7 ліпеня сімвалы Сусветага дня моладзі – крыж і абраз Маці Божай “Salus Populi Romani”, якія з 28 чэрвеня здзяйсняюць перэгрынацыю па Беларусі, - наведалі парафію ў Браславе.

Імшу ўзначаліў біскуп Віцебскі Алег Буткевіч, які нечакана завітаў у сваю родную парафію. «Уявіце сабе, колькі людзей малілася перад гэтым крыжам! — сказаў іерарх на пачатку Імшы. — Сёння і мы ў нашай роднай парафіі вітаем гэты сімвал Мукі Пана. Вітаем таксама абраз Маці Божай тут, у касцёле, прысвечаным Марыі, і просім Яе аб апецы».

«У гэты касцёл мы прыносім свае просьбы да Маці Божай, - адзначыў біскуп у гаміліі. - І нездарма разам з крыжам — сімвалам Сусветнага дня моладзі —вандруе па краінах абраз Маці Божай “Salus Populi Romani”. Успамінаю сцэну з Евангелля, калі Маці Божая стаяла пад крыжам. Яна выпрошвае для нас ласкі ў свайго Сына… Калі глядзім на крыж, памятаем, што ніхто не забыты. Бог нікога не забывае».

Кожны прысутны на Імшы мог ушанаваць крыж, пасля адбылося набажэнства, падрыхтаванае моладдзю.

Паводле waladarka.by

(AG)