Урачыстае адкрыццё і благаслаўленне новага будынка Апостальскай нунцыятуры ў Рэспубліцы Беларусь прайшло 4 кастрычніка ў Мінску на пр. Незалежнасці, 46д.
Ва ўрачыстай цырымоніі прыняў удзел намеснік Дзяржсакратара Папы Рымскага арцыбіскуп Джавані Анджэло Бэччу і міністр замежных спраў Беларусі Уладзімір Макей.
Сярод гасцей былі паслы шматлікіх краін і супрацоўнікі дыпламатычных місій, Упаўнаважаны па справах рэлігій і нацыянальнасцяў Уладзімір Гуляка, біскупы Беларусі, прадстаўнікі іншых канфесій і рэлігій, настаяцелі і прадстаўнікі манаскіх супольнасцяў у Беларусі.
Апостальскі Нунцый у Беларусі арцыбіскуп Габар Пінтэр, выступаючы перад прысутнымі з прывітальным словам, назваў адкрыццё новай нунцыятуры падзеяй, дзе сустракаюцца мінулае, сучаснасць і будучыня.
Адкрыццё будынка нунцыятуры супала з 25-годдзем устанаўлення дыпламатычных адносін паміж Ватыканам і Беларуссю.
«За 25 гадоў мы мелі магчымасць перажыць шмат сапраўды плённых падзей. За гэты час шмат рэчаў змянілася ў свеце і Беларусі, але мэта нашага супрацоўніцтва засталася нязменнай — мы і далей жадаем супольна працаваць на карысць агульнага дабра, каб гэты свет станавіўся найлепшым месцам для кожнага чалавека», — сказаў іерарх.
Старшыня беларускага епіскапату арцыбіскуп Тадэвуш Кандрусевіч у сваёй прамове назваў падзею 25-гадовай даўніны «вельмі вялікім гістарычным крокам тых часоў».
Беларускі іерарх падкрэсліў, што будынак нунцыятуры — гэта ў першую чаргу дом Папы Рымскага.
«Наш народ чакае і не можа дачакацца візіту Святога Айца. Перад гэтым у яго не было свайго дома ў Беларусі, але з сённяшняга дня ён існуе. І мы спадзяёмся, што Папа яго наведае, бо наша краіна з яе багатай і адначасова трагічнай гісторыяй, добрымі і канструктыўнымі адносінамі з рознымі веравызнаннямі, асабліва з Праваслаўнай Царквой, і дзяржавай гэтага заслугоўвае», — адзначыў арцыбіскуп.
Міністр замежных спраў Беларусі Уладзімір Макей зазначыў, што Беларусь разглядае Ватыкан як «вельмі важнага партнёра» з пункту гледжання развіцця адносін з іншымі краінамі і рознымі міжнароднымі арганізацыямі.
«Нас збліжаюць практычна аднолькавыя падыходы да тых пытанняў, якія сёння турбуюць увесь сусвет — гэта пытанні захавання міру, бяспекі, сацыяльнай справядлівасці, традыцыйных каштоўнасцяў», — сказаў палітык.
Міністр выказаў падзяку Каталіцкаму Касцёлу ў Беларусі за «ўзважаны падыход да захавання міжканфесійнай згоды ў Беларусі» і «за імкненне вырашаць магчымыя пытанні шляхам дыялогу, для якога характэрны ўзаемная павага і паразуменне».
Уладзімір Макей пажадаў Апостальскаму Нунцыю і яго супрацоўнікам плёну ў служэнні ў Беларусі.
Намеснік Дзяржаўнага Сакратара Папы Рымскага арцыбіскуп Джавані Анджэло Бэччу зазначыў, што новая сядзіба нунцыятуры — «ясны знак вялікай любові, якую Папа Францішак мае да Беларусі».
«Я прыношу глыбокую падзяку Святога Айца католікам гэтай краіны за нястомную адданасць службе на карысць людзей», — падкрэсліў ватыканскі іерарх.
Арцыбіскуп выказаў падзяку Святога Айца дзяржаўным і рэлігійным уладам Беларусі, а таксама тым, «хто служыць высакароднай дыпламатычнай місіі», за ўсе «добрыя намаганні, якія садзейнічаюць мірнаму суіснаванню, устойліваму развіццю і больш плённай інтэграцыі паміж людзьмі і кампанентамі грамадства».
Арцыбіскуп Бэччу дадаў, што сакральнае ўбранства ў новаадкрытай нунцыятуры зроблена з бліскучага і паліраванага камня чырвона-рубінавага колеру, «каб паказаць сувязь паміж ахвярамі, перажытымі беларусамі з любоўю і гераізмам, і крывёю Хрыста, пралітай на крыжы, вобраз якога адлюстраваны на знешняй сцяне будынка пры галоўным уваходзе».
Прамова арцыбіскупа Бэччу цалкам››
У завяршэнне прамовы ватыканскі іерарх дадаў, што пакідае пажаданне Святога Айца: «Каб усе вы заўсёды маглі знайсці ў гэтым месцы працягнутую руку і дружалюбную прысутнасць».
Арцыбіскуп Габар Пінтэр выказаў спадзяванне, што падзея паспрыяе таму, што ў недалёкай будучыні «сапраўдны гаспадар гэтага дома — Святы Айцец — зможа наведаць Беларусь і асабіста адчуе гасціннасць гэтага краю».
«Добрае сяброўства мацней за каменныя сцены. Няхай сцены гэтай Апостальскай нунцыятуры заўсёды будуць выразным знакам сяброўства і добрых адносін», — заключыў напрыканцы арцыбіскуп Габар Пінтэр.
