Святы Юбілейны год доўжыцца ў Каталіцкім Касцёле з 24 снежня 2024 года да 6 студзеня 2026 года ўключна пад дэвізам «Пілігрымы надзеі». У вернікаў ёсць яшчэ крыху больш за 50 дзён, каб са скарбніцы Касцёла атрымаць адпусты, звязаныя з наведваннем юбілейных святыняў і выкананнем пэўных умоў.
9 мая 2024 года ва ўрачыстасць Унебаўшэсця Пана была абнародаваная була Папы Францішка Spes non confundit «Надзея не расчаруе», у якой было абвешчана пра Юбілей Святога 2025 года.
Паводле гэтага дакумента, усе тыя, хто ў Святым годзе прыступяць да сакрамэнтальнай споведзі, прымуць святую Камунію, выключаць прывязанасць да любога граху і будуць маліцца ў інтэнцыях Святога Айца, могуць атрымаць поўны адпуст (поўнае дараванне перад Богам часовага пакарання за грахі):
- калі здзейсняць пабожную пілігрымку — індывідуальна або ў групе — у юбілейную святыню, будуць удзельнічаць у святой Імшы, прымаючы святую Камунію, або ў набажэнстве Божага слова, Літургіі гадзінаў ці ў іншых набажэнствах, карыстаючыся сакрамэнтам пакаяння,
- або правядуць адпаведны час у Эўхарыстычнай адарацыі і разважанні, завяршаючы яго малітвай «Ойча наш», вызнаннем веры ў любой зацверджанай форме і малітвай да Маці Божай.
Акрамя таго, нягледзячы на прынцып Касцёла, што на працягу аднаго дня можна атрымаць толькі адзін поўны адпуст, вернікі ў Юбілейным годзе атрымліваюць акт міласэрнасці дзеля чыстцовых душаў і, калі ў той самы дзень яшчэ раз прыступяць да святой Камуніі, могуць атрымаць яшчэ адзін адпуст з магчымасцю ахвяраваць яго толькі за памерлых.
Па наступных спасылках можна знайсці:
- Юбілейныя святыні Мінска-Магілёўскай архідыяцэзіі;
- Юбілейныя святыні Віцебскай дыяцэзіі;
- Юбілейныя святыні Гродзенскай дыяцэзіі;
- Юбілейныя святыні Пінскай дыяцэзіі.
Ёсць таксама адмысловыя малітвы на Юбілейны год, у тым ліку малітвы падчас пілігрымкі ў юбілейную святыню.
Каб ніхто не застаўся пазбаўленым юбілейнай ласкі, варта выкарыстаць духоўныя магчымасці Святога Юбілейнага года, які звычайна абвяшчаецца Рымскімі Пантыфікамі раз на чвэрць стагоддзя.
