20 лістапада ў Гомельскім доме-інтэрнаце для дзяцей-інвалідаў і маладых інвалідаў з асаблівасцямі псіха-фізічнага развіцця прайшло традыцыйнае свята ў гонар Анёлаў-ахоўнікаў. У інтэрнаце адбылася праваслаўная Літургія, якую правёў іерэй Свята-Траецкага храма айцец Мікалай Кадацкі, дзеці выступілі з канцэртам, а сёстры бэнэдыктынкі падрыхтавалі пачастунак.

— Свята прайшло цудоўна, — кажуць у дабрачыннай каталіцкай місіі «Карытас - Міласэрнасць». — Спачатку была Літургія, затым — выдатны канцэрт, на якім былі прадстаўлены новыя нумары і музычныя сцэнкі. Дзеці вельмі стараліся і хваляваліся. Потым быў арганізаваны салодкі стол, на якім было ўсё, што любяць дзеці. Да іх у домік прыйшло шмат гасцей. А скончылася ўрачыстасць дыскатэкай. Да свята рыхтаваліся ўсе: адміністрацыя, выхавальнікі, сёстры і самі дзеці. Усе былі вельмі прыгожа апранутыя і панавала атмасфера свята.

Два гады таму праваслаўныя і католікі пачалі сумеснае служэнне ў Дзіцячай вёсцы, пабудаванай каталіцкай дабрачыннай місіяй «Карытас - Міласэрнасць».

Унікальная для Беларусі дзіцячая вёска была ўрачыста адкрыта 12 кастрычніка 2011 года. Хоспіс пабудаваны на грошы замежных дабрачынных арганізацый і католікаў з Германіі, Аўстрыі, Італіі і іншых еўрапейскіх дзяржаў.

Вёска разлічана на пражыванне 60 хлопчыкаў і дзяўчынак ва ўмовах, максімальна набліжаных да сямейных. У такім асяроддзі, а таксама дзякуючы пастаянным дыдактычным і рэабілітацыйным заняткам, магчыма максімальна поўнае развіццё асобы. Пяць асобных груп-сем’яў уключаюць максімум 12 чалавек. Звяно, якое злучае такую групу-сям’ю, — сястра бэнэдыктынка-самарытанка Крыжа Хрыстова, якая разам з дапаможным персаналам клапоціцца аб належным клімаце выхавання і апякуецца дзецьмі. Дзейнасць хоспіса арганізавана пры падтрымцы абласнога камітэта па працы і сацыяльнай абароне насельніцтва.

Паводле гомельскага каталіцкага сайта

(AG)