( Мц 26, 8-9.11). Гэтая жанчына зразумела, што Езус быў пакорным і церпячым Месіем, на якога яна магла выліць сваю любоў: якім суцяшэннем было гэтае намашчэнне для галавы, якая праз некалькі дзён будзе зраненая цернем! Вядома, яе жэст сціплы, але той, хто церпіць, ведае, наколькі вялікім з’яўляецца нават маленькі жэст пяшчоты і як шмат палёгкі ён можа прынесці. Езус гэта разумее і кажа, што пра яе ўчынак будуць успамінаць доўга: «Дзе б ні абвяшчалася Евангелле па ўсім свеце, сказана будзе і пра тое, што яна зрабіла, на ўспамін аб ёй» ( Мц 26, 13). Прастата яе жэста выяўляе штосьці вялікае. Ніводзін жэст любові, нават найменшы, не будзе забыты, асабліва той, які скіраваны да церпячых, самотных, патрабуючых, якім быў Пан у тую хвіліну. 5. Менавіта ў такой перспектыве любоў да Пана спалучаецца з любоўю да ўбогіх. Той Езус, які кажа нам: «Убогіх заўсёды маеце пры сабе, а Мяне не заўсёды маеце» ( Мц 26, 11), таксама абяцае вучням: «Я з вамі ва ўсе дні» ( Мц 28, 20). Адначасова прыходзяць на думку словы Пана: «Тое, што вы зрабілі аднаму з гэтых братоў Маіх меншых, вы Мне зрабілі» ( Мц 25, 40). Гэта не далягляд дабрачыннасці, але далягляд Аб’яўлення: кантакт з тымі, хто не мае ўлады і велічы, становіцца асноўным спосабам сустрэчы з Панам гісторыі. Ва ўбогіх Ён працягвае прамаўляць да нас. Святы Францішак 6. Папа Францішак, згадваючы пра выбар свайго імя, распавёў, што пасля абрання ягоны сябра кардынал абняў яго, пацалаваў і сказаў: «Не забывай пра бедных!» [4] . Маецца на ўвазе той самы заклік, з якім кіраўнікі Касцёла звярнуліся да св. Паўла, калі ён накіраваўся ў Ерузалем, каб упэўніцца ў сапраўднасці сваёй місіі (пар. Гал 2, 1-10). Гадамі пазней, Апостал мог сцвердзіць: «І менавіта гэта я старанна рабіў» ( Гал 2, 10). Такім быў і выбар св. Францішка Асізскага: у пракажоным яго абняў сам Хрыстус і змяніў ягонае жыццё. Светлая постаць Бедалагі з Асізі ніколі не перастане нас натхняць. 7. Гэта ён, восем стагоддзяў таму, даў штуршок евангельскаму адраджэнню хрысціянаў і тагачаснага грамадства. Багаты і самаўпэўнены, юны Францішак навярнуўся пасля непасрэднага кантакту з убогімі і выключанымі з грамадскага жыцця людзьмі. Імпульс, які ён даў, працягвае ўзрушваць душы веруючых і многіх няверуючых. Ён «змяніў гісторыю» [5] . Тым жа шляхам, згодна са словамі св. Паўла VI, ішоў Другі Ватыканскі Сабор: «Старадаўняя прыпавесць пра міласэрнага самараніна паслужыла мадэллю для духоўнасці Сабору» [6] . Я перакананы, што прэферэнцыйны выбар на карысць бедных з’яўляецца крыніцай незвычайнага аднаўлення як у Касцёле, так і ў грамадстве, пры ўмове, што мы перастанем усё адносіць выключна да сябе і здолеем услухацца ў іх крык. Крык бедных 8. У гэтым плане нам заўсёды варта пачынаць з фрагмента Святога Пісання, дзе распавядаецца пра аб’яўленне Бога Майсею ў палаючым кусце: «Я нагледзеўся на нядолю Майго народу, які ў Егіпце, і пачуў галашэнне ягонае з прычыны яго прыгнятальнікаў, бо пазнаў яго цярпенні. Таму сышоў, каб вызваліць яго […] Таму цяпер ідзі, Я пашлю цябе» ( Зых 3, 7-8.10) [7] . Бог выказвае клопат пра патрэбы ўбогіх: «усклікалі да Пана, і Ён узняў для іх збаўцу» ( Суд 3, 15). Таму, прыслухоўваючыся да крыку ўбогага, мы запрошаныя ўвайсці ў лучнасць з сэрцам Бога, які заўсёды ўважліва ставіцца да патрэбаў сваіх дзяцей і асабліва тых, чые патрэбы найбольшыя. Калі б мы засталіся абыякавымі да гэтага крыку, убогі ўсклікнуў бы да Пана супраць нас, і мы абцяжарылі б сябе грахом (пар. Дрг 15, 9) і аддаліліся б ад сэрца Бога. 9. Цяжкае становішча бедных – гэта крык, які на працягу ўсёй гісторыі чалавецтва няспынна вымагае адказу нашага жыцця, нашага грамадства, нашых палітычных і эканамічных сістэм і, не ў апошнюю чаргу, Касцёла. На параненых тварах людзей, якія жывуць у галечы, мы бачым адбітак цярпення нявінных, а значыць, цярпення самога Хрыста. Адначасова, мабыць, нам варта выразней казаць пра шматлікія абліччы бедных і беднасці, паколькі гэта шматгранны феномен. На самай справе, існуе шмат формаў беднасці: беднасць тых, хто не мае матэрыяльных сродкаў да жыцця, беднасць тых, хто выключаны з грамадства і не мае магчымасці праявіць сваю годнасць і здольнасці, маральная і духоўная беднасць, культурная беднасць, беднасць тых, хто знаходзіцца ў стане асабістай або сацыяльнай безабароннасці або крохкасці, беднасць тых, хто не мае правоў, прасторы, свабоды. 10. У гэтым сэнсе можна сказаць, што клопат пра бедных і ліквідацыя сацыяльных і структурных прычын беднасці, хоць і сталі важнымі ў апошнія дзесяцігоддзі, застаюцца недастатковымі яшчэ і таму, што грамадствы, у якіх мы жывём, часта аддаюць перавагу крытэрыям такой арыентацыі ў жыцці і палітыцы, якія вызначаюцца рознай няроўнасцю. Такім чынам, да старых формаў беднасці, пра якія мы ведаем і з якімі спрабуем змагацца, дадаюцца новыя, часам больш вытанчаныя і небяспечныя. З гэтай прычыны можна толькі вітаць той факт, што Арганізацыя Аб’яднаных Нацый вызначыла ліквідацыю беднасці адной са сваіх Мэтаў тысячагоддзя. 11. Канкрэтная прыхільнасць да ўбогіх павінна суправаджацца і зменай менталітэту, што можа паўплываць на культуру. Сапраўды, ілюзія, што шчасце заключаецца ў камфортным жыцці, штурхае многіх людзей звесці жыццё да назапашвання багацця і дасягнення сацыяльнага поспеху любой цаной, нават коштам іншых людзей і праз выкарыстанне несправядлівых сацыяльных ідэалаў і палітычна-эканамічных сістэм, якія аддаюць перавагу мацнейшым. Так у свеце, дзе расце колькасць бедных, мы заўважаем парадаксальнае павелічэнне багатай эліты, якая жыве ў бурбалцы камфорту і раскошы, амаль у іншым свеце, чым звычайныя людзі. Гэта азначае, што існуе культура, часам добра замаскіраваная, якая адкідае іншых, нават не ўсведамляючы гэтага, і абыякава ставіцца да мільёнаў людзей, якія паміраюць ад голаду або выжываюць ва ўмовах, нягодных чалавека. Некалькі гадоў таму фатаграфія мёртвага дзіцяці на міжземнаморскім пляжы выклікала шырокі рэзананс; на жаль, апроч некаторага кароткага хвалявання, такія падзеі становяцца ўсё менш актуальнымі, быццам другарадная навіна. 12. У пытанні пра беднасць нельга губляць чуйнасці. Асабліва нас непакояць цяжкія ўмовы, у якіх жыве мноства людзей з-за недахопу харчавання і вады. Выклікае заклапочанасць тое, што расце колькасць бедных нават у заможных краінах. У Еўропе ўсё больш сем’яў з цяжкасцю зводзяць канцы з канцамі. У цэлым, мы адзначаем, што розныя праявы беднасці ўзмацніліся. Гэта ўжо не адзіны, аднастайны стан, цяпер яна выяўляецца ў шматлікіх формах эканамічнага і сацыяльнага збяднення, адлюстроўваючы нарастанне няроўнасці у заможных асяроддзях. Не будзем забываць, што «ўдвая бедныя жанчыны, якія церпяць з прычыны адкінутасці, злоўжывання і гвалту, бо часта маюць меншыя магчымасці для абароны сваіх правоў. Тым не менш сярод іх увесь час мы бачым годныя захаплення праявы штодзённага гераізму ў абароне і ў клопаце аб крохкасці сваіх сем’яў» [8] . Нягледзячы на тое, што ў некаторых краінах назіраюцца важныя змены, «арганізацыя грамадстваў па ўсім свеце надалей далёкая ад таго, каб наглядна прадэманстраваць, што жанчыны маюць такую ж годнасць і правы, як і мужчыны. Словы кажуць адно, але рашэнні і рэчаіснасць сведчаць пра іншае» [9] , асабліва калі мы думаем пра жанчын, якія жывуць у крайняй галечы. Ідэалагічныя прадузятасці 13. Калі паглядзець далей за звесткі, якія часам «інтэрпрэтуюцца», каб пераканаць нас у тым, што становішча бедных не такое ўжо і цяжкае, агульная рэальнасць цалкам відавочная: «Існуюць эканамічныя законы, якія эфектыўна паспрыялі развіццю, хоць у галіне інтэгральнага развіцця чалавека яны не былі настолькі паспяховымі. Багацце павялічылася, але ва ўмовах няроўнасці „нараджаюцца новыя формы беднасці”. Калі кажам, што сучасны свет зменшыў беднасць, то вымяраем яе неактуальнымі крытэрыямі, якія не адпавядаюць сучаснаму стану рэчаў. Так, калісьці, напрыклад, адсутнасць доступу да электрычнай энергіі не лічылася прыкметай беднасці і не была прычынай асаблівага цяжару. Беднасць заўсёды трэба аналізаваць і разумець у кантэксце рэальных магчымасцяў дадзенага гістарычнага моманту» [10] . Аднак, акрамя канкрэтных і кантэкстуальных сітуацый, у дакуменце Еўрапейскай супольнасці 1984 года сцвярджаецца, што «бедныя – гэта асобы, сем’і і групы людзей, чые рэсурсы (матэрыяльныя, культурныя і сацыяльныя) настолькі абмежаваныя, што выключаюць іх з мінімальна прымальнага ўзроўню жыцця ў краінах-членах, у якіх яны жывуць» [11] . Але калі мы прызнаем, што ўсе людзі маюць аднолькавую годнасць, незалежна ад месца іх нараджэння, нельга ігнараваць вялікія адрозненні, якія існуюць паміж краінамі і рэгіёнамі. 14. Бедныя не з’явіліся выпадкова або з прычыны сляпога бязлітаснага лёсу. І напэўна большасць з іх не выбірала беднасць. Аднак усё яшчэ ёсць людзі, якія асмельваюцца рабіць такія заявы, дэманструючы гэтым сваю слепату і жорсткасць. Вядома, сярод бедных ёсць тыя, хто не хоча працаваць, магчыма, таму, што іх продкі, адпрацаваўшы ўсё жыццё, памерлі ў галечы. Але вельмі многія, ‒ мужчыны і жанчыны, ‒ усё ж працуюць з раніцы да вечара, напр., збіраючы макулатуру ці выконваючы іншую падобную працу, хоць ведаюць, што гэты іх высілак дапамагае толькі ператрываць і ніколі па-сапраўднаму не палепшыць іх жыццё. Нельга казаць, што большасць бедных такія, бо не «заслугоўваюць» іншага, як сцвярджае фальшывая мерытакратычная візія, паводле якой заслугі маюць толькі тыя, хто дасягнуў поспеху. 15. Хрысціяне таксама часта паддаюцца ўплыву свецкіх ідэалогій або палітычных і эканамічных падыходаў, якія вядуць да несправядлівых абагульненняў і памылковых высноў. Той факт, што праяўленне міласэрнасці сутыкаецца з пагардай або высмейваецца, быцццам бы гэта нейкая апантанасць, якой ахоплены толькі адзінкі, а не палаючае сэрца місіі Касцёла, схіляе мяне да меркавання, што мы павінны заўжды і нястомна перачытваць Евангелле, бо інакш мы рызыкуем замяніць яго свецкім менталітэтам. Нельга забывацца пра ўбогіх, калі хочам застацца ў жывой плыні Касцёла, якая выплывае з Евангелля і ўзбагачае кожны момант гісторыі.   РАЗДЗЕЛ ДРУГІ БОГ ВЫБІРАЕ ЎБОГІХ Выбар на карысць убогі х 16. Бог – гэта міласэрная любоў, а Ягоны план любові, які пашыраецца і здзяйсняецца на працягу ўсёй гісторыі, палягае найперш у тым, што Ён прыйшоў і пасяліўся сярод нас, каб вызваліць з няволі, страху, граху і ўлады смерці. З міласэрным позіркам і поўным любові сэрцам Ён звярнуўся да сваіх стварэнняў, клапоцячыся пра іх чалавечы стан, і, такім чынам, пра іх убоства. Менавіта каб мець удзел у абмежаваннях і немачах нашай чалавечай натуры, Ён сам стаў убогім, нарадзіўся ў целе, як мы. І мы пазналі Яго ў маласці дзіцяці, пакладзенага ў яслі, і ў крайнім прыніжэнні крыжа, дзе Ён прыняў нашае радыкальнае ўбоства, якім ёсць смерць. Таму лёгка зразумець, чаму мы можам таксама тэалагічна казаць пра прэферэнцыйны выбар Бога на карысць бедных; гэты выраз узнік у лацінаамерыканскім кантэксце, у прыватнасці падчас Асамблеі ў Пуэбла, а пазней быў адпаведна інтэграваны ў навучанне Касцёла [12] . Гэтая «прэферэнцыя» не азначае выключнасці або дыскрымінацыі ў адносінах да іншых груп, што ў Бога было б немагчымым. Яна мае на мэце падкрэсліць дзеянне Бога, які са спачуваннем ставіцца да беднасці і слабасці ўсяго чалавецтва і, жадаючы ўсталяваць Валадарства справядлівасці, братэрства і салідарнасці, найбольш сардэчна клапоціцца пра тых, хто спазнае дыскрымінацыю і ўціск, патрабуючы таксама ад нас, ад свайго Касцёла, зрабіць рашучы і радыкальны выбар на карысць найслабейшых. 17. Зыходзячы з гэтага мы можам зразумець шматлікія старонкі Старога Запавету, дзе Бог прадстаўлены як сябар і вызваліцель убогіх, як той, хто чуе крык няшчаснага і ўмешваецца, каб вызваліць яго (пар. Пс 34, 7). Бог, прытулак убогіх, праз прарокаў, асабліва Амоса і Ісаю, асуджае беззаконні, учыненыя супраць найслабейшых, і заклікае Ізраэль аднавіць знутры таксама і культ, бо немагчыма маліцца і прыносіць ахвяры, адначасова прыгнятаючы найбольш абяздоленых і бедных. З самага пачатку Святога Пісання Божая любоў так інтэнсіўна праяўляецца ў абароне слабых і ўбогіх, што можна казаць пра пэўную «слабасць» Бога да іх. «У сэрцы Бога ёсць асаблівае месца для ўбогіх [...]. Уся дарога нашага адкуплення пазначана ўбогімі» [13] . Езус – убогі Месія 18. Уся старазапаветная гісторыя пра прыхільнасць Бога да ўбогіх і Яго прагненне выслухаць іх, аб чым я коратка нагадаў, знаходзіць сваё поўнае ўвасабленне ў Езусе з Назарэта [14] . У сваім уцелаўленні Ён «выракся самога сябе, прыняўшы постаць слугі, прыпадобніўшыся да людзей. І з выгляду стаўшы як чалавек» ( Флп 2, 7), і ў гэтым выглядзе Ён прынёс нам збаўленне. Гэтае радыкальнае ўбоства грунтуецца на Яго місіі: паказаць сапраўднае аблічча Божай любові (пар. Ян 1, 18; 1 Ян 4, 9). Вось чаму ў адным са сваіх цудоўных падагульненняў св. Павел можа сцвярджаць: «Вы ведаеце ласку Пана нашага Езуса Хрыста, што Ён, хоць быў багаты, стаў бедным дзеля вас, каб вы ўзбагаціліся Ягоным убоствам» ( 2 Кар 8, 9). 19. Евангелле паказвае, што гэтае ўбоства закранула кожны аспект Ягонага жыцця. З моманту прыйсця на свет Езус зведаў цяжкі досвед непрыняцця. Евангеліст Лука распавядае, як Юзаф і Марыя, якая хутка павінна была нарадзіць, прыбылі ў Бэтлеем, а потым дадае са шкадаваннем, што «не было ім месца ў заедзе» ( Лк 2, 7). Езус нарадзіўся ў сціплых умовах і быў пакладзены ў яслі, і неўзабаве, каб выратаваць Яго ад смерці, ім давялося ўцякаць у Егіпет ( Лк 2, 7). У пачатку свайго публічнага служэння, пасля таго, як Ён абвясціў у сінагозе ў Назарэце, што ў Ім споўніўся год ласкі, які прынясе радасць убогім, Яго выгналі з горада (пар. Лк 4, 14-30). Нават для смерці не было годнага месца: Яго вывелі з Ерузалема на ўкрыжаванне (пар. Мк 15, 22). Менавіта ў гэтым кантэксце можна найлепш апісаць убоства Езуса: Ён спазнаў такое ж выключэнне, якое выпадае на долю ўбогіх, ізгояў грамадства. Езус – выраз гэтага прывілею беднасці ( privilegium pauperum ). Ён прэзентуе сябе свету не толькі як убогі Месія, але і як Месія ўбогіх і для ўбогіх. 20. Ёсць некаторыя падказкі адносна сацыяльнага статусу Езуса. Па-першае, Ён працаваў рамеснікам або цесляром, téktōn (пар. Мк 6, 3). Гэта была катэгорыя людзей, якія жылі з фізічнай працы. Паколькі яны не мелі зямлі, то лічыліся ніжэйшымі за земляробаў. Калі Юзаф і Марыя прынеслі маленькага Езуса ў святыню, то ахвяравалі пару туркавак або галубоў (пар. Лк 2, 22-24), якія, згодна з прадпісаннямі Кнігі Левіта (пар. 12, 8), былі ахвяраваннем, якое прыносілі незабяспечаныя людзі. Досыць значным евангельскім эпізодам з’яўляецца аповед аб тым, як Езус і вучні збіралі каласы на пасілак, праходзячы праз поле (пар. Мк 2, 23-28), а збіраць каласы на полі было дазволена толькі бедным. Сам Езус тады кажа пра сябе: «Лісы маюць норы, і птушкі нябесныя – гнёзды, а Сын Чалавечы не мае дзе прыхіліць галаву» ( Мц 8, 20; Лк 9, 58). Па сутнасці, Ён – вандроўны настаўнік, чыя беднасць і няпэўнае становішча з’яўляюцца знакам сувязі з Айцом. Такія ж умовы чакаюць і тых, хто хоча ісці за Ім па дарозе вучнёўства, менавіта дзеля таго, каб адмаўленне ад дабротаў, багацця і бяспекі гэтага свету сталася бачным знакам даверу да Бога і Яго Провіду. 21. У пачатку свайго публічнага служэння Езус прыйшоў у Назарэт і прачытаў у сінагозе фрагмент Кнігі прарока Ісаі, адносячы да сябе словы прарока: «Дух Пана на Мне, бо Ён намасціў Мяне абвяшчаць Добрую Навіну ўбогім» ( Лк 4, 18; пар. Іс 61, 1). Так Ён аб’яўляе сябе: Ён – той, хто ў гэты гістарычны момант прыходзіць, каб прынесці поўную любові блізкасць Бога, а перадусім здзейсніць вызваленне тых, каго зло трымае ў палоне, слабых і ўбогіх. Знакі, якія суправаджаюць навучанне Езуса, на самой справе паказваюць любоў і спачуванне, з якімі Бог глядзіць на хворых, бедных і грэшнікаў, якіх і грамадства, і рэлігія маргіналізавалі па прычыне іх становішча. Ён адкрывае вочы сляпым, аздараўляе пракажоных, уваскрашае мёртвых, а бедным абвяшчае Добрую Навіну: Бог блізка, Бог любіць вас (пар. Лк 7, 22). Вось чаму Ён абвяшчае: «Шчаслівыя ўбогія, бо ваша ёсць Валадарства Божае» ( Лк 6, 20). Сапраўды, Бог мае асаблівую прыхільнасць да ўбогіх: слова надзеі і вызвалення Пана адрасавана ў першую чаргу да іх, і таму, нават ва ўмовах галечы і нямогласці, ніхто не павінен адчуваць сябе пакінутым. І Касцёл, калі хоча належаць Хрысту, павінен быць Касцёлам благаслаўленняў, Касцёлам, які дае месца малым і крочыць як убогі з убогімі, месцам, дзе яны маюць прывілеяванае становішча (пар. Як 2, 2-4). 22. Бедныя і хворыя, няздольныя забяспечыць сабе неабходныя жыццёвыя сродкі, часта былі вымушаны жабраваць. Такім чынам, неслі дадатковы цяжар сацыяльнага сораму, падмацаваны перакананнем, што хвароба і беднасць звязаны з нейкім асабістым грахом. Езус рашуча выступіў супраць такога спосабу мыслення, сцвярджаючы, што «Бог загадвае сонцу свайму ўзыходзіць над дрэннымі і добрымі і пасылае дождж на справядлівых і на несправядлівых» ( Мц 5, 45). Сапраўды, Ён цалкам абвергнуў гэтую канцэпцыю, пра што выдатна сведчыць прыпавесць пра багацея і беднага Лазара: «Дзіця, успомні, што ты атрымаў ужо сваё дабро пры жыцці сваім, а Лазар – ліха. Цяпер жа ён тут суцяшаецца, а ты пакутуеш» ( Лк 16, 25). 23. Тады становіцца зразумела, што «з нашай веры ў Хрыста, які стаў убогім і заўсёды быў блізка бедных і адкінутых, вынікае клопат аб інтэгральным развіцці найбольш занядбаных людзей у грамадстве» [15] . Я часта задаюся пытаннем, чаму, нягледзячы на яснасць Святога Пісання адносна бедных, многія працягваюць думаць, што могуць не заўважаць іх. Застанёмся яшчэ на хвіліну ў біблійных рамках і паспрабуем паразважаць над сваімі зносінамі з самымі нязначнымі асобамі ў грамадстве і над іх важным месцам у Божым народзе. Міласэрнасць да ўбогіх у Бібліі 24. Апостал Ян піша: «Бо той, хто не любіць свайго брата, якога бачыць, не можа любіць Бога, якога не бачыць» ( 1 Ян 4, 20). Падобным чынам, у сваім адказе кніжніку Езус паўтарае дзве старажытныя запаведзі: «Любі Пана, Бога твайго, усім сэрцам тваім, усёй душою тваёю і з усіх сілаў тваіх» ( Дрг 6, 5) і «любі бліжняга твайго, як самога сябе» ( Лев 19, 18), аб’ядноўваючы іх у адну запаведзь. Евангеліст Марк перадае адказ Езуса наступнымі словамі: «Першая такая: «Слухай, Ізраэль, Пан Бог наш – Пан адзіны; любі Пана Бога твайго ўсім сэрцам тваім, і ўсёй душой тваёй, і ўсім розумам тваім, і ўсёй моцаю тваёй». Другая: «Любі бліжняга твайго, як самога сябе». Няма іншай запаведзі большай за гэтыя» ( Мк 12, 29-31). 25. Прыведзены фрагмент з Кнігі Левіта заклікае нас шанаваць суайчыннікаў, у той час як іншыя тэксты заклікаюць да павагі, калі не наўпрост да любові, нават да ворагаў: «Калі натрапіш на заблукалага вала свайго ворага ці на ягонага асла, зараз жа вярні яго яму. Калі ўбачыш, што асёл твайго ненавісніка ўпаў пад сваім цяжарам, не пакідай яго без дапамогі, няўхільна дапамажы разам з ім» ( Зых 23, 4-5). Тут выразна гаворыцца пра ўнутраную каштоўнасць павагі да іншых: кожны, хто апынуўся ў цяжкай сітуацыі, нават вораг, заўсёды заслугоўвае нашай дапамогі. 26. Навучанне Езуса пра прыярытэт любові да Бога выразна дапаўняецца яго сцвярджэннем, што нельга любіць Бога, не распасціраючы сваю любоў на ўбогіх. Любоў да бліжняга з’яўляецца адчувальным доказам сапраўднасці любові да Бога, як сведчыць апостал Ян: «Бога ніхто ніколі не бачыў. Калі мы любім адзін аднаго, то Бог жыве ў нас, і любоў Ягоная ў нас дасканалая. […] Бог ёсць любоў, і хто жыве ў любові, той жыве ў Богу, і Бог у ім» ( 1 Ян 4, 12. 16). Гэта дзве асобныя, але непадзельныя любові. Нават у выпадках, калі адносіны з Богам не відавочныя, сам Пан вучыць нас, што кожны акт любові да бліжняга нейкім чынам з’яўляецца адлюстраваннем Божай любові: «Сапраўды кажу вам: тое, што вы зрабілі аднаму з гэтых братоў Маіх меншых, вы Мне зрабілі» ( Мц 25, 40). 27. Таму нам і раяць рабіць учынкі міласэрнасці, бо ў іх выяўляецца праўдзівасць культу, які праз праслаўленне Бога мае на мэце адкрыць нас на перамену, якую Дух можа ў нас здзейсніць, каб мы ўсе сталіся вобразам Хрыста і Яго міласэрнасці да найслабейшых. У гэтым сэнсе, адносіны з Панам, якія выяўляюцца ў кульце, таксама вызваляюць нас ад рызыкі перажываць нашыя адносіны ў логіцы разліку і эгаізму, дапамагаюць нам адкрыцца на бескарыслівасць, якая ўзнікае паміж тымі, хто любіць адзін аднаго і таму дзеліцца ўсім, што мае. У сувязі з гэтым Езус вучыць: «Калі наладжваеш абед ці вячэру, не кліч сяброў тваіх, ні братоў тваіх, ні родных тваіх, ні суседзяў багатых, каб і яны не паклікалі цябе ў адказ, і ты атрымаў бы адплату. Але калі наладжваеш гасціну, кліч убогіх, калек, кульгавых, сляпых, і будзеш шчаслівы, што яны не маюць як адплаціць табе» ( Лк 14, 12-14). 28. Заклік Пана да міласэрнасці ў дачыненні да ўбогіх знайшоў поўнае выражэнне ў вялікай прыпавесці пра Апошні суд (пар. Мц 25, 31-46), маляўнічай ілюстрацыі благаслаўлення: «Шчаслівыя міласэрныя…». У ёй Пан даў нам ключ да дасягнення нашай паўнаты, бо «калі мы шукаем той святасці, якая падабаецца Богу, то ў гэтым тэксце мы можам знайсці правіла паводзінаў, на падставе якога нас будуць судзіць» [16] . Ясныя і моцныя словы Евангелля павінны ўвасабляцца ў жыццё «без каментарыяў, домыслаў і адгаворак, што пазбаўляе іх сілы. Пан сказаў нам вельмі ясна, што святасць нельга зразумець, пражыць па-за гэтымі Яго патрабаваннямі» [17] . 29. У ранняй хрысціянскай супольнасці справа міласэрнасці вынікала не з аналізу ці планаў, а непасрэдна з прыкладу Езуса, з саміх словаў Евангелля. Пасланне апостала Якуба шмат увагі прысвячае праблеме адносінаў паміж багатымі і беднымі і звяртаецца да вернікаў з двума надзвычай глыбокімі пытаннямі, якія выпрабоўваюць іх веру: «Якая карысць, браты мае, калі нехта кажа, што мае веру, а ўчынкаў не мае? Ці можа вера збавіць яго? Калі брат ці сястра знаходзяцца ў галечы, не маючы штодзённай ежы, а нехта з вас скажа ім: „Ідзіце ў спакоі, грэйцеся і насычайцеся”, але не дасць ім неабходнага для цела, то якая з гэтага карысць? Так і вера без учынкаў мёртвая сама па сабе» ( Як 2, 14-17). 30. «Золата ваша і срэбра паржавела, ржа іх засведчыць супраць вас і з’есць вашыя целы, як агонь. Вы сабралі скарб у апошнія дні. Вось кліча плата, якую вы затрымалі працаўнікам, што жалі вашыя палеткі, і крык жняцоў дайшоў да вушэй Пана Магуццяў. Вы жылі на зямлі ў распусце і раскошы, вы насыцілі сэрцы вашыя ў дзень забою» ( Як 5, 3-5). Якую ж моц маюць гэтыя словы, нават калі мы лічым за лепшае прыкідвацца глухімі! У Першым пасланні св. апостала Яна мы знаходзім падобны заклік: «Калі хтосьці мае дастатак у свеце і бачыць брата свайго ў нястачы, і закрывае перад ім сваё сэрца, то як любоў Божая можа жыць у ім?» ( 1 Ян 3, 17). 31. Пасланне аб’яўленага Слова «настолькі выразнае […], настолькі непасрэднае, настолькі простае і вымоўнае, што ніякая касцёльная герменеўтыка не мае права ставіць яго пад сумненне. Разважанне Касцёла над гэтымі тэкстамі не павінна іх зацямняць або аслабляць іх закліку, але павінна дапамагчы адважна і з імпэтам прыняць іх. Навошта ўскладняць тое, што з’яўляецца такім простым? Канцэптуальныя прылады існуюць для таго, каб аблегчыць кантакт з рэчаіснасцю з мэтаю яе высвятлення, а не для таго, каб аддаляцца ад яе» [18] . 32. З іншага боку, выразны касцёльны прыклад шчодрасці і ўвагі да бедных знаходзім у паўсядзённым жыцці і ладзе жыцця першай хрысціянскай супольнасці. Можна ўспомніць, у прыватнасці, тое, як вырашалася пытанне штодзённага размеркавання міласціны ўдовам (пар. Дз 6, 1-6). Справа была няпростай яшчэ і таму, што некаторых удоў, якія паходзілі з іншых краін, часам абміналі як замежніц. Па праўдзе, эпізод, апісаны ў Дзеях Апосталаў, паказвае пэўную незадаволенасць з боку элінаў, габрэяў грэцкай культуры. Апосталы адказалі не абстрактнымі разважаннямі, а паставілі ў цэнтр міласэрнасць, якая ахоплівае ўсіх. Яны рэарганізавалі дапамогу ўдовам, просячы супольнасць пашукаць мудрых і паважаных людзей, якім яны маглі б даверыць служэнне пры сталах, каб самім займацца абвяшчэннем Слова. 33. Калі Павел пайшоў у Ерузалем параіцца з Апосталамі, «каб не аказалася, што я бягу ці бегаў дарэмна» ( Гал 2, 2), яго папрасілі не забываць пра ўбогіх (пар. Гал 2, 10). Таму ён арганізаваў некалькі збораў ахвяраванняў для дапамогі бедным супольнасцям. Сярод прычын, якімі абгрунтаваў свой жэст, варта адзначыць наступную: «Радаснага даўцу любіць Бог» ( 2 Кар 9, 7). Тым, хто сярод нас не схільны да велікадушных, бескарыслівых жэстаў, Божае слова паказвае, што шчодрасць да бедных з’яўляецца сапраўдным набыткам для людзей, якія яе практыкуюць: Бог асабліва іх любіць. Сапраўды, Біблія багатая на абяцанні шчодрым даўцам: «Хто мае літасць да беднага, той нібы пазычае, і Ён аддасць яму» ( Прып 19, 17). «Давайце, і будзе дадзена вам (…) Бо якой мераю мераеце, такой і вам будзе адмерана» ( Лк 6, 38). «Тады заззяе, як золак, святло тваё, і хутка з’явіцца тваё аздараўленне» ( Іс 58, 8). Першыя хрысціяне былі ў гэтым перакананыя. 