Менавіта такою магчымасцю скарысталася і невялікая група моладзі з парафіі Перамянення Пана ў Новай Мышы пад кіраўніцтвам свайго пробашча, ксяндза Паўла Урубеля. Карыстаючыся тым, што 29 жніўня рэліквіі прыбывалі ў Дзятлаве, кс. Павел вырашыў арганізаваць невялікую роваровую пілігрымку ў дзятлаўскую парафію Унебаўзяцця Найсвяцейшай Панны Марыі.

 

У пілігрымцы ўдзельнічалі пробашч парафіі, два семінарысты і чатыры хлопцы з парафіяльнай моладзі. Пілігрымы атрымалі магчымасць ушанаваць рэліквіі св. Яна Боско і папрасіць яго заступніцтва і малітвы. Па дарозе пілігрымы наведалі некалькі касцёлаў і капліц, дзе маліліся ў інтэнцыі вернікаў гэтых святынь і аб навяртанні для тых, хто далёкі ад веры. 30 жніўня пілігрымы вярнуліся ў Новую Мыш: за два дні пілігрымкі яны праехалі больш за 140 кіламетраў.

 

Няважна, што пілігрымка доўжылася два дні і склалася толькі з 7 чалавек. У такіх справах важная не столькі колькасць, але інтэнцыя, з якой гэтыя людзі вырушалі ў дарогу. Хтосьці распачынаў шлях, каб нанова распаліць агонь сваёй веры, іншы — каб маліцца аб веры для людзей нашай краіны…

 

Але самае галоўнае, што яны не пабаяліся сваім жыццём сведчыць аб тым, што на Беларусі ёсць Бог і ў іх гарачых маладых сэрцах жыве Езус!