9 чэрвеня дыякан Андрэй Каўшук прыняў прэзбітэрскае пасвячэнне з рук біскупа Гродзенскага Аляксандра Кашкевіча.
Урачыстасць прайшла ў катэдральным касцёле св. Францішка Ксаверыя.
«Святарства — гэта новы этап, які цалкам зменіць сэнс майго жыцця. У пэўным значэнні гэта сапраўдны духоўны пераварот, — сказаў напярэдадні пасвячэння дк. Андрэй.
Час, праведзены ў семінарыі, быў часам сталення і ўмацавання ў веры. Стала менш эмацыйнасці, я перастаў глядзець на рэчаіснасць праз ружовыя акуляры і больш рэальна ацэньваю сітуацыю. Якой я бачу сваю місію як святара? Быць разам з людзьмі, быць паслухмяным Касцёлу — несці служэнне там, куды мяне накіруе біскуп».
Новапрэзбітэр нарадзіўся 16 лютага 1986 года і паходзіць з парафіі Найсвяцейшай Тройцы і св. Францішка Асізскага ў Свіслачы. Фармацыю да святарства ён праходзіў у Вышэйшай духоўнай семінарыі ў Гродне, якую скончыў у 2018 г.