34. Жыццё ранніх касцёльных супольнасцяў, апісанае ў біблійным каноне і перададзенае нам як аб’яўленае Слова, прапануецца ў якасці ўзору для пераймання, а таксама як сведчанне веры, якая дзейнічае праз міласэрную любоў, застаецца пастаяннай перасцярогай для будучых пакаленняў. Цягам стагоддзяў гэтыя старонкі натхнялі хрысціянскія сэрцы любіць і рабіць справы міласэрнасці; гэта ўрадлівае насенне, якое ніколі не перастае прыносіць плён.   РАЗДЗЕЛ ТРЭЦІ КАСЦЁЛ ДЛЯ БЕДНЫХ 35. Праз тры дні пасля свайго абрання мой Папярэднік выказаў прадстаўнікам СМІ пажаданне, каб у Касцёле больш выразна былі бачны клопат і ўвага да бедных: «Ах, як бы я хацеў бачыць Касцёл бедны і для бедных!» [19] . 36. Гэтае жаданне адлюстроўвае разуменне таго, што Касцёл «ва ўбогіх і церпячых бачыць вобраз свайго ўбогага і церпячага Заснавальніка, стараецца дапамагчы ім у нядолі і імкнецца ў іх служыць Хрысту» [20] . Сапраўды, паколькі Касцёл пакліканы да атаясамлення сябе з апошнімі, у ім «не павінна быць ніякіх сумненняў ці тлумачэнняў, якія аслабляюць гэтае вельмі выразнае пасланне. […] Трэба сцвердзіць без лішніх словаў, што існуе непадзельная сувязь паміж нашай верай і беднымі» [21] . На гэты конт мы маем шматлікія сведчанні на працягу амаль двухтысячагадовай гісторыі вучняў Езуса [22] . Сапраўднае багацце Касцёла 37. Святы Павел распавядае, што сярод вернікаў маладой хрысціянскай супольнасці было няшмат «мудрых паводле цела, няшмат моцных, няшмат шляхетнага паходжання» ( 1 Кар 1, 26). Аднак, нягледзячы на сваю беднасць, першыя хрысціяне выразна ўсведамлялі неабходнасць клапаціцца пра людзей, якія церпяць большую нястачу. На самым заранку хрысціянства Апосталы ўжо ўсклалі рукі на семярых выбраных мужчын і ў пэўнай ступені ўключылі іх у сваю місію, прызначыўшы іх для служэння – diakonía па-грэцку – самым бедным (пар. Дз 6, 1-5). Важна адзначыць, што першым вучнем, які засведчыў сваю веру ў Хрыста аж да праліцця ўласнай крыві, быў Стэфан, які належаў да гэтай групы. У ім спалучаюцца сведчанне жыцця, прысвечанага клопату пра бедных, і мучаніцтва. 38. Крыху больш за два стагоддзі іншы дыякан падобным чынам вызнаў сваю вернасць Езусу Хрысту, спалучаючы ў сваім жыцці служэнне бедным і мучаніцтва: св. Лаўрэнцій [23] . З апавядання св. Амброзія мы даведваемся, што Лаўрэнцій быў дыяканам у Рыме падчас пантыфікату папы Сікста II. Калі рымскія ўлады загадалі аддаць скарбы Касцёла, ён «на наступны дзень прывёў бедных. На пытанне, дзе абяцаныя скарбы, ён паказаў на бедных і сказаў: „Гэта скарбы Касцёла”» [24] . Апавядаючы гэтую гісторыю, Амброзій пытаецца: «Якія скарбы больш каштоўныя мае Езус за тыя, у якіх Ён сам прабывае паводле ўласнага ўпадабання?» [25] . І, успомніўшы, што слугі Касцёла ніколі не павінны грэбаваць клопатам пра бедных і тым больш не павінны назапашваць даброты дзеля ўласнай карысці, ён кажа: «Гэтая паслуга мае выконвацца са шчырай верай і мудрай прадбачлівасцю. Безумоўна, калі хтосьці атрымлівае з гэтага асабістую выгаду, ён здзяйсняе злачынства; але, калі раздае выручаныя сродкі ўбогім, выкупляе вязня, то робіць справу міласэрнасці» [26] . Айцы Касцёла і ўбогія 39. З першых стагоддзяў Айцы Касцёла бачылі ва ўбогіх прывілеяваны шлях да Бога, асаблівы спосаб сустрэчы з Ім. Міласэрнасць да патрабуючых разумелася не проста як маральная цнота, а як канкрэтнае выражэнне веры ва ўцелаўлёнае Слова. Супольнасць вернікаў, падтрыманая моцай Духа Святога, грунтавалася на блізкасці да ўбогіх, якіх яна лічыла не дадаткам, а неад’емнай часткай жывога Хрыстовага цела. Святы Ігнацый з Антыёхіі, напр., ідучы на мучаніцкую смерць, прыгадваў вернікам супольнасці ў Смірне не занядбоўваць абавязак міласэрнасці да найбольш патрабуючых, папярэджваў не паводзіць сябе так, як тыя, хто супрацьстаіць Богу: «Падумайце, наколькі супярэчаць Божаму плану тыя, хто мае іншае меркаванне пра ласку Езуса Хрыста, які прыйшоў да нас. Не дбаюць ні пра любоў, ні пра ўдаву, ні пра сірату, ні пра пакрыўджанага, ні пра вязня або свабоднага, ні пра галоднага, ні пра сасмяглага» [27] . Біскуп Смірны Палікарп выразна заахвочваў слугаў Касцёла клапаціцца пра ўбогіх: «Святары няхай будуць спагаднымі і міласэрнымі да ўсіх. Няхай вяртаюць на добры шлях тых, хто заблукаў, і наведваюць усіх хворых, не занядбоўваючы ані ўдавы, ані сіраты, ані ўбогага, але заўсёды няхай стараюцца рабіць дабро перад Богам і людзьмі» [28] . З гэтых двух сведчанняў мы бачым, што Касцёл паўстае як маці ўбогіх, месца гасціннасці і справядлівасці. 40. Святы Юстын, са свайго боку, у сваёй першай «Апалогіі», адрасаванай імператару Адрыяну, Сенату і рымскаму народу, тлумачыў, што хрысціяне прыносілі патрабуючым усё, што маглі, бо бачылі ў іх братоў і сясцёр у Хрысце. Пішучы пра малітоўны сход у першы дзень тыдня, ён падкрэсліваў, што ў самым сэрцы хрысціянскай літургіі знаходзіцца пакланенне Богу, але яго нельга аддзяліць ад увагі да бедных. Таму ў пэўны момант цэлебрацыі «заможныя ды гатовыя ахвяраваць, складаюць тое, што жадаюць; усё, што сабралі, перадаецца кіраўніку, які апякуецца сіротамі, удовамі, хворымі і тымі, хто церпіць нястачу з-за іншых прычын, вязнямі і чужынцамі, якія жывуць сярод нас; адным словам, ён дапамагае кожнаму ў патрэбе» [29] . Гэта паказвае, што Касцёл ад свайго нараджэння не аддзяляў веру ад сацыяльнай дзейнасці: вера, якая не суправаджалася сведчаннем учынкаў, як вучыў св. Якуб, лічылася мёртвай (пар. Як 2, 17). Святы Ян Хрызастом 41. Сярод усходніх Айцоў найбольш заўзятым прапаведнікам сацыяльнай справядлівасці напэўна быў св. Ян Хрызастом, арцыбіскуп Канстанцінопаля на мяжы IV і V стагоддзяў. У сваіх гаміліях ён заклікаў вернікаў распазнаваць Хрыста ў патрабуючых: «Хочаш ушанаваць Цела Хрыста? Не дапускай, каб было распранутым; ушанаваўшы яго шаўковымі шатамі [ў святыні], не дазваляй яму аголенаму памерці звонку ад холаду. (...) [Хрыстус у Эўхарыстыі] не мае патрэбы ў шатах, але ў чыстых душах; а Хрыстус у іншым чалавеку патрабуе большага клопату. Навучымся ж мудрасці і будзем шанаваць Хрыста так, як Ён сам таго жадае. Найбольш прыемным будзе культ, якога Ён сам прагне, а не той, які прыдумваем мы. (...) Таму і ты аддай Яму пашану, якую Ён устанавіў, і падзяліся з убогімі сваім багаццем. Богу патрэбныя не залатыя начынні, а залатыя душы» [30] . З крышталёвай яснасцю сцвярджаючы, што калі вернікі не сустрэнуць Хрыста ў бедных каля дзвярэй, яны не змогуць пакланіцца Яму і на алтары, ён працягвае: «Якая Яму карысць, калі Ягоны алтар поўны залатых келіхаў, а Ён сам памірае ад голаду (ва ўбогіх)? Спачатку накармі галодных, а потым тым, што застанецца, упрыгож алтар» [31] . Па гэтай прычыне ён разумеў Эўхарыстыю як сакрамэнтальны выраз міласэрнасці і справядлівасці, які папярэднічае ёй, суправаджае яе і павінен працягваць яе ў любові і клопаце пра ўбогіх. 42. Такім чынам, міласэрнасць – не опцыя на выбар, а крытэрый сапраўднага культу. Хрызастом рашуча асуджаў празмерную раскошу, якая суіснавала з абыякавасцю да бедных. Увага, якая ім належыцца, – гэта больш за сацыяльнае патрабаванне, гэта ўмова збаўлення, якая накладае на несправядлівае багацце цяжар асуджэння: «Сцюдзёна, а бядняк ляжыць у лахманах, канае, заходзіцца ад холаду, дрыжыць – ужо выгляду яго дастаткова, каб узрушыць цябе. А ты, разгарачаны і захмялелы, абмінаеш яго і шыбуеш далей. Як можаш ты спадзявацца, што Бог вызваліць цябе ў няшчасці? […] Ты часта апранаеш у мноства каляровых і пазалочаных убораў нябожчыка, які ўжо нічога не адчувае і не разумее гонару. А тымі, каму балюча, каго раздзіраюць на часткі і катуюць, хто пакутуе ад голаду і холаду, ты пагарджаеш, больш дбаючы пра марную славу, чым пра боязь Божую» [32] . Гэтае глыбокае пачуццё сацыяльнай справядлівасці прыводзіць яго да сцвярджэння, што «не аддаваць бедным частку сваіх дабротаў – азначае рабаваць іх і пазбаўляць жыцця; тое, што ў нас ёсць, належыць ім» [33] . Святы Аўгустын 43. Духоўным настаўнікам Аўгустына быў св. Амброзій, які падкрэсліваў этычную неабходнасць дзяліцца дабротамі: «Ты не даеш беднаму са свайго, але вяртаеш яму ягонае: бо тое, што было дадзена ўсім для сумеснага ўжывання, ты прысвоіў толькі сабе» [34] . Для біскупа Мілана міласціна – гэта аднаўленне справядлівасці, а не жэст патэрналізму. У яго прапаведаванні міласэрнасць набывае прарочы характар: яна асуджае структуры назапашвання і пацвярджае еднасць як пакліканне Касцёла. 44. Выхаваны ў гэтай традыцыі, святы біскуп Гіпоны таксама вучыў большай любові да ўбогіх. Пільны пастыр і тэолаг рэдкай празорлівасці, ён разумеў, што сапраўдная касцёльная еднасць выяўляецца таксама ў адзінстве дабротаў. У сваіх Каментарыях да п сальмаў ён нагадвае, што сапраўдныя хрысціяне не занядбоўваюць любоў да найбольш патрабуючых: «Прыглядаючыся да братоў, вы ведаеце, ці маюць яны ў нечым патрэбу, але калі Хрыстус жыве ў вас, рабіце дабро і прыхадням» [35] . Такім чынам, гэтае дзяленне дабротамі нараджаецца з тэалагальнай любові і мае канчатковую мэту ‒ любоў Хрыста. Для Аўгустына ўбогія – гэта не проста людзі, якім трэба дапамагчы, але сакрамэнтальная прысутнасць Пана. 45. Доктар Ласкі разглядаў клопат пра бедных як канкрэтны доказ шчырасці веры. Хто сцвярджае, што любіць Бога, і не мае спачування да патрабуючых, хлусіць (пар. 1 Ян 4, 20). Каментуючы сустрэчу Езуса з багатым юнаком і «скарб на нябёсах», прызначаны для тых, хто аддае свае даброты бедным (пар. Мц 19, 21), Аўгустын укладае ў вусны Пана наступныя словы: «Я атрымаў зямлю, дам неба; атрымаў часовыя даброты, аддам вечныя даброты; атрымаў хлеб, аддам сваё жыццё. […] Мяне гасцінна прынялі ў доме, але Я дам дом; Мяне наведалі ў хваробе, але Я дам здароўе; прыйшлі да Мяне ў вязніцы, але Я дам свабоду. Хлеб, які далі маім убогім, ужо спажыты, а хлеб, які Я дам, не толькі насыціць вас, але ніколі не скончыцца» [36] . Усемагутны не дазваляе пераўзысці сябе ў шчодрасці да тых, хто служыць Яму ў найбольш патрабуючых: чым большая любоў да бедных, тым большая ўзнагарода ад Бога. 46. Гэтая хрыстацэнтрычная і глыбока эклезіяльная перспектыва вядзе нас да сцвярджэння, што ахвяраванні, удзеленыя з любові, не толькі заспакойваюць патрэбы нашых братоў і сясцёр, але ачышчаюць сэрца даўцы, гатовага змяніцца: «Міласціна, на самай справе, дапамагае сцерці грахі мінулага жыцця, калі чалавек змяняе сваё жыццё» [37] . Можна сказаць, гэта звычайны шлях навяртання для тых, хто жадае ісці за Хрыстом з непадзеленым сэрцам. 47. У Касцёле, які распазнае аблічча Хрыста ў бедных, а ў наяўных дабротах – прылады міласэрнасці, думка Аўгустына застаецца надзейным святлом. Сёння вернасць навучанню Аўгустына вымагае не толькі даследвання ягоных прац, але і гатоўнасці радыкальна жыць ягоным заклікам да навяртання, неад’емнай часткай якога з’яўляецца служэнне міласэрнасці. 48. Многія іншыя Айцы Касцёла, як усходнія, так і заходнія, выказваліся пра прыярытэт увагі да бедных у жыцці і місіі кожнага хрысціянскага верніка. Падсумоўваючы, можна сказаць, што патрыстычная тэалогія была практычнай: імкнулася да Касцёла беднага і для бедных, нагадвала, што Евангелле абвяшчаецца адпаведным чынам толькі тады, калі схіляе нас дакрануцца да цела самых абяздоленых, папярэджвала, што дактрынальны рыгарызм без міласэрнасці – усяго толькі пустая размова. Клопат пра хворых 49. Хрысціянскае спачуванне асаблівым чынам выявілася ў клопаце пра хворых і церпячых. На падставе знакаў у публічным служэнні Езуса: аздараўленне сляпых, пракажоных і паралізаваных Касцёл разумее, што клопат пра хворых, у якіх нескладана распазнаць укрыжаванага Пана, з’яўляецца важнай часткай касцёльнай місіі. Святы Кіпрыян падчас эпідэміі ў Картагене, дзе ён быў біскупам, нагадаў хрысціянам, як важна апекавацца хворымі: «Цяперашняя пошасць і эпідэмія, бясспрэчна жахлівая і смяротная, выпрабоўвае справядлівасць кожнага і правярае чалавечы дух: ці клапоцяцца здаровыя пра хворых, ці любяць сваякі адно аднаго, ці гаспадары літуюцца над сваімі хворымі слугамі, ці лекары не пакідаюць хворых, якія патрабуюць дапамогі» [38] . Хрысціянская традыцыя наведвання хворых, абмывання іх ранаў і суцяшэння пакутуючых не зводзіцца да справы філантропіі, але з’яўляецца касцёльнай дзейнасцю, праз якую члены Касцёла менавіта ў хворых «дакранаюцца да церпячага цела Хрыста» [39] . 50. У шаснаццатым стагоддзі св. Ян Божы, заснаваўшы ордэн баніфратраў, які носіць яго імя, стварыў узорныя шпіталі, якія прымалі ўсіх, незалежна ад сацыяльнага ці эканамічнага статусу. Яго знакаміты выраз: «Рабіце дабро, браты мае!» стаў дэвізам актыўнай міласэрнасці да хворых. У той жа час св. Каміл Леліскі заснаваў ордэн духоўных для служэння хворым – камільянаў, узяўшы на сябе місію служэння хворым з поўнай адданасцю. Яго Рэгула кажа: «Няхай кожны просіць Пана даць яму ласку мацярынскай любові да бліжняга, каб мы маглі служыць яму з усёй любоўю ў патрэбах душы і цела, бо мы прагнем, з Божай ласкай, служыць усім хворым з той любоўю, якую любячая маці звычайна адчувае да свайго адзінага хворага дзіцяці» [40] . У шпіталях, на палях бітваў, у турмах і на вуліцах камільяне ажыццяўлялі міласэрнасць Хрыста Лекара. 51. З мацярынскай пяшчотай апякуючыся хворымі, на ўзор маці, якая клапоціцца пра сваё дзіця, многія кансэкраваныя жанчыны адыгралі яшчэ больш важную ролю ў аказанні медыцынскай дапамогі бедным. Дочкі Міласэрнасці св. Вінцэнта дэ Поля, шарыткі, Малыя Сёстры Божага Провіду і многія іншыя жаночыя кангрэгацыі ўвасобілі мацярынскую і непрыкметную прысутнасць у шпіталях, дамах апекі для састарэлых і пакінутых людзей. Яны прыўнеслі суцяшальнае, уважлівае слуханне, суправаджэнне і, перш за ўсё, пяшчоту. Часта яны сваімі рукамі будавалі ўстановы аховы здароўя ў месцах, дзе не хапала медыцынскай дапамогі. З натуральнай мудрасцю і глыбокай верай яны вучылі гігіене, дапамагалі пры родах і давалі лекі. Іх дамы сталі аазісамі годнасці, дзе не адкідалі нікога. Спагадны дотык быў першым лекам. Святая Луіза дэ Марыяк нагадвала сваім сёстрам, Дочкам Міласэрнасці, што яны «атрымалі асаблівае благаслаўленне ад Бога служыць убогім хворым у бальніцах» [41] . 52. Сёння гэтая спадчына працягваецца ў каталіцкіх шпіталях, медыцынскіх цэнтрах у аддаленых рэгіёнах, у медыцынскіх місіях, якія дзейнічаюць сярод лясоў, у цэнтрах рэабілітацыі наркаманаў, у палявых шпіталях у зонах ваенных дзеянняў. Хрысціянская прысутнасць побач з хворымі паказвае, што збаўленне – не абстрактная ідэя, а канкрэтныя ўчынкі. Праз сваю дзейнасць па аздараўленні ранаў Касцёл абвяшчае, што Валадарства Божае пачынаецца сярод найбольш уразлівых. Паступаючы так, ён застаецца верным таму, хто сказаў: «Я быў […] хворы, і вы адведалі Мяне» ( Мц 25, 36). Калі Касцёл кленчыць каля хворага на праказу, каля дзіцяці, якое не даядае, каля паміраючага, імя якога невядома, то праз гэта выконвае сваё найглыбейшае пакліканне: любіць Пана там, дзе Ён найбольш знявечаны. Клопат пра ўбогіх у манаскім жыцці 53. Манаскае жыццё, якое нарадзілася ў цішыні пустыні, ад самага пачатку было сведчаннем салідарнасці. Манахі пакідалі ўсё: багацце, прэстыж, сям’ю не толькі таму, што пагарджалі дабротамі свету, contemptus mundi, але каб сустрэць у гэтым радыкальным аддаленні ўбогага Хрыста. Святы Базыль Вялікі ў сваёй Рэгуле не бачыў супярэчнасці паміж манаскім жыццём у малітве і кантэмпляцыі і працай на карысць бедных. Для яго гасціннасць і клопат пра патрабуючых былі неад’емнай часткай манаскай духоўнасці, а манахі, нават пакінуўшы ўсё, каб прыняць убоства, павінны былі дапамагаць найбяднейшым сваёй працай, бо «каб мець што даць патрабуючым […] бясспрэчна, нам трэба старанна працаваць […]. Гэты прынцып жыцця карысны не толькі для ўтаймавання цела, але і для любові да бліжняга, каб праз нас Бог мог даваць нашым слабым братам тое, што ім неабходна» [42] . 54. У Цэзарэі, дзе Базыль быў біскупам, ён пабудаваў месца, вядомае як Базыліяда , дзе былі жыллёвыя памяшканні, бальніцы і школы для бедных і хворых. Такім чынам, манах быў не толькі аскетам, але і слугою. Базыль паказаў, што каб быць блізка да Бога, трэба быць блізка да ўбогіх. Канкрэтная любоў была крытэрыем святасці. Малітва і апека, сузіранне і лячэнне, пісьменніцтва і гасціннасць ‒ усё было выразам той самай любові да Хрыста. 55. На Захадзе св. Бэнэдыкт з Нурсіі напісаў Рэгулу, якая легла ў аснову еўрапейскай манаскай духоўнасці. Гасціннасць да ўбогіх і пілігрымаў займае ў ім першае месца: «Убогіх і пілігрымаў трэба прымаць з усім клопатам і гасціннасцю, бо менавіта ў іх мы прымаем Хрыста» [43] . Гэта былі не проста словы: стагоддзямі бэнэдыктынскія кляштары былі месцамі прытулку для ўдоваў, пакінутых дзяцей, пілігрымаў і жабракоў. Для Бэнэдыкта жыццё ў супольнасці было школай міласэрнасці. Фізічная праца мела не толькі практычную функцыю, але і фармавала сэрца для служэння. Праз тое, што манахі дзялілі між сабой усё, што мелі, даглядалі хворых і выслухоўвалі найбольш уразлівых, яны рыхтаваліся да прыняцця Хрыста ў асобе беднага і чужынца. Гасціннасць бэнэдыктынскіх кляштараў застаецца і сёння знакам Касцёла, які адчыняе свае дзверы, прымае без пытанняў і лечыць, не патрабуючы нічога ўзамен. 56. З часам бэнэдыктынскія кляштары сталі месцамі, якія супрацьстаялі культуры выключэння. Манахі апрацоўвалі зямлю, выраблялі прадукты харчавання, рабілі лекі і проста ахвяроўвалі гэта найбольш патрабуючым. Іх ціхая праца была закваскай новай цывілізацыі, дзе ўбогія былі не праблемай, якую трэба вырашаць, а братамі і сёстрамі, якіх трэба прыняць. Правіла ахвярнасці, сумеснай працы і дапамогі слабым стварала салідарную эканоміку, у адрозненне ад логікі назапашвання. Сведчанне такога манаскага жыцця паказвала, што добраахвотная беднасць – гэта далёка не вартае жалю існаванне, а шлях да свабоды і еднасці. Манахі не абмяжоўваліся дапамогай бедным: яны станавіліся іх бліжнімі, братамі ў адным Пану. У келлях і кляштарах сфармавалася містыка Божай прысутнасці ў малых. 57. Кляштары былі не толькі крыніцай матэрыяльнай дапамогі, але адыгрывалі фундаментальную ролю ў культурнай і духоўнай фармацыі найбяднейшых. У часы эпідэміі, вайны і голаду яны былі месцамі, дзе патрабуючыя знаходзілі не толькі хлеб і лекі, але таксама годнасць і слова. Менавіта там выхоўваліся сіроты, атрымлівалі падрыхтоўку рамеснікі, а земляробы вучыліся сельскагаспадарчым тэхнікам і чытанню. Веды перадаваліся як дар і адказнасць. Абат быў і настаўнікам, і бацькам, а школа пры кляштары – месцам вызвалення праз праўду. Сапраўды, як піша Ян Касіян, манах павінен вылучацца «пакорай сэрца [...], што вядзе не да ведаў, якія надзімаюць пыхай, а да ведаў, якія асвятляюць праз паўнату любові» [44] . Праз фармацыю сумлення і перадачу мудрасці манахі ўносілі свой уклад у хрысціянскую педагогіку інклюзіўнасці. Культура, прасякнутая верай, удзялялася з прастатой. Веды, асветленыя любоўю, станавіліся служэннем. Такім чынам, манаскае жыццё адкрывалася як стыль святасці і канкрэтны спосаб перамены грамадства. 58. Манаская традыцыя вучыць, што малітва і любоў, цішыня і служэнне, келлі і шпіталі ўтвараюць адзіную духоўную тканіну. Кляштар – гэта месца, дзе слухаюць і дзейнічаюць, хваляць Бога і дзеляцца дабротамі. Святы Бэрнард з Клерво, вялікі цыстэрцыянскі рэфарматар, «настойваў на неабходнасці цвярозага і ўмеркаванага жыцця, як за сталом, так і ў манаскім адзенні і кляштарных будынках, а таксама рэкамендаваў падтрымліваць убогіх і апекавацца імі» [45] . Спачуванне ён лічыў не дадатковым выбарам, а сапраўдным шляхам наследавання Хрыста. Такім чынам, манаскае жыццё, калі трывае ў вернасці свайму першапачатковаму пакліканню, паказвае, што Касцёл напоўніцу з’яўляецца абранніцай Пана толькі тады, калі таксама з’яўляецца сястрой убогіх. Кляштар – гэта не толькі сховішча ад свету, але і школа, у якой чалавек вучыцца лепш яму служыць. Там, дзе манахі адчынілі свае дзверы ўбогім, Касцёл з пакорай і рашучасцю паказаў, што сузіранне не выключае міласэрнасці, але мае ў ёй патрэбу як у найчысцейшым сваім плёне. Вызваленне вязняў 59. З апостальскіх часоў Касцёл успрымаў вызваленне прыгнечаных як знак Божага Валадарства. Сам Езус на пачатку сваёй публічнай місіі абвясціў: «Дух Пана на Мне, бо Ён намасціў Мяне абвяшчаць Добрую Навіну ўбогім, паслаў Мяне абвяшчаць вызваленне палонным» ( Лк 4, 18). Першыя хрысціяне, нават у цяжкіх умовах, маліліся за сваіх зняволеных братоў і сясцёр і дапамагалі ім, паводле сведчанняў Дзеяў Апосталаў (пар. 12, 5; 24, 23) і розных твораў Айцоў Касцёла. Гэтая місія вызвалення працягвалася скрозь стагоддзі праз канкрэтныя дзеянні, асабліва калі трагедыя рабства і зняволення закранула цэлыя грамадствы. 60. У канцы XII і на пачатку XIII стагоддзяў, калі многія хрысціяне былі схоплены ў Міжземнамор’і і забраныя ў палон падчас войнаў, узніклі два ордэны: Ордэн Найсвяцейшай Тройцы для выкупу нявольнікаў (трынітарыі), заснаваны св. Янам дэ Мата і св. Феліксам дэ Валуа, і Ордэн Найсвяцейшай Панны Марыі Міласэрнай (мерседарыі), заснаваны св. Пятром Наласка пры падтрымцы св. Раймунда Пеньяфорцкага, дамініканіна. Асаблівай харызмай гэтых супольнасцяў кансэкраваных асобаў было вызваленне хрысціянаў, за якіх яны аддавалі сваю маёмасць [46] і часта ахвяроўвалі ўзамен уласнае жыццё. Трынітарыі з дэвізам Gloria Tibi Trinitas et captivis libertas (Хвала Табе, Тройца, а палонным – свабода) і мерседарыі, якія дадалі да манаскіх абяцанняў убоства, паслухмянасці і чыстасці чацвёртае абяцанне [47] , сведчылі, што міласэрнасць можа быць гераічнай. Вызваленне вязняў – гэта выраз трынітарнай любові Бога, які вызваляе не толькі з духоўнай няволі, але і з канкрэтнага ўціску. Жэст выкупу з няволі і палону разглядаецца як працяг адкупленчай ахвяры Хрыста, чыя кроў з’яўляецца цаной нашага адкуплення (пар. 1 Кар 6, 20). 61. Першапачатковая духоўнасць гэтых ордэнаў была глыбока спалучана з сузіраннем крыжа. Хрыстус з’яўляецца, у самым поўным значэнні гэтага слова, Адкупіцелем вязняў, і Касцёл, Яго цела, працягвае гэтую таямніцу ў часе [48] . Законнікі разглядалі выкуп не як палітычную ці эканамічную дзейнасць, а як квазілітургічны акт, сакрамэнтальнае ахвяраванне саміх сябе. Многія аддавалі сябе, каб замяніць вязняў, літаральна выконваючы запаведзь: «Ніхто не мае большай любові за тую, калі хто жыццё сваё аддае за сяброў сваіх» ( Ян 15, 13). Традыцыя гэтых ордэнаў не скончылася. Наадварот, стала натхненнем для новых формаў дзейнасці перад абліччам сучасных праяў няволі: гандаль людзьмі, прымусовая праца, сексуальная эксплуатацыя, розныя формы залежнасці [49] . Хрысціянская міласэрнасць, калі рэалізуецца ў жыцці, вызваляе. І місія Касцёла, калі ён верны свайму Пану, заключаецца ў тым, каб заўсёды абвяшчаць вызваленне. Нават сёння, калі «мільёны людзей, – дзяцей, мужчын і жанчын усіх узростаў, – пазбаўлены свабоды і вымушаны жыць ва ўмовах, падобных да нявольніцтва» [50] , тая спадчына працягваецца гэтымі ордэнамі і іншымі ўстановамі і кангрэгацыямі, якія працуюць на перыферыях гарадоў, у зонах канфліктаў і ў міграцыйных калідорах. Калі Касцёл схіляецца, каб разарваць новыя кайданы, якія скоўваюць бедных, ён становіцца пасхальным знакам. 62. Нельга завяршыць гэтае разважанне пра асобаў, пазбаўленых свабоды, не ўзгадаўшы пра зняволеных, якія ўтрымліваюцца ў розных пенітэнцыярных установах і цэнтрах утрымання пад вартай. У сувязі з гэтым успомнім словы папы Францішка, скіраваныя да групы вязняў: «Прыход у турму заўсёды з’яўляецца важным для мяне момантам, бо турма – месца вялікай чалавечнасці […]. Чалавечнасці, якая праходзіць выпрабаванні, часам стомленая цяжкасцямі, пачуццём віны, асуджэннем, непаразуменнямі, цярпеннем, але ў той жа час поўнай сілы, жадання прабачэння, жадання адкуплення» [51] . Гэтае жаданне, між іншым, было падхоплена і ордэнамі, дзейнасць якіх была прысвечана выкупу вязняў як пераважнаму служэнню Касцёлу. Як абвясціў св. Павел: «Дзеля свабоды вызваліў нас Хрыстус!» ( Гал 5, 1). І гэтая свабода не толькі ўнутраная: яна выяўляецца ў гісторыі як любоў, якая клапоціцца і вызваляе з любых путаў няволі. Сведкі евангельска га ўбоства 63. У XIII стагоддзі, сутыкнуўшыся з ростам гарадоў, канцэнтрацыяй багацця і з’яўленнем новых формаў убоства, Дух Святы даў пачатак новаму тыпу кансэкрацыі ў Касцёле: жабрацкім ордэнам. У адрозненне ад стабільнай манаскай мадэлі, жабракі прынялі вандроўны лад жыцця, без асабістай ці агульнай маёмасці, цалкам даверыўшыся Провіду. Яны не абмяжоўваліся служэннем убогім: яны станавіліся ўбогімі разам з імі. Яны бачылі ў горадзе новую пустыню, а ў маргіналізаваных людзях – новых духоўных настаўнікаў. Такія ордэны, як францішкане, дамінікане, аўгустыяне і кармэліты ўвасаблялі евангельскую рэвалюцыю, у якой просты і ўбогі лад жыцця стаў прарочым знакам для місіі, адраджаючы досвед першай хрысціянскай супольнасці (пар. Дз 4, 32). Сведчанне жабрацкіх ордэнаў кідала выклік як раскошы духавенства, так і халоднасці гарадскога грамадства. 