2 лютага, у свята Ахвяравання Пана, парафію Нараджэння Найсвяцейшай Панны Марыі ў Браславе наведаў ардынарый Віцебскі біскуп Алег Буткевіч. Іерарх, які атрымаў біскупскае пасвячэнне 18 студзеня гг., узначаліў у парафіі прыміцыйную Імшу.

Перад пачаткам Імшы біскуп, які сам паходзіць з Браслаўшчыны, памаліўся на могілках, дзе пахаваны святары, якія неслі служэнне ў браслаўскім касцёле. Падчас прывітання ардынарый асабліва падкрэсліў, што гэта гонар для ўсіх вернікаў, што менавіта з Браслаўшчыны Бог паклікаў пастыра Віцебскай дыяцэзіі. Вернікі, у сваю чаргу, прывіталі іерарха цёплымі словамі і кветкамі і адзначылі, што для іх вялікі гонар маліцца разам са сваім пастырам у яго роднай святыні.

Адказваючы на словы прывітання, у гаміліі біскуп звярнуў асаблівую ўвагу на сям’ю і каштоўнасці ў грамадстве. Іерарх заахвоціў парафіян не паддавацца нябачным спакусам ХХІ стагоддзя, а змагацца з імі пры дапамозе малітвы.   

У канцы Імшы пробашч парафіі кс. Антоні Земба SDS і прадстаўнікі парафіяльных малітоўных груп яшчэ раз выказалі радасць з нагоды супольнай малітвы з ардынарыем Віцебскай дыяцэзіі, пажадалі яму мужнасці ў кіраванні дыяцэзіяй і паабяцалі памятаць у малітве. Біскуп удзяліў прысутным благаслаўленне.

Пазней Віцебскі ардынарый наведаў раённы дом культуры, дзе яму, духавенству браслаўскага касцёла, прадстаўнікам мясцовай улады і іншым гледачам быў паказаны спектакль, па традыцыі падрыхтаваны ў Браславе пасля калядных святаў. Гледачы пабачылі таленавітую ігру самадзейных артыстаў, як дарослых, так і дзяцей, пастаноўку прафесійнага рэжысёра Алены Каспаровіч у музычным афармленні Іны Сапун. Біскуп выказаў словы падзякі ўсяму творчаму калектыву, зазначыўшы, што і сам калісьці выконваў ролю ў падобным спектаклі на гэтай жа сцэне, і дадаўшы, што з таго часу ўзровень пастановак намнога вырас.

 Паводле waladarka.by

(AG)