Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Зварот арцыбіскупа Тадэвуша Кандрусевіча да вернікаў Мінска-Магілёўскай архідыяцэзіі і Пінскай дыяцэзіі з нагоды прызначэння новага Апостальскага Нунцыя ў Беларусі
Беларусь
15.07.2011 13:50

Глыбокапаважыня вернікі!

15 ліпеня 2011 г., у літургічны ўспамін св. Бонавэнтуры, біскупа і доктара Касцёла, Святы Айцец Бэнэдыкт XVI прызначыў новага Апостальскага Нунцыя ў Беларусі, якім стаў арцыбіскуп Клаўдыё Гуджэроцці. Да гэтага часу Яго Эксцэленцыя з'яўляўся Апостальскім Нунцыем у Грузіі, Арменіі і Азербайджане. Іерарх мае вялікі вопыт дыпламацкага служэння і як былы супрацоўнік Кангрэгацыі па справах Усходніх Касцёлаў з'яўляецца экспертам у справах экуменізму.

Прызначэнне новага Апостальскага Нунцыя — гэта заўсёды вялікая падзея для мясцовага Касцёла і краіны, дзе ён будзе служыць. З гэтым прызначэннем мы звязваем новыя надзеі на далейшае развіццё як адносін паміж Апостальскім Пасадам і Беларуссю, так і Касцёла ў нашай Бацькаўшчыне.

Ад усяго сэрца віншуючы арцыбіскупа Клаўдыё Гуджэроцці з новым прызначэннем, жадаю яму поспехаў у новай і адказнай місіі ў Касцёле.

Звяртаюся да вас, дарагія вернікі Мінска-Магілёўскай архідэяцэзіі і Пінскай дыяцэзіі, маліцца ў яго інтэнцыі, каб пасля шматгадовай працы ў высакагорных краінах Каўказа шчасліва і плённа служыў на раўніннай Беларусі, дзе нямала высакагорных праблем. Няхай праз заступніцтва Маці Божай Будслаўскай і св. Андрэя Баболі Бог благаславіць яму і адорвае патрэбнымі дарамі.

З малітвай і благаслаўленнем

Арцыбіскуп Тадэвуш Кандрусевіч
Мітрапаліт Мінска-Магілёўскі
Апостальскі Адміністратар Пінскай дыяцэзіі

P.S. Глыбокапаважаныя святары Мінска-Магілёўскай архідыяцэзіі і Пінскай дыяцэзіі няхай прачытаюць гэты зварот вернікам у нядзелю 17 ліпеня 2011 г.

 

Пры выкарыстанні матэрыялаў сайта спасылка на Catholic.By абавязкова.

Спасылкі па тэме