29 лістапада, напярэдадні свята святога апостала Андрэя, нябеснага заступніка і абаронцы Канстанцінопальскай Царквы, Папа Францішак звярнуўся да яе кіраўніка — Патрыярха Барталамея.
Пра гэта паведамляе Беларуская рэдакцыя парталу Vatican News.
«Мы горача молімся, каб спынілася бразганне зброяй, якое прыносіць толькі смерць і разбурэнне, і каб дзяржаўныя і рэлігійныя лідары шукалі шлях дыялогу і прымірэння», — напісаў Папа Францішак у пасланні да Патрыярха Канстанцінопальскага.
«Рухомы сардэчнымі пачуццямі братэрскай любові і памятаючы аб глыбокіх сувязях веры, надзеі і любові, якія аб’ядноўваюць Цэрквы-сёстры Рыма і Канстанцінопаля, шлю табе, дарагі Браце ў Хрысце, сардэчныя пажаданні»,
— сказана ў пасланні Пантыфіка.
Святы Айцец згадаў пра сустрэчу ў Ерузалеме Папы Паўла VI і Патрыярха Атэнагора ў студзені 1964 года, якая «стала фундаментальным крокам наперад у разбурэнні бар’ера непаразумення, недаверу і нават варожасці, які існаваў на працягу амаль тысячагоддзя».
На думку Папы, «усе сапраўдныя шляхі да аднаўлення поўнай камуніі паміж вучнямі Хрыста характарызуюцца асабістым кантактам і разам праведзеным часам», «супольнай малітвай і сумеснай дзейнасцю ў служэнні чалавецтву, асабліва тым, хто пацярпеў ад беднасці, насілля і эксплуатацыі».
«Няхай святыя апосталы Пётр і Андрэй заступаюцца за ўсе народы і выпрошваюць для іх дары братэрскай еднасці і міру», — завяршыў сваё пасланне Папа Францішак.
