14 сакавіка ў Прэс-службе Святога Пасаду прайшоў брыфінг, на якім былі прадстаўлены два дакументы, якія дапамогуць Касцёлу падрыхтавацца да другой сесіі Генеральнай Асамблеі Сіноду ў кастрычніку.
Як адзначае Англійская рэдакцыя парталу Vatican News, Сінод — гэта не «касцёльная палітыка» або вынясенне на абмеркаванне спрэчных пытанняў, такіх як святарскі цэлібат або благаслаўленне для гомасексуальных пар у святле дактрынальнага дакумента Fiducia supplicans. Яго заданне ў тым, каб служыць сінадальнаму працэсу, ініцыяванаму з мэтай накіроўваць народ Божы і адказваць на яго просьбы, клопаты і патрэбы.
Кардынал Жан-Клод Ольрыш, Генеральны рэлятар (дакладчык) Сіноду, удакладніў гэта на прэс-канферэнцыі ў прэс-службе Святога Пасаду ў чацвер. Ён паўтарыў намеры распачатага ў 2021 годзе «знізу» шляху, які працягваецца і завершыцца другой сесіяй 16-й Звычайнай Генеральнай Асамблеі Сіноду, якая адбудзецца ў Ватыкане з 2 па 27 кастрычніка.
Да яго далучыўся кардынал Марыё Грэк, Генеральны сакратар Сіноду Біскупаў, каб прадставіць два дакументы: адзін пад назвай «Як быць сінадальным Касцёлам у місіі? Пяць пунктаў гледжання для тэалагічнага паглыблення ў сувязі з Другой сесіяй», а другі — «Даследчыя групы па пытаннях, якія ўзнікаюць на першай сесіі 16-й Звычайнай Генеральнай Асамблеі Сіноду Біскупаў, каб паглыбіць супрацоўніцтва з дыкастэрыямі Рымскай курыі».
Абодва дакументы ўяўляюць сабой бачныя «плёны» Сіноду, падкрэсліў кардынал Грэк.
Тэмы прадстаўленыя народам Божым
Засяродзіўшы ўвагу на гэтых тэмах, кардынал Ольрыш удакладніў, што іх выбар і падзел з’яўляюцца непасрэдным вынікам таго, што выявілася ў выніковым дакладзе першай сесіі, і, у сваю чаргу, вынікам дыскусій паміж удзельнікамі асамблеі, якія самі з’яўляюцца вынікам удзелу мясцовых Касцёлаў з пяці кантынентаў.
Вось што імкнецца адлюстраваць праца дзесяці груп: гэта штосьці, што ідзе наперад і што «не скончыцца разам з Сінодам па сінадальнасці», як падкрэсліў тэолаг монсіньёр П’еро Кода, генеральны сакратар Міжнароднай тэалагічнай камісіі: «Безумоўна, у самім працягу асамблеі будуць важныя наступствы».
«Мы з’яўляемся слугамі сінадальнага працэсу», — падкрэсліў кардынал Ольрыш. Гэта не азначае, што «мы займаемся ўсімі пытаннямі, якія ўзнікаюць у дыскусіях на Сінодзе, але толькі тымі, якія прадстаўляе народ Божы.
Мы не займаемся касцёльнай палітыкай; мы з’яўляемся слугамі гэтага сінадальнага працэсу. Я ніколі не вызначаў яго змест: гэта змест, прапанаваны народам Божым», — заўважыў галоўны дакладчык Сіноду.
Святарскі цэлібат ніколі не стаяў на парадку дня
Кардынал Грэк сказаў, што пытанне жанатых святароў ніколі не стаяла на парадку дня і не будзе абмяркоўвацца ў працоўнай групе, якая займаецца адносінамі з Усходнімі Касцёламі, дзе ёсць жанатыя святары. Таксама, дадаў ён, благаслаўленне гомасексуальных пар, як гэта прапануецца ў дакуменце Fiducia supplicans Дыкастэрыі Веравучэння, не будзе прадметам абмеркавання.
