Дзень малітвы і посту ў інтэнцыі міру ва ўсім свеце адбудзецца ў Касцёле ў панядзелак 7 кастрычніка, у першую гадавіну буйнога тэрарыстычнага нападу групоўкі ХАМАС на Ізраіль.
Пра гэта паведамляе Беларуская рэдакцыя парталу Vatican News.
«Каб прасіць праз заступніцтва Найсвяцейшай Панны Марыі аб дары міру, у бліжэйшую нядзелю я адпраўлюся ў базіліку Санта-Марыя-Маджорэ, дзе памалюся святы Ружанец і звярнуся да Найсвяцейшай Панны з гарачай просьбай», — сказаў Папа 2 кастрычніка падчас святой Імшы на адкрыццё Сіноду Біскупаў. Ён заклікаў удзельнікаў сінадальнага сходу па магчымасці далучыцца да яго.
«А на наступны дзень, 7 кастрычніка, я прашу ўсіх правесці дзень малітвы і посту ў інтэнцыі міру ва ўсім свеце», — дадаў Святы Айцец.
Дзень малітвы і посту ў інтэнцыі міру пройдзе па ініцыятыве Папы Францішка ўжо не ў першы раз. У мінулыя гады такія духоўныя акцыі адбываліся ў кантэксце канфліктаў у Сірыі, Дэмакратычнай Рэспубліцы Конга, Паўднёвым Судане, Ліване, Афганістане, ва Украінне і на Святой Зямлі.
