У сярэдзіне жніўня ў славуты шматлікімі аздараўленнямі марыйны санктуарый на поўдні Францыі прыбудуць першыя пілігрымкі хворых, прыпыненыя ў апошні час з-за пандэміі.
Як паведаміла польская рэдакцыя парталу Vatican News, пасля адкрыцця граніц паміж краінамі Еўрасаюзу дзве галоўныя арганізацыі, якія ў Італіі займаюцца дастаўкай хворых у Люрд, распачалаі набор у першыя ў гэтым годзе групы пілігрымаў.
Хворых будуць перавозіць на самалётах і аўтобусах. Пры гэтым не ўсе катэгорыі хворых змогуць здзейсніць пілігрымку ў санктуарый. Як кажа кс. Паоло Анджэліна, дырэктар арганізацыі OFTAL, неабходна надалей выконваць усе абавязковыя санітарныя прадпісанні, якія да гэтага часу застаюцца даволі строгімі. Аднак ужо цяпер вяідаць, што попыт на пілігрымкі ў Люрд вельмі вялікі.
«Хворыя хочуць вярнуцца да Марыі», — кажа святар.
«Гэта вялікі знак надзеі, бо час ізаляцыі, заразы, эпідэміі стаў для хворых балючым ударам. Усе глыбей усвядомілі іх прысутнасць. Мы раптам зразумелі, што хворыя і здаровыя складаюць адну супольнасць. Гэтаму нас таксама вучыць Люрд.
Цяпер пасля пандэміі патрэбна вялікая надзея, якая грунтуецца не толькі на нашых чалавечых стратэгіях і разліках, але вынікае з таго, што мы ўздымаем наш позірк да нябёсаў. Гэтаму нас таксама вучыць Папа Францішак, які нядаўна маліўся перад гротам Маці Божай Люрдскай у садах Ватыкана.
Яго жэст стаў заахвочваннем для нас, каб мы вярнуліся ў Люрд, у грот аб’яўленняў, які на гэтым свеце з’яўляецца адным з галоўных вытокаў надзеі, нашым акном у неба», — кажа кс. Паоло Анджэліна.
