6 лістапада Папа Леў XIV у межай свайго чарговага апостальскага падарожжа ў Лацінскую Амерыку прыляцеў ва Уругвай. Пасля трынаццаці з паловай гадзін палёту самалёт з Папам на борце прызямліўся ў міжнародным аэрапорце імя генерала Сесарэа Берыса, які знаходзіцца ў дваццаці кіламетрах ад сталіцы дзяржавы Мантэвідэа.
Інфармацыя пра здароўе Пантыфіка з першых вуснаў
Падчас палёту ва Уругвай Леў XIV распавёў журналістам пра сваё самаадчуванне пасля аперацыі, мэты апостальскага падарожжа і чаканні ад сустрэч у трох краінах Лацінскай Амерыкі, паведамляе карэспандэнт Vatican News Сальваторэ Чэрнуцыа.
Многія сумняваліся, што пасля аперацыі па выдаленні пухліны Леў XIV зможа адправіцца ў падарожжа. Сам жа Папа — ніколі.
«З першага дня я не меў ніякіх сумневаў: быў перакананы, што падарожжа павінна адбыцца», — сказаў ён, вітаючы 82 журналістаў, прысутных на борце самалёта. Пантыфік адзначыў, што адчувае сябе добра, і падзякаваў Богу і ўрачам, у тым ліку тым, якія суправаджаюць яго ў паездцы.
Папа адзначыў, што пасля аперацыі яшчэ больш адчувае абавязак быць побач з хворымі.
Ён выказаўся пра важнасць даступнасці медыцынскай дапамогі для ўсіх, а людзям, якія хварэюць на рак, параіў не баяцца і звярнуў увагу на значэнне ранняй дыягностыкі і рэгулярных абследаванняў.
Леў XIV таксама паведаміў, што падчас знаходжання ў клініцы Джэмэлі чытаў брэвіярый, малітоўнік і газеты. Да гульні ў тэніс ён пакуль не вярнуўся, але спадзяецца аднавіць яе ў будучыні.
Галоўная мэта падарожжа
Галоўнай мэтай шостага апостальскага падарожжа ў Лацінскую Амерыку Пантыфік назваў сустрэчу з народамі і культурамі Уругвая, Аргенціны і Перу, а таксама перадачу ім «паслання надзеі».
Гаворачы пра візіт у Перу, Леў XIV сказаў, што гэта будзе яго своеасаблівае «вяртанне дадому», бо ў гэтай краіне ён больш за дваццаць гадоў служыў спачатку місіянерам, а пазней таксама біскупам. «Для мяне гэта адзін з маіх шматлікіх дамоў. Я шчаслівы, што магу вярнуцца», — прызнаўся Святы Айцец.
Візіт у Аргенціну Леў XIV назваў знакам пашаны да свайго папярэдніка Папы Францішка, бо наведае яго радзіму, куды той так і не змог прыехаць падчас свайго пантыфікату.
Першыя крокі Папы па уругвайскай зямлі
Святога Айца сустракаў ля трапу прэзідэнт Уругвая Яманду Орсі, які займае найвышэйшую дзяржаўную пасаду з сакавіка 2025 года.
Леў XIV прывітаў прадстаўнікоў мясцовага Касцёла, а потым накіраваўся на аўтамабілі на тэрыторыю базы ўругвайскіх ваенна-паветраных сіл, дзе адбылося прадстаўленне членаў афіцыйнай урадавай дэлегацыі.
Адтуль папскі картэж накіраваўся на Плошчу Незалежнасці ў Мантэвідэа — галоўную плошчу сталіцы, дзе размяшчаюцца рэзідэнцыя кіраўніка дзяржавы і іншыя важныя дзяржаўныя ўстановы. Тут была запланавана афіцыйная цырымонія прывітання Пантыфіка з удзелам прадстаўнікоў уругвайскіх уладаў, грамадзянскай супольнасці, бізнесу, дзеячаў культуры, дыпламатаў і ганаровых гасцей, у тым ліку трох былых прэзідэнтаў краіны.
