12 снежня новапрэзбітэры кс. Раман Вайцяховіч, кс. Эрнэст Мікалайчык і кс. Андрэй Каўшук у капліцы Гродзенскай вышэйшай духоўнай семінарыі цэлебравалі прыміцыйную св. Імшу і ўдзялілі прыміцыйнае благаслаўленне семінарыстам і фарматарам.
Першая Эўхарыстыя, цэлебраваная ў капліцы alma mater выпускнікамі, — гэта заўсёды свята для семінарыйнай супольнасці, якая сёлета стала міждыяцэзіяльнай. Пры гэтым рэктар семінарыі кс. Віталь Вайцяхоўскі адзначыў:
«Прыміцыйная Імша ў семінарыйнай капліцы — лагічнае завяршэнне фармацыі».
Узначаліў цэлебрацыю Эўхарыстыі, удзельнікі якой мелі магчымасць атрымаць поўны адпуст, кс. Раман Вайцяховіч, а Божае слова прамовіў кс. Эрнэст Мікалайчык. Напрыканцы св. Імшы маладыя святары ўдзялілі прыміцыйнае благаслаўленне святарам і семінарыстам.
