Рух «Сужэнскія Сустрэчы» запрашае сужонкаў і кансэкраваных асоб з Баранавічаў і іншых куткоў Беларусі на рэкалекцыі, якія адбудуцца з 26 па 28 лістапада.
Рэкалекцыі праходзяць па ўнікальнай аўтарскай праграме.
Сужонкі перажываюць іх у дыялогу паміж мужам і жонкай, кансэкраваныя асобы — у дыялогу з Богам.
Як зазначаюць арганізатары, адносіны, нават самыя рамантычныя, патрабуюць пастаяннага клопату, без чаго можна згубіць эмацыйную сувязь, паразуменне, давер і цеплыню.
- Як клапаціцца аб адносінах у штодзённасці, калі праца, абавязкі, гадаванне дзяцей і шмат іншых спраў запаўняе увесь час і ўсю прастору?
- Чым адрозніваецца клопат аб маладых адносінах у сужэнстве ад клопату пра сталыя шматгадовыя адносіны?
Для таго, каб знайсці адказ на гэтыя пытанні, сужонкам найперш патрэбны час адно для аднаго, каб сустрэцца з унутраным светам свайго мужа ці жонкі. Сустрэцца як асоба з асобай, а не як «праблема з прытэнзіяй».
Акрамя таго, заўважаюць арганізатары духоўных практыкаванняў, патрэбныя канкрэтныя інструменты і план, дзякуючы якім гэтая сустрэча дасць шанц паступова выйсці з крызісу сужэнскага жыцця, дасць магчымасць паглыбіць і аднавіць адносіны і пачуцці, занурыцца ў цеплыню і шчырасць, а значыць дапаможа адчуваць радасць сужэнскага жыцця.
Сужэнскія сустрэчы прапануюць магчымасць такой трохдзённай сустрэчы з канкрэтнымі інструментамі і рэальнымі пладамі. Тое, што ўдзельнікі атрымаюць падчас рэкалекцый, можна будзе выкарыстоўваць самастойна ў штодзённым жыцці, каб клапаціцца пра свае адносіны і сужэнскую любоў.
Арганізатары запрашаюць
- сужонкаў, якія перажываюць крызіс сужэнскага жыцця;
- маладыя сем’і, каб атрымаць інструменты на далейшае будаванне моцных адносін;
- усіх тых, хто можа назваць сёння сябе шчаслівым сужэнствам, бо нават самыя моцныя адносіны патрабуюць штодзённага клопату.
«Менавіта час і клопат пра сужэнскія адносіны дае вялікі плён у сужэнскім жыцці», — лічаць удзельнікі руху.
Рэкалекцыі распачынаюца 26 лістапада ў 18.00, заканчваюцца 28 лістапада каля 15.00.
У рэкалекцыях абавязковы ўдзел абодвух сужонкаў, без дзяцей і ва ўсёй праграме.
Запрашаюцца ўсе, хто гатовы працаваць над сваімі сужэнскімі адносінамі, незалежна ад узросту, канфесійнай прыналежнасці і рэлігійнай актыўнасці: і тыя, хто толькі распісаліся ў ЗАГСе, і тыя, хто жыве ў касцёльным шлюбе.
Падчас рэкалекцый будуць прынятыя ўсе неабходныя меры бяспекі: колькасць уздельнікаў абмежавана магчымасцю захавання дыстанцыі, дзейнічае масачны рэжым, выкарыстоўваюцца сродкі дэзінфекцыі і г.д.
Адрас: г. Баранавічы, вул. Шаўчэнкі, 6.
Запіс па тэлефонах:
+375 (29) 644 26 05 (А1)
+375(29) 529 93 50 (МТС)
Вашай увазе прапануем сведчанні сем’яў, якія ўдзельнічалі ў рэкалекцыях руху «Сужэнскія сустрэчы»:
- «Я ехала на ўік-энд, не ведаючы, што там будзе». Гісторыя сям’і Яўгена і Вольгі Хілько
- Радасці і цяжкасці сямейнага жыцця: «Бог пакрыху, маленькімі крокамі прыходзіў у нашае жыццё»
- Радасці і цяжкасці сямейнага жыцця. Гісторыя сям’і Ганны і Юрыя Лугаўцовых
- Радасці і цяжкасці сямейнага жыцця. Гісторыі ўдзельнікаў «Сужэнскіх сустрэч»
