Біскупы Беларусі з 31 студзеня па 7 лютага наведаюць Апостальскую Сталіцу з візітам ad limina Apostolorum. У чым асаблівасці гэтага візіту і чаго чакае ад яго старшыня беларускага епіскапату?
Catholic.by задаў чатыры пытанні кіраўніку Канферэнцыі Каталіцкіх Біскупаў у Беларусі арцыбіскупу Тадэвушу Кандрусевічу.
«Я не ўпершыню еду з падобным візітам, але ў той самы час я далёкі ад думкі, што да гэтага можна прызвычаіцца.
Цяпер, як і першы раз, я еду з хваляваннем, але і з упэўненасцю, што такі візіт будзе спрыяць развіццю Касцёла ў Беларусі», — сказаў арцыбіскуп.
1. Што такое «візіт Ad limina»?
Ad limina Аpostolorum — «Візіт да апостальскіх парогаў», або традыцыйны візіт біскупаў адной краіны у Апостальскі Пасад.
Згодна з прадпісаннямі Кананічнага права, Канферэнцыя Біскупаў кожнай краіны абавязана рэгулярна (як правіла, раз на пяць гадоў) наведваць Апостальскі Пасад для сустрэчы з Папам Рымскім і кіраўнікамі ватыканскіх дыкастэрый.
Перад візітам біскупы рыхтуюць справаздачу пра становішча кожнай дыяцэзіі, запаўняючы спецыяльны апытальнік. Гэта дапамагае ўбачыць моцныя і слабыя бакі душпастырства ў кожнай з дыяцэзій.
2. У чым карысць такіх паездак для мясцовага Касцёла і для біскупаў?
Візіт Ad limina — заўсёды значная падзея як для мясцовага Касцёла, так і для кожнага біскупа і ўсяго епіскапату.
Гэта добрая магчымасць лепш пазнаёміцца са структурай Апостальскага Пасаду і яго ключавымі інстытутамі, якія могуць дапамагчы ва ўдасканальванні пастырскай дзейнасці, а таксама ў вырашэнні ўзнікаючых праблем.
Немалаважнай з’яўляецца магчымасць устанавіць асабістыя кантакты з супрацоўнікамі Апостальскага Пасаду.
3. Якія тэмы будуць закранутыя падчас сустрэчы з Папам?
Падчас сустрэчы іерархі з Беларусі спачатку праінфармуюць Святога Айца аб становішчы Касцёла ў Беларусі і асобна ў дыяцэзіях.
Затым біскупы будуць адказваць на пытанні Папы Рымскага. Беручы пад увагу той факт, што гэта першы візіт Ad limina біскупаў з Беларусі да папы Францішка, не выключана, што Пантыфіка будуць цікавіць і адносіны Касцёла з дзяржавай.
Са свайго боку мы будзем запрашаць Папу наведаць нашу краіну, якая чакае і не можа дачакацца візіту Святога Айца.
Таксама будзем абмяркоўваць сітуацыю, у якой знаходзіцца Касцёл у Беларусі. Мы хочам падкрэсліць, што, з аднаго боку, дзяржава паважае Каталіцкі Касцёл і высока цэніць яго шматбаковую дзейнасць: выхаванне чалавека на хрысціянскіх каштоўнасцях, клопат пра моладзь, падтрымку традыцыйнага інстытуту сям’і і Божага дару жыцця, дабрачыннасць, развіццё міжканфесійных і міжхрысціянскіх адносін і да т.п.
З іншага боку, мы сутыкаемся з шэрагам праблем.
На сустрэчах рознага ўзроўню з прадстаўнікамі дзяржаўнай улады мы пастаянна паўтараем аб тым, што існуе вострая неабходнасць карэкціроўкі заканадаўства аб свабодзе веравызнання, якое не адпавядае сучасным рэаліям.
Існуе вялікая і нявырашаная праблема са служэннем замежных святароў, у якіх мы яшчэ маем патрэбу, а таксама праблема цэлебрацыі Эўхарыстыі святарамі-гасцямі, якія не могуць гэтага рабіць без папярэдняга дазволу Упаўнаважанага па справах рэлігій і нацыянальнасцяў.
Неабходна вырашаць праблему пастырскай апекі ў школах і ВНУ, вязніцах, арміі і г.д. Складана вырашаецца праблема атрымання дазволаў на будаўніцтва новых святыняў.
Адсутнасць канкардату паміж Апостальскім Пасадам і Беларуссю з’яўляецца вялікай перашкодай у нармальнай дзейнасці Касцёла. Бюракратычныя праблемы з атрыманнем замежнай дапамогі моцна ўскладняюць дзейнасць Касцёла і дабрачыннасці. Існуюць вялікія цяжкасці ў арганізацыі дабрачыннай працы і г.д.
4. Што дасць візіт Аd limina біскупам Беларусі?
Гэта магчымасць усім разам наведаць шматлікія кангрэгацыі і Папскія рады і калегіяльна абмеркаваць праблемы з мэтай пошуку шляхоў у іх вырашэнні. На сёння прадугледжана 12 сустрэч у розных ватыканскіх дыкастэрыях.
Візіт Ad limina прадугледжвае супольную цэлебрацыю ўсімі біскупамі Эўхарыстыі ў чатырох Вялікіх базыліках: св. Пятра, св. Паўла, св. Яна на Латэране і святой Марыі Вялікай.
Такі візіт — таксама новая магчымасць памаліцца ў святых месцах і сустрэцца з многімі супрацоўнікамі Апостальскага Пасаду, што само сабой абагачае, бо чалавек акунаецца ў непаўторную атмасферу сталіцы хрысціянства.
