30 мая Папа Францішак узначаліў малітву Ружанца ў Люрдскім гроце ў садах Ватыкана, просячы разам з вернікамі ва ўсім свеце заступніцтва Маці Божай у выбаўленні ад каранавірусу.
Люрдскі грот у Ватыканскіх садах прысвечаны Маці Божай з Люрда — вядомага санктуарыя ў Францыі, дзе адбываюцца шматлікія цуды аздараўлення.
Як паведаміла агенцтва навінаў Еuronews, разам са Святым Айцом перад фігурай Маці Божай Люрдскай у Ватыкане маліліся людзі, якіх так ці інакш закранула пандэмія каранавірусу: лекар, медсястра, законніца, шпітальны капелан, фармацэўт, журналіст, валанцёр, які працуе з тымі, хто заразіўся, пацыент, які вылечыўся ад COVID, жанчына, якая страціла блізкага чалавека, і пара, у якой падчас пандэміі нарадзілася дзіця.
Гэта стала сімвалам надзеі на выбаўленне ад пандэміі і канчатковай перамогі жыцця над смерцю.
Ружанцовае набажэнства на чале з Папам Францішкам з дапамогаю тэлемаста звязала калі пяцідзесяці марыйных санктуарыяў ва ўсім свеце.
