![](/3/images/news/2019/08/10306/2019-08-29-190829-Budsalw-013.jpg)
Мінула ўжо больш за месяц, калі ў Будславе прайшоў моцны град, які нарабіў тут шмат бяды. Наступствы стыхіі відаць на сценах Нацыянальнага санктуарыя і сёння.
Мы праходзім з пробашчам будслаўскай парафіі ксяндзом Дзмітрыем Дубовікам уздоўж сценаў святыні.
«Вас, журналістаў, так цікавяць гэтыя разбурэнні ад граду! Вы прыедзеце, пафатаграфуеце, а нам з гэтым жыць», — кажа з горкай усмешкай святар, паказваючы то разбітую ўшчэнт электрычную каробку са скруткамі правадоў, то адарваны, нібы зламыснаю рукою, кабель-канал электраправодкі вонкавага асвятлення, то адбітыя сям-там кавалкі тынку…
![](/3/images/previews/news/2019/08/s-2019-08-29-190829-Budsalw-001-cb.jpg)
![](/3/images/previews/news/2019/08/s-2019-08-29-190829-Budsalw-002-cb.jpg)
![](/3/images/previews/news/2019/08/s-2019-08-29-190829-Budsalw-003-cb.jpg)
![](/3/images/news/2019/08/2019-08-29-190829-Budsalw-001.jpg)
![](/3/images/news/2019/08/2019-08-29-190829-Budsalw-002.jpg)
![](/3/images/news/2019/08/2019-08-29-190829-Budsalw-003.jpg)
І не толькі жыць з гэтымі разбурэннямі даводзіцца новаму пробашчу, але і рамантаваць, выпраўляць, рэстаўраваць.
Для прызначанага ўсяго год таму новага пробашча будслаўскай парафіі, які, можна сказаць, фактычна з’яўляецца таксама і кусташам санктуарыя, гэты год стаў сапраўдным «баявым хрышчэннем».
Падчас першага падрыхтаванага ім у якасці пробашча фэсту здарылася надзвычайная сітуацыя, калі перагарэла большая частка гукаўзмацняльнай апаратуры і іншых электрычных прыладаў. Тады сарвалася прамая трансляцыя, але дзякуючы аператыўным дзеянням ксяндза Дзмітрыя і яго каманды святкаванне гэта не азмрочыла.
![](/3/images/news/2019/08/2019-08-29-190829-Budsalw-004.jpg)
Не прайшло і месяца ад фэсту, і тут новая бяда: град, які зноў нарабіў шкоды. І зноў святар бярэцца за справу з аптымізмам і з Божаю дапамогаю.
Але ліквідаваць наступствы стыхіі — не адзіны клопат пробашча. Усярэдзіне святыні таксама ідуць запланаваныя рэстаўрацыйныя працы.
Калі ўваходзім у базыліку, адразу кідаецца ў вочы, што з левага ад уваходу боку ўсё завешана празрыстым поліэтыленам, за якім праглядаюцца абрысы будаўнічых рыштаванняў. Ідзе рэстаўрацыя паўночных сценаў каля арганных хораў.
![](/3/images/news/2019/08/2019-08-29-190829-Budsalw-006.jpg)
«Мы распачалі працу з аднаўлення аб’ёма вакол алтара святога Юды Тадэвуша. Чаму менавіта адсюль? Па-першае, стан сценаў тут найгоршы: расколіны, пашкоджанне тынку, у выніку частка роспісаў страчана незваротна.
А па-другое, вядома, што святы Юда Тадэвуш — апякун і дапаможца ў найбольш складаных, па-чалавечы безнадзейных справах, таму распачалі менавіта з яго алтара, каб ён сваім заступніцтвам нам дапамагаў», — разважае святар.
Справа рэстаўрацыі сапраўды вельмі складаная. Аб’ём вакол алтара, які цяпер аднаўляецца, большы па памерах за многія касцёлы. У будслаўскай святыні, як і ў большасці старых касцёлаў пры кляштарах, акрамя галоўнага ёсць шмат бакавых алтароў. Да Другога ватыканскага сабору ў Каталіцкім Касцёле не было магчымасці канцэлебры, а на адным алтары можна было цэлебраваць толькі адну Імшу ў дзень. Таму і рабілася ў касцёлах па некалькі алтароў, каб усе айцы маглі складаць на іх Эўхарыстычную ахвяру.
![](/3/images/news/2019/08/2019-08-29-190829-Budsalw-008.jpg)
«У будслаўскай базыліцы таўшчыня сценаў вагаецца ад чатырох метраў трыццаці сантыметраў да шасцідзесяці сантыметраў. Менавіта тут, каля хораў, сцены найбольш тонкія і найбольш пашкоджаныя, — кажа са скрухаю ксёндз Дзмітрый. —
Аднавіць трэба тынк і роспісы на ім: дзве стацыі — пятую і дванаццатую, фігуры двух апосталаў, два роспісы з раслінным арнаментам, якіх раней не было відаць, а на хорах — выявы ліры, кнігі з нотамі і габою, якія былі цалкам схаваныя ад людскіх вачэй.
Акрамя таго, з-за асаблівасцяў архітэктурнай канструкцыі тут найбольш складана трапіць на дах. У выніку ён своечасова не рамантаваўся, таму вада зацякала ўсярэдзіну і паступова рабіла сваю разбуральную справу».
