Каб заставацца сабой, чалавек мусіць берагчы душу. Выйшла ў свет новая кніга Рыгора Барадуліна |
Беларусь - Мінска-Магілёўская архідыяцэзія |
11.10.2011 13:31 |
«Anima» — на латыні «душа». У новай кнізе Народнага паэта Рыгора Барадуліна, выдадзенай рыма-каталіцкай парафіяй Св. Сымона і св. Алены, пад аднайменнай назвай вялікі мастак слова прадстаўляе сутнасць жыцця, спробу сам-насам пагутарыць з Нябёсамі. Кніга «Аnima» — дзясятая кніга Рыгора Барадуліна, якую парафія Чырвонага касцёла ў Мінску выдала за апошнія пяць гадоў. Як адзначаюць яе ўкладальнікі кс. Уладзіслаў Завальнюк і Ала Сакалоўская, сімвалічна, што «Anima» не толькі юбілейнае выданне, але і выходзіць у стогадовы юбілей святыні. «Усё прыходзіць і праходзіць, узнікае і знікае. Неўміручая толькі душа. Яна падуладна адно Усявышняму, — піша Народны паэт. — Незлічоныя бачныя і нябачныя, рознааблічныя чорныя сілы са дня Стварэння свету цікуюць за душой. Чалавек, каб заставацца сабой, мусіць берагчы сваю душу». Набыць кнігу можна ў Чырвоным касцёле, аб часы і месцы прэзентацыі выдання будзе паведамлена пазней. |