64. Святы Францішак Асізскі стаў сімвалам гэтай духоўнай вясны. Прыняўшы ўбоства, ён хацеў наследаваць Хрыста ўбогага, голага і ўкрыжаванага. У сваёй Рэгуле ён просіць, каб «браты нічога не набывалі сабе ва ўласнасць, ні дома, ні зямлі, ні чаго-небудзь іншага. І як пілігрымы і чужынцы ў гэтым свеце, служачы Пану ва ўбостве і пакоры, няхай з даверам ідуць і просяць міласціну; і не саромеюцца, бо Пан стаў убогі м дзеля нас на гэтым свеце» [52] . Яго жыццё было пастаянным адрачэннем: ад палаца да пракажонага, ад красамоўства да маўчання, ад валодання да самаахвярнасці. Францішак заснаваў не арганізацыю сацыяльнага абслугоўвання, а евангельскую братэрскую супольнасць. У бедных ён бачыў братоў і жывыя вобразы Пана. Ягонай місіяй было прабыванне з імі з-за салідарнасці, якая пераадольвала адлегласці, з-за любові, якая ўмела спачуваць. Убоства Францішка – гэта неад’емная частка адносінаў: яно падштурхоўвала яго стаць бліжнім, роўным, нават меншым. Яго святасць вырасла з пераканання, што па-сапраўднаму прыняць Хрыста можна толькі праз шчодрае прысвячэнне сябе братам. 65. Святая Клара Асізская, натхнёная Францішкам, заснавала Ордэн Убогіх Жанчын, якіх пазней назвалі кларыскамі. Яе духоўная барацьба заключалася ў верным падтрыманні ідэалу радыкальнага ўбоства. Яна адкінула папскія прывілеі, якія маглі б гарантаваць яе кляштару матэрыяльную бяспеку, і дзякуючы сваёй рашучасці атрымала ад папы Грыгорыя IX так званы Privilegium Paupertatis , які гарантаваў права жыць без валодання матэрыяльнымі дабротамі [53] . Гэты выбар паказвае яе поўны давер да Бога і разуменне таго, што добраахвотнае ўбоства з’яўляецца формай свабоды і прароцтва. Клара вучыла сваіх сясцёр, што Хрыстус – іх адзіная спадчына, нішто не павінна зацямняць еднасць з Ім. Яе малітоўнае і ўкрытае жыццё было гучным супрацівам свецкасці і маўклівай абаронай убогіх і забытых. 66. Святы Дамінік дэ Гусман, сучаснік Францішка, заснаваў Ордэн Прапаведнікаў, з іншай харызмай, але з тым жа радыкалізмам. Ён хацеў абвяшчаць Евангелле з аўтарытэтам, які грунтуецца на жыцці ва ўбостве. Ён быў перакананы, што Праўда патрабуе паслядоўных сведкаў. Прыклад убогага жыцця спадарожнічаў прапаведванню Слова. Вызваленыя ад цяжару зямных дабротаў, браты дамінікане маглі лепш прысвяціць сябе сваёй асноўнай справе – прапаведаванню. Яны ішлі ў гарады, асабліва тыя, дзе былі ўніверсітэты, каб вучыць Божай праўдзе [54] . У сваёй залежнасці ад іншых яны паказвалі, што вера не навязваецца, а прапануецца. І, жывучы сярод бедных, яны вучыліся праўдзе Евангелля «знізу», як вучні прыніжанага Хрыста. 67. Такім чынам, жабрацкія ордэны былі жывым адказам на выключэнне і абыякавасць. Яны не прапаноўвалі непасрэдных сацыяльных рэформаў, а хутчэй асабістае і супольнае навяртанне да логікі Валадарства. Беднасць была не наступствам матэрыяльнага недахопу, але свабодным выбарам: стаць малым, каб прыняць маленькіх. Тамаш з Чэлана сказаў пра Францішка: «Ён паказваў, як моцна любіць бедных [...]. Ён часта распранаўся, каб апрануць бедных, да якіх імкнуўся стаць падобным» [55] . Жабрацкія ордэны сталіся сімвалам пілігрымуючага, пакорнага і братэрскага Касцёла, які жыве сярод убогіх не дзеля празелітызму, а па прычыне сваёй тоеснасці. Гэтыя ордэны вучаць, што Касцёл ёсць святлом толькі тады, калі ён здымае з сябе ўсё, і што святасць прыходзіць праз пакорнае сэрца, ахвяраванае найменшым сярод нас. Касцёл і адукацыя бедных 68. Звяртаючыся да групы выхаваўцаў, папа Францішак нагадаў, што адукацыя заўсёды была адной з найвышэйшых праяў хрысціянскай любові: «Вашая місія поўная перашкод, але і радасці. […] Місія любові, бо нельга вучыць, не маючы любові» [56] . Таму з самых ранніх часоў хрысціяне разумелі, што веды вызваляюць, даюць годнасць і набліжаюць да праўды. Для Касцёла навучанне бедных было актам справядлівасці і веры. Натхнёны прыкладам Настаўніка, які вучыў людзей боскім і чалавечым праўдам, ён узяў на сябе місію выхавання дзяцей і моладзі, асабліва найбяднейшых, у праўдзе і любові. Гэтая місія набыла форму пасля заснавання кангрэгацый, прысвечаных паўсюднай адукацыі. 69. У XVI стагоддзі св. Юзаф Каласанс, узрушаны недахопам адукацыі і выхавання сярод беднай моладзі ў Рыме, заснаваў першую ў Еўропе бясплатную публічную школу, якую размясціў у некалькіх пакоях, што прылягалі да касцёла св. Дароты ў Трастэвэрэ. Яна была зярняткам, з якога пазней нарадзіўся і развіваўся, нягледзячы на цяжкасці, Ордэн Убогіх Рэгулярных Духоўных Маці Божай Пабожных Школаў, вядомы як піяры, мэтай якога было перадаваць моладзі «не толькі свецкія веды, але таксама мудрасць Евангелля, навучаючы распазнаваць у падзеях свайго жыцця і ў гісторыі любячае дзеянне Бога Стварыцеля і Адкупіцеля» [57] . Сапраўды, мы можам лічыць гэтага адважнага святара «сапраўдным заснавальнікам сучаснай каталіцкай школы, накіраванай на інтэгральную фармацыю чалавека і адкрытай для ўсіх» [58] . Натхнёны тым жа клопатам, у XVII ст. св. Жан Батыст Сальскі, адчуваючы несправядлівасць, выкліканую выключэннем дзяцей рабочых і сялянаў з адукацыйнай сістэмы тагачаснай Францыі, заснаваў Кангрэгацыю Братоў Хрысціянскіх Школаў, ідэалам якой стала прапанова такім дзецям бясплатнай адукацыі, грунтоўнага выхавання і братэрскага асяроддзя. Жан Батыст Сальскі разглядаў вучэбны клас як прастору для развіцця чалавека, а таксама для навяртання. У яго школах спалучаліся малітва, метад, дысцыпліна і ўзаемадапамога. Кожнае дзіця лічылася ўнікальным дарам ад Бога, а навучанне – служэннем Божаму Валадарству. 70. У XIX ст., зноў жа ў Францыі, св. Марсэлен Шампанья заснаваў Інстытут Школьных Братоў Марыстаў. Святы «адчуваў духоўныя і адукацыйныя патрэбы свайго часу, асабліва бачыў рэлігійнае невуцтва і занядбанасць, перадусім моладзі» [59] , цалкам прысвяціў сябе ў эпоху, калі доступ да адукацыі ўсё яшчэ быў прывілеем нямногіх, місіі выхавання і евангелізацыі дзяцей і моладзі, асабліва тых, хто быў у найбольшай патрэбе. У тым жа духу ў Італіі св. Ян Боска пачаў вялікую салезіянскую справу, заснаваную на трох прынцыпах «прэвентыўнага метаду»: на розуме, рэлігіі і любові [60] . Благаслаўлёны Антоніа Расміні заснаваў Інстытут Міласэрнасці, у якім «інтэлектуальная» міласэрнасць поруч з «матэрыяльнай» міласэрнасцю і з «духоўна-пастырскай» міласэрнасцю як вяршыняй была прадстаўлена як неад’емны аспект любой дабрачыннай дзейнасці, мэтай якой было дабро і інтэгральнае развіццё асобы [61] . 71. Многія жаночыя кангрэгацыі былі пратаганістамі гэтай педагагічнай рэвалюцыі. Уршулянкі, сёстры з Таварыства Марыі Нашай Пані ( Notre-Dame ), Пабожныя Настаўніцы і многія іншыя кангрэгацыі, заснаваныя асабліва ў XVIII i XIX стагоддзях, займалі абшары, дзе адсутнічала дзяржава. Яны стваралі школы ў невялікіх вёсках, на ўскраінах і ў рабочых раёнах. Асаблівым прыярытэтам стала адукацыя дзяўчынак. Законніцы вучылі чытаць і пісаць, евангелізавалі, вырашалі практычныя пытанні паўсядзённага жыцця, развівалі праз мастацтва, а ў першую чаргу, фармавалі сумленне. Іх педагогіка была простай: блізкасць, цярплівасць, лагоднасць. Яны вучылі сваім жыццём, а не словамі. У часы шырока распаўсюджанай непісьменнасці і структурнай ізаляцыі гэтыя кансэкраваныя жанчыны былі маякамі надзеі. Іх місія: фармаваць сэрцы, вучыць думаць і ўмацоўваць годнасць. Спалучаючы пабожнае жыццё з адданасцю бліжнім, яны пераадольвалі пакінутасць пяшчотай, уласцівай тым, хто выхоўвае ў імя Хрыста. 72. Для хрысціянскай веры адукацыя бедных – не паслуга, а абавязак. Дзеці маюць права на веды як фундаментальную ўмову прызнання чалавечай годнасці. Адукацыя пацвярджае іх каштоўнасць, дае інструменты для пераўтварэння рэчаіснасці. Хрысціянская традыцыя лічыць веды Божым дарам і грамадскай адказнасцю. Хрысціянская адукацыя рыхтуе не толькі спецыялістаў, але людзей, адкрытых на дабро, прыгажосць і праўду. Такім чынам, каталіцкая школа, калі захоўвае вернасць сваёй назве, з’яўляецца прасторай інклюзіі, інтэгральнай фармацыі і развіцця чалавецтва. Спалучаючы веру і культуру, яна сее зерне будучыні, шануе вобраз Бога і будуе лепшае грамадства. Суправаджэнне мігрантаў 73. Досвед міграцыі з’яўляецца неад’емнай часткай гісторыі Божага народу. Абрагам выпраўляецца ў дарогу, не ведаючы, куды ідзе; Майсей вядзе пілігрымуючы народ праз пустыню; Марыя і Юзаф уцякаюць з Дзіцяткам у Егіпет. Сам Хрыстус, які «да свайго прыйшоў, і свае Яго не прынялі» (пар. Ян 1, 11), жыў сярод нас як падарожны. Па гэтай прычыне Касцёл заўсёды распазнаваў у мігрантах жывую прысутнасць Пана, які ў Дзень Суда скажа тым, хто праваруч ад Яго: «Я быў падарожным, і вы прынялі Мяне» ( Мц 25, 35). 74. У XIX ст., калі мільёны еўрапейцаў эмігравалі ў пошуках лепшых умоў жыцця, два вялікія святыя вылучыліся пастырскай апекай мігрантаў: св. Ян Хрысціцель Скалабрыні і св. Францішка Ксаверыя Кабрыні. Скалабрыні, біскуп П’ячэнцы, заснаваў Місіянераў святога Карла Барамея, каб суправаджаць мігрантаў, прапаноўваць ім духоўную, юрыдычную і матэрыяльную дапамогу. Ён бачыў у мігрантах адрасатаў новай евангелізацыі, папярэджваў пра небяспеку эксплуатацыі і страты веры ў чужых землях. Шчодра адказваючы на харызму, якую даў яму Пан, «Скалабрыні глядзеў далей, наперад, у кірунку свету і Касцёла без бар’ераў, дзе ніхто не адчувае сябе чужым» [62] . Святая Францішка Кабрыні нарадзілася ў Італіі і натуралізавалася як амерыканка, была першай грамадзянкай ЗША, абвешчанай святой. Каб выканаць сваю місію дапамогі мігрантам, яна некалькі разоў перасякала Атлантыку і, «узброеная незвычайнай адвагай, з нічога стварала школы, шпіталі, дзіцячыя дамы для вялікай колькасці малазабяспечаных асобаў, якія прыбывалі ў новы свет у пошуках працы, не ведаючы мовы і не маючы сродкаў для годнай інтэграцыі ў амерыканскае грамадства і часта становячыся ахвярамі нядобрасумленных людзей. Яе мацярынскае сэрца, якое не ведала спакою, дасягала іх усюды: у хацінах, у турмах, у шахтах» [63] . У Юбілейны 1950 год папа Пій XII абвясціў яе заступніцай усіх мігрантаў [64] . 75. Традыцыя дзейнасці Касцёла на карысць мігрантаў і разам з імі надалей працягваецца, і сёння гэтае служэнне выяўляецца ў такіх ініцыятывах, як цэнтры прыёму бежанцаў, місіі ў памежных рэгіёнах, дзейнасць Caritas Internationalis і іншых устаноў. Сучасны Настаўніцкі Інстытут Касцёла выразна пацвярджае гэтае абавязацельства. Папа Францішак нагадаў, што місія Касцёла ў дачыненні да мігрантаў і бежанцаў яшчэ шырэйшая, настойваючы на тым, што «адказ на выклік сучаснай міграцыі можна падсумаваць чатырма дзеясловамі: вітаць, абараняць, падтрымліваць і інтэграваць. Але гэтыя дзеясловы тычацца не толькі мігрантаў і бежанцаў. Яны выражаюць місію Касцёла ў дачыненні да ўсіх тых, хто жыве на экзістэнцыяльных перыферыях, якіх трэба вітаць, абараняць, падтрымліваць і інтэграваць» [65] . І ён таксама сказаў: «Кожны чалавек – дзіця Божае! Вобраз Хрыста, які адбіваецца ў кожным чалавеку! Таму трэба, каб мы ўбачылі першымі і дапамаглі іншым убачыць у мігранце і бежанцы не толькі праблему, якую трэба вырашаць, але брата і сястру, якіх трэба прыняць, паважаць і любіць, магчымасць, якую дае нам Провід, каб зрабіць свой унёсак у будаванне больш справядлівага грамадства, больш дасканалай дэмакратыі, больш салідарнай краіны, больш братэрскага свету і больш адкрытай хрысціянскай супольнасці згодна з Евангеллем» [66] . Касцёл, як маці, спадарожнічае тым, хто ідзе. Там, дзе свет бачыць пагрозы, ён бачыць дзяцей; дзе ўзводзяцца сцены, ён будуе масты. Ён ведае, што абвяшчэнне Евангелля праўдзівае толькі тады, калі яно ўвасоблена ў жэсты блізкасці і гасціннасці. І ён ведае, што ў кожным адкінутым мігранце сам Хрыстус стукае ў дзверы супольнасці. Побач з самы мі малымі сярод нас 76. Хрысціянская святасць часта квітнее ў самых забытых і параненых месцах чалавецтва. Найбяднейшыя з бедных пазбаўлены не толькі маёмасці, але і голасу, і прызнання сваёй годнасці, але займаюць асаблівае месца ў сэрцы Бога. Яны – умілаваныя Евангелля, спадкаемцы Валадарства (пар. Лк 6, 20). Менавіта ў іх Хрыстус сёння церпіць і ўваскрасае. Менавіта ў іх Касцёл наноў адкрывае пакліканне да таго, каб паказаць сваё найбольш праўдзівае аблічча. 77. Святая Тэрэза з Калькуты, кананізаваная ў 2016 годзе, стала ўніверсальным сімвалам любові, якая даходзіць да межаў магчымасці дзеля самых убогіх, адрынутых грамадствам. Заснавальніца Місіянерак Любові прысвяціла сваё жыццё паміраючым на індыйскіх вуліцах. Яна збірала пакінутых, абмывала іх раны і суправаджала да моманту смерці з пяшчотай, якая была малітвай. Яе любоў да найбяднейшых з бедных спрычынілася да таго, што яна не толькі клапацілася пра матэрыяльныя патрэбы, але і абвяшчала ім Добрую Навіну Евангелля: «Мы хочам абвяшчаць убогім Добрую Навіну, што Бог іх любіць, што мы іх любім, што яны важныя для нас, што яны створаны той жа любячай рукой Бога, каб любіць і быць любімымі. Нашыя ўбогія – цудоўныя людзі, вельмі добрыя, ім не патрэбны наш жаль і спачуванне, але любоў, якая разумее іх. Ім патрэбна наша павага, ім трэба, каб мы ставіліся да іх з годнасцю» [67] . Усё гэта нарадзілася з глыбокай духоўнасці Маці Тэрэзы, якая лічыла служэнне найбяднейшым плёнам малітвы і любові, крыніцай сапраўднага спакою, як нагадваў папа Ян Павел II пілігрымам, якія прыехалі ў Рым на яе беатыфікацыю: «Адкуль Маці Тэрэза чэрпала сілу, каб цалкам прысвяціць сябе служэнню іншым? Яна знаходзіла яе ў малітве і ціхім сузіранні Езуса Хрыста, Яго Святога Аблічча, Яго Найсвяцейшага Сэрца. Яна сама сказала: «Плён цішыні – малітва, плён малітвы – вера, плён веры – любоў, плён любові – служэнне, плён служэння – супакой» […]. Малітва напоўніла яе сэрца супакоем Хрыста і дазволіла ёй выпраменьваць гэты супакой на іншым» [68] . Тэрэза не лічыла сябе філантропам або актывісткай, але абранніцай укрыжаванага Хрыста, якая служыла з ахвярнай любоўю сваім церпячым братам і сёстрам. 78. У Бразіліі св. Дульсэ ад Убогіх, вядомая як «добры анёл з Баі», увасабляла той жа евангельскі дух, надаўшы яму бразільскія рысы. Папа Францішак, спасылаючыся на яе і на дзвюх іншых законніц, кананізаваных падчас той жа цэлебрацыі, прыгадаў іх любоў да найбольш маргіналізаваных членаў грамадства і сказаў, што новыя святыя «паказваюць нам, што кансэкраванае жыццё – гэта шлях любові на экзістэнцыяльных перыферыях свету» [69] . Сястра Дульсэ адказвала на нястачу крэатыўнасцю, на перашкоды – пяшчотай, на патрэбы – непахіснай верай. Яна пачала з таго, што прымала хворых у куратніку, і так заснавала адну з найбуйнейшых сацыяльных службаў у краіне. Яна дапамагала тысячам людзей штодня, ніколі не губляючы сваёй далікатнасці. Яна збяднела разам з беднымі – з любові да найбольш Убогага. Жыла сціпла, горача малілася і служыла з радасцю. Яе вера не аддаляла яе ад свету, але вяла ўсё глыбей у пакуты самых малых сярод нас. 79. Можна таксама ўспомніць св. Бэнэдыкта Мэні і Шпітальных Сясцёр Найсвяцейшага Сэрца Езуса, якія працавалі з людзьмі з інваліднасцю; св. Шарля дэ Фуко ў супольнасцях Сахары; св. Кацярыну Дрэксэль, якая суправаджала найбольш абяздоленыя групы насельніцтва Паўночнай Амерыкі; сястру Эмануэль, якая працавала са збіральнікамі смецця ў раёне Эзбет Эль-Нахль у Каіры; і многіх іншых. Кожны па-свойму адкрыў, што людзі ў галечы – не толькі аб’екты нашага спачування, але і настаўнікі Евангелля. Гаворка не пра тое, каб «прынесці» ім Бога, а каб сустрэць Яго ў іх. Усе прыклады святых вучаць нас, што служэнне бедным – гэта не жэст «зверху ўніз», а сустрэча паміж роўнымі, дзе аб’яўляецца і ўшаноўваецца Хрыстус. Святы Ян Павел II нагадаў нам, што «асаблівым чынам Хрыстус прысутны ў людзях убогіх, таму Касцёл абавязаны рабіць на карысць іх „прэферэнцыйны выбар”» [70] . Таму Касцёл, клапатліва схіляючыся над убогімі, прымае сваю найбольш узнёслую паставу. Народныя рухі 80. Мы павінны таксама прызнаць, што на працягу стагоддзяў хрысціянскай гісторыі дапамога бедным і барацьба за іх правы закраналі не толькі асобных людзей, сем’і, установы або законніцкія супольнасці. Існавалі і існуюць розныя народныя рухі, якія складаліся са свецкіх людзей і ўзначальваліся народнымі лідарамі, якія часта рабіліся аб’ектам падазронасці і нават пераследу. Я маю на ўвазе «супольнасць асобаў, не адзінак, але тканку супольнасці ўсіх і для ўсіх, якая не можа дазволіць найбольш бедным і найбольш неабароненым слаям насельніцтва заставацца ззаду […] Народныя лідэры – гэта тыя, хто здольны актывізаваць усіх. […] Яны не перашкаджаюць ім і не палохаюцца зраненых маладых людзей, якія спазнаюць крыж» [71] . 81. Гэтыя народныя лідары ведаюць, што салідарнасць «таксама азначае барацьбу са структурнымі прычынамі беднасці: няроўнасцю, адсутнасцю працы, зямлі і жылля, адмовай у сацыяльных і працоўных правах. Гэта азначае супрацьстаянне разбуральным наступствам імперыі грошай [...]. Салідарнасць, зразуметая ў яе глыбокім сэнсе, ёсць спосабам стварэння гісторыі, і менавіта гэта робяць народныя рухі» [72] . Таму, калі розныя ўстановы думаюць аб патрэбах бедных, неабходна, «каб яны мелі на ўвазе народныя рухі і ажыўлялі мясцовыя, нацыянальныя і міжнародныя структуры кіравання тым патокам маральнай энергіі, які нараджаецца з удзелу выключаных у будаўніцтве агульнага лёсу» [73] . Народныя рухі, па сутнасці, заклікаюць нас пераадолець «канцэпцыю сацыяльнай палітыкі, задуманай як палітыка для бедных, але ніколі з беднымі і ніяк не палітыка (якая паходзіць ад) бедных, а тым больш не ўключана ў праект, які яднае народы» [74] . Калі палітыкі і спецыялісты не прыслухоўваюцца да іх, «дэмакратыя атрафіруецца, характарызуецца наміналізмам, фармальнасцю, губляе сваю прадстаўнічасць, адрываецца ад рэчаіснасці, таму што яна пакідае людзей па-за іх штодзённай барацьбой за годнасць, у будаванні іх лёсу» [75] . Тое ж самае трэба сказаць і пра інстытуты Касцёла. РАЗДЗЕЛ ЧАЦВЁРТЫ ГІСТОРЫЯ, ЯКАЯ ПРАЦЯГВАЕЦЦА Стагоддзе сацыяльнага вучэння Касцёла 82. Паскарэнне тэхналагічных і сацыяльных перамен апошніх двух стагоддзяў, поўнае трагічных супярэчнасцяў, не толькі паўплывала на ўбогіх, але выклікала ў іх асяроддзі дэбаты і роздумы. Рухі рабочых, жанчын і моладзі, а таксама барацьба з расавай дыскрымінацыяй прывялі да новага ўсведамлення годнасці тых, хто знаходзіцца на ўзбоччы грамадства. Унёсак сацыяльнага вучэння Касцёла таксама паходзіць з народнай традыцыі, аб чым нельга забываць: немагчыма ўявіць пераасэнсаванне хрысціянскага Аб’яўлення ў кантэксце сучасных сацыяльных, працоўных, эканамічных і культурных умоў без свецкіх хрысціянаў, якія змагаюцца з выклікамі свайго часу. Побач з імі працавалі законнікі і законніцы, якія сведчылі пра Касцёл, які рухаўся наперад новымі шляхамі. Эпахальныя змены, з якімі мы сутыкаемся сёння, павялічваюць неабходнасць пастаяннага ўзаемадзеяння паміж ахрышчанымі і Настаўніцкім Інстытутам Касцёла, паміж грамадзянамі і экспертамі, паміж людзьмі і ўстановамі. У прыватнасці, трэба яшчэ раз прызнаць, што рэальнасць лепш за ўсё бачна з ускраін, і што ўбогія з’яўляюцца суб’ектамі ўнікальных ведаў, неабходных Касцёлу і чалавецтву. 83. Настаўніцкі Інстытут Касцёла цягам апошніх 150 гадоў прапануе сапраўдную скарбніцу навучання пра ўбогіх. Біскупы Рыма агучылі новае разуменне, даследаванае праз касцёльнае распазнаванне. Напрыклад, у энцыкліцы Rerum Novarum (1891) Леў XIII закрануў праблему працы, выкрыўшы невыноснае становішча многіх прамысловых рабочых і прапанаваўшы ўстанаўленне справядлівага грамадскага ладу. Іншыя Пантыфікі таксама выказваліся ў гэтым кірунку. У энцыкліцы Mater et Magistra (1961) св. Ян XXIII прапагандаваў справядлівасць у глабальным маштабе: багатыя краіны не маглі заставацца абыякавымі да краін, прыгнечаных голадам і беднасцю; ён заклікаў заможныя краіны шчодра дапамагаць убогім усімі сваімі дабротамі. 84. Другі Ватыканскі Сабор распачаў новы фундаментальны этап касцёльнага распазнавання ў дачыненні да ўбогіх у святле Аб’яўлення. Нягледзячы на тое, што гэтая тэма была другараднай у падрыхтоўчых дакументах, ужо ў радыёпасланні ад 11 верасня 1962 г., праз месяц пасля адкрыцця Сабору, св. Ян XXIII звярнуў на яе ўвагу сваімі незабыўнымі словамі: «Касцёл паказвае сябе такім, які ён ёсць, і такім, якім хоча быць, як Касцёл усіх і асабліва Касцёл убогіх» [76] . І якраз тады інтэнсіўная праца біскупаў, тэолагаў і экспертаў, заклапочаных абнаўленнем Касцёла пры падтрымцы св. Яна XXIII дала Сабору новы напрамак. Фундаментальная прырода гэтага ферменту была хрыстацэнтрычнай і, такім чынам, дактрынальнай, а не толькі сацыяльнай. Шматлікія Айцы Сабору, сапраўды, спрыялі ўмацаванню падыходу, які выдатна выказаў кардынал Леркаро ў яго памятнай прамове 6 снежня 1962 г., што «таямніца Хрыста ў Касцёле заўсёды была і ёсць, але сёння гэта асабліва таямніца Хрыста ва ўбогіх» [77] . Далей ён сказаў, што «гэта не проста адна з тэм сярод іншых, але ў пэўным сэнсе адзіная тэма Другога Ватыканскага Сабору» [78] . Арцыбіскуп Балонні, рыхтуючы тэкст сваёй прамовы, занатаваў: «Гэта гадзіна ўбогіх, мільёнаў убогіх па ўсёй зямлі, гэта гадзіна таямніцы Касцёла, маці ўбогіх, гэта гадзіна таямніцы Хрыста, асабліва ва ўбогіх» [79] . Такім чынам, з’явілася неабходнасць новага бачання Касцёла, больш простага і стрыманага, якое б ахоплівала ўвесь Божы народ і яго гістарычную постаць. Каб Касцёл быў больш падобны да свайго Пана, чым да свецкіх уладаў, і імкнуўся заахвоціць чалавецтва да канкрэтнага ўдзелу ў вырашэнні вялікай праблемы беднасці ў свеце. 85. Святы Павел VI, адкрываючы другую сесію Сабору, узняў тэму, агучаную сваім папярэднікам, а менавіта, што Касцёл з асаблівай увагай глядзіць «на ўбогіх, патрабуючых, церпячых, галодных, зняволеных, гэта значыць, глядзіць на ўсё чалавецтва, якое пакутуе і плача: усе яны ‒ частка Касцёла паводле евангельскага закону» [80] . На генеральнай аўдыенцыі 11 лістапада 1964 г. ён падкрэсліў, што «ўбогія – гэта прадстаўнікі Хрыста», і, параўноўваючы вобраз Пана ў найбяднейшых з тым, які ўвасабляецца ў Папе, ён сцвердзіў: «Прадстаўніцтва Хрыста ў бедных універсальнае, кожны ўбогі адлюстроўвае Хрыста; прадстаўніцтва Папы асабістае. [...] Убогі і Пётр могуць быць той самай асобай, апранутай у падвойнае прадстаўніцтва: беднасці і ўлады» [81] . Такім чынам, унутраная сувязь паміж Касцёлам і ўбогімі была сімвалічна выказана з беспрэцэдэнтнай яснасцю. 86. У Пастырскай канстытуцыі Gaudium et s pes , якая грунтуецца на спадчыне Айцоў Касцёла, Сабор рашуча пацвярджае паўсюднае прызначэнне зямных дабротаў і грамадскую функцыю ўласнасці, якая з гэтага вынікае: «Бог прызначыў зямлю з усім, што яна змяшчае, на карысць усіх людзей і народаў, каб створаныя даброты даходзілі да ўсіх у справядлівай меры [...].Таму чалавек, карыстаючыся гэтымі дабротамі, павінен лічыць матэрыяльныя рэчы, якімі валодае, не толькі сваімі, але і агульнымі ў тым сэнсе, што яны павінны прыносіць карысць не толькі яму, але і іншым. Зрэшты, кожнаму чалавеку належыць права валодаць часткай дабротаў, дастатковай для яго і для ягонай сям’і. [...] Калі нехта апынецца ў крайняй патрэбе, ён мае права ўзяць сабе з багаццяў іншых неабходнае для жыцця. [...] Прыватная ўласнасць па сваёй сутнасці мае грамадскі характар, заснаваны на законе універсальнага прызначэння даброт. Калі гэты грамадскі характар ігнаруецца, нярэдка ўласнасць становіцца прычынай для хцівасці і сур’ёзных хваляванняў» [82] . Гэтае перакананне было адноўлена св. Паўлам VI у энцыкліцы Populorum progressio , дзе мы чытаем, што ніхто не можа лічыць сябе «ўпаўнаважаным пакідаць для свайго асабістага карыстання тое, што перавышае ягоныя патрэбы, калі іншым не хапае таго, што жыццёва неабходна» [83] . У сваёй прамове ў Арганізацыі Аб’яднаных Нацый папа Манціні прадставіўся як абаронца ўбогіх народаў [84] і заклікаў міжнародную супольнасць будаваць свет салідарнасці. 87. Дзякуючы св. Яну Паўлу II прэферэнцыйнае стаўленне Касцёла да ўбогіх умацавалася, прынамсі, у дактрынальнай сферы. У ягоным навучанні падкрэсліваецца, што выбар на карысць бедных – гэта «асаблівая форма першынства ў практыкаванні хрысціянскай любові, пра што сведчыць уся традыцыя Касцёла» [85] . У энцыкліцы Sollicitudo rei socialis ён далей піша, што сёння, улічваючы глабальны характар сацыяльнага пытання, «гэтая любоў, якая аддае перавагу ўбогім, і натхнёныя ёю рашэнні, не могуць не ахапіць велізарных мас галодных, жабракоў, бяздомных, пазбаўленых медыцынскай дапамогі, і, перш за ўсё, тых, хто не мае надзеі на лепшую будучыню: мы не можам не заўважаць існавання гэтых рэалій. Ігнараваць іх азначала б прыпадабняцца да «багацея», які рабіў выгляд, што не ведае Лазара, жабрака, які ляжаў каля ягонай брамы (пар. Лк 16, 19-31)» [86] . Навучанне св. Яна Паўла ІІ наконт працы таксама мае вялікае значэнне для нашага разважання пра актыўную ролю ўбогіх у аднаўленні Касцёла і грамадства, дзе варта адкінуць пэўны «патэрналізм», абмежаваны простым задавольваннем іх неадкладных патрэб. У энцыкліцы Laborem Exercens ён сцвярджае, што «чалавечая праца – гэта ключ, і напэўна найважнейшы, да ўсяго сацыяльнага пытання» [87] . 