Стужка, якая з’явілася ў сеціве 17 чэрвеня, была знятая кінарэжысёрам Вольгай Плясневіч з Масквы і прысвечана заснавальніку парталу TUT.BY Юрыю Зісеру.
Як перадае TUT.BY, Вольга Плясневіч здымала ў Беларусі дакументальны фільм пра яшчэ адзін унікальны арган, які знаходзіцца ў касцёле святых Пятра і Паўла ў вёсцы Мядзведзічы Ляхавіцкага раёна Брэсцкай вобласці. Гэты фільм таксама неўзабаве можна будзе ўбачыць.
У фільме «Арган над Пінай» можна пачуць не толькі тое, як гучыць адноўлены вядомым мецэнатам старадаўні арган, але таксама голас кардынала Казіміра Свёнтка — чалавека, які збярог для нашчадкаў унікальны інструмент, пінскі касцёл Унебаўзяцця Найсвяцейшай Панны Марыі і найкаштоўнейшы скарб — спадчыну нашай хрысціянскай веры, мужным сведкам якой ён быў на працягу ўсяго свайго доўгага і поўнага выпрабаванняў святарскага жыцця.
У застаўцы напачатку паведамляецца, што фільм прысвечаны Юрыю Зісеру, дзякуючы якому ў 2019 годзе быў адноўлены арган пінскага катэдральнага Касцёла.
«Фільм распавядае пра гістарычны арган пінскай катэдры, якая летась стала адным з цэнтраў прыцягнення ў арганнай культуры Беларусі», — адзначыў прадстаўнік праекту «Арганы Беларусі».
