21 верасня ў мінскай архікатэдры прайшла першая пасля летняга перапынку пастырская сустрэча з удзелам святароў і кансэкраваных асобаў Мінска-Магілёўскай архідыяцэзіі.
Гэты дзень душпастыры, законнікі і законніцы па традыцыі правялі на супольнай малітве, а таксама сустрэліся з іерархамі архідыяцэзіі.
Падчас аб’яў арцыбіскуп Тадэвуш Кандрусевіч падзякаваў прысутным за пастырскую працу ў парафіях летам, за арганізацыю для дзяцей канікулаў з Богам і парафіяды, музычнай майстэрні і Малітоўнай сустрэчы моладзі ў Івянцы.
З нагоды распачацця новага навучальнага і катэхетычнага года арцыпастыр заклікаў святароў выкарыстоўваць дапамогу свецкіх катэхетаў, якіх рыхтуе Мінскі тэалагічны каледж і многія з якіх ужо плённа вядуць заняткі па рэлігіі пры парафіях. «Прыйшоў час адмовіцца ад стэрэатыпу, што катэхізатарамі могуць быць толькі духоўныя асобы», — дадаў Мітрапаліт Кандрусевіч.
Арцыпастыр таксама звярнуў увагу на патрабаванні Кананічнага права адносна запаўнення нарачонымі адпаведнага пратаколу перад заключэннем сакрамэнту сужэнства. «Гэта не фармальнасць, а юрыдычны дакумент, наяўнасці якога патрабуе Касцёл», — падкрэсліў іерарх.
Іншыя аб’явы:
- 23–24 верасня — ІІ пешая пілігрымка Магілёў-Бялынічы
- 24 верасня — заканчэнне «Магілёўскіх чытанняў Бібліі»
- 15 кастрычніка — завяршэнне ў архідыяцэзіі перэгрынацыі фігуры Маці Божай Фацімскай
- 16 кастрычніка — пілігрымка для законных сясцёр архідыяцэзіі ў санктуарый Маці Божай Барунскай
- 21 кастрычніка — Ружанцовы кангрэс у Магілёве
- 28 кастрычніка — св. Імша з нагоды імянінаў арцыбіскупа Кандрусевіча ў мінскай архікатэдры (18.30)
Наступная сустрэча для душпастыраў Мінскай вобласці пройдзе 26 кастрычніка ў Свіры, для магілёўскага рэгіёну — 25 кастрычніка ў Горках, парафія Маці Божай Бялыніцкай, у 11.00.