88. Перад абліччам шматлікіх крызісаў, якімі пазначаны пачатак трэцяга тысячагоддзя, тэксты Бэнэдыкта XVI набываюць больш выразны палітычны характар. Так, у энцыкліцы Caritas in veritate ён сцвярджае, што «чым больш плённа любім бліжняга, тым больш клапоцімся пра агульнае дабро, якое адпавядае таксама яго сапраўдным патрэбам» [88] . Ён таксама адзначае, што «голад вынікае не столькі з нястачы матэрыяльных рэсурсаў, колькі з недахопу грамадскіх рэсурсаў, сярод якіх найважнейшым з’яўляецца той, які мае інстытуцыйную прыроду. Гэта значыць, што не хапае структуры эканамічных інстытуцый, якія ў стане гарантаваць рэгулярны i адпаведны з пункту гледжання харчавання доступ да ежы i вады, і вырашаць пільныя сітуацыі, звязаныя з першымі патрэбамі і сапраўднымі прадуктовымі крызісамі, выкліканымі натуральнымі прычынамі або безадказнай унутранай і міжнароднай палітыкай» [89] . 89. Папа Францішак прызнаў, што, акрамя навучання біскупаў Рыма ў апошнія дзесяцігоддзі ўсё часцей выказваюць свае пазіцыі нацыянальныя і рэгіянальныя канферэнцыі біскупаў. Напрыклад, ён асабіста быў сведкам асаблівай руплівасці Лацінаамерыканскага епіскапату над пераасэнсаваннем адносінаў Касцёла і бедных. У паслясаборны перыяд амаль ва ўсіх лацінаамерыканскіх краінах адчувалася моцнае атаясамленне Касцёла з беднымі і актыўны ўдзел у іх вызваленні. Сэрца Касцёла было ўзрушана прысутнасцю такой колькасці бедных людзей, якія пакутавалі ад беспрацоўя, няпоўнай занятасці, несправядлівага ўзроўню заработкаў і былі вымушаныя жыць у крайняй галечы. Мучаніцтва св. Оскара Рамера, арцыбіскупа Сан-Сальвадора, было адначасова сведчаннем і жывым заклікам для Касцёла. Біскуп Рамэра перажываў цяжкае становішча вялізнай колькасці сваіх вернікаў як асабісты. Ён паставіў іх у цэнтр сваёй пастырскай апекі. Канферэнцыі Лацінаамерыканскага епіскапату ў Медэльіне, Пуэбла, Санта-Дамінга і Апарэсідзе таксама з’яўляюцца значнымі вехамі для ўсяго Касцёла. Я сам, шматгадовы місіянер у Перу, многім абавязаны гэтаму шляху касцёльнага распазнавання, які папа Францішак мудра звязаў са шляхам іншых мясцовых Касцёлаў, асабліва на глабальным Поўдні. Цяпер я хацеў бы вярнуцца да дзвюх канкрэтных тэмаў гэтага біскупскага навучання. Структуры граху, якія ствараюць беднасць і крайнюю няроўнасць 90. У Медэльіне біскупы выказаліся за прэферэнцыйную опцыю на карысць бедных: «Хрыстус, наш Збаўца, не толькі любіў бедных, але, „хоць быў багаты, стаў убогім”, жыў у беднасці, засяродзіў сваю місію на абвяшчэнні іх вызвалення і заснаваў свой Касцёл як знак гэтай беднасці сярод людзей. [...] Галеча такой колькасці братоў і сясцёр заклікае да справядлівасці, салідарнасці, сведчання, удзелу, працы і пераадолення, каб збаўчая місія, даручаная яму Хрыстом, магла быць цалкам выканана» [90] . Біскупы рашуча сцвярджаюць, што Касцёл, каб быць цалкам верным свайму пакліканню, павінен не толькі падзяляць становішча бедных, але стаяць на іх баку і актыўна займацца іх інтэгральным развіццём. Канферэнцыя ў Пуэбла, сутыкнуўшыся з пашырэннем беднасці ў Лацінскай Амерыцы, пацвердзіла рашэнне Медэльіна, выказваючыся адкрыта і прароча на карысць бедных, і ахарактарызавала структуры несправядлівасці як «сацыяльны грэх». 91. Міласэрнасць з’яўляецца сілай, якая змяняе рэальнасць, сапраўднай гістарычнай сілай перамены. Гэта крыніца, з якой павінны сілкавацца любыя намаганні па «вырашэнні структурных прычын убоства» [91] , і неабходна неадкладна іх распачаць. Таму спадзяюся, што «колькасць палітыкаў, здольных распачаць сапраўдны дыялог дзеля плённага аздараўлення глыбокіх каранёў, а не знешніх праяў хваробы нашага свету» [92] , будзе расці, бо трэба пачуць «крык цэлых народаў, найбольш бедных людзей зямлі» [93] . 92. Таму наш абавязак – працягваць асуджаць «дыктатуру эканомікі, якая забівае» і прызнаваць, што «ў той час, як прыбыткі некаторых растуць у геаметрычнай прагрэсіі, большасць штораз больш аддаляецца ад дабрабыту гэтай шчаслівай меншасці. Такі дысбаланс нараджае ідэалогія, якая абараняе абсалютную аўтаномію рынкаў і фінансавых спекуляцый. Таму яны адмаўляюць права кантролю з боку дзяржаў, якія пакліканы абараняць агульнае дабро . Усталёўваецца новая нябачная тыранія, часам віртуальная, якая навязвае свае аднабаковыя і бязлітасныя законы і правілы» [94] . Нягледзячы на тое, што хапае розных тэорый, якія спрабуюць апраўдаць цяперашні стан рэчаў або растлумачыць, што эканамічная развага кажа пачакаць, пакуль нябачныя сілы рынку ўсё вырашаць, годнасць кожнай асобы трэба паважаць зараз, а не заўтра, а цяжкае становішча такой колькасці людзей, якім адмаўляюць у гэтай годнасці, павінна ўвесь час непакоіць нашае сумленне. 93. У энцыкліцы Dilexit nos папа Францішак нагадаў, што сацыяльны грэх фармуецца як «структура граху» ў грамадстве, якое «часта становіцца элементам дамінуючай ментальнасці, якая лічыць нармальным або разумным тое, што на самай справе ёсць эгаізмам і абыякавасцю. Гэтую з’яву можна вызначыць як «сацыяльнае адчужэнне» [95] . Тады становіцца нармальным ігнараванне бедных і такое жыццё, быццам іх не існуе. І тады таксама здаецца разумным арганізаваць эканоміку такім чынам, каб ад людзей патрабаваліся ахвяры дзеля задавальнення патрэбаў тых, хто мае ўладу. Тымчасам для ўбогіх застаюцца толькі абяцанні «кропель», якія будуць прасочвацца ім, пакуль новы глабальны крызіс не верне ўсё на свае месцы. Гэта сапраўднае адчужэнне, якое вядзе да пошуку толькі тэарэтычных апраўданняў, а не да імкнення вырашыць сёння канкрэтныя праблемы церпячых. Святы Ян Павел II ужо выказаўся пра гэта: «Грамадства адчужана, калі ў сваіх формах сацыяльнай арганізацыі, вытворчасці і спажывання яно ўскладняе рэалізацыю гэтага дару і будаўніцтва гэтай міжчалавечай салідарнасці» [96] . 94. Нам трэба больш актыўна браць на сябе абавязак вырашэння структурных прычын беднасці. Гэта тэрміновая справа, з якой «нельга марудзіць (…) не толькі з увагі на прагматычныя патрабаванні, каб атрымаць вынікі і ўстанавіць лад у грамадстве, але каб вылечыць грамадства ад хваробы, якая робіць яго слабым і нягодным і вядзе толькі да новага крызісу. Планы дапамогі, якія задавольваюць толькі некаторыя пільныя патрэбы, трэба лічыць толькі як часовыя адказы» [97] . Адсутнасць справядлівасці «з’яўляецца коранем грамадскіх хвароб» [98] . Фактычна, як «часта сцвярджаецца, правы чалавека насамрэч не для ўсіх роўныя» [99] . 95. Здараецца, што «ў абавязковай сёння мадэлі «поспеху» і «прыватнасці» бессэнсоўнымі здаюцца інвестыцыі, каб тыя, што знаходзіцца ззаду, слабыя ці менш здольныя маглі знайсці сабе дарогу ў жыцці» [100] . Увесь час вяртаецца тое самае пытанне: хіба менш адораныя – не людзі? Хіба слабыя не маюць такой жа годнасці, як і мы? Хіба тыя, хто нараджаецца з абмежаванымі магчымасцямі, менш вартыя як людзі і павінны проста выжываць? Вартасць нашых грамадстваў і нашая будучыня залежаць ад нашага адказу на гэтыя пытанні. Або мы адновім сваю маральную і духоўную годнасць, або правалімся ў адстойнік. Пакуль не спынімся і не пачнём ставіцца да гэтых спраў сур’ёзна, будзем надалей, відавочна ці прыхавана, «апраўдваць існуючую мадэль размеркавання дабротаў, у якой меншасць лічыць, што мае права спажываць у такой прапорцыі, якой нельга было б распаўсюджваць, бо планета не была б нават у стане змясціць адходаў такога спажывання» [101] . 96. Сярод структурных праблем, якія немагчыма вырашыць зверху і якімі тэрмінова трэба заняцца, вылучаецца праблема месцаў, раёнаў, дамоў і гарадоў, дзе жывуць і прабываюць бедныя. Без сумневу, мы ведаем: «Якімі ж прыгожымі з’яўляюцца гарады, якія перамаглі хваравіты недавер і інтэгруюць тых, хто адрозніваецца, робячы з гэтай інтэграцыі новы элемент развіцця! Якімі ж прыгожымі з’яўляюцца гарады, архітэктурныя планы якіх поўныя прасторы, якая лучыць, не перашкаджае адносінам, спрыяе прызнанню іншага чалавека!» [102] . Адначасова «нельга не браць пад увагу вынікаў дэградацыі навакольнага асяроддзя, актуальнай мадэлі развіцця і культуры адмаўлення ў жыцці асобаў» [103] . Бо «дэградацыя навакольнага асяроддзя і дэградацыя грамадства наносяць асаблівую шкоду найслабейшым жыхарам планеты» [104] . 97. Усе члены Божага народу маюць абавязак выказваць сваё меркаванне, хоць і па-рознаму, каб прыцягваць увагу да такіх структурных праблем і выкрываць іх, нават калі гэта будзе выглядаць наіўна і неразумна. Структуры несправядлівасці неабходна распазнаваць і нішчыць сілай дабра, праз змену менталітэту, але таксама, з дапамогай навукі і тэхналогій, праз развіццё палітыкі, якая эфектыўна змяняе грамадства. Варта заўсёды памятаць, што евангельская прапанова датычыць не толькі асабістых і блізкіх адносінаў з Панам. Гэтай шырэйшай прапановай « з’яўляецца Божае Валадарства (пар. Лк 4, 43); маецца на ўвазе любоў да Бога, які валадарыць у свеце. У такой ступені, у якой Ён зможа валадарыць сярод нас, грамадскае жыццё стане для ўсіх прасторай братэрства, справядлівасці, спакою, годнасці. Таму як заклік, так і хрысціянскі вопыт скіраваны да атрымання грамадскіх вынікаў. Мы шукаем Яго Валадарства» [105] . 98. І ўрэшце, у дакуменце, які спачатку не ўсе добра ўспрынялі, мы знаходзім разважанне, актуальнае і сёння: «Абаронцаў „артадоксіі” часам абвінавачваюць у пасіўнасці, паблажлівасці і нават саўдзеле перад абліччам невыносных сітуацый несправядлівасці і палітычных рэжымаў, якія іх падтрымліваюць. Кожны, асабліва пастыры і кіраўнікі, пакліканы да духоўнага навяртання, гарачай любові да Бога і бліжняга, клопату аб справядлівасці і супакоі, а таксама да евангельскага стаўлення да бедных і беднасці. Руплівасць пра чысціню веры павінна ісці рука ў руку з імкненнем – праз цэласнае тэалагічнае жыццё – даць эфектыўнае сведчанне служэння бліжняму, асабліва бедным і прыгнечаным» [106] . Бедныя як суб ’ екты 99. Фундаментальным дарам для шляху паўсюднага Касцёла з’яўляецца распазнаванне Канферэнцыі ў Апарэсідзе, на якой біскупы Лацінскай Амерыкі растлумачылі, што прэферэнцыйны выбар Касцёла на карысць бедных «абумоўлены хрысталагічнай верай у Бога, які стаў убогім дзеля нас, каб узбагаціць нас сваім убоствам» [107] . Гэты дакумент змяшчае місію ў кантэкст сучаснай сітуацыі глабалізаванага свету з яго новымі і драматычнымі дысбалансамі [108] . У заключным пасланні біскупы пішуць: «Такія значныя адрозненні паміж багатымі і беднымі заахвочваюць нас працаваць з большай адданасцю, каб быць вучнямі, здольнымі дзяліцца сталом жыцця, сталом усіх сыноў і дачок Айца, адкрытым і інклюзіўным сталом, за якім нікога не абмінаюць. Таму мы пацвярджаем наш прэферэнцыйны і евангельскі выбар на карысць убогіх» [109] . 100. Адначасова гэты дакумент, паглыбляючы тэму, якая ўжо ўзнімалася на папярэдніх канферэнцыях епіскапату Лацінскай Амерыкі, настойвае на неабходнасці разглядаць маргіналізаваныя супольнасці больш як суб ’ ектаў , здольных ствараць уласную культуру, а не як аб ’ екты дабрачыннасці. Гэта азначае, што такія супольнасці маюць права жыць паводле Евангелля, цэлебраваць і перадаваць веру ў адпаведнасці з каштоўнасцямі, якія ёсць у іх культурах. Досвед убоства дае ім здольнасць распазнаваць аспекты рэальнасці, якія іншыя не бачаць, і таму грамадству важна прыслухацца да іх. Тое ж самае датычыць і Касцёла, які павінен станоўча падыходзіць да іх «народнага» спосабу перажывання веры. Прыгожы фрагмент з Заключнага дакумента з Апарэсіды дапамагае нам задумацца над гэтым пытаннем і знайсці адпаведны адказ: «Толькі блізкасць, якая робіць нас сябрамі, дапамагае глыбока ацаніць каштоўнасці сённяшніх убогіх, іх законныя жаданні і іх спосаб жыцця паводле веры. [...] Дзень за днём бедныя становяцца суб’ектамі евангелізацыі і інтэгральнага развіцця чалавека: яны выхоўваюць сваіх дзяцей у веры, жывуць у пастаяннай салідарнасці з роднымі і суседзямі, пастаянна шукаюць Бога і ажыўляюць пілігрымаванне Касцёла. У святле Евангелля мы прызнаём іх велізарную годнасць і святую каштоўнасць у вачах Хрыста, убогага і адкінутага, як яны. Зыходзячы з гэтага досведу веры, мы будзем разам з імі абараняць іх правы» [110] . 101. Усё гэта азначае наяўнасць пэўнага аспекту ў выбары на карысць убогіх, пра які мы мусім няспынна памятаць: гэты выбар патрабуе ад нас увагі, скіраванай на іншага чалавека. «Гэтая ўвага, паўная любові, з’яўляецца пачаткам сапраўднага клопату пра яго асобу і, пачынаючы з яе, хачу плённа шукаць для яе дабра. Разам з тым трэба цаніць убогага з яго дабрынёй, з яго спосабам жыцця, з яго культурай, з яго спосабам перажывання веры. Сапраўдная любоў заўсёды сузіральная, дазваляе нам служыць іншаму не па неабходнасці ці дзеля пахвалы, але таму, што яна прыгожая, незалежна ад выгляду. […] Толькі пачынаючы з гэтай рэальнай і сардэчнай блізкасці, мы можам належна імі апекавацца на шляху іх вызвалення» [111] . Таму са шчырай удзячнасцю звяртаюся да ўсіх, хто вырашыў жыць сярод убогіх, а менавіта да тых, хто не наведвае іх час ад часу, але жыве з імі і любіць іх. Гэта выбар, які павінен знайсці сваё месца сярод найвышэйшых формаў евангельскага жыцця. 102. У святле вышэйсказанага становіцца відавочнай неабходнасць таго, «каб мы ўсе дазволілі ім сябе евангелізаваць» [112] і каб усе распазналі «таямнічую мудрасць, якую Бог хоча нам праз іх перадаць» [113] . Бедныя растуць і сталеюць ва ўмовах крайняй нестабільнасці, вучацца выжываць у самых неспрыяльных абставінах, давяраюць сябе Богу з упэўненасцю, што ніхто іншы не ўспрымае іх сур’ёзна. Яны дапамагаюць адзін аднаму ў самыя цяжкія хвіліны і засвойваюць мноства розных рэчаў, якія трымаюць у таямніцы сэрца. Тыя з нас, хто не меў падобнага досведу жыцця, безумоўна, могуць шмат чаму навучыцца з той крыніцы мудрасці, якой з’яўляецца досвед бедных. Толькі суадносячы нашыя нараканні з іх пакутамі і нястачамі, мы здолеем прыняць заклік да больш простага жыцця.   РАЗДЗЕЛ ПЯТЫ НЯСПЫННЫ ВЫКЛІК 103. Я вырашыў прыгадаць гэтую двухтысячагадовую гісторыю клопату Касцёла пра ўбогіх і разам з убогімі, каб паказаць, што яна з’яўляецца неад’емным складнікам безупыннага шляху Касцёла. Клопат пра бедных – гэта частка вялікай Традыцыі Касцёла, як промень святла, які з евангельскіх часоў асвятляў сэрцы і крокі хрысціянаў усіх эпох. Таму мы павінны адчуваць абавязак запрасіць усіх увайсці ў гэтую плынь святла і жыцця, якая бярэ пачатак у распазнанні Хрыста ў тварах патрабуючых і церпячых людзей. Любоў да бедных – гэта істотны элемент гісторыі Бога з намі, яна вырываецца з самага сэрца Касцёла няспынным заклікам да сэрцаў вернікаў, да супольнасцяў і да кожнага асабіста. Як Хрыстова цела, Касцёл адчувае жыццё бедных, прывілеяванай часткі пілігрымуючага народу, як сваё «цела». Такім чынам, любоў да бедных, – якой бы формы не была іх беднасць, – з’яўляецца евангельскай гарантыяй Касцёла, вернага сэрцу Бога. Сапраўды, кожнае касцёльнае аднаўленне заўсёды мела сярод сваіх прыярытэтаў гэтую прэферынцыйную ўвагу да ўбогіх, якая адрозніваецца як па сваіх матывах, так і па сваім стылі ад дзейнасці любой іншай гуманітарнай арганізацыі. 104. Хрысціянін не можа ўспрымаць убогіх толькі як сацыяльную праблему: яны з’яўляюцца нашай «сямейная справай». Яны – «адны з нас». Адносіны з імі нельга зводзіць да дзейнасці ці функцыі Касцёла. Словамі Дакумента Апарэсіды, «нас просяць прысвячаць свой час і зычлівую ўвагу бедным, цікавіцца іх справамі, быць побач у самыя цяжкія моманты, праводзіць з імі гадзіны, тыдні ці гады жыцця і спрабаваць змяніць іх становішча, пачынаючы з сябе. Нельга забываць, што сам Езус прапанаваў гэта сваімі ўчынкамі і словамі» [114] . Міласэрны самаранін, яшчэ раз 105. Культура, якая дамінуе на пачатку гэтага тысячагоддзя, схіляе нас пакінуць убогіх на волю лёсу, палічыць іх нявартымі ўвагі, а тым больш пашаны. У энцыкліцы Fratelli t utti папа Францішак запрашае паразважаць над прыпавесцю пра міласэрнага самараніна (пар. Лк 10, 25-37), каб паглыбіць гэтую тэму. У прыпавесці мы бачым, што да параненага і пакінутага на дарозе чалавека людзі ставяцца па-рознаму. Апякуецца ім толькі міласэрны самаранін. Таму зноў узнікае няпростае пытанне да кожнага асабіста: «З кім ты атаясамліваеш сябе? Пытанне вострае, прамое і вырашальнае. Да каго з герояў прыпавесці ты падобны? Мы павінны прызнаць, што нас атачае спакуса абыякавасці да іншых, асабліва да найслабейшых. Трэба сказаць, што пры ўсіх шматлікіх дасягненнях, мы ўсё яшчэ застаемся «непісьменнымі», калі гаворка ідзе пра суправаджэнне, клопат і падтрымку найбольш слабых і найбольш уразлівых членаў нашага развітага грамадства. Мы прызвычаіліся адводзіць позірк, праходзіць міма, ігнараваць сітуацыі, калі толькі яны не закранаюць нас непасрэдна» [115] . 106. Важна ўсведамляць, што гісторыя з міласэрным самаранінам паўтараецца і сёння. Успомнім сітуацыю з нашага часу: «Калі я сустракаю чалавека, які спіць на вуліцы ў халодную ноч, я магу палічыць, што гэты „дзівак” ‒ хтосьці выпадковы, хто нечакана ўзнікае на маім шляху, нягодны злачынец, перашкода, дакучлівыя церні майго сумлення, праблема, якую павінны вырашыць палітыкі, а, магчыма, нават смецце, якое забруджвае грамадскую прастору. Але магу таксама мець рэакцыю, якая зыходзіць з веры і міласэрнасці, і прызнаць у гэтым чалавеку людскую істоту з такой жа годнасцю, як у мяне, бясконца ўмілаванае Айцом стварэнне, Божы вобраз, брата, адкупленага Хрыстом. Вось што значыць быць хрысціянінам! Ці можам зразумець святасць па­за гэтым жывым прызнаннем годнасці кожнага чалавека?» [116] . Што зрабіў міласэрны самаранін? 107. Гэтае пытанне становіцца актуальным, бо дапамагае распазнаць сур’ёзны недахоп у нашых грамадствах і ў хрысціянскіх супольнасцях. Фактычна, многія формы абыякавасці, з якімі мы сёння сутыкаемся, носяць «рысы пэўнага агульнага ладу жыцця, які выяўляецца рознымі, магчыма больш вытанчанымі спосабамі. Больш за тое, паколькі мы ўсе вельмі засяроджваемся на ўласных патрэбах, нас непакоіць сам выгляд церпячага чалавека, бо мы не хочам марнаваць свой час на чужыя праблемы. Гэта сімптомы хворага грамадства, бо яно імкнецца да росквіту, але адварочваецца ад чалавечага цярпення. Лепш не трапляць у такую бяду. Паглядзім на прыклад міласэрнага самараніна» [117] . Апошнія словы евангельскай прыпавесці: «Ідзі і ты рабі так» ( Лк 10, 37) – гэта наказ, які хрысціянін павінен чуць кожны дзень у сваім сэрцы. Непазбежны выклік для с учасна га Касцёла 108. У асабліва цяжкі для Рымскага Касцёла час, калі імперскія інстытуты разбураліся пад ціскам варвараў, папа Грыгорый Вялікі настаўляў сваіх вернікаў: «Кожны дзень мы знаходзім Лазара, калі шукаем яго, і кожны дзень мы знаходзім яго каля дзвярэй, нават не шукаючы. Цяпер жабракі прыходзяць да нас у нязручны час і просяць міласціну, а пазней стануць нашымі заступнікамі. [...] Таму не марнуйце магчымасці рабіць справы міласэрнасці і не трымайце нявыкарыстанымі сродкі, якія ў вас ёсць» [118] . Ён адважна супрацьстаяў распаўсюджанай прадузятасці наконт бедных, у тым ліку меркаванню, што бедныя самі вінаватыя ў сваіх няшчасцях: «Калі бачыце, як убогія робяць нешта ліхое, не пагарджайце імі, не ганьбіце іх, бо агонь галечы, хутчэй за ўсё, ачышчае іх грэшныя ўчынкі, нават вельмі нязначныя» [119] . Нярэдка дабрабыт асляпляе нас, і мы пачынаем думаць, што шчасця можна дасягнуць толькі тады, калі можна абысціся без іншых. У гэтым бедныя могуць быць для нас нібы маўклівымі настаўнікамі, дапамагаючы вярнуць нашу пыху і саманадзейнасць да належнай пакоры. 109. Калі праўда, што бедных падтрымліваюць тыя, хто мае сродкі, то з упэўненасцю можна сказаць і адваротнае. Гэта дзіўны досвед, засведчаны хрысціянскай традыцыяй. Ён можа стаць сапраўдным паваротным момантам у нашым асабістым жыцці, калі мы разумеем, што менавіта ўбогія евангелізуюць нас. Як? Яны моўчкі ставяць нас перад фактам нашай слабасці. Напрыклад, пажылыя людзі сваёй фізічнай кволасцю нагадваюць пра нашу ўразлівасць, нават калі мы спрабуем схаваць яе за дабрабытам і знешнім выглядам. Больш за тое, бедныя прымушаюць задумацца над беспадстаўнасцю той агрэсіўнай пыхі, з якой мы часта сустракаем жыццёвыя цяжкасці. Па сутнасці, яны выяўляюць няпэўнасць і пустэчу, здавалася б, абароненага і бяспечнага жыцця. У гэтым кантэксце яшчэ раз паслухаем св. Грыгорыя Вялікага: «Таму няхай ніхто не пачуваецца ў бяспецы, кажучы: я не рабую іншых, я проста карыстаюся дабротамі, якія справядліва мне належаць. Багаты чалавек не за тое быў пакараны, што хацеў завалодаць чужым, а за тое, што, атрымаўшы столькі багацця, збядніў самога сябе. У пекла яго прывяло тое, што ў шчасці ён не захаваў боязі, атрыманымі дарамі карміў сваю пыху і страціў пачуццё спагады» [120] . 110. Нас, хрысціянаў, праблема ўбогіх вяртае да сутнасці веры. Выбар на карысць бедных, інакш кажучы, любоў Касцёла да іх, як вучыў св. Ян Павел II, «з’яўляецца вырашальным і належыць да пастаяннай традыцыі; заклікае яго звярнуцца да свету, у якім, нягледзячы на тэхнічны і эканамічны прагрэс, беднасць пагражае прыняць гіганцкія маштабы» [121] . Па сутнасці, бедныя для хрысціянаў – не сацыялагічная катэгорыя, а само цела Хрыста. Бо недастаткова абмежавацца агульным выкладам дактрыны пра ўцелаўленне Бога. Каб сапраўды ўвайсці ў гэтую таямніцу, мы павінны ўдакладніць, што Пан становіцца целам, якое галадае, прагне, хварэе, знаходзіцца ў зняволенні. «Убогі Касцёл для ўбогіх пачынаецца з таго, што мы ідзём да цела Хрыста. Калі мы ідзём да цела Хрыста, мы пачынаем нешта разумець, спасцігаць, што такое гэтае ўбоства Пана. А гэта нялёгка» [122] . 111. Сэрца Касцёла па сваёй сутнасці салідарнае з беднымі, выключанымі і маргіналізаванымі, з тымі, хто лічыцца «адкідамі» грамадства. Убогія знаходзяцца ў самым сэрцы Касцёла, бо менавіта з «нашай веры ў Хрыста, які стаў убогім і заўсёды быў блізка бедных і адкінутых, вынікае клопат аб інтэгральным развіцці найбольш занядбаных людзей у грамадстве» [123] . У сэрцы кожнага верніка «неабходнасць слухання гэтага крыку вынікае з вызваляючага дзеяння ласкі ў кожным з нас, таму не ідзе гаворка пра місіі, прызначаныя толькі для некаторых» [124] . 112. Часам у некаторых хрысціянскіх рухах або групах можна назіраць недахоп або нават адсутнасць зацікаўленасці ў агульным дабры грамадства і, між іншым, у абароне і падтрымцы самых слабых і абяздоленых. Аднак трэба памятаць, што рэлігія, асабліва хрысціянская рэлігія, не можа абмяжоўвацца прыватнай сферай, як быццам вернікі не павінны таксама займацца праблемамі, якія закранаюць грамадзянскую супольнасць, і падзеямі, якія датычаць грамадзянаў [125] . 113. Насамрэч, «кожная супольнасць Касцёла, якая не хоча цалкам і з творчай плённасцю супрацоўнічаць у тым, каб убогія жылі годна і ніхто не быў адкінуты, рызыкуе распасціся, хоць і выказваецца на грамадскія тэмы ці крытыкуе ўрады. З лёгкасцю ўрэшце падпарадкоўваецца свецкай духоўнасці, схаванай пад рэлігійнымі практыкамі, бясплённымі сходамі ці пустымі прамовамі» [126] . 114. Гаворка ідзе не толькі пра дапамогу і працу па забяспячэнні сацыяльнай справядлівасці. Вернікі павінны ўлічваць і іншую форму непаслядоўнасці ў адносінах да ўбогіх. Па праўдзе кажучы, «найгоршай дыскрымінацыяй, якую спазнаюць убогія, з’яўляецца недахоп духоўнай апекі. […] Прэферэнцыйны выбар павінен у асноўным выявіцца ў прывілеяванай і прыярытэтнай духоўнай апецы» [127] . Аднак гэтая духоўная ўвага да бедных ставіцца пад сумнеў з-за некаторых забабонаў, нават з боку хрысціянаў, бо мы адчуваем сябе больш камфортна без бедных. Ёсць тыя, хто працягвае казаць: «Наша задача – маліцца і вучыць сапраўднай дактрыне». Але, аддзяляючы гэты рэлігійны аспект ад інтэгральнай падтрымкі, яны дадаюць, што толькі ўрад павінен клапаціцца пра іх, або што лепш пакінуць іх у галечы і толькі навучыць працаваць. А часам выкарыстоўваюцца псеўданавуковыя крытэрыі, каб сказаць, што свабода рынку спантанна прывядзе да вырашэння праблемы беднасці. Або нават хтосьці выбірае пастырскую апеку так званай эліты, сцвярджаючы, што замест таго, каб марнаваць час на бедных, лепш клапаціцца пра багатых, уплывовых людзей і прафесіяналаў, каб праз іх можна было дасягнуць больш эфектыўных рашэнняў. Лёгка заўважыць свецкасць, якая стаіць за гэтымі меркаваннямі: яны вядуць да павярхоўнага ўспрыняцця рэальнасці, пазбаўленага яе звышнатуральнага святла, і да імкнення мець знаёмствы, якія даюць нам пачуццё бяспекі і прывілеяванае становішча. Міласціна сёння 115. Варта сказаць некалькі словаў пра міласціну, якая сёння не карыстаецца добрай рэпутацыяй, часта нават сярод вернікаў. Яе не толькі рэдка практыкуюць, але часам ёю нават пагарджаюць. З аднаго боку, я хацеў бы паўтарыць, што найлепшы спосаб падтрымаць беднага – памагчы яму знайсці добрую працу, каб ён мог зарабляць на больш годнае жыццё і развіваць свае здольнасці, прыкладаючы асабістыя намаганні. У гэтым сэнсе, сапраўды «адсутнасць працы – гэта значна больш, чым страта крыніцы даходу, неабходнага для жыцця. Праца – гэта штосьці значна, значна большае. Працуючы, мы становімся больш людскімі, наша чалавечнасць квітнее, маладыя становяцца дарослымі толькі дзякуючы працы. Сацыяльнае вучэнне Касцёла заўсёды разглядала працу як удзел у стварэнні, што працягваецца кожны дзень, у тым ліку дзякуючы рукам, розумам і сэрцам работнікаў» [128] . З іншага боку, калі яшчэ няма гэтай канкрэтнай магчымасці, мы не можам рызыкаваць, пакідаючы чалавека на волю лёсу без таго, што неабходна для годнага жыцця. І таму міласціна застаецца неабходным сродкам кантакту, сустрэчы і суадчування з іншай асобай у складаным становішчы. 