5 мая дапаможны біскуп Пінскай дыяцэзіі Казімір Велікаселец, які служыць у Гомелі, адзначыў дзень нараджэння, з якім іерарха павіншавалі мясцовыя вернікі. А 4 чэрвеня гг. біскуп будзе адзначаць 30 гадоў з часу прэзбітэрскага пасвячэння.

Як паведамляе гомельскі каталіцкі сайт, у дзень нараджэння парафіяне касцёла пажадалі біскупу святасці, каб Бог благаслаўляў яго жыццё і ўсе яго пачынанні, асабліва ў цяжкай справе па адраджэнні ў Гомелі парафіі Унебаўзяцця Найсвяцейшай Багародзіцы.

Казімір Велікаселец нарадзіўся 5 мая 1945 года ў вёсцы Стараволя Пружанскага раёна цяперашняй Брэсцкай вобласці. Служыў у войску, працаваў на будоўлі ў Вільні, там жа пазнаёміўся з дамініканцамі. Тры гады ўлады не давалі яму магчымасць паступіць у Рыжскую семінарыю, куды нарэшце ён быў прыняты ў 1981 годзе.

Падчас вучобы склаў першыя манаскія шлюбы ў ордэне дамініканцаў. Пасля заканчэння семінарыі ў 1984 годзе ва ўрачыстасць Святой Тройцы атрымаў прэзбітэрскае пасвячэнне з рук кардынала Ю. Вайвадса і прызначэнне ў сваю першую парафію Святой Тройцы ў Ішкалдзі.

Пад духоўнай апекай а. Казіміра Велікасельца былі таксама Юшкавічы, Гарадзішча, Сталавічы, Паланэчка, Новы Свержань, Гарадзея, Карэлічы, Мір, Ганцавічы, бо ў той час святароў катастрафічна не хапала і кожны з іх абслугоўваў многія адлеглыя парафіі. Акрамя душпастырскага служэння а. Казімір Велікаселец займаўся адбудоваю і рамонтам святыняў. У 1992 годзе быў прызначаны Генеральным вікарыем Пінскай дыяцэзіі, адначасова выконваў абавязкі дэкана Баранавіцкага дэканату і пробашча храма Узвышэння Святога Крыжа ў Баранавічах.

24 чэрвеня 1999 года ў пінскім катэдральным касцёле атрымаў біскупскае пасвячэнне з рук кардынала Казіміра Свёнтка.

(AG)