Увечары 16 чэрвеня, ва ўрачыстасць Найсвяцейшага Цела і Крыві Хрыста, арцыбіскуп эмэрыт Тадэвуш Кандрусевіч узначаліў цэлебрацыю святой Імшы і Эўхарыстычнага набажэнства ў мінскім архікатэдральным касцёле Найсвяцейшага Імя Марыі.
Агульнагарадская Эўхарыстычная працэсія ў сталіцы прайшла раней, у апошнюю нядзелю мая, таму святкаванне ў галоўнай святыні архідыяцэзіі ў дзень урачыстасці мела парафіяльны характар. У той час, як арцыбіскуп Станеўскі ўзначаліў працэсію Божага Цела ў старажытным Нясвіжы, яго папярэднік на пасадзе Мінска-Магілёўскага Мітрапаліта маліўся разам з вернікамі мінскай катэдральнай парафіі.
У прамоўленай гаміліі заслужаны іерарх падкрэсліў, што галоўнай мэтай гэтага свята з’яўляецца публічнае праслаўленне Эўхарыстыі не толькі падчас святой Імшы, але і ў адмысловай працэсіі.
«Яно таксама дапамагае засяродзіцца на праўдзе ўстанаўлення Эўхарыстыі, у якой без праліцця крыві Езус ахвяруе сябе за нас на алтарах святыняў падчас кожнай святой Імшы, калі прыходзіць да нас пад відамі хлеба і віна», — адзначыў арцыпастыр. Ён дадаў, што «дзякуючы сакрамэнту Эўхарыстыі мы маем магчымасць прымаць удзел у акце збаўлення чалавецтва, які здзейсніўся ў пасхальнай таямніцы крыжовай смерці Езуса і Яго слаўнага Уваскрасення».
Арцыбіскуп падкрэсліў, што Касцёл з удзячнасцю ўспамінае гэтую ахвяру Хрыста, праз якую ўсе, хто ў Яго верыць, атрымалі духоўную свабоду.
Нагадаўшы, што Эўхарыстыя ўнутрана перамяняе чалавека, іерарх звярнуў увагу на тое, што калі хрысціянін не адчувае перамяняльнай сілы гэтага сакрамэнту, то праблема крыецца не ў яе недахопе, а ў слабой веры.
«Нягледзячы на ўсё большыя магчымасці прымаць удзел у Эўхарыстыі, відавочна, што гэтая практыка нашых продкаў усё часцей забываецца.
Публічнае праслаўленне Эўхарыстыі заклікае нас выправіць гэтую памылку і ажывіць веру ў рэальную прысутнасць Езуса пад відам хлеба і віна. Гэта справа жыцця і смерці, бо як без матэрыяльнага хлеба немагчыма фізічнае жыццё, таксама без Эўхарыстыі немагчыма жыццё духоўнае», — сцвердзіў арцыбіскуп Кандрусевіч. На заканчэнне ён выказаў надзею на тое, што «свята Божага Цела дапаможа нам ажывіць нашу веру ў рэальную прысутнасць Езуса ў Эўхарыстыі, каб мы практыкавалі яе культ, пабожна прымалі яе, адчувалі яе боскую збаўчую моц і любоў, якая нас перамяняе».
Пасля святой Імшы на плошчы перад катэдрай адбылося Эўхарыстычнае набажэнства.
Арцыбіскуп Тадэвуш Кандрусевіч і пробашч мінскай катэдральнай парафіі ксёндз канонік Антоній Клімантовіч неслі Хрыста ў Найсвяцейшым Сакрамэнце да чатырох алтароў, пры кожным з якіх чыталіся ўрыўкі з Евангелля і адбываліся адпаведныя малітвы, што суправаджаліся спевам Суплікацыі і благаслаўленнем вернікаў.
