9 лютага ў культурна-рэлігійным цэнтры катэдральнага касцёла Езуса Міласэрнага ў Віцебску прайшла сустрэча пад назвай “Кожны талент – ад Бога”. У ёй прынялі ўдзел вернікі чатырох каталіцкіх парафій Віцебска, грэка-католікі, праваслаўныя, якія цікавяцца творчасцю, яго вытокамі, прыродай, хто неабыякавы да твораў прыгожага пісьменства, мастацтва, музыкі, спеваў. У сустрэчы ўдзельнічаў і віцебскі ардынарый біскуп Алег Буткевіч.

Падчас сустрэчы ўздымаліся пытанні аб тым, што такое талент, адкуль ён бярэцца, як яго развіваць, у чым найперш чэрпаць моц для рэалізацыі ўласных творчых памкненняў. Сваімі меркаваннямі дзяліліся на гэты конт з прысутнымі вядомы мастак і мастацтвазнаўца, прафесар кафедры мастацтва ВДУ імя П.М. Машэрава Вячаслаў Шамшур, паэтка Алена Гінько, празаік Стася Наркевіч. З цікавасцю ўспрыняла аўдыторыя выступленні маладых творцаў: гітарыстаў Ягора Дамініча і Фёдара Свірскага, якіх прадставіла выкладчыца Віцебскага тэхналагічнага каледжа Наталля Аніськовіч, а таксама паэта Рамана Калугіна.

Прыязную атмасферу сустрэчы дапаўнялі адказы гасцей на пытанні, а таксама сумесная гарбата і размовы ў кулуарах.

З прывітальным і заключным словамі звярнуўся да ўдзельнікаў імпрэзы пробашч парафіі Езуса Міласэрнага кс. Адам Дынак.

Біскуп Алег Буткевіч пажадаў прысутным творчага плёну і Божай дапамогі ў развіцці здольнасцяў, дадзеных кожнаму Панам, у справе дабратворнага ўплыву кожнага на фарміраванне як у асобных людзей, так і ў грамадстве паважлівага стаўлення да хрысціянскіх каштоўнасцяў.

Падобныя сустрэчы плануецца, згодна з планам парафіяльных мерапрыемстваў, праводзіць у культурна-рэлігійным цэнтры штомесяц.

Яўгенія Ізотава