Запрашаем дзяцей, моладзь, бацькоў і катэхетаў у аднадзённую пілігрымку ў Капцёўку (Гродзенская дыяцэзія), якая адбудзецца 19 верасня 2010 г. Пілігрымка з Гродна на пагорак Надзеі адбудзецца з нагоды новага навучальнага і катэхетычнага года, а яе дэвізам стануць словы «Марыя — наша настаўніца».
Парафія на Каменнай Горцы запрашае на набажэнствы ў гонар Маці Божай Будслаўскай
У капліцы на Каменнай Горцы ў Мінску 2-га чысла кожнага месяца ў 18.00 адбываюцца набажэнствы да Маці Божай Будслаўскай. У снежні гг. споўніцца два гады з таго часу, як парафіяне і вернікі іншых парафій атрымалі магчымасць маліцца перад копіяй абраза Маці Божай з будслаўскага санктуарыя.
18 верасня 2010 г. адбудзецца кансэкрацыя касцёла Найсвяцейшага Сэрца Езуса ў Лебедзеве (Мінска-Магілёўская архідыяцэзія), якую здейсніць Мітрапаліт Мінска-Магілёўскі арцыбіскуп Тадэвуш Кандрусевіч. Урачыстая літургія распачнецца ў 16.30.
У гаміліі падчас святой Імшы, якая адбылася ў санктуарыі Маці Божай Міласэрнасці з Эль Кобрэ, апякункі Кубы, арцыбіскуп Гаваны кардынал Джэйм Артэга адзначыў, што кубінскі народ ужо доўгі час чакае «многіх зменаў». Іерарх таксама выказаў перакананне, што ўлады краіны вызваляць 52 палітычных вязняў, як паабяцалі падчас перамоваў, у якіх удзельнічалі прадстаўнікі Каталіцкага Касцёла.
8 верасня 2010 г. у Маскве адбылася сустрэча Патрыярха Маскоўскага і ўсяе Русі Кірыла з Прэзідэнтам Ірландыі Мэры Макэліс. Падчас сустрэчы кіраўнік Рускай Праваслаўнай Царквы адзначыў, што ў духоўнай і культурнай традыцыі Расіі і Ірландыі існуе шмат агульнага.
Важнейшыя гістарычныя дакументы ўсіх сусветных цывілізацый павінны быць пераведзены ў лічбавы фармат і аб’яднаны ў адну бібліятэку, якую можна будзе змясціць у Інтэрнэце, — з такой ініцыятывай выступіў італьянскі царкоўны гісторык Альберто Меллоні, генеральны сакратар Фонда папы Яна XXIII.
Асацыяцыя каталіцкіх выдаўцоў Расіі арганізуе чацвёртую выстаўку-кірмаш хрысціянскай літаратуры. Мерапрыемства, якое адбудзецца ў дворыку маскоўскага архікатэдральнага касцёла Беззаганнага Зачацця Найсвяцейшай Панны Марыі, запланавана на 12 верасня 2010 г. 
«Вучні-місіянеры ў службе пакліканняў» — пад такім дэвізам з 3 па 7 верасня 2010 г. у сталіцы Бразіліі Сан-Паоло праходзіў ІІІ Кангрэс пакліканняў. Упершыні падобнае мерапрыемства адбылося ў 1999 г., затым — у 2005 г.
Да візіту Святога Айца Бэнэдыкта XVI у Вялікабрытанію, які адбудзецца з 16 па 19 верасня 2010 г., у гэтай краіне была створана танцавальная моладзевая песня «Плач сэрца». Песня была афіцыйна адобрана Каталіцкім Касцёлам у Англіі і Уэльсе. У ёй, між іншым, прысутнічаюць словы: «Ідзі і дапамажы бяднейшым з бедных, тым, хто ляжыць і памірае ў нястачы, як гэта рабіла Тэрэза з Калькуты».
Па інфармацыі амерыканскага каталіцкага агенцтва National Catholic Register, з году ў год набірае моц таварыства «Рыцараў Боскай Міласэрнасці», заснаванага кс. Рыкам Хейлманам у Вісконсіне (ЗША), дыяцэзіі Мэдзісан. Сёння супольнасць налічвае больш за 300 членаў.
Спецыялісты Нацыянальнага музея Ірландыі завяршылі першы этап даследавання рукапіснага Псалтыра, знойдзенага ў тарфяным балоце. Кніга была знойдзена ў Фадданморы падчас распрацовак тарфянікаў 4 гады таму.
