Наступная Міжнародная пілігрымка міністрантаў у Рым пройдзе з 31 ліпеня па 4 жніўня 2028 года і збярэ дзясяткі тысяч юных вернікаў з Еўропы і ўсяго свету.
Афіцыйная дата гэтага маштабнага форуму была абвешчаная прадстаўнікамі Міжнароднага саюза міністрантаў (CIM) пасля аўдыенцыі ў Папы Льва XIV.
Гэтая сустрэча, якая праходзіць кожныя чатыры-пяць гадоў, з’яўляецца адной з самых яркіх падзей у жыцці Касцёла, асабліва для дзяцей і моладзі, якія прыслугоўваюць каля алтара. Чакаецца, што праз два гады ў Вечны горад з’едуцца шматлікія групы з розных краін, у першую чаргу еўрапейскіх.
Для юных вернікаў гэта не проста падарожжа, а магчымасць адчуць сябе часткай сусветнай супольнасці.
Удзел у жыцці сваіх парафій праз міністранцкае служэнне робіць іх актыўнымі творцамі касцёльнага жыцця, а сумесная малітва ў Рыме ўмацоўвае веру і спрыяе міжнароднаму знаёмству.
Апошні раз такая пілігрымка адбылася ў 2024 годзе. Тады ў ёй прынялі ўдзел каля 50 тысяч маладых людзей з 20 краін. Кульмінацыяй той сустрэчы стала вечаровае малітоўнае чуванне з Папам Францішкам на Плошчы Святога Пятра, якое пакінула глыбокі след у сэрцах удзельнікаў.
Старшыня Саюза міністрантаў (CIM), нямецкі біскуп Клаўс Крэмер, апісаў сустрэчу з Папам Львом XIV як «кранальны момант». Паводле яго слоў, Святы Айцец з вялікай увагай паставіўся да пытанняў душпастырства моладзі, падкрэсліўшы важную ролю міністрантаў у сучасным Касцёле.
«Мы адчулі, што маладыя людзі займаюць асаблівае месца ў сэрцы Папы»,
— адзначыў біскуп Крэмер.
Гэтая сустрэча надала новы імпульс міжнароднаму супрацоўніцтву ў галіне душпастырства міністрантаў, пацвердзіўшы, што служэнне каля алтара застаецца жывым і дынамічным шляхам веры для будучых пакаленняў.
