15 красавіка навучэнцы і настаяцелі Вышэйшай духоўнай семінарыі ў Гродне пасля сустрэчы з Папам Францішкам, што адбылася падчас агульнай аўдыенцыі на плошчы св. Пятра, наведалі Ватыканскія музеі, дзе маглі бліжэй пазнаёміцца з гісторыяй Апостальскай Сталіцы і папства і глыбей адчуць Паўсюдны Касцёл.

У гэты ж дзень яны ўдзельнічалі таксама ў святой Імшы ў капліцы Генеральнага дома Кангрэгацыi Сясцёр Змёртвыхпаўстання Пана нашага Езуса Хрыста (змёртвыхпаўстанкі) у Рыме. Месца было абрана невыпадкова. Кангрэгацыя была заснавана Цэлінай і Ядвігай Бажэнцкімі, маці і дачкой, у Рыме ў 1891 годзе. Да з’яўлення ў Касцёле новай законнай супольнасці былі доўгія гады духоўнай фармацыі заснавальніц, шэраг цяжкасцяў, якія яны пераадольвалі, змагаючыся са зменлівасцю лёсу, каб напрыканцы ХІХ стагоддзя здзейсніць Божую волю ў сведчанні пра Уваскрасенне.

Цэліна Бажэнцкая (у дзявоцтве Хлюдзінская) нарадзілася ў 1833 годзе ў Антовілі каля Оршы ў Беларусі. З дзяцінства прагнула ўступіць у кляштар, аднак бацькі і спаведнік палічылі, што ёй трэба выйсці замуж. Яна паслухалася і ўзяла шлюб з Юзафам Бажэнцкім, які паходзіў з Гродзеншчыны. У шлюбе яна была шчаслівая: кахала мужа, з любоўю выхоўвала дзяцей. Сямейнае шчасце парушыла хвароба Юзафа, якога разбіў параліч. Прахварэўшы пяць гадоў, ён памёр. Пасля смерці мужа ў Цэліны ізноў з’явілася жаданне законнага жыцця.

Ядвіга Бажэнцкая нарадзілася ў 1863 годзе ў Заневічах каля Гродна. Першаю школаю, у якой дзяўчынка вучылася сапраўднай любові — цяжкай, але цярплівай і вернай, — быў родны дом. Да гэтага асабліва прычынілася хвароба бацькі. Пасля рэкалекцый Ядвіга вырашыла далучыцца да маці, каб дапамагчы ёй у справе заснавання кангрэгацыі сясцёр змёртвыхпаўстанак.

Святую Імшу ў капліцы ўзначаліў біскуп Гродзенскі Аляксандр Кашкевіч, які падзякаваў супольнасці сясцёр за запрашэнне і выраз вялікай павагі да Касцёла ў Беларусі. “Сёння мы ішлі з тымі, хто ўтварае супольнасць семінарыі ў Гродне, як два вучні паспешна ішлі ў Эмаўс, каб спаткаць Уваскрослага Пана”, - сказаў іерарх.

У гаміліі дапаможны біскуп дыяцэзіі Юзаф Станеўскі заахвоціў прысутных быць сапраўднымі сведкамі Уваскрослага Хрыста. “Зараз мы перажываем перыяд Уваскрасення нашага Пана. Мы вырушылі ў пілігрымку нашай веры, каб ісці за той праўдай, што Хрыстус уваскрос, – адзначыў іерарх. – Ідучы ў нашай пілігрымцы, мы затрымліваемся на кароткі час ва ўсіх тых месцах, дзе раней жылі вялікія святыя, якія спаткалі Уваскрослага, і стараемся, каб праз нашу паставу і штодзённае жыццё іншыя маглі спаткацца з Ім”.

Кажучы пра благаслаўлёную Цэліну Бажэнцкую, біскуп адзначыў: “Яна паказала свету шлях да Уваскрослага Езуса, вучыла іншых, як трэба любіць Бога і чалавека. Будзем вучыцца ад яе і іншых святых, якіх сустракаем на шляху нашага пілігрымавання, найперш штодзённаму імкненню да дасканалага жыцця; вучыцца святасці, да якой нас запрашае Хрыстус”.

Кс. Юрый Марціновіч