Дарагія дыяцэзіяне,
скончыўся час летніх канікул і адпускоў. У верасні мы распачынаем новы навучальны і катэхетычны год. З вялікай надзеяй і адказнасцю падыходзім да чарговага этапу працы па фарміраванні маладога пакалення, якое цяпер яшчэ вучыцца ў школе ці ўніверсітэце, але ў недалёкай будучыні возьме на сябе адказнасць за лёс нашага грамадства.

Працэс навучання і выхавання маладога пакалення важны як для Касцёла, так і для дзяржавы. Таму неабходна, каб усе – бацькі, парафія, школа – усвядомілі сабе неабходнасць гарманічнага і плённага супрацоўніцтва, а таксама адпаведнага падзелу абавязкаў. Вернасць маральным і рэлігійным прынцыпам сярод дзяцей і моладзі – гэта плод добрай і адказнай працы, шчырага клопату бацькоў аб сваім патомстве. Хрысціянскае выхаванне маладога пакалення павінна быць для бацькоў натуральным вынікам паслядоўнай рэалізацыі сужэнскай прысягі, якую яны складалі падчас шлюбу, а таксама абяцанняў, якія яны давалі Богу падчас хросту кожнага дзіцяці. Ва ўсім гэтым выражаецца клопат аб будучыні сям’і, Касцёла і краіны.

На жаль, некаторым бацькам хочацца перакінуць значную частку сваіх абавязкаў на дзяржаву, Касцёл або школу. У выніку такога самавызвалення бацькоў ад іх абавязкаў дзеці і моладзь вырастаюць у перакананні, што іх не жадаюць прымаць, любіць. Ім пачынае здавацца, што іх жыццёвы шлях больш залежыць ад спрыту і хітрасці, чым ад грунтоўнай, шляхетнай і адказнай формы быцця ў грамадстве. Таму важна, каб хрысціянскія бацькі не паддаваліся ментальнасці самавызвалення ад абавязкаў і ўдзельнічалі ў выхаванні сваіх дзяцей.

Многія выхаваўчыя праблемы паглыбляе таксама нізкі матэрыяльны ўзровень некаторых сем’яў. Таму заахвочваю паасобных вернікаў, дабрачынныя супольнасці і фонды дапамагаць сваёй ахвярнасцю дзецям з такіх сем’яў.

Таксама мы павінны ўсе разам выказаць сваё рашучае “не” тым, хто хоча выкарыстаць недасведчанасць маладых людзей, прапаноўваючы ім заглыбіцца ў нерэальны свет праз наркотыкі, курэнне, алкаголь, парнаграфію і агрэсіўныя камп’ютэрныя гульні. Пры гэтым прапаноўваецца бескантрольны доступ да ўсяго, што можа нашкодзіць. Такая з’ява ператвараецца ў сур’ёзную пагрозу для духоўнага, фізічнага і псіхічнага здароўя нашай моладзі.

Просім Найсвяцейшую Панну Марыю, Каралеву Палесся, аб яе асаблівай дапамозе ў рэалізацыі добрага і шляхетнага задання па выхаванні маладога пакалення, каб яно не аслабла і не было згублена праз нядбайнасць. З дапамогай Маці Божай і па Яе прыкладу будзем імкнуцца выхоўваць нашую моладзь.

Заахвочваю таксама ўсіх да супольнай малітвы ў форме Навэнны да благаслаўлёных сясцёр мучаніц з Навагрудка. Праз іх заступніцтва будзем маліць Пана Бога аб усіх неабходных дарах Духа Святога на пачатак новага катэхетычнага года.           

Усім вучням, настаўнікам, катэхетам і выхаваўцам, а таксама ўсім вернікам нашай дыяцэзіі ўдзяляю пастырскае благаслаўленне: у імя Айца і Сына, + і Духа Святога.

+ Антоні Дзям’янка
Біскуп Пінскі

Пінск, 26 жніўня 2013 г.

Шаноўных душпастыраў прашу змясціць тэкст паведамлення на дошцы аб’яваў, а таксама выкарыстаць яго змест у казаннях або ў парафіяльных аб’явах у бліжэйшую нядзелю на кожнай св. Імшы.