І так адбываецца не таму, што гэта нецікавыя тэмы, а наадварот: «Fiducia supplicans — гэта важны дакумент; я лічу яго вельмі прыгожым, таму што гэта азначае, што Бог любіць усіх, нават тых, хто знаходзіцца ў нерэгулярных сітуацыях», — падкрэсліў кардынал Ольрыш. Аднак гэта «пастырскі дакумент, а не дактрынальны. Гэта ініцыятыва, якая дапамагае мне ў маім душпастырскім кантэксце, але яна ўжо разглядалася Дыкастэрыяй Веравучэння з аўтарытэтам Папы, і таму гэта не тое пытанне, якое трэба пераглядаць на Сінодзе».
Пытанне дыяканату жанчын
Тым не менш, іншыя пытанні, якія ўзніклі падчас сінадальнага сходу ў кастрычніку 2023 года, будуць займаць цэнтральнае месца ў працы даследчых груп, якім даручана даследаваць тэалагічныя і кананічныя пытанні ў дачыненні да канкрэтных форм служэння, у тым ліку пасвячэння жанчын у дыяканы.
«Гаворка ідзе аб узгадненні гэтага патрабавання ў даследаванні, з улікам высноваў дзвюх камісій, створаных Папам Францішкам», — удакладніў монсіньёр Кода. Праца працягваецца, як і тэма адбору кандыдатаў у біскупы (таксама тэма, якую вывучае іншая даследчая група). «Гэта адкрыты стол, дзе слуханне з’яўляецца фундаментальным вымярэннем», — дадаў тэолаг.
Сустрэча пробашчаў з усяго свету ў Ватыкане
Кардынал Грэк падкрэсліў важнасць слухання як аднаго з найбольш відавочных вынікаў сінадальнага падарожжа.
«Плады, якія мы ўжо бачым, пацвярджаюць, што Святы Дух прысутнічае і дзейнічае ў сучасным Касцёле»,— сказаў ён, маючы на ўвазе шматлікія ініцыятывы, якія вынікаюць з вопыту Сіноду.
Ён асабліва адзначыў міжнародную сустрэчу пробашчаў, якая адбудзецца ў Ватыкане з 29 красавіка па 2 мая і завершыцца дыялогам у прысутнасці Папы. Кардынал Грэк сказаў, што мерапрыемства скіравана на тое, каб выслухаць і ацаніць «досвед, які пробашчы перажываюць у сваіх мясцовых Касцёлах», таму што «толькі тыя, хто адчувае сінадальнасць, лепш разумеюць, якія яе плёны».
Першы плён — слуханне
Мерапрыемства з удзелам пробашчаў, як і многія іншыя сустрэчы па ўсім свеце, арганізаваныя ў гэтыя месяцы дыяцэзіямі або канферэнцыямі біскупаў, у якіх бяруць удзел кіраўнікі Генеральнага сакратарыяту Сіноду, на думку кардынала Грэка, падтрымліваюць «жывую» сінадальную дынаміку ў мясцовых Касцёлах, «каб усё большая колькасць людзей магла мець непасрэдны досвед».
Так, сястра Наталі Бэкар, падсакратар Сіноду, толькі што вярнулася з Токіа, а другі падсакратар біскуп Луіс-Марын дэ Сан-Марцін цяпер знаходзіцца ў Чылі.
Рух, які вызваляе, але не ўраўноўвае
Гэта вопыт, з якога «няма дарогі назад», — сказала сястра Сымона Брамбіла, сакратар Дыкастэрыі Інстытутаў кансэкраванага жыцця.
«Мы рухаемся наперад і паглыбляемся, уцягнутыя і захопленыя спіральным рухам, які з сілай і лагоднасцю вядзе нас да сутнасці таго, чым мы з’яўляемся як хрысціяне: браты і сёстры ў Хрысце, аблегчаныя, раззброеныя і вызваленыя ад розных даспехаў і шатаў, якія мы можам насіць на сабе», — сказала яна.
Сінод, дадала сястра, з’яўляецца «рухам, які перамяняе, вызваляе, аб’ядноўвае і гарманізуе, ніколі не спрашчаючы, не ўраўноўваючы і не робячы аднастайным».
Як адзначыў арцыбіскуп Філіпо Янонэ, Прэфект Дыкастэрыі па заканадаўчых тэкстах, Сінод мае «адзіную місію» — «абвяшчаць Хрыста свету».
