6 красавіка біскуп Віцебскі Алег Буткевіч удзяліў сакрамэнт канфірмацыі вернікам парафіі Святога Духа ў Віцебску. Сённяшні біскуп, які з 2003 года нёс святарскае служэнне ў Віцебску, добра ведае парафію і, у сваю чаргу, вядомы парафіянам, а ў якасці ардынарыя наведаў гэты касцёл упершыню.

25 сакавіка, ва ўрачыстасць Звеставання Пана, біскуп Віцебскі Алег Буткевіч узначаліў Імшу ў віцебскім катэдральным касцёле.

22 сакавіка ў Гісторыка-краязнаўчым музеі Браслава адбылося адкрыццё выставы "Гісторыя Каталіцкага Касцёла на Браслаўшчыне". Запрошаныя госці мелі магчымасць убачыць рэлігійныя рэчы, перададзеныя ў музей з навакольных святыняў.

16 сакавіка падчас Імшы ў пастаўскім касцёле Беззаганнага Зачацця Найсвяцейшай Панны Марыі і св. Антонія Падуанскага біскуп Віцебскі Алег Буткевіч аб'явіў вернікам сваё рашэнне аб арганізацыі новай парафіі ў Паставах і пабудове новага касцёла.

«Дзякую Богу за цудоўны дзень, за спрыяльнае надвор’е і за вашу прысутнасць на гэтай сустрэчы» — гэтымі словамі кс. Біскуп Алег Буткевіч распачаў Эўхарыстыю падчас сустрэчы святароў і законных асоб у Паставах, якая адбылася 11 сакавіка.

Біскуп Віцебскі Алег Буткевіч 11 сакавіка прызначыў марыяніна а. Аляксандра Жарнасека з парафіі Св. Юзафа ў Оршы экзарцыстам дыяцэзіі. Да гэтага часу Віцебская дыяцэзія не мела свайго экзарцыста.

9 сакавіка ў Друі адбылася прыміцыйная Імша а. Вадзіма Мізера, марыяніна, які атрымаў прэзбітэрскае пасвячэнне з рук біскупа Віцебскага Алега Буткевіча дзень таму.

8 сакавіка ў Оршы атрымалі прэзбітэрскае пасвячэнне дыяканы Канстанцін Анашка і Вадзім Мізер. Пасвячэнне ўдзяліў біскуп Віцебскі Алег Буткевіч.

У Папяльцовую сераду, 5 сакавіка, вернікі Віцебска разам з біскупам Алегам Буткевічам сабраліся ў катэдральным касцёле Езуса Міласэрнага на Імшу на распачацце Вялікага посту – часу пакаяння і навяртання. Віцебскі ардынарый, які ўзначаліў гэтую Імшу, на яе пачатку адзначыў, што гэты час “павінен стаць нагодай да перамены жыцця на лепшае”. Эўхарыстыю іерарх ахвяраваў за Віцебскую дыяцэзію.

4 сакавіка ва ўрочышчы Барок недалёка ад Глыбокага сабраліся парафіяне глыбоцкага касцёла, каб ушанаваць памяць мучанікаў Другой сусветнай вайны, сярод якіх былі ксяндзы Мечыслаў Багаткевіч, Станіслаў Пыртак і Уладзіслаў Мацькавяк. Гэтыя святары былі расстраляны ва ўрочышчы 4 сакавіка 1942 г.

У культурна-рэлігійным цэнтры віцебскай парафіі Езуса Міласэрнага пад патранажам пробашча кс. Адама Дынака прайшла вечарына, прысвечаная роднай мове і некаторым аспектам яе бытавання ў грамадстве і Касцёле ў сітуацыі моўнага білінгвізму. Пра мову як адмысловы арганізм, здольны гуртаваць ці, наадварот, раз’ядноўваць людзей, пра варункі існавання беларускай мовы ў розныя перыяды яе развіцця, сённяшні ўзровень запатрабаванасці разважалі падчас імпрэзы людзі розных прафесій, узростаў, веравызнанняў.

2 сакавіка парафія Св. Юды Тадэвуша ў Лучаі (Віцебская дыяцэзія) запрасіла ўсіх жадаючых да копіі цудатворнага абраза Маці Божай Будслаўскай, якая перэгрынуе ў Лучаі ўжо трэці месяц і прабудзе там да Вялікадня. Гасцямі нядзельнай Імшы стаў хрысціянскі гурт "Laudans" з Мінска.

23 лютага біскуп Віцебскі Алег Буткевіч у адпаведнасці з прызначэннямі, якія здзейсніў у дыяцэзіі, прадставіў вернікам віцебскай парафіі Св. Антонія Падуанскага іх новых пастыраў.

Ардынарый Віцебскі біскуп Алег Буткевіч зрабіў першыя ў сваім біскупскім служэнні прызначэнні ў Віцебскай дыяцэзіі.