20 сакавіка, у Пальмовую нядзелю, якая распачынае Вялікі тыдзень, святую Імшу ў катэдральным касцёле Езуса Міласэрнага ў Віцебску ўзначаліў біскуп Віцебскі Алег Буткевіч.

Па традыцыі ў гэты дзень вернікі прынеслі у касцёл аздобленыя галінкі вярбы, якія сімвалізуюць ўваскрашэнне і несмяротнасць душы. Галінкі ўпрыгожваюць напярэдадні, часта ўсёй сям’ёй, а найбольш радасці гэты занятак прыносіць дзецям.  

Пасля асвячэння вербаў адбылася працэсія вакол касцёла, якая з’яўляецца нібы заклікам ісці за Хрыстом Валадаром.

Пальмовая нядзеля нагадвае аб урачыстым уездзе Езуса у Ерузалем, калі людзі віталі Яго, сцелячы Яму пад ногі адзенне і галінкі пальмаў. Але ў гэты ж дзень чытаецца і апісанне  Мукі Пана, дзе распавядаецца, што той жа натоўп, які некалькімі днямі раней вітаў Езуса, потым запатрабаваў укрыжаваць Яго. Таму гэтая нядзеля таксама носіць назву Нядзеля Мукі Пана.

Аб гэтым нагадаў у гаміліі біскуп Алег Буткевіч, разам з тым падкрэсліўшы, што такая перамена ў паводзінах «датычылася не толькі габрэяў, якія расчараваліся ў Месіі, чакаўшы Яго як Збаўцу», «Збаўцу толькі палітычнага, таго, хто меў здольнасць накарміць іх, прынесці дабрабыт тут і сёння». Яны, па словах біскупа, не зразумелі той праўды і ідэі, з якой Езус прыйшоў у гэты свет, а не зразумеўшы, расчараваліся і пажадалі адпомсціць за неспаўненне сваіх жаданняў і мараў.

Іерарх адзначыў, што гэта навука і «для нас з вамі, бо мы часта паўтараем гэтую гісторыю ў нашых сэрцах у хвіліну расчаравання ў іншым чалавеку, у той ці іншай сітуацыі». Біскуп дадаў, што жаданне адпомсціць — праяўленне ганарыстасці чалавека, яго пыхі, нязгоды прыняць праўду.

Віцебскі ардынарый нагадаў, што нават у гэтай сітуацыі Бог не папракае чалавека, а просіць свайго Айца прабачыць сваім крыўдзіцелям. «Міласэрнасць для нас з’яўляецца паратункам, — падкрэсліў  іерарх. — У гэты год Святы Айцец Францішак звяртае асаблівую ўвагу на Божую міласэрнасць. Яна вучыць нас гэтай вялікай пакоры, якая адрознівала Божага Сына і якая прынесла выратаванне і перамогу чалавека над злом і смерцю».

Напрыканцы гаміліі іерарх пажадаў: «Таму няхай сёння наш удзел у перамозе Божага жыцця над грахом і смерцю прынясе нам надзею і дасць той доўгачаканы і так патрэбны нам супакой у нашыя сэрцы. І каб мы з гэтым Божым супакоем заўсёды былі пераможцамі ў нашым штодзенным жыцці над тым, што нясе нам зло і непаразуменне. Няхай Езус, якога мы сёння вітаем з пальмовымі галінкамі ў руках, сапраўды стане нашым Валадаром».

Звяртаючы ўвагу на галінкі вербаў у руках вернікаў, біскуп Алег Буткевіч падкрэсліў: «Гэтая галінка, якую мы асвячаем, павінна на працягу года прыгадваць нам аб гэтым дні, вяртаць нас да ўсведамлення, кім мы ёсць і якой ёсць наша вера. Каб, калі пазней гэтая галінка будзе спалена і ў Папяльцовую сераду нашы галовы пасыпяць  попелам з яе, мы зноў і зноў маглі вяртацца да гэтай праўды, што жыццё, у якім мы прабываем — часовае, але перамога Хрыста над грахом і смерцю адкрывае нам дарогу ў вечнасць, у тую будучыню, дзе мы навекі станем пераможцамі разам з Хрыстом і застанемся там назаўсёды ».

Кацярына Лаўрыненка