13 мая, ва ўспамін Маці Божай Фацімскай, у парафіі святога Юды Тадэвуша ў Вішневе (Смаргонскі дэканат) пройдзе дзень посту і малітвы аб спыненні пандэміі каранавірусу і адбудзецца адмысловае набажэнства.
У мясцовай каталіцкай супольнасці традыцыйна з мая па кастрычнік у кожны трынаццаты дзень месяца адбываюцца набажэнствы на ўспамін аб’яўленняў Найсвяцейшай Панны Марыі ў Фаціме.
Сёлета вернікі вішнеўскай парафіі разам са сваім пробашчам ксяндзом Антоніем Казлоўскім распачнуць цыкл Фацімскіх набажэнстваў з дня посту і малітвы ў інтэнцыі спынення пандэміі каранавірусу.
Гэтая ініцыятыва Высокага камітэту па чалавечым братэрстве была падтрымана Папам Францішкам і каталіцкімі біскупамі Беларусі.
З гэтай нагоды ў вішнеўскім касцёле а 12-й гадзіне распачнецца цэлебрацыя святой Імшы, падчас якой Божае слова прамовіць ксёндз Павел Калеснік, пробашч парафій Найсвяцейшай Тройцы ў Жодзішках і Маці Божай Добрай Рады ў Нястанішках. Пасля святой Імшы адбудзецца адмысловае набажэнства, якое будзе складацца з Фацімскага Ружанца, Літаніі да Найсвяцейшай Панны Марыі і малітваў аб спыненні эпідэміі каранавірусу.
Дзень, прысвечаны малітве, посту і ўчынкам міласэрнасці ў інтэнцыі спынення пандэміі, невыпадкова быў спалучаны з успамінам Маці Божай Фацімскай. Рэч у тым, што двое з трох дзяцей, якім у 1917 годзе ў Фаціме аб’яўлялася Панна Марыя, Франсішку і Жасінта Марту, памерлі ад самай жахлівай эпідэміі ХХ стагоддзя — грыпу «іспанкі», якая лютавала сто гадоў таму.
Такім чынам, 13 мая вернікі ў Вішневе будуць прасіць Бога аб спыненні пандэміі каранавірусу, якая ўжо забрала сотні тысяч жыццяў ва ўсім свеце, праз заступніцтва Найсвяцейшай Панны Марыі і святых Франсішку і Жасінты, падмацоўваючы свае малітвы постам і ўчынкамі хрысціянскай міласэрнасці, як да гэтага заклікае Святы Айцец і каталіцкія біскупы Беларусі.
