Пошук

26.11.2021 11:11   Catholic.by

Старшыня Сінадальнай камісіі пры Канферэнцыі Каталіцкіх Біскупаў Беларусі біскуп Аляксандр Яшэўскі SDB запрашае духавенства, кансэкраваных асоб, вернікаў Касцёла ў Беларусі і ўсіх ахвотных адказаць на пытанні анкеты ў межах кансультацый на дыяцэзіяльным этапе Сіноду Біскупаў.

Глыбокапаважаныя святары і кансэкраваныя асобы,
дарагія браты і сёстры ў Хрысце Пану,
шаноўныя сябры,

17 кастрычніка гэтага года ва ўсіх катэдрах нашай Айчыны распачаўся дыяцэзіяльны этап Сіноду Біскупаў на тэму: «На карысць сінадальнага Касцёла: камунія, удзел і місія», які будзе доўжыцца да красавіка 2022 года. Метадам сінадальнага працэсу з’яўляецца слуханне, мэтай — распазнанне, а шляхам — удзел. На першым этапе Сіноду практычны ўдзел усіх жадаючых — гэта адказ на пытанні анкеты. Вынікі анкеты будуць апрацаваны дыяцэзіяльнай Сінадальнай камісіяй.

Прапанаваныя пытанні для абмеркавання з’яўляюцца вынікам распрацоўкі дзесяці тэм, складзеных Сінодам паўсюднага Касцёла. Пры падрыхтоўцы мы ўлічвалі і рэчаіснасць Касцёла ў Беларусі.

Усіх, хто жадае прыняць удзел у гэтай Сінадальнай кансультацыі, мы просім адказаць перш за ўсё на тыя тэмы і пытанні, якія адпавядаюць вашаму асабістаму шляху веры і жыцця, і пакідаем за кожным свабоду вырашаць, на якое сінадальнае пытанне адказваць, а якое пакінуць без адказу. Існуе таксама магчымасць выказацца на любую тэму, нават на тую, якая не ўвайшла ў Сінадальную кансультацыю.

Выконваючы рэкамендацыі папы Францішка і нашых біскупаў, зазначым, што прыняць удзел у дыяцэзіяльным этапе Сінадальнай кансультацыі можа кожны жадаючы. Запоўніць анкету можна як самастойна, так і супольна. Ксяндзы пробашчы могуць арганізаваць у парафіях сустрэчы для розных рэлігійных груп і станаў, падчас якіх будзе прысвечаны час на слуханне, распазнанне і супольны ўдзел у запаўненні Анкеты. Тое ж самае можна зрабіць у сям’і, манаскай супольнасці, дэканаце і г.д.

Сінадальная кансультацыя ў дыяцэзіях будзе праводзіцца з 29 лістапада 2021 года да 1 лютага 2022 года.

Па выніках гэтых кансультацый з 1 лютага 2022 года да 1 красавіка 2022 года, кожная дыяцэзія падрыхтуе свой дакумет, які будзе перададзены ў Сінадальную камісію пры Канферэнцыі Каталіцкіх Біскупаў у Беларусі. На базе дыяцэзіяльных дакументаў з 1 красавіка 2022 года да 1 чэрвеня 2022 года будзе падрыхтаваны агульны дакумент Канферэнцыі Каталіцкіх Біскупаў у Беларусі і перададзены ў Сакратарыят Сіноду Біскупаў у Рым.

Спосаб правядзення Сінадальнай кансультацыі наступны:

  • На партале Catholic.by створана асобная рубрыка Сінод 2023, дзе змешчана ўся даступная інфармацыя пра дыяцэзіяльны этап Сіноду Біскупаў у дыяцэзіях Беларусі.
  • Анкета будзе змешчана на партале Catholic.by, у часопісах «Ave Maria», «Дыялог», «Каталіцкі веснік», «Слова Жыцця».
  • Створаны паштовыя скрыні для магчымасці даслаць анкеты ў фармаце Word.
  • Будзе таксама магчымасць запаўнення анкеты ў фармаце Google для карыстальнікаў інтэрнэт-рэсурсаў і сацыяльных сетак.
  • Вялікая просьба да ксяндзоў пробашчаў раздрукаваць некалькі копій анкеты і размясціць іх ў адпаведным месцы ў касцёле. Старэйшым парафіянам, пры неабходнасці, належыць дапамагчы запоўніць анкету і даслаць адказным у дыяцэзіях.

Прэзентацыя анкеты Сінадальнай кансультацыі будзе адбывацца:

На час плённага перажывання і ўдзелу ў дыяцэзіяльным этапе Сіноду Біскупаў жадаю святла і дару мудрасці Духа Святога!

Аляксандр Яшэўскі SDB
Дапаможны біскуп Мінска-Магілёўскай архідыяцэзіі,
Старшыня Сінадальнай камісіі пры ККББ

Абноўлена 26.11.2021 22:56
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа