1 лютага Канферэнцыя Каталіцкіх Біскупаў у Беларусі ў межах аd limina Apostolorum у поўным складзе сустрэнецца са Святым Айцом.
Пантыфік будзе размаўляць з іерархамі за зачыненымі дзвярыма. Сустрэча будзе доўжыцца каля дзвюх гадзін — з 10.00 да 12.00.
У такім фармаце епіскапат Беларусі сустракаўся з Пантыфікам восем гадоў таму — 17 снежня 2009 г. Бэнэдыкт XVI звярнуўся да іерархаў з пасланнем, у якім заклікаў няспынна абвяшчаць Евангелле, узмацняць еднасць Касцёла, развіваць катэхізацыю і клапаціцца аб новых пакліканнях.
Святы Айцец адзначыў тады важнасць грунтоўнай падрыхтоўкі святароў, супрацоўніцтва з Праваслаўнай Царквой дзеля агульнага дабра вернікаў і пошуку належных адказаў на выклікі нашага часу.
Па традыцыі, у межах візіту аd limina Apostolorum біскупы з усяго свету прыбываюць у Рым. Раней гэта адбывалася кожныя пяць гадоў, падчас апошніх пантыфікатаў радзей. Іерархі прадстаўляюць Папу Рымскаму сітуацыю ў сваіх дыяцэзіях і сустракаюцца з кіраўніцтвам розных дыкастэрый Рымскай курыі.
Перад візітам біскупы рыхтуюць справаздачу пра становішча кожнай дыяцэзіі і ў цэлым у Касцёле ў Беларусі.
У Кангрэгацыі па справах Біскупаў такую справаздачу прадставіць біскуп Гродзенскі Аляксандр Кашкевіч; у Кангрэгацыі па справах Духавенства — біскуп Віцебскі Алег Буткевіч; у Кангрэгацыі Каталіцкай Адукацыі — Мітрапаліт Мінска-Магілёўскі арцыбіскуп Тадэвуш Кандрусевіч; у новай Дыкастэрыі па справах свецкіх, сям’і і жыцця — біскуп Пінскі Антоні Дзям’янка; у Кангрэгацыі па справах Усходніх Касцёлаў — Апостальскі візітатар для грэка-католікаў Беларусі архімандрыт Сяргей Гаек; у Папскай радзе спрыяння хрысціянскаму адзінству — дапаможны біскуп Гродзенскай дыяцэзіі Юзэф Станеўскі; у Кангрэгацыі Інстытутаў кансэкраванага жыцця і Таварыстваў апостальскага жыцця — дапаможны біскуп Мінска-Магілёўскай архідыяцэзіі Аляксандр Яшэўскі SDB; у Кангрэгацыі Веравучэння — дапаможны біскуп Мінска-Магілёўскай архідыяцэзіі Юрый Касабуцкі; у Кангрэгацыі Божага Культу і Дысцыпліны Сакрамэнтаў — Мітрапаліт Мінска-Магілёўскі арцыбіскуп Тадэвуш Кандрусевіч.
31 студзеня беларускія іерархі распачалі візіт Ad limina удзелам у агульнай аўдыенцыі папы Францішка на плошчы св. Пятра.
Пасля катэхезы Святога Айца біскупы падыйшлі да Папы, і арцыбіскуп Тадэвуш Кандрусевіч па чарзе прадставіў Пантыфіку кожнага з іерархаў Беларусі. Таксама Папа благаславіў вуглавы камень пад будаўніцтва новага касцёла ў Гомелі.
1 лютага беларускія біскупы будуць цэлебраваць святую Імшу на алтары ля магілы св. Пятра ў ватыканскай базыліцы, а ў наступныя дні ў іншых трох вялікіх базыліках Рыма. Іх чакае сустрэча ў штаб-кватэры экуменічнай супольнасці св. Эгідзія.
Візіт аd limina Apostolorum біскупаў з Беларусі праходзіць з 31 студзеня па 7 лютага.