116. Для тых, хто сапраўды любіць, відавочна, што міласціна не вызваляе кампетэнтныя органы ад іх адказнасці, не адмяняе арганізацыйных абавязкаў устаноў і не замяняе законнай барацьбы за справядлівасць. Аднак яна прынамсі запрашае нас спыніцца і паглядзець беднаму чалавеку ў твар, дакрануцца да яго і падзяліцца чымсьці сваім. У любым выпадку, міласціна, нават невялікая, уносіць нотку pietas (пабожнасці) ў грамадскае жыццё, дзе кожны клапоціцца пра асабістыя інтарэсы. Кніга Прыпавесцяў кажа: «Шчодры чалавек будзе шчаслівы, бо дае са свайго хлеба беднаму» ( Прып 22, 9). 117. І ў Старым, і ў Новым Запавеце ёсць сапраўдныя гімны міласціне: «Аднак будзьце цярплівыя да бедных і не прымушайце іх доўга чакаць міласціны. […] Захоўвайце міласціну ў скарбніцах вашых, і яна выратуе вас ад усялякага зла» ( Сір 29, 8.12). І Езус таксама навучае: «Прадайце, што маеце, і дайце міласціну. Зрабіце сабе торбы, якія не нішчацца, скарб бязмежны ў нябёсах, куды злодзей не пранікне і дзе моль не знішчыць» ( Лк 12, 33). 118. Святому Яну Хрызастому прыпісваецца наступнае выказванне: «Міласціна – гэта крыло малітвы. Калі не дадасі крылы да сваёй малітвы, яна ледзьве ўзляціць» [129] . А св. Грыгорый Назіянзскі напрыканцы адной са сваіх знакамітых малітваў напісаў: «Дык вось, калі вы слухаеце мяне, слугі Хрыстовыя, браты і суспадчыннікі, пакуль час спрыяльны, наведаем Хрыста, будзем клапаціцца пра Хрыста, будзем карміць Хрыста, будзем апранаць Хрыста, будзем вітаць Хрыста, будзем шанаваць Хрыста: не толькі сталом, як некаторыя, не толькі духмянасцямі, як Марыя; не толькі магілай, як Юзаф з Арыматэі; не толькі абрадамі пахавання, як Нікадэм, які любіў Хрыста толькі напалову; не толькі золатам, кадзілам і мірам, як мудрацы; але, паколькі Пан хоча міласэрнасці, а не ахвяры […], акажам Яму міласэрнасць ва ўбогіх, каб, калі мы сыдзем адсюль, яны прынялі нас у вечнае жыллё» [130] . 119. Любоў і найглыбейшыя перакананні трэба падмацоўваць, а гэта здзяйсняецца праз жэсты. Існаванне ў свеце ідэй і дыскусій без асабістых, частых і шчырых жэстаў разбурыць нашыя самыя каштоўныя мары. Па гэтай простай прычыне, як хрысціяне, мы не адмаўляемся ад міласціны. Гэта жэст, які можна рабіць рознымі спосабамі, спрабаваць імкнуцца да найбольшай эфектыўнасці, але мы павінны яго рабіць. І заўсёды лепш зрабіць нешта, чым нічога. У любым выпадку, такі жэст кране нашыя сэрцы. Ён не вырашыць праблемы сусветнай беднасці, што трэба рабіць з розумам, рашучасцю і сацыяльнай адказнасцю. Але нам трэба практыкаваць міласціну, каб дакрануцца да спакутаванага цела ўбогіх. 120. Хрысціянская любоў перамагае ўсе перашкоды, збліжае далёкіх, яднае незнаёмых, мірыць ворагаў, пераадольвае неадольныя для чалавека прорвы і пранікае ў самыя патаемныя куткі грамадства. Па сваёй прыродзе хрысціянская любоў прароцкая, чыніць цуды і не мае межаў: імкнецца здзяйсняць немагчымае. Любоў – гэта, перш за ўсё, спосаб разумення жыцця, спосаб яго пражывання. Касцёл, які не ставіць абмежаванняў для любові, які не ведае ворагаў, з якімі трэба змагацца, а ведае толькі мужчын і жанчын, якіх трэба любіць, – гэта Касцёл, які патрэбны свету сёння. 121. Няхай праз вашую працу, вашыя намаганні змяніць несправядлівыя сацыяльныя структуры, а таксама праз просты, шчыры жэст блізкасці і падтрымкі, бедны пачуе словы Езуса, скіраваныя асабіста да яго: «Я палюбіў цябе» ( Ап 3, 9). Дадзена ў Рыме, у святога Пятра, 4 кастрычніка 2025 год а , ва ўспамін св . Францішка Асізскага, у першы год майго П антыфікату. ЛЕЎ XIV ____________________ [1] Францішак, Энц. Dilexit nos (24 кастрычніка 2024), 170. [2] Тамсама , 171. [3] Францішак, Ап. адг. Gaudete et exsultate (19 сакавіка 2018 г.), 96. [4] Францішак, Incontro con i rappresentanti dei media (16 сакавіка 2013 г.): AAS 105 (2013), 381. [5] J. Bergoglio – A. Skorka, Sobre el cielo y la tierra, Buenos Aires 2013, 214. [6] Святы Павел VI, Omelia nella Messa in occasione dell’ultima sessione pubblica del Concilio Ecumenico Vaticano II (7 снежня 1965 г.): AAS 58 (1966), 55-56. [7] Пар. Францішак, Ап. адг. Evangelii gaudium (24 лістапада 2013 г.), 187. [8] Тамсама , 212. [9] Францішак, Энц. Fratelli Tutti (3 кастрычніка 2020 г.), 23. [10] Тамсама , 21. [11] Consiglio delle Comunità Europee, Decisione (85/8/CEE) relativa ad un’azione specifica comunitaria di lotta contro la povertà (19 снежня 1984), art. 1, par. 2: Gazzetta ufficiale delle Comunità Europee , N. L 2/24. [12] Пар. Св. Ян Павел II, Catechesi (27 кастрычніка 1999 г.): L’Osservatore Romano , 28 кастрычніка 1999 г., 4. [13] Францішак, Ап. адг. Evangelii Gaudium (24 лістапада 2013 г.), 197. [14] Пар. Францішак, Messaggio per la V Giornata Mondiale dei Poveri (13 чэрвеня 2021 г.), 3: AAS 113 (2021), 691: «Езус не толькі на баку бедных, але і падзяляе іх лёс. Гэта важны ўрок і для Яго вучняў усіх эпох». [15] Францішак, Ап. адг. Evangelii Gaudium (24 лістапада 2013 г.), 186. [16] Францішак, Ап. адг. Gaudete et exsultate (19 сакавіка 2018 г.), 95. [17] Тамсама , 97. [18] Францішак, Ап. адг. Evangelii gaudium (24 лістапада 2013 г.), 194. [19] Францішак, Incontro con i rappresentanti dei media (16 сакавіка 2013 г.): AAS 105 (2013), 381. [20] Другі Ватыканскі Сабор, Дагм. канст. Lumen gentium , 8. [21] Францішак, Ап. адг. Evangelii Gaudium (24 лістапада 2013 г.), 48. [22] У гэтым раздзеле мы прапануем некаторыя з тых прыкладаў святасці, якія не з’яўляюцца вычарпальнымі, а хутчэй паказваюць клопат пра бедных, чым заўсёды вылучалася прысутнасць Касцёла ў свеце. Глыбокае разважанне пра гісторыю гэтай увагі да найбольш патрабуючых можна знайсці ў кнізе V. Paglia, Storia della povertà , Milan 2014. [23] Пар. Святы Амброзій, De officiis ministrorum I, раздз. 41, 205-206: CCSL 15, Turnhout 2000, 76-77; II, раздз. 28, 140-143: CCSL 15, 148-149. [24] Тамсама , II, раздз. 28, 140: CCSL 15, 148. [25] Тамсама . [26] Тамсама . II, раздз. 28, 142: CCSL 15, 148. [27] Святы Ігнацый з Антыохіі, Epistula ad Smyrnaeos , 6, 2: SCh 10bis, Paris 2007, 136-138. [28] Святы Палікарп, Epistula ad Philippenses , 6, 1: SCh 10bis, 186. [29] Святы Юстын, Apologia prima , 67, 6-7: SCh 507, Paris 2006, 310. [30] Святы Ян Хрызастом, Homiliae in Matthaeum , 50, 3: PG 58, Paris 1862, 508. [31] Тамсама , 50, 4: PG 58, 509. [32] Святы Ян Хрызастом, Homilia in Epistula ad Hebraeos 11, 3: PG 63, Paris 1862, 94. [33] Святы Ян Хрызастом, Homilia II De Lazaro , 6: PG 48, Paris 1862, 992. [34] Святы Амброзій, De Nabuthae , 12, 53: CSEL 32/2, Praga-Vienna-Lipsia 1897, 498. [35] Святы Аўгустын, Enarrationes in Psalmos, 125, 12: CSEL 95/3, Vienna 2001, 181. [36] Той жа, Sermo LXXXVI , 5: CCSL 41Ab, Turnhout 2019, 411-412. [37] Псеўда-Аўгустын, Sermo CCCLXXXVIII , 2: PL 39, Paris 1862, 1700. [38] Святы Кіпрыян, De mortalitate , 16: CCSL 3A, Turnhout 1976, 25. [39] Францішак, Пасланне на ХХХ Сусветны дзень хворага (10 снежня 2021 г.), 3: AAS 114 (2022), 51. [40] Святы Каміл дэ Леліскі, Regole della Compagnia dei Servi degli Infermi , 27: M. Vanti (ed.), Scritti di San Camillo de Lellis, Milano 1965, 67. [41] Святая Луіза дэ Марыяк, Lettera alle sorelle Claude Carré e Marie Gaudoin (28 novembre 1657): E. Charpy (ed.), Sainte Louise de Marillac. Écrits , Parigi 1983, 576. [42] Святы Базыль Вялікі, Regulae fusius tractatae , 37, 1: PG 31, Paris 1857, 1009 C-D. [43] Regula Benedicti , 53, 15: SCh 182, Paris 1972, 614. [44] Святы Ян Касіян, Collationes , XIV, 10: CSEL 13, Вена 2004, 410. [45] Бэнэдыкт XVI, Catechesi (21 кастрычніка 2009 г.): L ’ Osservatore Romano , 22 кастрычніка 2009 г., 1. [46] Пар. Innocenzo III, Bolla Operante divinae dispositionis – Regola Primitiva dei Trinitari (17 dicembre 1198), 2: J.L. Aurrecoechea – A. Moldón (edd.), Fuentes históricas de la Orden Trinitaria (s. XII-XV) , Córdoba 2003, 6: «Усе даброты, з якой бы крыніцы яны ні паходзілі, павінны быць падзелены на тры роўныя часткі; і, паколькі дзвюх частак дастаткова, з іх здзяйсняць справы міласэрнасці і забяспечваць умеранае ўтрыманне для сябе і для хатніх слугаў, якія знаходзяцца на іх службе па неабходнасці. Аднак трэцяя частка павінна быць захавана для выкупу палонных, якія знаходзяцца ў зняволенні за веру ў Хрыста». [47] Пар. Costituzioni dell’Ordine dei Mercedari , n. 14: Orden de la Bienaventurada Virgen María de la Merced, Regla y Constituciones , Roma 2014, 53: «Каб выканаць гэтую місію, натхнёную міласэрнасцю, мы прысвячаем сябе Богу асаблівым абяцаннем, якое называецца абяцаннем адкуплення, адпаведна з якім мы абяцаем аддаць сваё жыццё, калі спатрэбіцца, як Хрыстус аддаў яго за нас, каб выратаваць хрысціянаў, якія знаходзяцца ў крайняй небяспецы страціць веру ў новых формах няволі». [48] Пар. Святы Ян Хрысціцель ад Зачацця, La regla de la Orden de la Santísima Trinidad , XX, 1: BAC Maior 60, Madrid 1999, 90: «У гэтым бедныя і вязні падобныя да Хрыста, на якога ўскладзены цярпенні свету [...]. Гэты святы Ордэн Найсвяцейшай Тройцы кліча іх і запрашае прыйсці і піць ваду Збаўцы, што азначае, што, калі Хрыстус, які вісеў на крыжы, быў адкупленнем і збаўленнем для чалавецтва, ордэн прыняў гэтае адкупленне і жадае раздаваць яго бедным, а таксама ратаваць і вызваляць вязняў». [49] Пар. т амсама , El recogimiento interior, XL, 4: BAC Maior 48, Madrid 1995, 689: «Свабодная воля робіць чалавека свабодным і гаспадаром усіх стварэнняў, але, Божа, дапамажы мне! Колькі ёсць тых, хто такім чынам становіцца нявольнікам і вязнем д’ябла, зняволеным і скаваным сваімі страсцямі і пажадлівасцю». [50] Францішак, Пасланне на XLVIII Сусветны дзень супакою (8 снежня 2014 г.), 3: AAS 107 (2015), 69. [51] Той жа, Incontro con gli agenti di Polizia Penitenziaria, i detenuti e i volontari (Верона, 18 мая 2024 г.): AAS 116 (2024), 766. [52] Ганорый III, Була Solet annuere – Regula bullata (29 лістапада 1223 г.), cap. VI: SCh 285, Paris 1981, 192. [53] Пар. Грыгорый IX, Була Sicut manifestum est (17 верасня 1228), 7: SCh 325, Parigi 1985, 200: «Sicut igitur supplicastis, altissimae paupertatis propositum vestrum favore apostolico roboramus, auctoritate vobis praesentium indulgentes, ut recipere possessiones a nullo compelli possitis». [54] Пар. S. C. Tugwell (ed.), Early Dominicans. Selected Writings , Mahwah 1982, 16-19. [55] Tommaso da Celano, Vita Secunda - pars prima , cap. IV, 8: AnalFranc, 10, Firenze 1941, 135. [56] Францішак, Discorso dopo la visita alla tomba di don Lorenzo Milani (Барбіяна, 20 чэрвеня 2017 г.), 2: AAS 109 (2017), 745. [57] Святы Ян Павел II, Discorso ai partecipanti al Capitolo Generale dei Chierici Regolari Poveri della Madre di Dio delle Scuole Pie (Скалопі, 5 ліпеня 1997 г.), 2: L’Osservatore Romano , 6 ліпеня 1997 г., 5. [58] Тамсама . [59] Той жа, Omelia nella Messa di canonizzazione (18 красавіка 1999 г.): AAS 91 (1999), 930. [60] Пар. той жа, Ліст Iuvenum Patris (31 студзеня 1988 г.), 9: AAS 80 (1988), 976. [61] Пар. Францішак, Discorso ai partecipanti al Capitolo Generale dell’Istituto della Carità (Rosminiani) (1 кастрычніка 2018 г.): L’Osservatore Romano , 1-2 кастрычніка 2018 г., 7. [62] Той жа, Omelia nella Messa di canonizzazione (9 кастрычніка 2022 г.): AAS 114 (2022), 1338. [63] Святы Ян Павел ІІ, Messaggio alla Congregazione delle Missionarie del Sacro Cuore (31 мая 2000 г.), 3: L ’ Osservatore Romano , 16 ліпеня 2000 г., 5. [64] Пар. Пій XII, Breve ap. Superiore Iam Aetate (8 верасня 1950 г.): AAS 43 (1951), 455-456. [65] Францішак, Messaggio per la CV Giornata Mondiale del Migrante e del Rifugiato (27 мая 2019 г.): AAS 111 (2019), 911. [66] Той жа, Messaggio per la C Giornata Mondiale del Migrante e del Rifugiato (5 жніўня 2013 г.): AAS 105 (2013), 930. [67] Святая Тэрэза з Калькуты, Discorso in occasione del conferimento del Premio Nobel per la Pace (Осла, 10 снежня 1979): Той жа, Aimer jusqu’à en avoir mal , Lione 2017, 19-20. [68] Святы Ян Павел ІІ, Discorso ai pellegrini convenuti a Roma per la beatificazione di Madre Teresa di Calcutta (20 кастрычніка 2003 г.), 3: L’Osservatore Romano, 20-21 кастрычніка 2003 г., 10. [69] Францішак, Omelia nella Messa di canonizzazione (13 кастрычніка 2019 г.): AAS 111 (2019), 1712. [70] Святы Ян Павел ІІ, Ап. ліст Novo Millennio Ineunte (6 студзеня 2001), 49: AAS 93 (2001), 302. [71] Францішак, Ап. адг. Christus Vivit (25 сакавіка 2019 г.), 231. [72] Той жа, Discorso ai partecipanti all’Incontro mondiale dei movimenti popolari (28 кастрычніка 2014 г.): AAS 106 (2014), 851-852. [73] Тамсама : AAS 106 (2014), 859. [74] Францішак, Discorso ai partecipanti all’Incontro mondiale dei movimenti popolari (5 лістапада 2016 г.): L’Osservatore Romano, 7-8 лістапада 2016 г., 5. [75] Тамсама . [76] Святы Ян XXIII, Радыёпасланне да ўсіх вернікаў свету праз месяц пасля адкрыцця Другога Ватыканскага Сабору (11 верасня 1962 г.): AAS 54 (1962), 682. [77] Джакама Леркара, Intervento nella XXXV Congregazione Generale del Concilio Ecumenico Vaticano II (6 снежня 1962 г.), 2: AS I/IV, 327-328. [78] Тамсама , 4: AS I/IV, 329. [79] Istituto per le Scienze Religiose (ed.), Per la forza dello Spirito. Discorsi conciliari del Card. Giacomo Lercaro , Bologna 1984, 115. [80] Святы Павел VI, Allocuzione nella solenne inaugurazione della II Sessione del Concilio Ecumenico Vaticano II (29 верасня 1963 г.): AAS 55 (1963), 857. [81] Той жа, Catechesi (11 лістапада 1964 г.): Insegnamenti di Paolo VI , II (1964), 984. [82] Другі Ватыканскі Сабор, Паст. канст. Gaudium et spes , 69,71. [83] Святы Павел VI, Энц. Populorum progressio (26 сакавіка 1967), 23: AAS 59 (1967), 269. [84] Пар. т амсама , 4: AAS 59 (1967), 259. [85] Святы Ян Павел II, Энц. Sollicitudo Rei Socialis (30 снежня 1987), 42: AAS 80 (1988), 572. [86] Тамсама : AAS 80 (1988), 573. [87] Тамсама , Энц. Laborem Exercens (14 верасня 1981 г.), 3: AAS 73 (1981), 584. [88] Бэнэдыкт XVI, Энц. Caritas in veritate (29 чэрвеня 2009 г.), 7. [89] Тамсама , 27. [90] II Generale dell’Episcopato Latino-americano, Documento di Medellín (24 кастрычніка 1968 г.), 14, n. 7: CELAM , Medellín. Conclusiones , Lima 2005, 131-132. [91] Францішак, Ап. адг. Evangelii gaudium (24 лістапада 2013 г.), 202. [92] Тамсама , 205. [93] Тамсама , 190. [94] Тамсама , 56. [95] Той жа, Энц. Dilexit nos (24 кастрычніка 2024 г.), 183. [96] Святы Ян Павел II, Энц. Centesimus annus (1 мая 1991), 41: AAS 83 (1991), 844-845. [97] Францішак, Ап. адг. Evangelii Gaudium (24 лістапада 2013 г.), 202. [98] Тамсама . [99] Францішак, Энц. Fratelli Tutti (3 кастрычніка 2020 г.), 22. [100] Францішак, Ап. адг. Evangelii Gaudium (24 лістапада 2013 г.), 209. [101] Францішак, Энц. Laudato Si’ (24 мая 2015 г.), 50. [102] Францішак, Ап. адг. Evangelii Gaudium (24 лістапада 2013 г.), 210. [103] Францішак, Энц. Laudato si' (24 мая 2015), 43. [104] Тамсама , 48. [105] Францішак, Ап. адг. Evangelii Gaudium (24 лістапада 2013 г.), 180. [106] Кангрэгацыя Веравучэння, Istruzione su alcuni aspetti della „ Teologia della liberazione” (6 жніўня 1984 г.), XI, 18: AAS 76 (1984), 907-908. [107] Пятая Генеральная канферэнцыя епіскапату Лацінскай Амерыкі і Карыбскага басейна, Documento di Aparecida (29 чэрвеня 2007 г.), n. 392, Bogotá 2007, pp. 179-180. Пар. Бэнэдыкт XVI, Discorso nella sessione inaugurale dei lavori della V Conferenza Generale dell'Episcopato Latino-Americano e dei Caraibi (13 мая 2007), 3: AAS 99 (2007), 450. [108] Пар. Пятая Генеральная канферэнцыя епіскапату Лацінскай Амерыкі і Карыбскага басейна, Documento di Aparecida (29 чэрвеня 2007), no. 43-87, С. 31-47. [109] Той жа, Messaggio finale (29 мая 2007), n. 4, Bogotá 2007, p. 275. [110] Той жа, Documento di Aparecida (29 чэрвеня 2007 г.), n. 398, p. 182 [111] Францішак, Ап. адг. Evangelii Gaudium (24 лістапада 2013 г.), 199. [112] Тамсама , 198. [113] Тамсама . [114] Пятая Генеральная канферэнцыя епіскапату Лацінскай Амерыкі і Карыбскага басейна, Documento di Aparecida (29 чэрвеня 2007 г.), n. 397, р. 182 [115] Францішак, Энц. Fratelli tutti (3 кастрычніка 2020 г.), 64. [116] Францішак, Ап. адг. Gaudete et exsultate (19 сакавіка 2018 г.), 98. [117] Францішак, Энц. Fratelli tutti (3 кастрычніка 2020 г.), 65-66. [118] Святы Грыгорый Вялікі, Homilia 40, 10: SCh 522, Parigi 2008, 552-554. [119] Тамсама , 6: SCh 522, 546. [120] Тамсама , 3: SCh 522, 536. [121] Святы Ян Павел ІІ, Энц. Centesimus annus (1 мая 1991), 57: AAS 83 (1991), 862-863 і інш. [122] Францішак, Veglia di Pentecoste con i Movimenti, le nuove Comunità, le Associazioni, le Aggregazioni laicali (18 мая 2013 г.): L ’ Osservatore Romano , 20-21 мая 2013 г., 5. [123] Францішак, Ап. адг. Evangelii Gaudium (24 лістапада 2013 г.), 186. [124] Тамсама , 188. [125] Пар. тамсама , 182-183. [126] Тамсама , 207. [127] Тамсама , 200. [128] Францішак, Discorso in casee dell ’ Incontro con il mondo del lavoro presso lo stabilimento ILVA di Genova (27 мая 2017 г.): AAS 109 (2017), 613. [129] Псеўда-Хрызастом, Homilia de jejunio et eleemosyna: PG , 1060. [130] Святы Грыгорый Назіянзскі, Oratio XIV , 40: PG 35, Parigi 1886, 910.   Пераклад Секцыі па перакладзе літургічных тэкстаў і афіцыйных дакументаў Касцёла Камісіі Божага Культу і Дысцыпліны Сакрамэнтаў пры Канферэнцыі Каталіцкіх Біскупаў Беларусі
Серада, 31 снежня 2025
Апостальскі ліст Папы Льва XIV «Маляванне новых мап надзеі»
31.12.2025 15:39
Аўторак, 30 снежня 2025
Апостальскі ліст Папы Льва XIV пра значэнне археалогіі
30.12.2025 11:47
Нядзеля, 7 снежня 2025
Дактрынальная Нота Дыкастэрыі Веравучэння «Mater Populi fidelis» адносна некаторых Марыйных тытулаў, якія тычацца супрацоўніцтва Марыі ў справе збаўлення
08.12.2025 00:15
Чацвер, 27 лістапада 2025
Апостальскі ліст Папы Льва XIV «In unitate fidei» з нагоды 1700-й гадавіны Нікейскага Сабору
27.11.2025 07:00
Пятніца, 15 лістапада 2024
Нормы выступлення і прысутнасці духоўных асобаў і членаў Інстытутаў кансэкраванага жыцця і Таварыстваў апостальскага жыцця Каталіцкага Касцёла ў Беларусі ў сродках масавай інфармацыі і сацыяльнай камунікацыі
15.11.2024 12:37
Прымаючы на сябе заданне арганізаванай і плённай перадачы евангельскага паслання ў сродках масавай інфармацыі і сацыяльнай камунікацыі, а таксама у клопаце пра забеспячэнне дакладнай інфармацыі пра жыццё Каталіцкага Касцёла ў Беларусі, Канферэнцыя Каталіцкіх Біскупаў у Беларусі вызначае асноўныя нормы выступлення ў СМІ і сродках сацыяльнай камунікацыі духоўных асобаў і членаў Інстытутаў кансэкраванага жыцця і Таварыстваў апостальскага жыцця (далей – духоўныя і манаскія асобы). 1. Дадзеныя нормы распаўсюджваюцца таксама на асобаў, якія праходзяць адпаведную фармацыю ў духоўных установах. 2. Свецкія асобы, якія паступаюць на працу або распачынаюць пастаяннае супрацоўніцтва з інстытуцыямі Касцёла, павінны выразіць пісьмовую згоду на распаўсюджванне на іх дадзеных нормаў. 3. Толькі заявы тых духоўных і манаскіх асобаў, якія выступаюць з выразнага дазволу ардынарыя месца, згодна з кан. 831 § 1 і 832 Кодэкса Кананічнага Права, можна лічыць пазіцыяй інстытуцыі Касцёла, ад імя якой яны выказваюцца. 4. Духоўныя і манаскія асобы абавязаны верна перадаваць каталіцкае вучэнне ў адпаведнасці з дактрынай Настаўніцтва Касцёла і захоўваць нормы, выдадзеныя дыяцэзіяльным біскупам, а таксама захоўваць прадпісанні, устаноўленыя Канферэнцыяй Біскупаў, згодна з кан. 772 §1 і 2 Кодэкса Кананічнага Права. 5. Духоўныя і манаскія асобы, якія выказваюцца ў СМІ альбо ў сродках сацыяльнай камунікацыі, павінны адзначацца вернасцю вучэнню Евангелля, адпаведнымі ведамі і кампетэнцыяй, разважлівасцю і адказнасцю за сказанае слова, клопатам і любоўю да праўды, павагай да іншых людзей і шчырым пошукам супольнага дабра, каб Касцёл мог эфектыўна выконваць сваё заданне (гл. кан. 822 § 3 Кодэкса Кананічнага Права). 6. Пры выступленні ў СМІ альбо ў сродках сацыяльнай камунікацыі духоўныя і манаскія асобы павінны памятаць, што яны пакліканы прапаведаваць вучэнне Хрыста, а не ўласныя меркаванні і погляды, асабліва такія, якія могуць выклікаць блытаніну, скандал, стаць прычынай падзелаў паміж людзьмі, і каб такое выступленне спрыяла бездакорнаму захаванню праўдаў веры і добрых нораваў (гл. кан. 823 § 1 Кодэкса Кананічнага Права). Гэта таксама ўключае ў сябе ўстрыманне ад палітычных заяў і выказванняў. 7. Пры выступленні ў СМІ або ў сродках сацыяльнай камунікацыі духоўных і манаскіх асобаў неабходна дакладна выконваць касцёльныя прадпісанні (гл. кан. 822-832 Кодэкса Кананічнага Права) і дзяржаўнае заканадаўства, асабліва ў сферы аховы непаўналетніх, публікацыі фотаздымкаў іншых асоб, абароны асабістых дадзеных і аўтарскіх правоў. 8. Для ажыццяўлення супрацоўніцтва з прэсай, радыё- або тэлепраграмай, інтэрнэт-парталам, для рэгулярнага выступлення ў СМІ і вядзення ўласных праграм духоўным і манаскім асобам неабходна мець выразную згоду ўласнага ардынарыя або ўласнага вышэйшага настаяцеля (кан. 831 §1 і §2, кан.832 Кодэкса Кананічнага Права). 9. Кожны дыяцэзіяльны біскуп павінен клапаціцца пра тое, каб духоўныя і манаскія асобы, якія служаць у яго дыяцэзіі, а таксама супрацоўнікі касцёльных установаў рэгулярна прымалі ўдзел у адукацыйных праграмах, якія забяспечваюць адпаведную медыяадукацыю і кампетэнцыі для адказнага і эфектыўнага ўдзелу ў сродках масавай інфармацыі і сацыяльнай камунікацыі. 10. Духоўныя і манаскія асобы нясуць персанальную маральную і юрыдычную адказнасць за ўсе ўласныя публікацыі і дзеянні ў СМІ і сродках сацыяльнай камунікацыі. 11. Нягледзячы на тое, што часта прысутнасць духоўных і манаскіх асобаў ў СМІ альбо сродках сацыяльнай камунікацыі, асабліва ў сацыяльных сетках, з’яўляецца іх прыватнай ініцыятывай, аднак яны заўсёды ўспрымаюцца як прадстаўнікі Касцёла. Іх прысутнасць у медыйнай прасторы не можа спрыяць і выкарыстоўвацца для вядзення дзейнасці супраць Бога, Евангелля, Касцёла, свайго настаяцеля, а таксама любога іншага чалавека. Такім чынам, згодна з кан. 831 §1 Кодэкса Кананічнага Права, яны не могуць удзельнічаць у медыйных кампаніях і праектах, якія супярэчаць каталіцкай веры і маралі. Кожны ўдзел у медыйных праектах павінен быць адпаведна зацверджаны ўласным ардынарыем або ардынарыем месца, дзе будзе рэалізоўвацца праект. 12. У сродках сацыяльнай камунікацыі духоўныя і манаскія асобы павінны выступаць ў духоўным або манаскім адзенні, у адпаведнасці з іх дыяцэзіяльнай або манаскай прыналежнасцю. У асобных выпадках, калі дазваляецца выключэнне з гэтага правіла, неабходна атрымаць выразную згоду ардынарыя або вышэйшага настаяцеля. 13. Адказнасць за адміністраванне сайта або старонкі касцёльнай установы ускладаецца на кіраўніка гэтай касцёльнай установы або ўпаўнаважанаю ім асобу. Адміністратары сайтаў або інтэрнэт-старонак касцёльных установаў павінны быць прызначаныя дыяцэзіяльным біскупам. 14. Неабходна мець асаблівую асцярожнасць і разважлівасць ў справах духоўнага кіраўніцтва або прыватнай кансультацыі праз сродкі сацыяльнай камунікацыі. З мэтай захавання канфідэнцыяльнасці абсалютна немагчыма цэлебрацыя сакрамэнту пакаяння і паяднання праз гэтыя сродкі, у тым ліку па тэлефоне ці праз Інтэрнэт (пар. кан. 960 Кодэкса Кананічнага Права і Нормы Апостальскай Пэнітэнцыярыі адносна гэтых пытанняў). 15. Каб пазбегнуць парушэння вышэйпералічаных нормаў уласны Ардынарый або ўласны вышэйшы настаяцель, які нясе адказнасць за тое, каб вера і добрыя норавы захоўваліся бездакорна (кан. 823 §1 Кодэкса Кананічнага Права), можа выдаць адпаведныя распараджэнні, увесці неабходныя абмежаванні і ў абгрунтаваных выпадках накладаць прадугледжаныя Кананічным Правам санкцыі (гл. кан. 1368 §1, 1373, 1378 §1 Кодэкса Кананічнага Права). Нормы выступлення і прысутнасці духоўных асобаў і членаў Інстытутаў кансэкраванага жыцця і Таварыстваў апостальскага жыцця Каталіцкага Касцёла ў Беларусі ў сродках масавай інфармацыі і сацыяльнай камунікацыі уваходзяць у жыццё з моманту іх публікацыі.
