18 гадоў таму, 14 жніўня, узнікла першая суполка Легіёна Марыі ў Беларусі. Добрай традыцыяй руху стала правядзенне рэкалекцый у Баранавічах напярэдадні свята Унебаўзяцце Найсвяцейшай Панны Марыі.

 

У гэтым годзе ў рэкалекцыях удзельнічалі легіянеры з усіх чатырох дыяцэзій, а канферэнцыі прамаўляў рэктар пінскай семінарыі кс. Ян Саламон. Святар навучаў вялікаму даверу да Пана Бога на прыкладах людзей Бібліі: Аўраама, Якава, жыцця святой Рыты і Эдыты Штайн. 

 

Ксёндз Ян Саламон тлумачыў сэнс служэння легіянераў у першаю чаргу сваёй уласнай сям’і, а таксама ў Касцёле і грамадстве; вучыў прабачэнню і цярпенню, як перамагчы зло цёплым словам і ўсмешкай.

 

У пятніцу, 10 жніўня, легіянераў наведаў біскуп Пінскай дыяцэзіі Антоні Дзям’янка, які цэлебраваў святую Імшу. У гаміліі пастыр падкрэсліў неабходнасць дзейнасці членаў Легіёна Марыі.

 

Заўжды ў час рэкалекцый легіянеры наведваюць Фацімскі касцёл у Баранавічах, рыхтуюцца і прымаюць удзел у святой Імшы, а пасля наступае час адпачынку на тэрыторыі касцёльнага двара: яны спяваюць, прымаюць удзел у конкурсах і розных забавах, падмацоўваюць сілы сумесным пасілкам, і за ўсё дзякуюць Пану Богу.

 

                                                                                               

Легіянерка з Маладзечна Марыя