19 ліпеня папа Францішак узначаліў Звычайны кансісторый па кананізацыйных справах, на якім было абвешчана, што кананізацыя сямі благаслаўлёных пройдзе ў Ватыкане 14 кастрычніка 2018 г.
Святымі будуць абвешчаны папа Павел VI; арцыбіскуп Сан-Сальвадора Оскар Арнульфо Рамэра-і-Гальдамес; кс. Франчэско Спінэллі, дыяцэзіяльны святар, заснавальнік законніцкага інстытута Сясцёр адаратарак Найсвяцейшага Сакрамэнту; дыяцэзіяльны святар кс. Вінчэнцо Рамана; Марыя Катарына Каспер, заснавальніца законніцкага інстытута Бедных служак Езуса Хрыста; Назарыя Ігнасія ад святой Тэрэзы ад Езуса, заснавальніца кангрэгацыі Сясцёр місіянерак Cruzadas de la Iglesia, а таксама малады рабочы Нунцыё Сульпрыцыё.
Гэты італьянскі юнак памёр у 19-гадовым узросце ад рака касцей, які быў выкліканы нялюдскімі ўмовамі працы ў кузні, дзе яго бязлітасна эксплуатаваў ягоны дзядзька.
Нунцыё Сульпрыцыё дасягнуў святасці, з непарушнай верай зносячы страшэнныя цярпенні.
Яго вера — прыклад для сучаснай моладзі, а менавіта ёй будзе прысвечаны Сінод Біскупаў, падчас якога адбудзецца кананізацыя маладога італьянскага рабочага.
Раней Папа даручыў Кангрэгацыі па справах Кананізацыі публікацыю дэкрэтаў аб мучаніцтве і сапраўднасці цудаў, здзейсненых праз заступніцтва гэтых благаслаўлёных.