Панядзелак, 4 снежня 2023
Пастырскі ліст біскупа Аляксандра Кашкевіча на першую нядзелю Адвэнту 2023 года
04.12.2023 10:00
Умілаваныя ў Хрысце Пану браты і сёстры, дарагія вернікі нашай дыяцэзіі! Сёння мы адзначаем у літургіі Касцёла першую нядзелю Адвэнту – пачатак новага літургічнага года. Перад намі гадавы цыкл касцёльных урачыстасцяў і святаў, а таксама літургічных перыядаў, якія, змяняючы адно аднаго, нагадваюць нам пра найважнейшыя падзеі гісторыі збаўлення і дазваляюць нанова іх перажыць. Гэта гісторыя любові Бога да чалавека, а найдасканалейшым чынам гэтую любоў нам аб’явіў Езус Хрыстус, Сын Божы, які для нас стаўся чалавекам, каб праз муку, смерць і ўваскрасенне адкупіць усё чалавецтва. Адвэнт, які пачынаецца, – гэта запрашэнне ўвайсці ў настрой суму па Збаўцу і чакання Яго прыйсця. У Старым Запавеце чытаем, як Пан Бог спрадвеку рыхтаваў свой народ да сустрэчы з абяцаным Месіяй. Натхнёныя Богам прарокі нястомна павучалі ізраэлітаў, указвалі на шматлікія выпадкі іх нявернасці і грахі, абвінавачвалі ў жорсткасці сэрца і пагардзе да Божага слова. Адначасова ў пасланнях прарокаў мы можам пачуць заклік апамятацца, распачаць пакаянне і навяртанне, разам з запэўніваннем, што Бог у сваёй бясконцай міласэрнасці акажа грэшнікам прабачэнне і літасць, а Яго ласка пераменіць і адновіць чалавечыя сэрцы. “Завялі мы, як лісце, – вызнае сёння з пакорай прарок Ісая, – а правіны нашыя, як вецер, нясуць нас. І няма нікога, хто заклікаў бы імя Тваё, хто ўстаў бы, каб моцна трымацца за Цябе. […] Але, Пане, Ты – Айцец наш, мы – гліна, а Ты – наш ганчар. І ўсе мы – справа рукі Тваёй” (Iс 64, 5-7). У перыяд Адвэнту Касцёл запрашае нас з такой жа ахвотай, у духу шчырага навяртання, з верай у Божую міласэрнасць і прабачэнне падрыхтаваць сэрцы да сустрэчы з Езусам Хрыстом, які да нас прыходзіць у таямніцы Нараджэння. Хоць Адвэнт не мае характару вузка пакаяннага, традыцыя Касцёла заахвочвае нас адмовіцца ад павярхоўных пацехаў і гучных забаваў, унутрана сцішыцца і звярнуць большую ўвагу на духоўныя справы. Не дазволім, каб гарачка перадсвяточных закупак, прысутныя паўсюль рэкламы ці спакуслівыя прапановы ў крамах заглушылі ў нас жаданне таго, што самае істотнае: больш інтэнсіўнай малітвы, больш уважлівага слухання Божага слова, больш стараннага прыняцця святых сакрамэнтаў. Няхай Адвэнт стане часам глыбокага аднаўлення нашай веры, ажыўлення надзеі, узрастання ў любові да Бога і бліжняга. Двухтысячагадовая традыцыя Касцёла выпрацавала разнастайныя адвэнтавыя практыкі, якія могуць быць карыснымі ў актыўным і свядомым перажыванні гэтага асаблівага часу ласкі. У многіх парафіях арганізоўваюцца рэкалекцыі і дні засяроджання, якія маюць на мэце нагадаць нам важныя праўды, звязаныя з верай, і дапамагчы прыняць адпаведныя адвэнтавыя пастановы, якія палегчаць нам пераадоленне ўласных слабасцяў і грахоў. Ужо цяпер сплануем час так, каб мы маглі ўзяць удзел у гэтых духоўных практыкаваннях, такіх важных і вельмі патрэбных. Па меры магчымасці пастараемся ўдзельнічаць у раратніх святых Імшах, якія традыцыйна цэлебруюцца ў Адвэнт у гонар Маці Божай. Паклапоцімся асабліва аб тым, каб у гэтых Імшах бралі ўдзел дзеці і моладзь. Няхай духоўнае знаходжанне побач з Найсвяцейшай Паннай Марыяй у чаканні прыйсця Сына Божага прынясе ва ўсіх нас плён паглыблення Марыйнай пабожнасці і яшчэ глыбейшага перажывання радасці Божага Нараджэння. Не забудзем прыступіць у перыяд Адвэнту да сакрамэнту паяднання, каб мы маглі сустрэць Хрыста, які прыходзіць, у стане асвячальнай ласкі ў нашых сэрцах. Няхай паяднанне з Панам Богам будзе для нас заахвочваннем да паяднання з бліжнімі шляхам узаемнага прабачэння, даравання правінаў і кампенсавання ўчыненых крыўдаў. Перыяд Адвэнту – гэта таксама час агарнуць асаблівым клопатам тых, хто знаходзіцца ў цяжкай жыццёвай сітуацыі, і аказаць ім сардэчную, бескарыслівую дапамогу. У гэты святы час агледзімся вакол сябе і заўважым людзей бедных, самотных, беспрацоўных, хворых, пажылога ўзросту, тых, якія перажываюць розныя жыццёвыя крызісы і цяжкасці. Пачуем іх нямое маленне аб дапамозе, зацікавімся імі, выкажам ім братэрскае спачуванне, падзелімся тым, што маем, і не пашкадуем для іх хвіліны часу, добрага слова і крупінкі сэрца. Будзем памятаць пра словы Езуса Хрыста: “Сапраўды кажу вам: тое, што вы зрабілі аднаму з гэтых братоў Маіх меншых, вы Мне зрабілі” (Мц 25, 40). Умілаваныя браты і сёстры! Сёлетні перыяд Адвэнту надзвычай кароткі. Ужо праз тры тыдні мы сядзем сем’ямі за вігілійным сталом, падзелімся аплаткай, выкажам адзін аднаму віншаванні і ў чарговы раз у жыцці адчуем выключную радасць, цеплыню, дабро, мір і любоў – штосьці, што мы часта называем магіяй святаў. Спытаемся ў сябе сёння, на пачатку Адвэнту: чаму мы так мала прыкладваем старанняў, каб падобная атмасфера любові, дабрыні і міру панавала ў нашых дамах штодзень, а не толькі ў святы? Можа, варта ўжо цяпер пачаць штосьці змяняць у нашым сямейным жыцці, каб зрабіць яго паўнейшым і прыгажэйшым, больш падобным да найдасканалейшага ўзору, якім з’яўляецца для нас, хрысціян, жыццё Святой Сям’і з Назарэта? Няхай пуцяводным святлом для кожнай сям’і будуць прыгожыя словы Папы Францішка з апостальскай адгартацыі Amoris Laetitia пра любоў у сям’і: “Уцелаўленне Слова ў чалавечай сям’і ў Назарэце, – піша Святы Айцец, – ўзрушвае сваёй навізной гісторыю свету. Мы павінны паглыбіцца ў таямніцу нараджэння Езуса, у „так“ Марыі, сказанае падчас нябеснага звеставання, калі ў Яе ўлонні было зачата Слова; таксама ў „так“ Юзафа, які даў імя Езусу і паклапаціўся пра Марыю; у радасць пастухоў пры яслях; у пакланенне трох Мудрацоў; у таямніцу ўдзелу Езуса ў пакутах свайго выгнанага, пераследаванага і прыніжанага народу. […] Далей трэба паглыбіцца ў перыяд трыццаці доўгіх гадоў, калі Езус зарабляў на сваё жыццё, працуючы сваімі рукамі, узносячы малітвы і захоўваючы рэлігійныя традыцыі свайго народу, выхоўваючыся ў веры сваіх айцоў, клапоцячыся, каб яна дала плён ў таямніцы Валадарства. Гэта таямніца Божага Нараджэння і таямніца Назарэта, […] з яе таксама чэрпаюць прыклады хрысціянскія сем’і, каб аднавіць сваю надзею і радасць. Запавет любові і вернасці, якім жыве Святая Сям’я з Назарэта, пралівае святло на прынцып, які надае форму кожнай сям’і і дазваляе ёй лепш спраўляцца са зменлівасцю жыцця і гісторыі. На гэтым падмурку кожная сям’я таксама ў сваёй слабасці можа стаць святлом у змроку свету. […] Няхай Назарэт сам нагадае, чым ёсць сям’я, чым ёсць еднасць любові, яе суровая і простая прыгажосць, яе святы і непарушны характар” (AL, 65-66). З усяго сэрца жадаю кожнаму з вас, дарагія браты і сёстры, цудоўнага і глыбокага, поўнага сэнсу і шчодрага на духоўныя плёны перажывання Адвэнту. Няхай гэты святы час будзе ўзбагачаны асабістай малітвай, прыняццем святых сакрамэнтаў і ўважлівым слуханнем Божага слова. Няхай не будзе ў вас недахопу ва ўнутранай цішыні і засяроджанасці, якія дазволяць пачуць у сэрцы далікатны і поўны любові Божы голас. Памятаю пра вас, дарагія вернікі дыяцэзіі, у маіх малітвах, даручаю ваш шлях адвэнтавага чування клапатлівай апецы Беззаганнай Панны Марыі і на плённую падрыхтоўку да святаў Божага Нараджэння ўсіх з усяго сэрца благаслаўляю. Aляксандр Кашкевіч Біскуп Гродзенскі Гродна, 27.11.2023 г.
Пастырскі ліст на пачатак Года Любові — чарговага этапу падрыхтоўкі да 100-гадовага юбілею Пінскай дыяцэзіі
04.12.2023 09:47
Пастырскі ліст на пачатак Года Любові — чарговага этапу падрыхтоўкі да 100-гадовага юбілею Пінскай дыяцэзіі.
Чацвер, 9 лістапада 2023
Адгартацыя Францішка C’est la confiance
09.11.2023 14:58
АПОСТАЛЬСКАЯ АДГАРТАЦЫЯ C’EST LA CONFIANCE СВЯТОГА АЙЦА ФРАНЦІШКА АБ ДАВЕРЫ ДА МІЛАСЭРНАЙ ЛЮБОВІ БОГА З НАГОДЫ 150-ГОДДЗЯ З ДНЯ НАРАДЖЭННЯ СВ. ТЭРЭЗЫ АД ДЗІЦЯТКА ЕЗУСА І НАЙСВЯЦЕЙШАГА АБЛІЧЧА
Чацвер, 19 кастрычніка 2023
Адгартацыя Францішка Laudate Deum
19.10.2023 10:55
АПОСТАЛЬСКАЯ АДГАРТАЦЫЯ LAUDATE DEUM СВЯТОГА АЙЦА ФРАНЦІШКА ДА ЎСІХ ЛЮДЗЕЙ ДОБРАЙ ВОЛІ АБ КЛІМАТЫЧНЫМ КРЫЗІСЕ
Чацвер, 9 лютага 2023
Прынцыпы працы і правілы паводзін з непаўналетнімі ў Рымска-каталіцкіх дыяцэзіях Республікі Беларусь
09.02.2023 11:40
Серада, 3 жніўня 2022
Апостальскі ліст DESIDERIO DESIDERAVI Святога Айца Францішка
03.08.2022 13:14
Апостальскі ліст DESIDERIO DESIDERAVI Святога Айца Францішка Да біскупаў, прэзбітэраў і дыяканаў, кансэкраваных асобаў і ўсіх свецкіх вернікаў Аб літургічнай фармацыі Божага народу Desiderio desideravi hoc Pascha manducare vobiscum, antequam patiar (Lc 22,15).
Пятніца, 14 студзеня 2022
Евангелле ў аўдыё
14.01.2022 19:42
Агучыў і апрацаваў кс. Аляксандр Улас паводле першага поўнага афіцыйнага Рыма-Каталіцкага выдання Новага Запавету на беларускай мове (Выдавецтва «Про Хрысто», Мінск, 2017).
Серада, 22 снежня 2021
Пастырскае пасланне арцыбіскупа Станеўскага на Нараджэнне Пана 2021 года
22.12.2021 10:53
У Пастырскім пасланні на Нараджэнне Пана 2021 года Мітрапаліт Мінска-Магілёўскі арцыбіскуп Юзаф Станеўскі прапануе паразважаць, на чым грунтуецца і да чаго нас абавязвае дыялог Бога і чалавека, які распачаўся ў Бэтлееме.
Субота, 27 лістапада 2021
Арцыбіскуп Кандрусевіч на Адвэнт: настроіцца на «хвалю» Евангелля
27.11.2021 13:00
Старшыня Камісіі агульнага душпастырства пры Канферэнцыі Каталіцкіх Біскупаў у Беларусі арцыбіскуп эмерыт Тадэвуш Кандрусевіч кіруе Слова на Адвэнт, у якім разважае пра душпастрыскі аспект гэтага асаблівага літургічнага перыяду.
Аўторак, 18 мая 2021
Апостальскі ліст ANTIQUUM MINISTERIUM
18.05.2021 12:07
Апостальскі ліст у форме «MOTU PROPRIO» Найвышэйшага Пантыфіка ФРАНЦІШКА ANTIQUUM MINISTERIUM у якім ён устанаўлівае паслугу катэхета 1. Паслуга катэхета ў Касцёле вельмі старажытная. Тэолагі згодна сцвярджаюць, што пра першых катэхетаў ідзе гаворка ўжо на старонках Новага Запавету. Служэнне навучання бярэ пачатак ад «настаўнікаў», пра якіх згадвае Апостал, калі піша ліст да супольнасці ў Карынце: «Адных Бог паставiў у Касцёле найперш апосталамi, другіх – прарокамi, трэцiх – настаўнікамі, потым даў моц, потым – дары аздараўлення, дапамогі, кіравання, розныя мовы. Цi ўсе апосталы? Цi ўсе прарокi? Цi ўсе настаўнікі? Цi ўсе цудатворцы? Цi ўсе маюць дар аздараўлення? Цi ўсе гавораць мовамi? Цi ўсе тлумачаць? Дбайце пра большыя дары, і я пакажу вам яшчэ лепшы шлях» ( 1 Кар 12, 28-31). Таксама Лука распачынае сваё Евангелле сведчаннем: «…вырашыў і я дакладна даследаваць усё ад пачатку і апісаць табе ўсё па парадку, дастойны Тэафіле, каб ты пазнаў праўдзівасць таго, чаму быў навучаны» ( Лк 1, 3-4). Евангеліст добра ведае, што яго пісанне парапануе адмысловую форму навучання, якая сапраўды дадае сілы і вытрываласць тым, хто ўжо атрымаў хрост. Апостал Павел зноў вяртаецца да гэтага аргумента, калі наказвае Галатам: «Няхай той, каго навучаюць, дзеліцца ўсякім дабром з тым, хто яго навучае» ( Гал 6, 6). Як можна заўважыць, тэкст дадае адну істотную дэталь: еднасць жыцця як знак плённасці атрыманай сапраўднай катэхезы. 2. Ужо з самага пачатку хрысціянская супольнасць мае досвед распаўсюджанай формы паслугі, якая больш канкрэтна выяўлялася ў служэнні мужчын і жанчын, якія, паслухмяныя дзеянню Духа Святога, прысвяцілі сваё жыццё справе будавання Касцёла. Харызмы, якія Дух ніколі не пераставаў удзяляць ахрышчаным, набывалі ў пэўныя моманты бачную і канкрэтную форму, скіраваную на служэнне хрысціянскай супольнасці ў яе розных праявах такім чынам, што яна была прынятая як diakonia неабходная для супольнасці. Апостал Павел аўтарытэтна раз’ясняе гэта, калі заяўляе: «Розныя ёсць дары, але той самы Дух. Розныя ёсць служэнні, але той самы Пан. Розныя ёсць дзеянні, але той самы Бог, які робіць усё ва ўсіх. Аднак кожнаму даецца праяўленне Духа на карысць. Аднаму даецца Духам слова мудрасці, другому – слова пазнання паводле таго самага Духа; іншаму – вера ў тым самым Духу; іншаму – дар аздараўлення ў тым жа Духу; іншаму – моц чыніць цуды, іншаму – прароцтва, іншаму – распазнаванне духаў, іншаму – розныя мовы, іншаму – тлумачэнне моваў. А ўсё гэта здзяйсняе адзін і той жа Дух, які ўдзяляе кожнаму паасобку, як жадае» ( 1 Кар 12, 4-11). Таму ў межах вялікай харызматычнай традыцыі Новага Запавету можна заўважыць рэальную прысутнасць ахрышчаных, якія выконвалі паслугу перадачы навучання Апосталаў і Евангелістаў у больш арганічнай, працяглай форме, звязанай з рознымі абставінамі жыцця (пар. Другі Ват. Сабор, Дагм. канстыт. Dei Verbum , 8). Касцёл пажадаў прызнаць гэтае служэнне, як канкрэтную праяву асабістай харызмы, якая ў немалой ступені спрыяе выкананню яго евангелізацыйнай місіі. Гэты погляд на жыццё першых хрысціянскіх супольнасцяў, якія ўключыліся ў абвяшчэнне і распаўсюджванне Евангелля, і ў нашы дні заахвочвае Касцёл ацаніць магчымыя новыя спосабы захавання вернасці слову Пана, каб Яго Евангелле магло дасягнуць кожнае стварэнне. 3. Уся гісторыя евангелізацыі за апошнія два тысячагоддзі паказвае вельмі выразна, наколькі плённай была місія катэхетаў. Біскупы, прэзбітэры і дыяканы разам з многімі мужчынамі і кансэкраванымі жанчынамі прысвячалі сваё жыццё катэхетычнаму навучанню, каб вера стала сапраўднай падтрымкай для асабістага існавання кожнай чалавечай істоты. Яшчэ іншыя збіралі вакол сябе наступных братоў і сясцёр, якія, маючы тую самую харызму, заснавалі законныя супольнасці для выключнага служэння катэхезе. Нельга забыць незлічоную колькасць свецкіх, якія прынялі непасрэдны ўдзел у пашырэнні Евангелля праз катэхетычнае навучанне. Мужчыны і жанчыны, праўдзівыя сведкі святасці, напоўненыя вялікай вераю, у некаторых выпадках былі таксама заснавальнікамі Касцёлаў, ахвяруючы нават сваё жыццё. Таксама ў наш час, шмат здольных і вытрывалых катэхетаў стаіць начале супольнасцяў у розных рэгіёнах i выконвае незаменную місію перадачы і паглыблення веры. Вялікі шэраг катэхетаў благаслаўлёных, святых і мучанікаў паспрыяў развіццю місіі Касцёла і заслугоўвае прызнання, бо з’яўляецца багатай крыніцай не толькі для катэхезы, але для ўсёй гісторыі хрысціянскай духоўнасці. 4. Пачынаючы з Другога Ватыканскага Сабору, Касцёл нанова адчуў значэнне ўдзелу свецкіх у справе евангелізацыі. Айцы сабору неаднаразова сцвярджалі, наколькі неабходны для «plantatio Ecclesiae» i для развіцця хрысціянкай супольнасці непасрэдны ўдзел свецкіх вернікаў у розных формах дзейнасці, у якіх можа выявіцца іх харызма. «Годны пахвалы таксама атрад катэхетаў, што здабыў вельмі вялікія заслугі ў місійнай справе сярод народаў. Ён складаецца як з мужчын, так і жанчын, поўных апостальскага духу, якія дзякуючы сваёй вялікай працы сталі асаблівай і абсалютна неабходнай дапамогай у пашырэнні веры i Касцёла. У наш час, калі адчуваецца недахоп духавенства для евангелізацыі такой вялікай колькасці вернікаў i для пастырскага служэння, паслуга катэхетаў мае вялізнае значэнне» (Другі Ват. Сабор, Дэкр. Ad gentes , 17). Побач з багатым саборавым навучаннем абавязкова трэба згадаць пастаянную зацікаўленасць Папаў, Сіноду Біскупаў, Канферэнцый Біскупаў ды паасобных пастыраў, якія цягам гэтых дзесяцігоддзяў у значнай ступені спрычыніліся да адновы катэхезы. Катэхізіс Каталіцкага Касцёла , Апостальская адгартацыя Catechesi tradendae , Агульная катэхетычная інструкцыя , Агульны дырэктыўны дакумент па катэхізацыі , нядаўні Дырэктыўны дакумент па катэхізацыі разам з многімі нацыянальнымі, рэгіянальнымі і дыяцэзіяльнымі Катэхізісамі з’яўляюцца праяўленнем цэнтральнага значэння катэхетычнай справы, якая ставіць на першае месца навучанне, а таксама сталую фармацыю верных. 5. Ні ў чым не змяншаючы місіі біскупа, які з’яўляецца першым катэхетам сваёй дыяцэзіі разам з прэзбітэрыем, які падзяляе з ім той самы пастырскі клопат, а таксама адказнасці бацькоў у справе хрысціянскай фармацыі іх дзяцей (пар. ККП, кан. 774 §2; ККУК, кан. 618), неабходна прызнанне прысутнасці свецкіх, якія ў сілу сакрамэнту хросту адчуваюць сябе пакліканымі да катэхетычнага супрацоўніцтва (пар. ККП, кан. 225; ККУК, кан. 401 i 406). Гэтая прысутнасць становіцца яшчэ больш неабходнай у наш час з прычыны адноўленага ўсведамлення евангелізацыі ў сучасным свеце (пар. Апост. адгарт. Evangelii gaudium , 163-168), а таксама таму, што сучасная культура глабалізацыі мае значны ўплыў (пар. Энц. Fratelli tutti, 100.138) i таму патрабуе сапраўднага ўзаемадзеяння з моладдзю, не кажучы ўжо пра неабходнасць адпаведнай метадалогіі i творчых рэсурсаў, здольных прыстасаваць абвяшчэнне Евангелля да місійнай трансфармацыі, якую распачаў Касцёл. Вернасць мінуламу i адказнасць за сучаснасць ? гэта неабходныя ўмовы для выканання Касцёлам яго місіі ў свеце. Абуджэнне асабістага энтузіязму з боку кожнага ахрышчанага і жывое ўсведамленне імі ўласнага паклікання да выканання сваёй місіі ў супольнасці патрабуе ўслухоўвання ў голас Духа, які не пазбаўляе нас сваёй плённай прысутнасці (пар. ККП, кан. 774 §1; ККУК, кан. 617). Таксама сёння Дух заклікае мужчын і жанчын вырушыць у дарогу і сустракацца з усімі, хто чакае адкрыцця прыгажосці, дабра і праўды хрысціянскай веры. Задача пастыраў ‒ падтрымаць іх у гэтым працэсе і ўзбагаціць жыццё хрысціянскай супольнасці шляхам прызнання паслугі свецкіх, здольных унесці свой уклад у перамену грамадства праз пранікненне «хрысціянскіх каштоўнасцяў у грамадскі, палітычны і эканамічны свет» ( Evangelii gaudium , 102). 6. Апостальства свецкіх несумненна мае свецкі характар. Яно абавязвае «шукаць Божага Валадарства, займаючыся свецкімі справамі і кіруючы імі згодна з Божым намерам» (Другі Ват. Сабор, Дагм. канст. Lumen Gentium , 31). Штодзённае жыццё свецкіх саткана не толькі з сямейных адносінаў і повязяў, але і грамадскіх, якія дазваляюць праверыць, наколькі яны «пакліканы да таго, каб зрабіць Касцёл прысутным і дзейсным у такіх месцах і такіх абставінах, дзе толькі з іх дапамогай ён можа стаць соллю зямлі» ( Lumen Gentium , 33). Карысна памятаць, што акрамя гэтага апостальства, «свецкія могуць быць па-рознаму пакліканыя да больш канкрэтнага супрацоўніцтва з апостальствам іерархіі, на ўзор тых мужчын і жанчын, якія дапамагалі апосталу Паўлу ў абвяшчэнні Евангелля, шмат працуючы ў Пану» ( Lumen Gentium , 33). Роля, якую адыгрываюць катэхеты, ‒ адна з адмысловых формаў служэння ў хрысціянскай супольнасці. Катэхеты пакліканы ў першую чаргу для таго, каб паказаць сваю кампетэнтнасць ў пастырскім служэнні перадачы веры па меры яе развіцця на розных этапах: ад першага абвяшчэння, якое ўводзіць у керыгму , праз навучанне, якое дапамагае зразумець новае жыццё ў Хрысце і рыхтуе да сакрамэнтаў хрысціянскага ўтаямнічання, аж да пастаяннай фармацыі, якая дазваляе кожнаму ахрышчанаму быць «заўсёды гатовымі даць адказ кожнаму, хто патрабуе ад вас слова пра вашу надзею» ( 1 П 3, 15). У той жа час кожны катэхет павінен быць сведкам веры, настаўнікам і містагогам, прыяцелем і педагогам, які навучае ад імя Касцёла. Толькі дзякуючы малітве, вывучэнню і непасрэднаму ўдзелу ў жыцці супольнасці яны могуць узрастаць у гэтай ідэнтычнасці належным чынам і адказна (пар. Папская рада па новай евангелізацыі, Дырэктыўны дакумент па катэхізацыі , 113). 7. З вялікай дальнабачнасцю святы Павел VI выдаў Апостальскі ліст Ministeria quaedam з намерам не толькі адаптаваць паслугу лектара і паслугу акаліта да зменлівага гістарычнага часу (пар. Апост. ліст Spiritus Domini ), але і заахвоціць Канферэнцыі Біскупаў садзейнічаць развіццю іншых служэнняў, у тым ліку і катэхета. «У дадатак да паслуг, агульных для ўсяго Лацінскага Касцёла, нішто не перашкаджае Канферэнцыям Біскупаў звяртацца да Апостальскай Сталіцы з просьбай аб устанаўленні іншых служэнняў, якія па пэўных прычынах яны лічаць неабходнымі ці вельмі карыснымі ў сваім рэгіёне. Сярод іх, напрыклад, служэнне астыярыя, эгзарцыста і катэхета». Такое ж настойлівае запрашэнне можна знайсці ў Апостальскай адгартацыі Evangelii nuntiandi. Заклікаючы да ўмелага распазнавання сучасных патрэбаў хрысціянскай супольнасці ў вернай пераемнасці яе вытокаў, Папа заахвоціў да развіцця новых формаў служэння для адноўленай пастырскай дзейнасці. «Такія паслугі здаюцца чымсьці новым, але насамрэч яны цесна звязаныя з даўнім досведам Касцёла на працягу яго доўгай гісторыі, як, напрыклад, паслуга катэхета. […] Гэтыя паслугі вельмі каштоўныя пры заснаванні Касцёла, для яго жыцця і росту, а таксама для таго, каб ён меў большы ўплыў на наваколле і дасягнуў тых, хто знаходзіцца здалёк» (Св. Павел VI, Апост. адгарт. Evangelii nuntiandi , 73). Безумоўна, нельга адмаўляць, што «разуменне тоеснасці і місіі свецкай асобы ў Касцёле ўзрасло. Мы маем вялікую колькасць свецкіх, хоць і недастатковую, з моцным пачуццём супольнасці, якія з вялікай вернасцю ўдзельнічаюць у любові, катэхезе, цэлебрацыі веры» ( Evangelii gaudium , 102). Адсюль вынікае, што прыняцце свецкага служэння, такога як катэхет, яшчэ больш падкрэслівае ўдзел у місіі, уласцівы кожнаму ахрышчанаму чалавеку. Аднак гэты ўдзел павінен ажыццяўляцца цалкам у свецкай форме, без якога-небудзь праяўлення клерыкалізму. 8. Пакліканне мае вялікае значэнне для гэтай паслугі, пра што сведчыць абрад устанаўлення, таму патрабуе з боку біскупа належнай разважлівасці. Гэтая паслуга з’яўляецца сталай формай служэння мясцоваму Касцёлу ў адпаведнасці з пастырскімі патрэбамі, якія бачыць мясцовы ардынарый, але мае яна свецкі характар, згодна з самой сутнасцю гэтай паслугі. Добра, калі да ўстанаўленння паслугі катэхета пакліканы мужчыны і жанчыны з глыбокай верай і чалавечай сталасцю, якія актыўна ўдзельнічаюць у жыцці хрысціянскай супольнасці, якія здольныя прымаць іншых, быць шчодрымі і жыць у братэрскай еднасці, якія маюць адпаведную біблійную, тэалагічную, пастырскую і педагагічную фармацыю, якія з’яўляюцца стараннымі прапаведнікамі праўды веры і маюць ужо папярэдні досвед катэхізацыі (пар. Другі Ват. Сабор, Дэкр. Christus Dominus , 14; ККП, кан. 231 §1; ККУК, кан. 409 §1). Вельмі важна, каб яны былі вернымі супрацоўнікамі прэзбітэраў і дыяканаў, гатовымі выконваць сваё служэнне там, дзе гэта неабходна, каб былі натхнёныя сапраўднай апостальскай руплівасцю. Таму, разгледзеўшы ўсе аспекты, сваёй апостальскай уладай устанаўліваю свецкую паслугу катэхета. Кангрэгацыя Божага Культу і Дысцыпліны Сакрамэнтаў у найбліжэйшы час апублікуе абрад устанаўлення паслугі свецкага катэхета. 9. Таму заклікаю Канферэнцыі Біскупаў зрабіць паслугу катэхета эфектыўнай, вызначыўшы неабходны працэс фармацыі і нарматыўныя крытэрыі, патрэбныя для атрымання гэтай паслугі, і распрацаваўшы найбольш прыдатныя формы служэння, якое гэтыя мужчыны і жанчыны будуць пакліканы выконваць у адпаведнасці са зместам гэтага Апостальскага ліста. 10. Сіноды Усходніх Касцёлаў ці Сходы іерархаў могуць прыняць тое, што ўстаноўлена тут для адпаведных Касцёлаў sui iuris , у адпаведнасці са сваім мясцовым правам. 11. Няхай пастыры прымаюць заахвочванні айцоў Сабору, якія прыгадвалі, што «пастыры ведаюць, што яны ўстаноўлены Хрыстом не для таго, каб узяць на сябе ўсю місію Касцёла ў збаўленні свету, але што іх ганаровым заданнем з’яўляецца такое ажыццяўленне пастырскай апекі над вернікамі і такое прызнанне іх паслуг і харызмаў, каб усе яны згодна, кожны па-свойму, працавалі на агульную справу» ( Lumen Gentium , 30 ). Няхай распазнаванне дароў, якія Дух Святы ніколі не перастае ўдзяляць Касцёлу, падтрымлівае іх у выкананні паслугі катэхета дзеля ўзрастання даручанай ім супольнасці (пар. Эф 4, 15-16). Загадваю, каб тое, што было прынята ў гэтым Апостальскім лісце, выдадзеным у форме «Motu Proprio», цалкам выконвалася, нягледзячы ні на якія супрацьлеглыя аргументы, нават калі яны вартыя асобнай увагі, каб было абнародавана праз публікацыю ў L’Osservatore Romano і ўступіла ў сілу ў той жа дзень, а пасля было апублікавана ў афіцыйным выданні Acta Apostolicae Sedis . Дадзена ў Рыме, у св. Яна на Латэране, 10 мая 2021 года, ва ўспамін св. Яна Авільскага, прэзбітэра i доктара Касцёла, у дзесяты год майго пантыфікату. Францішак
Серада, 10 сакавіка 2021
10 сакавіка — пачатак Навэнны да святога Юзафа
10.03.2021 11:44
За дзевяць дзён да ўрачыстасці святога Юзафа, якая адзначаецца 19 сакавіка, распачынаецца Навэнна да святога Юзафа — традыцыйнае набажэнства на ўшанаванне святога Абранніка Багародзіцы.
