• Гвалтоўныя абвінаваўцы прывялі да Езуса грэшную жанчыну. Стану сярод натоўпу, каб углядацца ў твар спалоханай і прысаромленай жанчыны (верш 3). Буду сузіраць поўны чуласці і далікатнасці твар Езуса. Падумаю, што Езус глядзіць на мяне так кожны дзень. Стану перад Ім у маўчанні, таксама як жанчына з Евангелля.

«Мы верым у адпушчэнне грахоў і з удзячнасцю вызнаём гэта. Няма такіх грахоў, якія б не маглі быць прабачаны грэшніку, што раскаяўся. У сённяшнім Евангеллі мы чулі, што абвінаваўцы не хацелі прабачыць грэшнай жанчыне. Больш таго, яны хацелі нават закідаць яе камянямі. Езус не асудзіў яе. Ён нават зрабіў так, што ўсе абвінаваўцы адышлі. Але нешта надзвычай важнае сказаў Ён гэтай жанчыне: „Ідзі і больш не грашы“».

«Прывялі да Езуса грэшніцу. Сапраўды, грэх гэтай жанчыны быў страшны, і яна заслугоўвала смяротнага пакарання. Але якою была рэакцыя Езуса? Ён даруе ёй усе грахі, гаворыць толькі, каб больш не грашыла. Перажываем Вялікі пост. Час, калі кожны з нас становіцца перад Езусам са сваімі грахамі. Варта памятаць, што ўсе нашыя грахі Езус прабачае. Ці ўсведамляю я гэта? Ці са шчырым сэрцам набліжаюся да кратаў канфесіянала?»