У пінскім катэдральным касцёле Унебаўзяцця Найсвяцейшай Панны Марыі ў межах «Арганнага сімпозіума», які пройдзе ў сталіцы Палесся з 10 па 17 кастрычніка, адбудуцца сем бясплатных канцэртаў акадэмічнай музыкі на гістарычным аргане.
Ужо другі раз у Пінску ладзіцца «Арганны сімпозіум», які збірае канцэртуючых і касцёльных арганістаў, студэнтаў і аматараў вакол гістарычнага аргана пінскага катэдральнага касцёла.
Арган пінскай Катэдры з’яўляецца буйнейшым спраўным гістарычным арганам Беларусі.
Акрамя майстар-класаў і лекцый, разлічаных на прафесійных музыкантаў, усе ахвотныя змогуць наведаць сем бясплатных канцэртаў: чатыры канцэрты дадуць канцэртуючыя арганісткі і выкладчыцы з Мінска і Масквы, і яшчэ тры канцэрты адбудуцца ў выкананні студэнтаў Маскоўскай дзяржаўнай кансерваторыі, Маскоўскай сярэдняй спецыяльнай школы (каледжа) імя Гнесіных, Пінскага дзяржаўнага каледжа мастацтваў і іншых.
Расклад канцэртаў
- 10 кастрычніка, нядзеля
16.00 — загадчыца аддзялення «Арган» Маскоўскай сярэдняй спецыяльнай школы (каледжа) імя Гнесіных, лаўрэат міжнародных конкурсаў Марыя Чарапанава (Масква)
- 11 кастрычніка, панядзелак
19.30 — лаўрэат міжнародных конкурсаў Кацярына Булахціна (Масква)
- 12 кастрычніка, аўторак
19.30 — студэнты і удзельнікі майстар-классаў
- 13 кастрычніка, серада
17.00 — студэнты і удзельнікі майстар-классаў
19.30 — студэнткі маскоўскай дзяржаўнай кансерваторыі (клас К. Валастнова), лаўрэаты міжнародных конкурсаў Ірына Красная і Ганна Спірына (Масква)
- 16 кастрычніка, субота
16.00 — арганістка касцёла Найсвяцейшай Тройцы (святога Роха) на Залатой Горцы ў Мінску, лаўрэат міжнародных конкурсаў Ганна Горбач (Мінск)
- 17 кастрычніка, нядзеля
16.00 — выкладчыца аргана ў Мінскім дзяржаўным каледжы мастацтваў Калініка Мядзведзева (Мінск)
Уваход на ўсе арганныя канцэрты ў пінскім катэдральным касцёле вольны.
Большая частка удзельнікаў пералічаных вышэй канцэртаў пінскага сімпозіума адначасова складае ядро удзельнікаў першага арганнага фестывалю Gloria Deo, які будзе праходзіць амаль адначасова ў касцёле святых апосталаў Пятра і Паўла ў вёсцы Мядзведзічы, дзе знаходзіцца яшчэ адзін значны гістарычны арган Пінскай дыяцэзіі.
