Паважаныя браты і сёстры, бібліятэкары і супрацоўнікі «скарбніцы ведаў» — беларускай бібліятэкі!
Са святам!
Сёння, 15 верасня, мы адзначаем ваш прафесійны дзень. Гэта свята заснавана Прэзідэнтам нашай краіны Аляксандрам Рыгоравічам Лукашэнкам у 2001 годзе і звязана з днём заснавання Нацыянальнай бібліятэкі Беларусі.
У сённяшні дзень хочацца выказаць удзячнасць за вашу місію, якую вы выконваеце, працуючы ў нашых «скарбніцах ведаў» — беларускіх бібліятэках.
Кнігазборы і ваша праца служаць развіццю і распаўсюджванню культуры на карысць дзяржавы, Касцёла і ўсяго грамадства.
Бібліятэка — гэта месца, якое адзначаецца дыскрэтнасцю, спакоем, павагай і клопатам.
У сценах яе пануе амаль манастырская атмасфера, якая нагадвае: гэта не проста сховішча кніг, але прастора, створаная дзякуючы адносінам, абмену і ідэям.
Мае дарагія, прыміце самыя сардэчныя пажаданні! Няхай ваша праца і далей падтрымлівае духоўны і культурны ўзровень нашага народа, няхай праз вашу паслугу ў маладога пакалення беларусаў узмацняецца любоў і пашана да друкаванага слова.
Жадаю вам, супрацоўнікам друкаванага слова, Божага благаслаўлення і ўдзячных чытачоў. Так, як святы Аўгустын у час свайго пошуку праўды пачуў Божае натхненне праз вусны дзіцячага спеву: «Бяры і чытай!», так няхай у пошуку праўды нашы чытачы захапляюцца зместам друкаванага слова, апеку над якім вы штодня чыніце сваім жыццём.
З малітвай і благаслаўленнем для вашай працы,
✠ Арцыбіскуп Юзаф Станеўскі
Мітрапаліт Мінска-Магілёўскі
Старшыня Канферэнцыі Каталіцкіх Біскупаў Беларусі
