Дзесяць дзён у дарозе, чатыры вялікія папскія базылікі, малітва на плошчы святога Пятра і нечаканая радасць спаткання са сваім пастырам — такімі ўспамінамі вярнуліся з Італіі ўдзельнікі пілігрымкі «Вечны горад і святыя Італіі».
З 9 па 20 кастрычніка дзве аўтобусныя групы беларускіх вернікаў здзейснілі падарожжа «Вечны горад і святыя Італіі». Арганізатарам выступіла пілігрымкавая група Viam Dei («Божым шляхам»), а духоўна ўдзельнікаў суправаджалі ксёндз Юрый Санько, ксёндз Вячаслаў Дубавец, ксёндз Юрый Дрозд, сястра Яніна і сястра Лілія.
Падарожжа пачалося з наведвання санктуарыя Яснай Гары ў Чэнстахове, дзе пілігрымы ўдзельнічалі ў ранішняй святой Імшы і прысутнічалі пры адкрыцці цудатворнага абраза Маці Божай. Далей іх шлях пралягаў праз Чэхію і Вену, дзе вернікі маліліся ў касцёле капуцынаў. Італія адкрылася для беларускіх вернікаў з Падуі — «Горада фрэсак», дзе яны пабачылі святыні, звязаныя са святымі Антоніем і Юстынай, а затым з Фларэнцыі, «Калыскі Адраджэння», дзе сабраліся на Эўхарыстыю ў касцёле Санта-Марыя-Маджорэ.
Галоўнымі момантамі пілігрымкі сталі ўдзел 14 кастрычніка ў Імшы на плошчы святога Пятра ў Ватыкане і спатканне з Мітрапалітам Мінска-Магілёўскім арцыбіскупам Юзафам Станеўскім, які ў тыя дні знаходзіўся ў Апостальскай Сталіцы. Іерарх сардэчна прывітаў беларускіх пілігрымаў і ўдзяліў ім благаслаўленне.
Арцыпастыр ахвотна пагадзіўся зрабіць з вернікамі супольнае селфі — і гэты просты жэст яшчэ больш наблізіў пастыра да сваіх людзей.
Як адзначылі ўдзельнікі, гэтае спатканне стала для іх бачным знакам еднасці з Касцёлам на Радзіме і асаблівым знакам Божай ласкі.
Па словах удзельнікаў, асаблівае ўражанне пакінула супольная малітва на плошчы святога Пятра падчас традыцыйнай святой Імшы — адной з тых, якія праводзяцца па серадах кожны тыдзень для вернікаў з усяго свету: «Тут мы адчулі сябе часцінкай вялікай сям'і Касцёла, дзе няма меж і няма „сваіх“ і „чужых“». Эўхарыстыя 14 кастрычніка завяршала цыкл мерапрыемстваў з нагоды дзесяцігоддзя апостальскай адгартацыі Amoris laetitia, прысвечанай любові ў сям'і. Папа Леў XIV у гэты час знаходзіўся ў шпіталі, таму літургію ўзначаліў кардынал Луіс Антоніа Тагле.
Акрамя таго, вернікі наведалі ўсе чатыры Вялікія папскія базылікі Рыма, падняліся па Святой Лесвіцы, пабывалі ў Асізі і Балонні, а завяршылі падарожжа святой Імшой у Вавельскай катэдры ў Кракаве.
Многія адзначалі, што пілігрымка стала для іх не проста знаёмствам са святынямі, а глыбокім духоўным досведам — школай супольнасці, цярплівасці і ўвагі адзін да аднаго.
«Пілігрымка — гэта не пра турызм, а пра іспыт, калі важна трываць не пра камфорт цела, а пра тое, што ў сэрцы», — падзяліліся вернікі.
Падрабязнасці пілігрымкі чытайце на catholicminsk.by.