Падобная сітуацыя і з супрацьлеглага боку, каля алтара святой Барбары, якая лічыцца ў Касцёле апякункаю добрай смерці. У свой час абразы бакавых алтароў будслаўскай базылікі былі адрэстаўраваныя намаганнямі шэрагу каталіцкіх парафій і асобных мецэнатаў. Таму вялікім дысанансам глядзіцца адноўлены абраз на абшарпанай сцяне з вялікаю «дзіркай», праз якую выглядае цагляная кладка.
![](/3/images/news/2019/08/2019-08-29-190829-Budsalw-011.jpg)
«Тут тынк, які адышоў ад сцяны, быў асцярожна зняты, каб захаваць на ім унікальны фрэскавы жывапіс. Пасля ўсе фрагменты закансервуюць і вернуць на месца.
Рэстаўрацыя вядзецца з захаваннем усіх нормаў і з улікам не толькі нашага, але і еўрапейскага вопыту, з выкарыстаннем толькі аўтэнтычных з гістарычнага пункту гледжання, натуральных матэрыялаў. Увесну плануем адрэстаўраваць таксама аб’ём вакол алтара святой Барбары», — дзеліцца з гонарам пробашч.
Але глыбока ў вачах разам з радасным бляскам прабягае і цень заклапочанасці. Душпастыра і яго вернікаў сёння хвалюе пытанне, дзе знайсці грошы на працяг дарагіх рэстаўрацыйных працаў.
![](/3/images/news/2019/08/2019-08-29-190829-Budsalw-010.jpg)
Іх складанасць яшчэ і ў тым, што праект карэктуецца па ходу працы. Кожны дзень адкрываюцца новыя праблемы, узнікае неабходнасць дадатковых укладанняў, прычым вельмі нятанных.
Гэта ж не проста рамонт у кватэры, а рэстаўрацыя нацыянальнага набытку, адной з галоўных святыняў нашай Бацькаўшчыны.
«Сцены не проста тынкуюцца: пры гэтым неабходна захаваць унікальныя фрэскавыя роспісы. Іх выканаў вядомы мастак Казімір Анташэўскі. Лічыцца, што яго пэндзлю належаць творы сакральнага жывапісу ў шэрагу іншых касцёлаў на Беларусі, у тым ліку ў мінскай катэдры», — адзначае будслаўскі пробашч.
![](/3/images/previews/news/2019/08/s-2019-08-29-190829-Budsalw-005-cb.jpg)
![](/3/images/previews/news/2019/08/s-2019-08-29-190829-Budsalw-006-cb.jpg)
![](/3/images/previews/news/2019/08/s-2019-08-29-190829-Budsalw-007-cb.jpg)
![](/3/images/previews/news/2019/08/s-2019-08-29-190829-Budsalw-010-cb.jpg)
![](/3/images/previews/news/2019/08/s-2019-08-29-190829-Budsalw-008-cb.jpg)
![](/3/images/previews/news/2019/08/s-2019-08-29-190829-Budsalw-009-cb.jpg)
![](/3/images/previews/news/2019/08/10306/s-2019-08-29-190829-Budsalw-013-cb.jpg)
![](/3/images/news/2019/08/2019-08-29-190829-Budsalw-005.jpg)
![](/3/images/news/2019/08/2019-08-29-190829-Budsalw-006.jpg)
![](/3/images/news/2019/08/2019-08-29-190829-Budsalw-007.jpg)
![](/3/images/news/2019/08/2019-08-29-190829-Budsalw-010.jpg)
![](/3/images/news/2019/08/2019-08-29-190829-Budsalw-008.jpg)
![](/3/images/news/2019/08/2019-08-29-190829-Budsalw-009.jpg)
![](/3/images/news/2019/08/10306/2019-08-29-190829-Budsalw-013.jpg)
Святар дадае:
«У нас працуюць цудоўныя людзі, выдатныя спецыялісты, якія часам робяць немагчымае і даюць другое жыццё творам сакральнага мастацтва, якія без іх былі б незваротна страчаны. Яны поўныя самаахвярнасці і энтузіязму, але рэстаўрацыя патрабуе не толькі ўмелых рук, але і дарагіх матэрыялаў.
Дапамагчы ратаваць нацянальны набытак можа кожны, бо гэта скарб не толькі Касцёла на Беларусі, але ўсяго нашага народа», — упэўнены ксёндз Дзмітрый Дубовік.
Пры нагодзе ён таксама запрасіў усіх жадаючых прыехаць у Будслаў 7 верасня, калі ў Нацыянальным санктуарыі будуць адзначаць гадавіну асвячэння касцёла.
Непасрэдна звязацца з ксяндзом Дзмітрыем кожны можа па тэлефоне +375 (29) 365 83 01, а рэквізіты для добраахвотных ахвяраванняў пададзены на сайце Нацыянальнага санктуарыя Маці Божай Будслаўскай.
![](/3/images/news/2019/08/2019-08-29-190829-Budsalw-012.jpg)
![](https://catholic.by/3/templates/catholic/img/left.png)
![](https://catholic.by/3/templates/catholic/img/right.png)
![](https://catholic.by/3/templates/catholic/img/close.png)
![](https://catholic.by/3/templates/catholic/img/close.png)