Тэкст трэцяй энцыклікі Папы Францішка будзе апублікаваны 4 кастрычніка, ва ўспамін святога Францішка Асізскага.
Пра гэта са спасылкай на прэс-службу Святога Пасаду паведаміла Каталіцкае інфармацыйнае агенцтва КАІ.
Назва энцыклікі гучыць Fratelli tutti («Усе браты»), і хоць у некаторых краінах вяліся дыскусіі наконт яе гучання, а таксама адносна таго, як пры перакладзе перадаць яе інтэгральны сэнс, аднак варта памятаць, што энцыкліка сама па сабе нясе ўніверсальнае пасланне і скіравана да сэрца кожнага чалавека, як падкрэсліў праграмны дырэктар ватыканскіх СМІ Андрэа Тарньелі.
Ён заўважыў, што назва энцыклікі «Усе браты» ўзята з «Напамінаў» святога Францішка Асізскага (6, 1), а падзагаловак тлумачыць, што яна прысвечана братэрству і грамадскаму сяброўству.
Як ужо паведамлялася, Пантыфік падпіша дакумент 3 кастрычніка ў святыні ў Асізі, дзе спачываюць рэліквіі святога Францішка, з твораў якога ўзяты incipit — пачатковыя словы энцыклікі, па якіх яна называецца.
«Той факт, што Святы Айцец не змяніў гэтых словаў, тым не менш не азначае, што назва ў сваёй фармулёўцы мае намер выключыць з адрасатаў больш за палову людзей, а менавіта жанчын», — адзначыў праграмны дырэктар ватыканскіх СМІ. Ён патлумачыў, што для Папы вельмі важнай тэмай з’яўляецца братэрства і сацыяльнае сяброўства, і таму ён мае намер звярнуцца да ўсіх сясцёр і братоў, да ўсіх мужчын і жанчын добрай волі, якія жывуць на зямлі, нікога не выключаючы.
«Мы жывем у часы, пазначаныя вайной, беднасцю, міграцыяй, кліматычнымі зменамі, эканамічным крызісам, пандэміяй: прызнанне адзін аднаго братамі і сёстрамі, распазнаванне ў тым, каго мы сустракаем, брата і сястры, а для хрысціянаў — распазнаванне ў іншым чалавеку, які церпіць, аблічча Езуса, дае магчымасць пацвердзіць элементарную годнасць кожнай чалавечай істоты, створанай паводле Божага вобразу.
Гэта разам з тым магчымасць нагадаць самім сабе, што з цяперашніх цяжкасцяў мы ніколі не зможам выбрацца самі, адзін супраць другога, Поўнач супраць Поўдня, багатыя супраць бедных, ці падзеленыя паводле іншай выключнай асаблівасці», — сцвярджае журналіст.
Андрэа Тарньелі нагадвае, што братэрства і грамадскае сяброўства — тэмы, названыя ў падзагалоўку, — паказваюць на тое, што яднае мужчын і жанчын, а менавіта пачуццё, якое з’яўляецца паміж асобамі, не злучанымі повязямі крыві, і выяўляецца ва ўчынках добразычлівасці, розных формах дапамогі і велікадушным дзеянні ў хвіліну патрэбы. Бескарыслівае пачуццё да іншых людзей, незалежна ад усіх розніц і прыналежнасцяў.
«З гэтага пункту гледжання не можа быць ніякіх непаразуменняў, ані абмежаванага разумення ўніверсальнага і скіраванага да кожнага чалавека паслання словаў „Усе браты“», — кажа праграмны дырэктар ватыканскіх СМІ.
