У ноч з 31 снежня на 1 студзеня 2025 года, ва ўрачыстасць Святой Багародзіцы Марыі, у Нацыянальным санктуарыі Маці Божай Будслаўскай адбудзецца ўрачысты абрад адкрыцця юбілейнай святыні 2025 года.
З гэтай нагоды Мітрапаліт Мінска-Магілёўскі арцыбіскуп Юзаф Станеўскі кіруе адмысловае паведамленне духавенству і вернікам.
Любыя сёстры і браты!
У сувязі з абвяшчэннем Юбілею Святога 2025 года з 24 снежня 2024 года па 6 студзеня 2026 года, згодна з рэкамендацыямі Папы Францішка, прадстаўленымі ў буле Spes non confundit («Надзея не расчаруе») ад 9 мая 2024 года, дэкрэтам ад 10 снежня 2024 года № 85/Д/24 юбілейнай святыняй Юбілею Святога 2025 года была прызначана базыліка Унебаўзяцця Найсвяцейшай Панны Марыі ў Будславе — Нацыянальны санктуарый Маці Божай Будслаўскай. На працягу Юбілею 2025 Святога года вернікі, якія наведаюць юбілейную святыню, могуць атрымаць поўны адпуст.
Урачысты абрад і цэлебрацыю святой Імшы ў касцёле, прызначаным юбілейнай святыняй, узначаліць Мітрапаліт Мінска-Магілёўскі арцыбіскуп Юзаф Станеўскі.
- Пачатак святой Імшы 31 снежня ў 22.30.
- У 23.30 адбудзецца абрад адкрыцця юбілейнай святыні, а таксама набажэнства падзякі і перапрашэння на заканчэнне 2024 года.
- Апоўначы адбудзецца благаслаўленне Найсвяцейшым Сакрамэнтам на пачатак Новага, 2025 Юбілейнага года.
- Анлайн-трансляцыя з Нацыянальнага санктуарыя ў Будславе даступная ТУТ>>>
Сардэчна запрашаю ўсіх на ўрачыстасць. Будзем разам у гэты дзень як «Пілігрымы надзеі». Дазволім Богу дзейнічаць у нашым жыцці, а праз нас — у жыцці нашых сясцёр і братоў, бо пакуль полымя любові Хрыстовай гарыць у нашых сэрцах, тым, хто крочаць побач з намі, холад нявер’я не можа пагражаць.
Браты і сёстры! Няхай гэты асаблівы год ласкі ўмацуе нас у крочанні за Хрыстом, які з’яўляецца Нязгасным Светачам свету, як было заўсёды, цяпер і будзе на векі вечныя.
Запрашаю ўсіх да малітвы падзякі за 2024 год і сустрэчы Новага, 2025 года Пана ў Нацыянальным санктуарыі нашай Каралевы.
✠ Арцыбіскуп Юзаф Станеўскі
Мітрапаліт Мінска-Магілёўскі
Кс. кан. Дзмітрый Пухальскі
Канцлер курыі
