3 кастрычніка Святы Айцец здзейсніць візіт у Асізі, дзе падпіша новую энцыкліку аб братэрстве і грамадскім сяброўстве пад назвай Fratelli tutti («Усе браты»).
Як паведамляе беларуская рэдакцыя парталу Vatican News са спасылкай на прэс-службу Святога Пасаду, перад падпісаннем дакумента Пантыфік узначаліць цэлебрацыю Імшы ля магілы святога Францішка Асізскага.
Падкрэсліваецца, што ў сувязі з надзвычайнай эпідэміялагічнай сітуацыяй візіт пройдзе ў прыватнай форме.
Падчас літургічнай цэлебрацыі не прадугледжана прысутнасць вернікаў. Пасля яе завяршэння Папа вернецца ў Ватыкан.
Дакумент стане трэцяй энцыклікай Папы Францішка пасля Lumen fidei («Святло веры», 2013) і Laudato si’, прысвечанай клопату пра супольны дом (2015). Акрамя трох энцыклік, Пантыфік выдаў пяць Апостальскіх адгартацый: Evangelii gaudium («Радасць Евангелля», 2013), Amoris laetitia («Радасць любові», 2016), Gaudete et exsultate («Радуйцеся і весяліцеся», 2018), Christus vivit («Хрыстус жыве», 2019) і Querida Amazonia («Умілаваная Амазонія», 2020).
