Святы Айцец прыняў ганаровае званне Папскага субрата Капітула святога Георгія пры Капліцы святога Георгія ў Віндзарскім замку. Тытул быў нададзены яму каралём Карлам III, дэканам і канонікамі Віндзара пры падтрымцы арцыбіскупа Кэнтэрберыйскага ў знак духоўнай еднасці, экуменічнага сяброўства і хрысціянскага братэрства.
Як паведаміў афіцыйны сайт брытанскай каралеўскай сям’і, ганаровае званне было нададзена Папу 23 кастрычніка — роўна праз год пасля дзяржаўнага візіту караля Карла III і каралевы Камілы ў Ватыкан. Падчас гэтага візіту каралеўская пара наведала Базыліку святога Пятра і Базыліку святога Паўла за мурамі.
Падчас наведвання апошняй, з дазволу Папы, арцыпрэзбітэр Базылікі і абат святога Паўла прынялі караля Карла III як Каралеўскага субрата абацтва. Да сярэдзіны XVI стагоддзя англійскія каралі мелі гістарычную сувязь з Базылікай святога Паўла за мурамі. У адказ на гэты жэст дэкан і канонікі Віндзара пры падтрымцы арцыбіскупа Кэнтэрберыйскага запрасілі Льва XIV стаць Папскім субратам Капітула і Капліцы святога Георгія. Папа прыняў запрашэнне.
У заяве брытанскага каралеўскага дома адзначаецца, што гэтыя ўзаемныя жэсты з’яўляюцца «адчувальным выразам духоўнай еднасці і агульнай адданасці справе хрысціянскага адзінства».
Яны таксама сведчаць пра шматвяковыя сувязі паміж Капітулам і Капліцай святога Георгія ў Віндзары і Апостальскай Сталіцай, а таксама пра развіццё адносінаў паміж Каталіцкім Касцёлам, Англіканскім Касцёлам і Англіканскай супольнасцю.
Асаблівае значэнне гэты жэст мае і ў кантэксце экуменічнага служэння Льва XIV. Яшчэ ў першыя месяцы свайго пантыфікату Папа сярод прыярытэтаў сваёй дзейнасці назваў аднаўленне поўнай і бачнай еднасці паміж хрысціянамі праз малітву, дыялог, узаемнае слуханне і супольнае сведчанне Евангелля.
Пасля Рэфармацыі XVI стагоддзя адносіны паміж Рымам і Англіканскім Касцёлам былі адзначаны глыбокім падзелам. Сёння ж Брытанскі каралеўскі дом называе першым за паўтысячагоддзя выпадкам, калі Папа і брытанскі манарх атрымліваюць адзін ад аднаго рэлігійныя тытулы, якія падкрэсліваюць тое, што аб’ядноўвае, а не тое, што падзяляе.
Тытул Папскага субрата мае ганаровы характар. Яго значэнне — у выразе ўзаемнай павагі, даверу і гатоўнасці працягваць экуменічны шлях.
У памяць пра ўзаемныя жэсты ў Рыме і Віндзары былі створаны спецыяльныя крэслы. Крэсла, падоранае каралю Карлу III, ужо знаходзіцца побач з манаскімі хорамі ў Базыліцы святога Паўла за мурамі. Адпаведнае крэсла для Папы будзе ўстаноўлена ў Капліцы святога Георгія, Віндзар, Англія.
