Фота Аўдыё Відэа  
be  ru  pl  en  de info@catholic.by
Касцёлу ў Нясвіжы 410 гадоў
Беларусь - Мінска-Магілёўская архідыяцэзія
27.06.2011 13:26

410 гадоў адзначыў славуты духоўны сімвал Беларусі і архітэктурны помнік ранняга барока — касцёл у Нясвіжы. Святыню асвяціў Папскі нунцый Клаўдыё Рангоні 7 кастрычніка 1601 г. Cёлета святкаванні прайшлі 25 чэрвеня пасля ўрачыстасці Божага Цела, тытул якога носіць касцёл.

Cвяткаванне распачалося канферэнцыяй для сем’яў, якую правёў кс. Эрвін Вячорак (рух Equipes Notre-Dame). Падчас адарацыі Найсвяцейшага Сакрамэнту вернікі нясвіжскай парафіі і яе госці дзякавалі Богу за святыню, яе мецэнатаў і святароў, якія тут працавалі.

Пра гісторыю нясвіжскага касцёла і парафіі прысутныя маглі даведацца з рэферата навуковага супрацоўніка Нацыянальнага гісторыка-культурнага музея-запаведніка «Нясвіж» Аляксандра Храмога.

Кульмінацыйны момант святкавання — святая Імша — распачалася са словаў прывітання арцыбіскупа Тадэвуша Кандрусевіча, Мітрапаліта Мінска-Магілёўскага. Канцэлебравалі літургію шматлікія святары і прысутны а. Фернандо Вера, член прэлатуры «Opus Dei».

Падчас літургіі іерарх удзяліў вернікам сакрамэнт канфірмацыі, а два вернікі (ахрышчаныя ў Царкве) аднавілі сакрамэнт бежмавання.

У гаміліі іерарх заахвочваў заўсёды быць з Езусам, прысутным у Эўхарыстыі. «Мы павінны прыходзіць да Бога і казаць: „Я, Ян. Я вітаю Цябе, Езус“», — адзначыў Мітрапаліт.

Пасля вернікі прайшлі ў эўхарыстычнай працэсіі па вуліцах горада.

Ва ўрачыстасцях прынялі ўдзел святары і сёстры законныя з розных куточкаў Беларусі, прадстаўнікі Таварыства несвіжан за межамі краіны, Надзвычайны пасол Рэспублікі Польшча ў РБ, прадстаўнікі мясцовай улады. Міністр культуры Павел Латушка накіраваў нясвіжскай парафіі віншавальны ліст.

Пасля малітвы наступіў час супольнага адпачынку. Як вялікая сям’я, парафіяне і госці ўрачыстасці сабраліся за супольным сталом на абед, які быў арганізаваны на вуліцы.

Завяршылася святкаванне дабрачынным канцэртам мінскага Тэатра оперы і балета.

Камень на будаўніцтва езуіцкага касцёла ў Нясвіжы быў асвячоны ў 1589 г. біскупам Віленскім Юрыем Радзівілам, родным братам Радзівіла Сіроткі, ініцыятара пабудовы. Асвяціў жа касцёл Папскі нунцый Клаўдыё Рангоні 7 кастрычніка 1601 г.

Славіцца святыня і сямейнай усыпальніцай, трэцяй па велічыні ў Еўропе. Тут знаходзяцца 69 саркафагаў. Першым быў пахаваны Радзівіл Сіротка ў 1616 г., апошняе пахаванне адбылося ў 1936 г. У 2000 г. з Лондана была дастаўлена урна з прахам Антонія Мікалая Радзівіла.

Гісторыя святыні цікавая, гераічная, а часам і трагічная. Але на працягу чатырох стагоддзяў касцёл у Нясвіжы ніколі не зачыняўся, і цела Хрыста заўсёды прабывала ў святыні.

Фотарэпартаж
 

Пры выкарыстанні матэрыялаў сайта спасылка на Catholic.By абавязкова.

Беларусь - Мінска-Магілёўская архідыяцэзія

28.06 16:50Мітрапаліт Кандрусевіч сустрэўся з цяжкімі падлеткамі ў дзіцячым лагеры пад Радашковічамі
28.06 15:30У Мінску стартавала роварная пілігрымка ў Будслаў
28.06 09:29Новапрэзбітэр Раман Страшко цэлебраваў прыміцыйную Імшу ў Нясвіжы
27.06 21:52Касцёльныя іерархі сталі гасцямі гала-канцэрта фестывалю «Магутны Божа»
27.06 18:09Цяпер афіцыйна: скверу ля Чырвонага касцёла прысвоена імя Эдварда Вайніловіча
27.06 10:54Другі дзень пілігрымкі Мінск-Будслаў: ранішняя Эўхарыстыя з Мітрапалітам
26.06 12:57ХХVІІ Пешая пілігрымка Мінск-Будслаў распачала пяцідзённы шлях
24.06 19:40Прэзбітэрскае і дыяканскае пасвячэнні прайшлі ў мінскай архікатэдры
22.06 17:587 незвычайных фактаў пра Эдварда Вайніловіча, у гонар якога хочуць перайменаваць сквер у Мінску
21.06 08:51«Рыбы» і Laudans прадставяць Касцёл Беларусі на фестывалі «Магутны Божа»