8 лютага 2010 г. у касцёле святой Ганны ў Мосары (Віцебская дыяцэзія, Глыбоцкі дэканат) адбылася ўрачыстая святая Імша з нагоды 30-га дня пасля смерці кс. прэлата Юзафа Булькі. У літургіі прынялі ўдзел святары — духоўныя вучні кс. Булькі, іншае духавенства, а таксама вернікі мосарскай парафіі і ваколіц, дзе святар служыў на працягу многіх гадоў.

Эўхарыстыю, якая была спалучана з Нешпарамі, узначаліў кс. Антоній Клімантовіч, гамілію прамовіў кс. Славамір Самковіч. Падчас гаміліі святар нагадаў пра хрысціянскі сэнс смерці, а таксама пра тое, якой павінна быць памяць вернікаў аб памерлых. Як адзначыў кс. Самковіч, акрамя малітоўнай памяці аб памерлым душпастыры мы павінны захаваць тое прыгожае, што было ім зроблена дзеля таго, каб людзі сустрэліся з Богам.

Напрыканцы святой Імшы кс. Раман Мурзіч, канцлер Віцебскай курыі, ад імя біскупа Віцебскага Уладзіслава Бліна пераказаў вернікам парафіі і іх сённяшняму пастыру, кс. Уладзіміру Шымковічу, словы суцяшэння і падкрэсліў, што біскуп памятае аб іх у сваіх малітвах. У сваю чаргу, кс. Шымковіч падзякаваў прысутным за супольную малітву і за памяць аб памерлым, а таксама дадаў, што шмат людзей наведвае магілу святара, а некаторыя нават прысвяцілі кс. Бульку вершы, адзін з якіх і быў прачытаны.

Пасля заканчэння Эўхарыстыі ўсе накіраваліся да магілы кс. прэлата Булькі, дзе пасля малітвы «Анёл Панскі» паставілі запаленыя знічы. На заканчэнне ўсе прысутныя атрымалі новы нумар часопіса «Ave Maria», у якім змешчаны матэрыялы і фотаздымкі з пахавання памерлага душпастыра.

Вернікі мосарскай парафіі і кс. Уладзімір Шымковіч маюць намер арганізаваць Музей памяці кс. прэлата Юзафа Булькі, які доўгі час працаваў сярод іх і сваім прыкладам малітвы і ахвярнага служэння вёў вернікаў да Бога.

Кс. прэлат Юзаф Булька, які на працягу многіх гадоў нёс сваё служэнне ў мосарскай парафіі Віцебскай дыяцэзіі, адышоў у вечнасць 9 студзеня 2010 г., на 85 годзе жыцця, у адной з мінскіх бальніц. Юзаф Булька нарадзіўся ў 1925 г. у літоўскай вёсцы Рыпайчай. У канцы 1980–х гг. атрымаў святарскае пасвячэнне і напрацягу многіх гадоў працаваў у мосарскай парафіі Святой Ганны. Святар прапагандаваў здаровы лад жыцця, шмат зрабіў у справе барацьбы з алкагалізмам. Так у Мосары прадстаўнікамі клубаў ананімных алкаголікаў з Беларусі, Латвіі і Літвы была створана Алея цвярозасці. Шмат намаганняў прыкладаў кс. Юзаф Булька і на добраўпарадкаванне тэрыторыі вакол касцёла.

У 2005 г. кс. Юзаф стаў першым ксяндзом у Беларусі, які быў удастоены дзяржаўнай прэміі Прэзідэнта Беларусі «За духоўнае адраджэнне», а ў 2006 г. указам Прэзідэнта быў узнагароджаны медалём Францішка Скарыны за падзвіжніцкую дзейнасць па ўмацаванні духоўных каштоўнасцяў і прапагандзе здаровага ладу жыцця.