Аўторак, 22 снежня 2020
Апостальскі ліст PATRIS CORDE Святога Айца Францішка
22.12.2020 10:52
АПОСТАЛЬСКІ ЛІСТ PATRIS CORDE СВЯТОГА АЙЦА ФРАНЦІШКА З НАГОДЫ 150-АЙ ГАДАВІНЫ АБВЯШЧЭННЯ СВЯТОГА ЮЗАФА АПЕКУНОМ ПАЎСЮДНАГА КАСЦЁЛА
Панядзелак, 16 лістапада 2020
Энцыкліка Францішка «Fratelli tutti»
16.11.2020 11:58
ЭНЦЫКЛІКА FRATELLI TUTTI СВЯТОГА АЙЦА ФРАНЦІШКА АБ БРАТЭРСТВЕ І САЦЫЯЛЬНЫМ СЯБРОЎСТВЕ
Аўторак, 20 кастрычніка 2020
Апостальскі ліст SCRIPTURAE SACRAE AFFECTUS Святога Айца Францішка
20.10.2020 13:45
АПОСТАЛЬСКІ ЛІСТ SCRIPTURAE SACRAE AFFECTUS Святога Айца Францішка у тысяча шасцісотую гадавіну смерці св. Гераніма Змест Уступ З Рыма ў Бэтлеем Сапенцыяльны ключ да яго вобраза Любоў да Святога Пісання Даследаванне Святога Пісання Вульгата Пераклад як інкультурацыя Геранім і пасад Пятра Палюбіць тое, што любіў Геранім Замілаванне да Святога Пісання , жывая і глыбокая любоў да запісанага Божага слова – гэта спадчына, якую пакінуў Касцёлу св. Геранім праз сваё жыццё і творы. Словы, узятыя з яго літургічнага ўспаміну 1 , даюць нам, пасля шаснаццаці стагоддзяў з дня яго смерці, патрэбны ключ для разумення яго выдатнай постаці ў гісторыі Касцёла і яго вялікай любові да Хрыста. Гэтая любоў разліваецца як рака на мноства ручаёў у яго нястомнай працы як вучонага, перакладчыка, экзегета, глыбокага знаўцы і гарачага папулярызатара Святога Пісання; выдатнага інтэрпрэтатара біблійных тэкстаў; гарачага і часам нястрыманага абаронцы хрысціянскай праўды; аскетычнага і бескампраміснага пустэльніка, а таксама дасведчанага духоўнага кіраўніка ў сваёй велікадушнасці і пяшчоце. Сёння, праз 1600 гадоў, яго постаць застаецца вельмі важнай для нас, хрысціянаў XXI стагоддзя. Уступ Геранім завяршыў сваё зямное жыццё 30 верасня 420 г. у Бэтлееме ў супольнасці, якую сам заснаваў пры гроце Нараджэння Хрыста. Такім чынам, ён даверыў сябе таму Пану, якога заўсёды шукаў і распазнаваў у Святым Пісанні; таму, каго, як Суддзю, ён ужо сустрэў, будучы ў ліхаманцы, у адной візіі, магчыма ў перыяд Вялікага посту 375 году. Гэтая падзея стала пераломным момантам у яго жыцці, нагодай для навяртання і змены перспектывы. Ён адчуў, што стаіць перад Суддзёю, пра што ўспамінаў: «Адказваючы на пытанне аб сваім стане, я адказаў, што я хрысціянін. Але той, хто сядзеў спераду, сказаў: „Хлусіш! Ты цыцэронец, а не хрысціянін”» 2 . Сапраўды, св. Геранім з дзіцячых гадоў любіў чыстую прыгажосць класічных лацінскіх тэкстаў, у параўнанні з якімі біблійныя творы спачатку падаліся яму грубымі і некарэктнымі, занадта рэзкімі для яго вытанчанага літаратурнага густу. Гэты эпізод з яго жыцця паўплываў на яго рашэнне цалкам прысвяціць сябе Хрысту і Ягонаму слову, аддаючы сваё жыццё таму, каб праз сваю нястомную працу як перакладчыка і каментатара зрабіць боскія пісанні больш даступнымі для іншых. Гэтая падзея надала ягонаму жыццю новую і больш пэўную мэнакіраванасць: стаць слугою Божага слова, закаханым у «цела Пісання». Так у няспынных пошуках, якімі вызначалася яго жыццё, ён дасканаліць сваю юнацкую адукацыю і фармацыю, атрыманую ў Рыме, накіроўваючы ў іншае рычышча свае веды дзеля больш сур’ёзнага служэння Богу і касцёльнай супольнасці. Так св. Геранім стаў адной з выдатных постацяў старажытнага Касцёла ў перыяд, вядомы як залаты век патрыстыкі; сапраўдным мастам паміж Усходам і Захадам: з юнацтва сябруе з Руфінам Аквілійскім, сустракаецца з Амброзіем і вядзе частую перапіску з Аўгустынам. На Усходзе знаёміцца з Грыгорыем Назіянзскім, Дыдымам Александрыйскім, Эпіфаніем Саламінскім. Хрысціянская іканаграфічная традыцыя прадстаўляе яго як святога разам з Аўгустынам, Амброзіем і Грыгорыем Вялікім, сярод гэтых чатырох вялікіх дактароў Заходняга Касцёла. У розных абставінах мае папярэднікі ўжо ўзгадвалі св. Гераніма. Сто год таму, на пятнаццатае стагоддзе з дня яго смерці, Бэнэдыкт XV прысвяціў Гераніму сваю энцыкліку Spiritus Paraclitus (15 верасня 1920 г.), прадставіўшы яго свету як « doctor maximus explanandis Scripturis » 3 . У апошні час Бэнэдыкт XVI прысвяціў яго асобе і творчасці дзве чарговыя катэхезы 4 . Цяпер, у 1600-ую гадавіну яго смерці, я таксама жадаю ўшанаваць памяць св. Гераніма і яшчэ раз падкрэсліць актуальнасць яго паслання і навучання, пачынаючы з яго вялікага замілавання да Святога Пісання. У пэўным сэнсе яго можна прадставіць у дасканалым спалучэнні як надзейнага правадніка і прывілеяванага сведку ўслед за XII Сходам Сіноду Біскупаў, які быў прысвечаны Божаму слову 5 , а таксама разам з Апостальскай адгартацыяй Verbum Domini ( VD ) майго папярэдніка Бэнэдыкта XVI, апублікаванай ва ўспамін святога, 30 верасня 2010 года 6 . З Рыма ў Бэтлеем Жыццё і асабісты шлях св. Гераніма ідуць дарогамі Рымскай імперыі, паміж Еўропай і Усходам. Ён нарадзіўся каля 345 г. у Стрыдоне, на памежжы Паноніі і Далмацыі, на тэрыторыі сучаснай Харватыі або Славеніі. Атрымаў грунтоўнае выхаванне ў хрысціянскай сям’і. Як было прынята ў тыя часы, ён быў ахрышчаны ў дарослым узросце, будучы студэнтам рыторыкі ў Рыме, паміж 358 і 364 гадамі. Менавіта ў гэты час ён стаў ненасытным чытачом лацінскай класікі, які вучыўся пад кіраўніцтвам самых выдатных на той час настаўнікаў рыторыкі. Пасля вучобы ён здзейсніў доўгае падарожжа па Галіі, якое прывяло яго ў імперскі горад Трэвір, які сёння знаходзіцца ў Германіі. Менавіта там ён упершыню сутыкнуўся з усходнім манаствам, якое пашыраў св. Атаназій. Так сталее яго глыбокае жаданне, якое не пакідае яго ў Аквілеі, дзе разам з некалькімі сваімі сябрамі ён ініцыюе «хор благаслаўлёных» 7 , перыяд супольнага жыцця. Каля 374 года, праходзячы праз Антыёхію, ён вырашае сысці ў пустыню Халкіс, каб больш радыкальна весці аскетычнае жыццё, у якім шмат месца адводзіць вывучэнню біблійных моў, спачатку грэцкай, а затым габрэйскай. Ён давяраецца аднаму брату габрэю, які прыняў хрысціянства і дапамог яму пазнаць новую, габрэйскую мову і яе гукі, якія, па яго словах, былі «шыпячымі і прыдыхальнымі» 8 . Геранім выбірае пустыню, а пазней жыццё на пустыні, у самым глыбокім яе значэнні: як месца асноўных экзістэнцыяльных выбараў, блізкасці і сустрэчы з Богам, дзе праз сузіранне, унутраныя выпрабаванні і духоўную барацьбу ён пачынае глыбей разумець сваю слабасць, больш усведамляючы абмежаванасць сваю і іншых людзей і прызнаючы значэнне слёз 9 . Такім чынам на пустыні ён адчуў канкрэтную прысутнасць Бога, неабходнасць адносінаў чалавека з Ім, Яго міласэрнае суцяшэнне. У гэтым кантэксце мне ўспамінаецца анекдот з апакрыфічнай традыцыі. Геранім пытаецца ў Пана: «Што хочаш ад мяне?» − І Ён адказвае: «Ты не ўсё яшчэ аддаў мне». − «Але ж, Пане, я даў табе гэта, гэта і гэта». − «Не хапае адной рэчы». − «Якой?» − «Дай мне свае грахі, каб я мог атрымаць радасць іх прабачэння яшчэ раз» 10 . Пасля мы знаходзім Гераніма ў Антыёхіі, дзе ён быў пасвячаны ў святары біскупам гэтага горада Паўлінам, а затым, прыблізна ў 379 г., у Канстанцінопалі, дзе ён знаёміцца з Грыгорыем Назіянзскім і працягвае вучобу, перакладае з грэцкай мовы на лацінскую важныя творы (гаміліі Арыгена і хроніку Эўзэбія), удыхае атмасферу Сабору, які адбываўся ў гэтым горадзе ў 381 годзе. У гэтыя гады навучання выявілася яго захапленне і шчодрасць. Гэта благаслаўлёны неспакой, які вядзе яго і робіць нястомным і поўным запалу ў сваіх пошуках: «Колькі разоў я расчароўваўся; колькі разоў я адмаўляўся, але потым дзякуючы ўпартаму жаданню вучыцца распачынаў зноў», ідучы праз «горкае насенне» такой вучобы да збірання «салодкіх пладоў» 11 . У 382 г. Геранім вярнуўся ў Рым і трапіў у распараджэнне папы Дамаса, які, ацаніўшы яго выдатныя якасці, зрабіў яго сваім блізкім супрацоўнікам. Тут Геранім вядзе актыўную дзейнасць, не забываючы аднак пра духоўнае вымярэнне. На Авентыне пры падтрымцы рымскіх арыстакратак, такіх як Марцэла, Паўла і яе дачка Эўстахія, якія імкнуцца да евангельскага радыкалізму, ён стварае кола, прысвечанае чытанню і дакладнаму вывучэнню Святога Пісання. Геранім выступае як экзегет, настаўнік і духоўны кіраўнік. У гэты час ён пераглядае ранейшыя лацінскія пераклады Евангелля і, магчыма, іншых частак Новага Запавету; працягвае працу перакладчыка гамілій і біблійных каментарыяў Арыгена; займаецца надзвычай актыўнай эпісталярнай дзейнасцю; вядзе публічныя спрэчкі з аўтарамі-ерэтыкамі, часам дапускаючы празмернасць і нястрыманасць, але заўсёды маючы шчырае жаданне бараніць праўдзівую веру і дэпазіт Святога Пісання. Гэты напружаны і плённы перыяд быў перарваны смерцю папы Дамаса. Геранім вымушаны пакінуць Рым і ў таварыстве сяброў і некаторых жанчын, якія пайшлі за ім, жадаючы працягнуць распачаты ім досвед духоўнага жыцця і вывучэння Бібліі, адпраўляецца спачатку ў Егіпет, дзе сустракае вялікага тэолага Дыдыма Александрыйскага, а затым у Палестыну, каб канчаткова ў 386 г. пасяліцца ў Бэтлееме. Ён зноў бярэцца за вывучэнне філалогіі, будучы звязаным з канкрэтнымі месцамі, якія згадваюцца ў біблійных апавяданнях. Важнасць, якую ён прыпісваў святым мясцінам, бачна не толькі ў яго рашэнні жыць у Палестыне, з 386 г. да самай смерці, але і ў падтрымцы пілігрымак. Менавіта ў Бэтлееме, яго прывілеяваным месцы, паблізу грота Нараджэння Пана ён засноўвае два кляштары «двайняты», мужчынскі і жаночы, прытулкі для пілігрымаў, якія прыбываюць у святыя месцы ( ad loca sancta ), паказваючы гэтым сваю велікадушнасць у прыняцці тых, хто прыязджае на гэтую зямлю, каб убачыць і дакрануцца да месцаў гісторыі збаўлення, спалучаючы такім чынам культурныя і духоўныя пошукі 12 . Услухоўваючыся ў Святое Пісанне, Геранім знаходзіць самога сябе, аблічча Бога і сваіх братоў, а таксама пацвярджае сваю прыхільнасць да супольнага жыцця. Адсюль яго жаданне жыць з сябрамі, як у Аквілеі, засноўваць манаскія супольнасці для рэалізацыі цэнабіцкага ідэалу манаскага жыцця, дзе кляштар разглядаецца як «трэнажорны зал», у якім выхоўваюцца людзі, «якія былі меншыя за ўсіх, каб яны маглі стаць першымі сярод усіх», шчаслівымі ў беднасці і здольнымі вучыць іншых сваім стылем жыцця. Ён лічыць, што жыццё «пад кіраўніцтвам аднаго айца і ў таварыстве многіх» мае выхаваўчае значэнне, бо вучыць пакоры, цярплівасці, маўчанню і лагоднасці, разуменню таго, што «праўда не любіць цёмных куткоў і не шукае шэптаў» 13 . Ён таксама прызнаецца, што «сумуе па келлях кляштара, [...] жадае наследаваць руплівасць тых мурашак, дзе ўсе працуюць разам і дзе няма нічога, што б належала толькі камусьці, але ўсё належыць усім» 14 . Геранім не шукае ў вучобе часова задавальнення і самамэты, але лічыць яе як бы духоўным практыкаваннем і сродкам набліжэння да Бога. Таму яго класічнае выхаванне таксама было падпарадкавана больш глыбокаму служэнню касцёльнай супольнасці. Давайце паразважаем пра дапамогу, якую ён аказаў папу Дамасу, пра яго навучанне жанчын, асабліва па-габрэйску, з часоў першага кола на Авентыне, у выніку чаго Паўла і Эўстахія ўвайшлі ў «змаганні перакладчыкаў» 15 і мелі магчымасць чытаць і спяваць псальмы на мове арыгінала, што было чымсьці нечуваным у тыя часы 16 . Культура, якой ён вызначаўся, была прызначана для служэння і з’яўляецца неабходнай для кожнага евангелізатара. Ён так нагадвае свайму сябру Непацыяну: «Слова прэзбітэра павінна зыходзіць з чытання Святога Пісання. Я не хачу, каб ты быў дэкламатарам, крыклівым пустазвонам, але тым, хто разумее таямніцу ( mysterii ) і глыбока ведае Боскія сакрамэнты ( sacramentorum ). Выклікаць захапленне ў нявопытнага натоўпу патокам словаў і хуткай гаворкай уласціва невукам. Бессаромны чалавек часта тлумачыць тое, чаго сам не ведае, і прыкідваецца вялікім экспертам толькі таму, што яму ўдаецца пераканаць іншых» 17 . У Бэтлееме, аж да сваёй смерці ў 420 г., Геранім перажывае самы плённы і напружаны перыяд свайго жыцця, цалкам прысвечаны вывучэнню Святога Пісання і манументальнай працы па перакладзе ўсяго Старога Запавету з габрэйскага арыгінала. У той жа час ён каментуе кнігі прарокаў, псальмы, творы Паўла, а таксама піша дапаможнікі па вывучэнні Бібліі. Каштоўная праца, замацаваная ў яго творах, з’яўляецца плёнам канфрантацыі і супрацоўніцтва, ад перапісвання і супастаўлення рукапісаў да разважанняў і дыскусій: «Я ніколі не давяраў уласным сілам, вывучаючы Божыя тамы, [...] у мяне ёсць звычка пытацца нават пра тое, што я, як мне здавалася, ведаў, а тым больш пра тое, у чым я не быў упэўнены» 18 . Вось чаму, усведамляючы сваю абмежаванасць, ён просіць пастаяннай падтрымкі ў заступніцкай малітве аб паспяховасці свайго перакладу святых тэкстаў «у тым самым Духу, у якім яны былі напісаны» 19 , не забываючы таксама пра пераклад твораў аўтараў, неабходных для экзэгетычнай працы, такіх як Арыген, каб «даць матэрыял тым, хто хоча дасягнуць поспеху ў веданні рэчаў» 20 . Даследаванне Гераніма разглядаецца як намаганне, рэалізаванае ў межах супольнасці і дзеля служэння супольнасці, як мадэль сінадальнасці для нас, для нашага часу і для розных культурных інстытуцый Касцёла, каб яны заўсёды былі «месцамі, дзе веды становяцца служэннем, бо без ведаў, якія нараджаюцца ў выніку супрацоўніцтва і вядуць да ўзаемадзеяння, няма ніякага сапраўднага і інтэгральнага чалавечага развіцця» 21 . Фундаментам такой еднасці з’яўляецца Святое Пісанне, якое мы не можам чытаць адныя: «Біблія напісана Божым народам і для Божага народу пад натхненнем Духа Святога. Толькі ў гэтай еднасці з Божым народам можам сапраўды дайсці з нашым „мы” да сутнасці праўды, якую Бог хоча нам перадаць» 22 . Трывалы жыццёвы досвед, узгадаваны Божым словам, дазволіў Гераніму дзякуючы шырокай карэспандэнцыі стаць духоўным правадыром. Ён спадарожнічаў многім, бо быў перакананы, што «без настаўніка нельга навучыцца ніякаму майстэрству», як пісаў Рустыку: «Гэта ўсё хачу табе прывіць, трымаючы цябе за руку, падобна як дасведчаны мараплавец пасля многіх караблекрушэнняў спрабуе навучыць недасведчанага марака» 23 . Са свайго спакойнага кутка свету ён сачыў за чалавецтвам у эпоху вялікіх хваляванняў, пазначаных такімі падзеямі, як рабаванне Рыма ў 410 годзе, якое моцна закранула яго. У сваіх лістах ён вядзе дактрынальныя спрэчкі, абараняючы заўсёды праўдзівую веру, будучы чалавекам моцных і далікатных адносінаў, шчырага аддання, без саладжавасці, бо «любоў бясцэнная» 24 . Ён перажывае свае пачуцці жыва і шчыра. Такая рэакцыя на сітуацыі, у якіх ён жыве і працуе, выяўляецца таксама ў тым, што ён прапануе сваю працу перакладчыка і каментатара як munus amicitiae [сяброўскую паслугу]. Гэта ў першую чаргу дар для сяброў, да якіх ён кіруе і якім прысвячае свае творы, якіх просіць, каб яны чыталі іх прыязным, а не крытычным вокам, а пасля чытачам, яго сучаснікам і людзям усіх часоў 25 . Апошнія гады жыцця ён праводзіць у асабістым і супольным малітоўным чытанні Святога Пісання, у сузіранні, у служэнні братам сваімі творамі. Усё гэта ён робіць у Бэтлееме, ля грота, у якім Дзева нарадзіла Слова, ведаючы, што «шчаслівы той, хто ў сваёй душы носіць крыж, уваскрасенне, месца нараджэння Хрыста і месца Яго ўнебаўшэсця! Шчаслівы той, хто ў сваім сэрцы мае Бэтлеем і ў чыім сэрцы штодня нараджаецца Хрыстус!» 26 . Сапенцыяльны ключ да яго вобраза Для поўнага разумення асобы св. Гераніма трэба спалучыць два вымярэнні, якія характарызавалі яго жыццё як веруючага чалавека: з аднаго боку абсалютная i рыгарыстычная адданасць Богу, з адмаўленнем ад любога людскога задавальнення дзеля любові да ўкрыжаванага Хрыста (пар. 1 Кар 2, 2; Флп 3, 8.10); з другога боку, руплівыя намаганні ў вучобе, скіраванай выключна на больш поўнае разуменне таямніцы Пана. І менавіта гэтае падвойнае сведчанне, якое цудоўна дае Геранім, прапанавана як узор: перадусім для манахаў, каб тых, хто жыве аскезай і малітвай, заахвоціць да цяжкой даследчыцкай і інтэлектуальнай працы; затым для вучоных, якія павінны памятаць, што веды маюць рэлігійную каштоўнасць толькі тады, калі грунтуюцца на выключнай любові да Бога, калі пазбаўлены ўсякіх людскіх амбіцый i свецкіх памкненняў. Гэтыя вымярэнні знайшлі адлюстраванне ў гісторыі мастацтва, дзе часта прадстаўляецца св. Геранім: вялікія майстры заходняга мастацтва пакінулі нам яго выявы. Мы можам вылучыць іканаграфічныя жанры паводле двух розных спосабаў яго прадстаўлення. Адзін паказвае яго перадусім як манаха і пакутніка, са знясіленым ад посту целам, які ўкрываецца ў пустыні, кленчыць або ляжыць крыжам на зямлі, часта з заціснутым у правай руцэ каменем, каб біць сябе ў грудзі, і з вачыма, скіраванымі да Укрыжаванага. У гэтую лінію ўпісваецца кранальны шэдэўр Леанарда да Вінчы, які захоўваецца ў Ватыканскай Пінакатэцы. Другі спосаб прадстаўлення Гераніма – той, які паказвае яго ў вопратцы вучонага, які сядзіць за сваім сталом, каб перакладаць і каментаваць Святое Пісанне, у атачэнні кніг i пергаментаў, занураны думкамі і пісаннем у місію абароны веры. У такой паставе, – прыводзячы іншы славуты прыклад, – прадстаўляе яго неаднаразова Альбрэхт Дзюрэр. Згаданыя вышэй два аспекты можна ўбачыць разам на палатне Караваджо ў Галерэі Баргезэ ў Рыме. У адной сцэне прадстаўлены стары аскет, нядбайна ахінуты ў чырвоную тканіну, які трымае на стале чэрап, сімвал марнасці зямных спраў, і адначасова моцна паказаны таксама характар вучонага, вочы якога глядзяць у кнігу, а яго рука макае пяро ў чарніліцу ў характэрным для пісьменніка жэсце. Падобным чынам – які я назваў бы сапенцыяльным – мы павінны разумець падвайны характар жыццёвай дарогі Гераніма. Калі ён як сапраўдны «бэтлеемскі Леў» быў празмерны ў тоне сваіх выказванняў, то рабіў гэта дзеля пошуку праўды, бескампрамісным слугою якой быў гатовы стаць. І як сам гэта тлумачыць у адным з першых сваіх лістоў пад назваю Жыццярыс св. Паўла Тэбанскага, пустэльніка , львы здольныя і на «магутны рык», і на слёзы 27 . Таму тое, што з’яўляецца ў яго вобразе як бы дзьвюма супрацьлеглымі рысамі, па-сутнасці гэта элементы, пры дапамозе якіх Дух Святы дазваляе яму гартаваць духоўную еднасць. Любоў да Святога Пісання Адметнай рысай духоўнасці св. Гераніма была, несумненна, яго гарачая любоў да Божага слова, даручанага Касцёлу ў Святым Пісанні. Усе дактары Касцёла, − асабліва з першых стагоддзяў хрысціянства, − выразна чэрпалі змест свайго навучання з Бібліі, але Геранім рабіў гэта больш сістэматычна і ў нейкай ступені непаўторна. У апошні час экзегеты адкрылі нарацыйную і паэтычную геніальнасць Бібліі менавіта з увагі на яе выразнасць. Геранім жа падкрэсліваў у Святым Пісанні больш ціхмяны характар аб’яўлення Бога, паказаны з дапамогаю грубай і амаль прымітыўнай прыроды габрэйскай мовы ў параўнанні з вытанчанасцю лаціны Цыцэрона. Таму ён прысвяціў сябе Святому Пісанню не з эстэтычных меркаванняў, але − як добра вядома − толькі таму, што Святое Пісанне вяло яго да пазнання Хрыста, бо няведанне Святога Пісання − гэта няведанне Хрыста 28 . Геранім вучыць нас, што трэба вывучаць не толькі Евангеллі, і трэба каментаваць не толькі апостальскую традыцыю, заключаную ў Дзеях Апосталаў i ў Пасланнях, бо для разумення праўды і багацця Хрыста неабходны ўвесь Стары Запавет 29 . Нават старонкі самога Евангелля сведчаць пра гэта: яны гавораць нам пра Езуса як пра Настаўніка, які звяртаецца да Майсея, прарокаў і Псальмаў (пар. Лк 4, 16-21; 24, 27.44-47), каб растлумачыць сваю таямніцу. Прапаведаванне Пятра і Паўла ў Дзеях Апосталаў таксама ў большасці караніцца ў Пісаннях Старога Запавету; без іх нельга ў поўнай меры зразумець постаць Божага Сына, Месіі Збаўцы. Стары Запавет нельга разглядаць толькі як шырокі спіс цытат, якія пацвярджаюць спаўненне прароцтваў у асобе Езуса з Назарэта. Хутчэй, кажучы больш радыкальна, толькі ў святле старазапаветных «фігур» можна зразумець паўнату значэння падзеі Хрыста, якая здзейснілася ў Яго смерці і ўваскрасенні. Таму трэба нанава адкрыць ў катэхетычнай і казнадзейскай практыцы, а таксама ў тэалагічных трактатах неад’емны ўклад Старога Запавету, які трэба чытаць і засвойваць як каштоўную ежу (пар. Эзх 3, 1-11; Ап 10, 8-11) 30 . Поўная адданасць Гераніма Святому Пісанню выяўляецца ў форме яго гарачых выказванняў, падобна старажытным прарокам. Менавіта ад іх наш Доктар чэрпае ўнутраны агонь, які становіцца палымяным і рэзкім словам (пар. Ер 5, 14; 20, 9; 23, 29; Мал 3, 2; С і р 48, 1; Мц 3, 11; Лк 12, 49), неабходным для выражэння гарачай руплівасці таго, хто служыць Божай справе. Як у выпадку з Іллёю, Янам Хрысціцелем і апосталам Паўлам, абурэнне хлуснёй, крывадушнасцю і фальшывым вучэннем распальвае прамову Гераніма, робячы яе правакацыйнай і, здавалася б, жорсткай. Палемічнае вымярэнне яго твораў можна зразумець лепш, калі чытаць іх як своеасаблівае запазычанне і актуалізацыю самай сапраўднай прароцкай традыцыі. Таму Геранім з’яўляецца ўзорам бескампраміснага сведкі праўды, які выкарыстоўвае жорсткасць дакору, каб прывесці да навяртання. Праз інтэнсіўнасць выразаў і вобразаў выяўляецца мужнасць слугі, які хоча падабацца не іншым, але толькі свайму Пану (пар. Гал 1, 10), дзеля якога ён спажыў усю духоўную энергію. Даследаванне Святога Пісання Гарачая любоў св. Гераніма да Святога Пісання прасякнута паслухмянасцю. Перадусім Богу, які выразіў сябе словамі, якія патрабуюць слухання, поўнага пашаны 31 , а ў выніку паслухмянасці тым, хто ў Касцёле прадстаўляе жывую традыцыю інтэрпрэтацыі аб’яўленага паслання. Аднак «паслухмянасць веры» ( Рым 1, 5; 16, 26) не з’яўляецца проста пасіўным прыняццем чагосьці ўжо вядомага; наадварот, патрабуе актыўных намаганняў у асабістым пошуку. Мы можам разглядаць св. Гераніма як вернага і працавітага «слугу» Слова, цалкам адданага пашырэнню сярод сваіх братоў і сясцёр у веры больш адэкватнага разумення даверанага ім святога «дэпазіту» (пар. 1 Цім 6, 20; 2 Цім 1, 14). Без разумення напісанага натхнёнымі аўтарамі само Божае слова пазбаўлена сваёй плённасці (пар. Мц 13, 19), і з яго не можа выплываць любоў да Бога. Аднак біблійныя старонкі не заўсёды даступныя адразу. Як кажа Ісая (29, 11), нават для тых, хто ўмее «чытаць», гэта значыць для тых, хто прайшоў дастатковую інтэлектуальную падрыхтоўку, Святая Кніга падаецца «запячатанай», герметычна закрытай для інтэрпрэтацыі. Таму неабходна, каб умяшаўся кампетэнтны сведка і даў выратавальны ключ, Хрыста Пана, адзінага, хто можа зламаць пячатку і адкрыць кнігу (пар. Ап 5, 1-10) дзеля цудоўнага праліцця ласкі (пар. Лк 4, 17-21). Многія, нават сярод практыкуючых хрысціянаў, адкрыта кажуць, што не ўмеюць чытаць (пар. Іс 29, 12), не з прычыны непісьменнасці, але таму, што не падрыхтаваныя да разумення біблійнай мовы, спосабаў яе выражэння і старажытных культурных традыцый. У выніку чаго біблійны тэкст становіцца неразборлівым, нібы напісаным незнаёмым алфавітам і незразумелай мовай. Таму неабходна пасрэдніцтва інтэрпрэтатара, які б мог выконваць сваю «дыяканскую» функцыю, служачы тым, хто не можа зразумець сэнс напісанага прароча. У сувязі з гэтым можна ўзгадаць вобраз дыякана Філіпа, якога Пан падштурхнуў наблізіцца да еўнуха, які чытаў урывак з Ісаі (53, 7-8) на сваёй калясніцы, але не меў магчымасці зразумець яго сэнс. «Ці разумееш, што чытаеш?» − спытаў Філіп, а еўнух адказаў: «Як жа магу разумець, калі ніхто не павучыў мяне?» ( Дз 8, 30-31) 32 . Геранім наш правадыр, бо як Філіп (пар. Дз 8, 35), ён вядзе кожнага чытача да таямніцы Езуса, а таксама таму, што адказна і сістэматычна дае экзегетычную і культурную інфармацыю, неабходную для правільнага і плённага чытання Святога Пісання 33 . Кампетэнтнасць у мовах, на якіх было перададзена Божае слова, дбайны аналіз і ацэнка рукапісаў, сістэматычныя археалагічныя даследаванні, а таксама веданне гісторыі інтэрпрэтацыі – адным словам усе метадалагічныя рэсурсы, якія былі даступныя ў яго гістарычную эпоху, ён умела і мудра выкарыстаў для таго, каб паказаць правільнае разуменне натхнёнага Пісання. Гэты выдатны аспект дзейнасці св. Гераніма таксама мае вялікае значэнне для Касцёла ў наш час. Калі, як вучыць нас Dei Verbum , Біблія з’ўяўляецца «як бы душой святой тэалогіі» 34 і нібы духоўным касцяком хрысціянскай рэлігійнай практыкі 35 , то неабходна, каб інтэрпрэтацыя Бібліі была падмацавана канкрэтнымі навыкамі. Безумоўна, гэтай мэце служаць такія спецыялізаваныя цэнтры біблійных даследаванняў, як Папскі біблійны інстытут у Рыме, École Biblique і Studium Biblicum Franciscanum у Ерузалеме, а для патрыстычных даследаванняў Augustinianum у Рыме. Аднак кожны тэалагічны факультэт павінен імкнуцца да таго, каб выкладанне Святога Пісання было запраграмавана так, каб студэнты атрымлівалі кампетэнтныя навыкі інтэрпрэтацыі, як у экзегезе тэкстаў, так і ў біблійнай тэалогіі ў цэлым. На жаль, багацце Святога Пісання многія не ведаюць ці мінімізуюць, таму што яны не атрымалі асноўных ведаў. Таму, акрамя павелічэння касцёльных праграм навучання для святароў і катэхетаў, якія б лепш выкарыстоўвалі веды ў галіне разумення Святога Пісання, варта таксама пашыраць фармацыю ўсіх хрысціянаў, каб кожны з іх мог адкрыць святую кнігу і чэрпаць з яе бясцэнныя плады мудрасці, надзеі і жыцця 36 . Тут я хацеў бы прыгадаць тое, што мой папярэднік выказаў у Апостальскай адгартацыі Verbum Domini : «Сакрамэнтальнасць слова становіцца зразумелай праз аналогію з сапраўднай прысутнасцю Хрыста ў кансэкраваных постацях хлеба і віна. [...] Наконт таго, як трэба адносіцца да Эўхарыстыі і да Божага слова, св. Геранім піша: „Мы чытаем Святое Пісанне. Думаю, што Евангелле – гэта цела Хрыста; думаю, што Святое Пісанне – гэта Яго вучэнне. А калі Ён гаворыць: ‘Калі не будзеце спажываць Цела Сына Чалавечага і піць Крыві Ягонай’ ( Ян 6, 53), то хоць гэтыя словы можна разумець у аднясенні да [эўхарыстычнай] таямніцы, не менш аднак цела Хрыста і Яго Кроў сапраўды з’яўляюцца словам Пісання, Божым вучэннем”» 37 . На жаль, у многіх хрысціянскіх сем’ях ніхто не адчувае сябе здольным − як было прадпісана ў Торы (пар. Дрг 6, 6) ‑ перадаваць сваім дзецям слова Пана ва ўсёй яго прыгажосці, з усёй яго духоўнай сілай. Таму я ўстанавіў нядзелю Божага слова 38 , каб заахвоціць да малітоўнага чытання Бібліі і знаёмства з Божым словам 39 . Любое іншае праяўленне пабожнасці набудзе дзякуючы гэтаму больш багаты сэнс, зойме сваё месца ў іерархіі каштоўнасцяў і будзе весці да таго, што з’яўляецца вяршыняй веры: да поўнага з’яднання з таямніцай Хрыста. Вульгата «Салодкім плёнам карпатлівай сяўбы» 40 вывучэння Геранімам грэцкай і габрэйскай моваў, стаў пераклад Старога Запавету на лацінскую мову з габрэйскага арыгінала. Да гэтага часу хрысціяне Рымскай імперыі маглі чытаць Біблію цалкам толькі на грэцкай мове. У той час як кнігі Новага Запавету былі напісаны на грэцкай мове, кнігі Старога Запавету існавалі ў поўнай версіі перакладу, гэтак званай Сэптуагінце (г.зн. версіі сямідзесяці), зробленай габрэйскай супольнасцю Александрыі прыблізна ў ІІ ст. да нар. Хрыста. Але для чытачоў, якія карысталіся лацінскай мовай, не было поўнай версіі Бібліі на іх мове, толькі некалькі частковых і няпоўных перакладаў з грэцкай мовы. Заслуга Гераніма і тых, хто працягваў яго працу, заключалася ў пераглядзе і ў новым перакладзе ўсяго Святога Пісання. Пасля перагляду Евангелляў і Псалтыра ў Рыме па заахвочванні папы Дамаса Геранім распачаў у сваім адасабленні ў Бэтлееме пераклад усіх старазапаветных кніг непасрэдна з габрэйскай мовы: працу, якая доўжылася гадамі. Для выканання гэтай перакладчыцкай працы Геранім добра выкарыстаў свае веды грэцкай і габрэйскай моваў, сваю салідную лацінскую адукацыю, а таксама філалагічныя інструменты, якія меў у распараджэнні, у прыватнасці Гекзаплю Арыгена. Канчатковы тэкст аб’яднаў у сабе працяг формул, якія ўжо шырока ўвайшлі ва ўжытак, з большай вернасцю габрэйскаму арыгіналу, не адыходзячы ад элегантнасці лацінскай мовы. У выніку ўзнік сапраўдны помнік, які азнаменаваў культурную гісторыю Захаду, фарміруючы яго тэалагічную мову. Перамогшы некаторае першапачатковае непрыняцце, пераклад Гераніма адразу стаў агульнай спадчынай як навукоўцаў, так і звычайных вернікаў; адсюль яго назва Вульгата 41 . Сярэднявечная Еўропа навучылася чытаць, маліцца і разважаць са старонак Бібліі ў перакладзе Гераніма. Такім чынам «Святое Пісанне стала своеасаблівым „велізарным слоўнікам” (Поль Кладэль) і „іканаграфічным атласам” (Марк Шагал), з якога чэрпала хрысціянская культура і мастацтва» 42 . Літаратура, мастацтва і нават размоўная мова няспынна чэрпалі з Геранімавай версіі Бібліі, пакідаючы нам скарбы прыгажосці і пабожнасці. Менавіта дзякуючы гэтаму бясспрэчнаму факту Трыдэнцкі Сабор у дэкрэце Insuper сцвердзіў «аўтэнтычны» характар Вульгаты, аддаўшы даніну яе выкарыстанню ў Касцёле на працягу многіх стагоддзяў і пацвердзіўшы яе каштоўнасць як інструмента для даследавання, пропаведзі і публічных спрэчак 43 . Аднак гэта не змяншала значэння арыгінальных моў, бо Геранім не толькі не забараняў рабіць у будучыні новыя захады для поўнага перакладу, але таксама няспынна нагадваў пра іх. Святы Павел VI па прапанове Айцоў Другога Ватыканскага Сабору пажадаў, каб праца па пераглядзе перакладу Вульгаты была завершана і прадстаўлена ўсяму Касцёлу. Так у 1979 г. Ян Павел ІІ у Апостальскай канстытуцыі Scripturarum thesaurus 44 абнародаваў узорнае выданне, якое называецца «Новая Вульгата» (лац. Nova Vulgata). Пераклад як інкультурацыя Сваім перакладам Гераніму ўдалося здзейсніць «інкультурацыю» Бібліі ў лацінскую мову і культуру, а яго праца стала трывалым узорам місійнай дзейнасці Касцёла. Сапраўды, «калі нейкая супольнасць прымае пасланне збаўлення, Дух Святы напаўняе яе культуру перамяняючай моцаю Евангелля» 45 , і такім чынам узнікае своеасаблівае замкнёнае кола: гэтак жа, як пераклад Гераніма абавязаны мове і культуры лацінскіх класікаў, уплыў якіх выразна бачны, так і яго пераклад са сваёй мовай і сваім сімвалічным зместам і ўяўленнем стаў у сваю чаргу творчым элементам культуры. Перакладчыцкая праца Гераніма вучыць нас, што каштоўнасці і пазітыўныя формы кожнай культуры ўзбагачаюць увесь Касцёл. Розныя спосабы абвяшчэння, разумення і перажывання Божага слова ўзбагачаюць само Святое Пісанне, бо, паводле вядомага выказвання Грыгорыя Вялікага, яно ўзрастае разам з тым, хто яго чытае 46 , набываючы цягам стагоддзяў новыя акцэнты і новае гучанне. Уключэнне Бібліі і Евангелля ў розныя культуры робіць Касцёл ўсё больш відавочнай «абранніцай, упрыгожанай сваімі каштоўнасцямі» (Іс 61, 10). У той жа час гэта сведчыць аб тым, што Біблію неабходна пастаянна перакладаць на мову і менталітэт кожнай культуры і кожнага пакалення, а таксама на секулярызаваную глабальную культуру нашага часу 47 . Слушна было адзначана, што можна правесці аналогію паміж перакладам як актам «моўнай адкрытасці» і іншымі відамі гасціннасці 48 . Вось чаму пераклад не з’яўляецца працай, якая датычыць толькі мовы, але па-сутнасці адлюстроўвае больш шырокае этычнае рашэнне, звязанае з цэласным бачаннем жыцця. Без перакладу розныя моўныя супольнасці не змаглі б мець зносін паміж сабой; мы зачынілі б дзверы гісторыі адзін перад адным і адмовілі б у магчымасці будаваць культуру сустрэчы 49 . Сапраўды, без перакладу няма гасціннасці, а варожасць наадварот узрастае. Перакладчык − гэта будаўнік мастоў. Колькі паспешных рашэнняў, колькі асуджэнняў і канфліктаў узнікае з-за таго, што мы не разумеем мовы іншых людзей і не бяромся з цвёрдай надзеяй за бясконцае выпрабаванне любові, якім з’яўляецца пераклад! Гераніму таксама давялося супрацьстаяць пануючай думцы свайго часу. Калі веданне грэцкай мовы было адносна распаўсюджаным на світанні Рымскай імперыі, то ў яго час гэта стала ўжо рэдкасцю. Аднак ён стаў адным з найлепшых знаўцаў грэцкай мовы і хрысціянскай грэцкай літаратуры. Пачаўшы вывучаць габрэйскую мову, ён здзейсніў яшчэ больш цяжкае і самотнае падарожжа. Калі, як ужо было напісана, «межы маёй мовы вызначаюць межы майго свету» 50 , то можам сказаць, што за больш універсальнае разуменне хрысціянства і ў той жа час больш звязаным з яго крыніцамі, мы абавязаны шматмоўю св. Гераніма. Разам з цэлебрацыяй чарговай гадавіны смерці св. Гераніма наш погляд скіраваны на незвычайную місійную жыццяздольнасць, якая выяўляецца ў перакладзе Божага слова больш чым на тры тысячы моў. Многім місіянерам мы абавязаны за неацэнную справу выдання граматык, слоўнікаў ды іншых лінгвістычных дапаможнікаў, якія ствараюць аснову для камунікацыі людзей і з’яўляюцца носьбітамі «місійнай мары дасягнуць усіх» 51 . Трэба ацаніць усю гэтую працу і інвеставаць у яе, дапамагаючы пераадолець межы некамунікатыўнасці і адсутнасці сустрэчы. Шмат яшчэ трэба зрабіць. Як было ўжо сказана, без перакладу не можа быць разумення 52 : мы не зразумелі б ні сябе, ні іншых. Геранім і пасад Пятра Геранім заўсёды меў асаблівыя адносіны з Рымам: Рым быў духоўным прыстанішчам, да якога ён пастаянна вяртаўся; у Рыме ён атрымаў гуманітарную адукацыю і сфарміраваўся як хрысціянін; ён быў homo romanus . Гэтая сувязь вельмі адмыслова адлюстоўваецца ў мове гэтага Горада, лаціне, майстрам і знаўцам якой ён быў, але перадусім яна звязана з Рымскім Касцёлам, асабліва з пасадам Пятра. Іканаграфічная традыцыя анахранічна прадстаўляе яго ў кардынальскім пурпуры, каб паказаць яго прыналежнасць да прэзбітэрату Рыма поруч з папам Дамасам. Менавіта ў Рыме быў распачаты перагляд перакладу. І нават калі зайздрасць і непаразуменні прымусілі яго пакінуць горад, ён заўсёды захоўваў моцную сувязь з пасадам Пятра. Для Гераніма Рымскі Касцёл з’яўляецца ўрадлівай глебай, на якой зерне Хрыста прыносіць багаты плён 53 . У неспакойны час, калі непадзельную туніку Касцёла часта раздзіралі падзелы паміж хрысціянамі, Геранім глядзеў на пасад Пятра як на надзейны арыенцір: «Як я не іду ні за кім, акрамя Хрыста, так я не маю зносін ні з кім, акрамя Вашай Святасці, гэта значыць з пасадам Пятра. Бо ведаю, што на гэтай скале пабудаваны Касцёл». У разгар спрэчак з арыянамі ён напісаў Дамасу: «Той, хто не збірае з табою, раскідвае; хто не ад Хрыста, той ад антыхрыста» 54 . Такім чынам, ён мог бы таксама сказаць: «Я з тым, хто яднаецца з пасадам Пятра» 55 . Геранім часта ўдзельнічаў у вострых спрэчках за веру. Любоў да праўды і гарачая абарона Хрыста прывялі яго, магчыма, да празмернай слоўнай парывістасці ў лістах і творах. І ўсё ж ён імкнуўся да міру: «Я таксама жадаю міру, і не толькі жадаю яго, а прашу аб ім! Але я маю на ўвазе мір Хрыстовы, сапраўдны мір, мір без варожасці, мір, які не мае ў сабе ўкрытай вайны, мір, які не падпарадкоўвае сабе праціўнікаў, але яднае іх як сяброў» 56 . Сёння нашаму свету як ніколі патрэбны лекі міласэрнасці і еднасці. Дазвольце мне яшчэ раз паўтарыць: давайма прыцягальнае і прывабнае сведчанне братэрскай еднасці 57 . «Па гэтым усе пазнаюць, што вы Мае вучні, калі будзеце мець любоў адзін да аднаго» ( Ян 13, 35). Вось аб чым Езус прасіў Айца ў кранальнай малітве: «каб усе былі адно [...], каб паверыў свет» ( Ян 17, 21). Палюбіць тое, што любіў Геранім У завяршэнне гэтага ліста я хачу звярнуцца да ўсіх з заклікам. Сярод шматлікіх пахвал, якія гучаць у адрас св. Гераніма ад нашчадкаў, ёсць адна, што быў ён не проста адным з найвялікшых вучоных гэтай «бібліятэкі», якой сілкуецца ўвесь час хрысціянства, пачынаючы са скарбніцы Святога Пісання, але пра яго можна сказаць тое, што ён сам сказаў пра Непацыяна: «Праз пастаяннае чытанне і доўгае разважанне ён зрабіў сваё сэрца бібліятэкай Хрыста» 58 . Геранім не шкадаваў сілаў для пашырэння сваёй бібліятэкі, якую заўсёды разглядаў як неабходную майстэрню для разумення веры і духоўнага жыцця; у гэтым таксама ён служыць выдатным прыкладам для цяперашняга часу. Але на гэтым ён не спыніўся. Для яго вучоба не абмяжоўвалася юнацкімі гадамі яго выхавання; яна была пастаянным абавязацельствам, штодзённым прыярытэтам яго жыцця. Можна сказаць, што ён засвоіў усю бібліятэку і стаў распарадчыкам ведаў для многіх іншых. Пастуміян, які ў IV ст. падарожнічаў па Усходзе, даследуючы манаскія рухі, на свае вочы ўбачыўшы стыль жыцця Гераніма, з якім правёў некалькі месяцаў, пісаў: «Ён заўсёды заняты чытаннем, заўсёды ў сваіх кнігах; ён не адпачывае ні днём, ні ноччу; пастаянна або штосьці чытае, або піша» 59 . У сувязі з гэтым я часта думаю пра досвед, які малады чалавек можа атрымаць сёння, заходзячы ў кнігарню ў сваім горадзе ці наведваючы Інтэрнэт-сайт, шукаючы рэлігійныя кнігі. У большасці выпадкаў гэты раздзел, калі ён існуе, не толькі маргінальны, але дрэнна забяспечаны матэрыяламі. Гледзячы на гэтыя паліцы ці вэб-старонкі, маладому чалавеку цяжка зразумець, што рэлігійныя пошукі могуць стаць захапляльнай прыгодай, якая лучыць сэрца і розум; што прага Бога распальвае вялікія розумы на працягу стагоддзяў аж да цяперашняга часу; што рост духоўнага жыцця ўплываў на тэолагаў і філосафаў, мастакоў і паэтаў, гісторыкаў і навукоўцаў. Адна з праблемаў, з якімі мы сёння сутыкаемся, не толькі ў рэлігіі, − гэта непісьменнасць: нам не хапае герменеўтычных навыкаў, якія б зрабілі нас надзейнымі перакладчыкамі нашай уласнай культурнай традыцыі. Асабліва я хацеў бы звярнуцца да моладзі: пачніце даследаваць сваю спадчыну. Хрысціянства робіць вас спадкаемцамі непараўнальнай культурнай спадчыны, уладальнікам якой вы павінны стаць. Будзьце ў захапленні ад гэтай вашай гісторыі. Майце адвагу скіраваць свой позірк на таго неспакойнага юнака Гераніма, які, як герой прыпавесці Езуса, прадаў усё, што меў, каб набыць «каштоўную пярліну» ( Мц 13, 46). Сапраўды, Гераніма можна назваць «бібліятэкай Хрыста», невычарпальнай бібліятэкай, якая праз шаснаццаць стагоддзяў працягвае вучыць нас таму, што азначае любоў Хрыста, любоў, якая непадзельна звязана з сустрэчай з Яго словам. Вось чаму цяперашнюю гадавіну можна разглядаць як заклік палюбіць тое, што любіў Геранім, нанова адкрыць яго творы і дазволіць захапіць сябе духоўнасцю, якую можна ахарактарызаваць па сутнасці як неспакойнае і гарачае жаданне больш пазнаваць Бога Аб’яўлення. Як жа нам не паслухаць у наш час тое, да чаго няспынна заклікаў сваіх сучаснікаў Геранім: «Пастаянна чытай Божае Пісанне; ніколі не выпускай святога тэксту са сваіх рук» 60 . Яркім прыкладам з’яўляецца Дзева Марыя, да якой звяртаўся Геранім, згадваючы перш за ўсё Яе Дзявочае Мацярынства, а таксама як узор малітоўнага чытання Святога Пісання. Марыя разважала ў сваім сэрцы (пар. Лк 2, 19. 51), «бо як святая чытала Святое Пісанне, ведала прарокаў і параўноўвала тое, што сказаў ёй анёл Габрыэль з тым, што прадказалі прарокі [...]. Яна глядзела на свайго нованароджанага Сына, свайго адзінага Сына, які ляжаў у яслях і плакаў, але бачыла, насамрэч, таго, хто быў Сынам Божым; яна параўноўвала ўбачанае з прачытаным і пачутым» 61 . Даручым сябе той, якая лепш за ўсіх можа навучыць нас чытаць, разважаць, маліцца і сузіраць Бога, які нястомна робіць сябе прысутным у нашым жыцці. Дадзена ў Рыме , у св. Яна на Латэране , 30 верасня 2020 года , ва ўспамін св . Гераніма , у восьмы год майго Пантыфікату . Францішак   1 « Deus qui beato Hieronymo presbitero suavem et vivum Scripturae Sacrae affectum tribuisti, da, ut populus tuus verbo tuo uberius alatur et in eo xfontem vitae inveniet » (Collecta Missae Sanctae Hieronymi, Missale Romanum , editio typica tertia, Civitas Vaticana, 2002). Пераклад на бел. мову: « Божа, Ты адарыў святога Гераніма жывою і глыбокаю любоўю да Святога Пісанння, умацуй нашыя сэрцы Тваім словам і дай нам знайсці ў ім жыватворную крыніцу » (Калекта ў літургічны ўспамін св. Гераніма, Рымскі Імшал для дыяцэзій на Беларусі , Мінск 2004). 2 Ep . 22, 30: CSEL 54, 190. 3 AAS 12 (1920), 385-423. 4 Пар. Audientiae Generales 7 і 14 лістапада 2007: Insegnamenti, III, 2 (2007), 553-556; 586-591. 5 Synodus Episcoporum, Nuntius ad Populum Dei XII Coetus Generalis ordinarii (24 кастрычніка 2008). 6 Пар. AAS 102 (2010), 681-787. 7 Chronicum 374: PL 27, 697-698. 8 Ep . 125, 12: CSEL 56, 131. 9 Ep . 122, 3: CSEL 56, 63. 10 Пар. Meditatio matutina , 10 снежня 2015. Анекдот цытуецца з: A. Louf, Sotto la guida dello Spirito , Qiqaion, Magnano (BI) 1990, 154-155. 11 Пар. Ep . 125, 12: CSEL 56, 131. 12 Пар. VD , 89. 13 Пар. Ep . 125, 9.15.19: CSEL 56, 128.133-134.139. 14 Vita Malchi monachi captivi 7, 3: PL 23, 59-60; Opere storiche e agiografiche , a cura di B. Degórski, Opere di Girolamo , XV, Città Nuova, Roma 2014, 196-199. 15 Praef . Esther 2: PL 28, 1505. 16 Пар. Ep . 108, 26: CSEL 55, 344-345. 17 Ep . 52,8: CSEL 54, 428-429; пар. VD , 60. 18 Praef . Paralipomenon LXX , 1. 10-15: SCh 592, 340. 19 Praef . in Pentateuchum : PL 28, 184. 20 Ep . 80, 3: CSEL 55, 105. 21 Nuntius occasione data XXIV sollemnis Sessionis publicae Pontificiarum Academiarum, 4 снежня 2019: L’Osservatore Romano , 6 снежня 2019, p. 8. 22 VD, 30. 23 Ep . 125, 15.2: CSEL 56, 133.120. 24 Ep . 3, 6: CSEL 54, 18. 25 Пар. Praef . Iosue , 1, 9-12: SCh 592, 316. 26 Homilia in Psalmum XCV : PL 26, 1181; пар. S. Girolamo, 59 Omelie sui Salmi (1-115) , a cura di A. Capone, Opere di Girolamo , IX/1, Città Nuova, Roma 2018, 357. 27 Пар. Vita S . Pauli primi eremitae , 16, 2: PL 23, 28; Opere storiche e agiografiche , op. cit., p., 111. 28 Пар. S. Hieronimus, In Isaiam Prol .: PL 24, 17, цыт. за: Дагматычная канстытуцыя пра Божае Аб’яўленне Dei Verbum , у: Дакументы Другога Ватыканскага Сабору, Мінск 2008, с. 276. 29 Пар. Другі Ватыканскі Сабор, Дагм. канст. Dei Verbum , 14. 30 Пар. тамсама . 31 Пар. тамсама , 7. 32 Ep . 53, 5 : CSEL 54, 451; S. Girolamo, Le lettere , a cura di S. Cola, II, Città Nuova, Roma 1997, 54. 33 Пар. Дакументы Другога Ватыканскага Сабору, Дагм. канст. Dei Verbum , 12. 34 Тамсама , 24. 35 Пар. тамсама , 25. 36 Пар. тамсама , 21. 37 N. 56; пар. In Psalmum CXLVII : CCL 78, 337-338; S. Girolamo, 59 Omelie sui Salmi (119-149) , a cura di A. Capone, Opere di Girolamo , IX/2, Città Nuova, Roma 2018, p. 171. 38 Пар. Апостальскі ліст у форме motu proprio Aperuit illis (30 верасня 2019). 39 Пар. Апост. адгарт. Evangelii gaudium , 152. 175. 40 Пар. Ep . 52, 3: CSEL 54, 417. 41 Пар. VD , 72. 42 Ioannes Paulus II, Epistula ad artis cultores (4 красавіка 1999), 5: AAS 91 (1999), 1159-1160. 43 Пар. Denzinger-Schönmetzer, Enchiridion Symbolorum , 1506. 44 25 красавіка 1979: AAS LXXI (1979), 557-559. 45 Апост. адгарт. Evangelii gaudium , 116. 46 Hom. in Ezech . I, 7: PL 76, 843D. 47 Пар. Апост. адгарт. Evangelii gaudium , 116. 48 Пар. P. Ricoeur, Sur la Traduction , Bayard, Paris 2004. 49 Пар. Апост. адгарт. Evangelii gaudium , 24. 50 L. Wittgenstein, Tractatus logico-philosophicus , 5.6. 51 Апост. адгарт. Evangelii gaudium , 31. 52 Пар. G. Steiner, After Babel. Aspects of Language and Translation , Oxford University Press, New York 1975. 53 Пар. Ep . 15, 1: CSEL 54, 63. 54 Тамсама , 15, 2: CSEL 54, 62-64. 55 Тамсама , 16, 2: CSEL 54, 69. 56 Тамсама , 82, 2: CSEL 55, 109. 57 Пар. Апост. адгарт. Evangelii gaudium , 99. 58 Ep . 60, 10: CSEL 54, 561. 59 Sulpicius Severus, Dialogus I, 9, 5: SCh 510, 136-138. 60 Ep . 52, 7: CSEL 54, 426. 61 Homilia de nativitate Domini IV: PL Suppl . 2,191.
. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.